Marcos 16
16
Ang Pagkabanhaw
(Mat. 28:1-8; Luc. 24:1-12; Juan 20:1-10)
1Sa tapos ang Adlaw nga Inugpahuway, sanday Maria Magdalena, Salome kag Maria nga iloy ni Santiago, nagbakal sing mga pahamot, kay makadto sila sa lulobngan sa paghaplas sang bangkay ni Jesus. 2Aga pa sang Domingo, sang nagabutlak pa lang ang adlaw, nagkadto sila sa lulobngan. 3-4Sa dalanon nagapamangkutanay sila, “Sin-o bala ang magapaligid sang bato para sa aton sa pagbukas sang lulobngan?” Kay daku gid kaayo yadto nga bato. Sang pagtan-aw nila, ila nasapwan nga ang bato napaligid na. 5Gani nagsulod sila sa lulobngan sa diin nakita nila ang isa ka pamatan-on nga lalaki, nga nagapungko sa tuo nayon nga nagasuksok sing malaba kag maputi nga bayu. Hinadlukan gid sila.
6Nagsiling sia sa ila, “Indi kamo magkahadlok! Nakahibalo ako nga ginapangita ninyo si Jesus nga taga-Nazaret nga ginlansang sa krus. Wala sia diri! Nabanhaw sia! Tan-awa bala ninyo, yari ang lugar nga ginpahamyangan nila sang iya bangkay. 7Karon#Mat. 26:32; Mar. 14:28. lakat kamo kag isugid ninyo ini nga balita sa iya mga gintuton-an labi na gid kay Pedro: ‘Magauna sia sa inyo sa Galilea. Didto makita ninyo sia suno gid sa ginsiling niya sa inyo.’”
8Gani naggwa ang mga babayi sa lulobngan kag nagpalagyo, kay nagakulurog sila sa kahadlok. Kag wala gid sila maghambal bisan kay sin-o, tungod kay hinadlukan sila.
ISA KA DAAN NGA PAGTAPOS SANG MAAYONG BALITA#Ang iban nga mga manuskrito kag dumaan nga mga pagbadbad wala nagalakip sang hingapusan sini nga libro (mga bersikulo 9-20).
Si Jesus Nagpakita kay Maria Magdalena
(Mat. 28:9-10; Juan 20:11-18)
[9Aga pa gid sang nahauna nga adlaw sang simana, sang pagkabanhaw ni Jesus, nagpakita sia sing una kay Maria Magdalena nga gikan sa iya anay gintabog niya ang pito ka demonyo. 10Naglakat si Maria Magdalena kag nagpanugid sang nahanabo sa mga kaupdanan anay ni Jesus. Nagapangalisod sila kag nagahinibi, 11kag sang pagkabati nila sang iya panugiron nga si Jesus buhi kag nakit-an niya, wala sila magpati sa iya.
Nagpakita si Jesus sa Duha ka Gintuton-an
(Luc. 24:13-35)
12Sa tapos sini, nagpakita si Jesus sa lain nga paagi sa duha ka gintuton-an samtang nagapakadto sila sa uma. 13Nagbalik sila kag ginsugiran nila ang iban nga mga gintuton-an, pero indi sila magpati.
Nagpakita si Jesus sa Onse
(Mat. 28:16-20; Luc. 24:36-49; Juan 20:19-23; Bin. 1:6-8)
14Sang ulihi, nagpakita si Jesus sa onse ka mga apostoles sang nagakaon sila. Ginsaway niya sila, tungod kay wala sila sing pagtuo kag tungod sang katig-a sang ila tagipusoon sa pagpati sa mga nakakita sa iya nga nabanhaw sia. 15Nagsiling#Bin. 1:8. sia sa ila, “Lakat kamo sa bug-os nga kalibutan kag iwali ang Maayong Balita sa tanan nga mga tawo. 16Ang bisan sin-o nga magtuo kag mabautisohan, maluwas; ang indi magtuo, kondenahon. 17Ang mga tumoluo pagahatagan sining masunod nga mga gahom: magatabog sila sang mga yawa sa akon ngalan, magahambal sila sang iban nga mga hambal, 18kag kon mag-uyat sila sang mga man-og ukon makainom sang bisan ano nga hilo, indi sila mahalitan. Magatungtong sila sang ila mga kamot sa mga masakiton, kag ini sila magaayo.”
Si Jesus Gindala pa Langit
(Luc. 24:50-53; Bin. 1:9-11)
19Sa#Bin. 1:9-11. tapos si Ginoong Jesus nakapakighambal sa ila, nagkayab sia sa langit kag nagpungko sa tuo sang Dios. 20Naglakat kag nagwali ang mga gintuton-an sa bisan diin nga lugar kag ang Ginoo nagbulig sa ila, kag nagpamatuod sang ila mensahe paagi sa paghatag sa ila sing gamhanan nga mga tanda.]
ISA PA GID KA DAAN NGA PAGTAPOS SINING MAAYONG BALITA#Ang iban nga mga manuskrito kag dumaan nga mga pagbadbad may malip-ot nga pagtapos sini nga libro dugang sa malawig nga hingapusan (mga bersikulo 9-20).
[9Ang mga babayi nagkadto kay Pedro kag sa iya mga kaupdanan kag nagpanaysayon sing malip-ot sa ila sang tanan nga ginsugid sa ila. 10Sa tapos sini, ginpadala ni Jesus mismo paagi sa iya mga gintuton-an ang balaan kag buhi nga mensahe sang walay katubtoban nga kaluwasan nga iwali halin sa sidlangan tubtob sa nakatundan.]
Currently Selected:
Marcos 16: MBBHIL12
Tõsta esile
Share
Kopeeri
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012