Jɔɔn 2
2
1Daa ŋata dai ate faarika a jam bo Kena ale bo Galili po la, Yeezu mawa a jam boro kama. 2Ba yaa jam wi Yeezu ale wa ŋaaŋviirɔma ayen ba jam nipok fiaka nyɔnɔwa yenni. 3Nipok fiaka nyɔnɔwa a jam te nuru baai ale jam la ka daam. Daamu yaa le nueri la, Yeezu mawa yaa ga weeni wa ayen daamu a nueri kama. 4Yeezu yaa weeni wa ayen, <<Kan weeni mu dii ate mi ayen m nye la, dii nyiŋla diipo ate mi a yaali ayen m nye wari la an diem paari ya.>> 5Wa mawa yaa weeni yenni tomteerɔma ayen, <<Wa dan weeni ayen ni nye wari, ni nye.>> 6Samɔniŋ kpieŋsa siyuebi ale jam bo yenni po. Samɔniŋ kanyi a jam a su ase ka leŋsa pisiye yaase pisita nyiam la. Juuma a nyiem a dan boro a gomsi ayen ba dɛ ŋandiinta, ba a ŋari nyiam a nyo samɔnsaŋa de po a nye ŋiak wanni ale nye ate ba a nye cheri. 7Yeezu yaa weeni ba ayen, <<Ni ŋari nyiam a sueri samɔnsaŋa.>> Ba yaa ŋari a sueri, 8wa yaa weeni ba ayen, <<Ni ŋari bu a ta ga te waai ale ka kpagni a nya nichamma zuk la.>> Ba yaa ŋari nyiamu a ta ga te wa. 9Kpagni ale lam nyiamu ale tagri a chim daamu a nya la, wa yaa zɛ bu le nyini ka juijui la, alege ka yenni tomteerɔma baai ale ŋari a ta ga te wa la, nyiini ale seba bu le nyini juijui la. Kpagni a yaa wi nipok fiaka nyɔnɔwa a weeni wa ayen, 10<<Ba nyiem dɛ niŋ a chari ka damaŋka, ba ale nyu chak la ŋaaŋnyiŋ, ba yaa chari buui ale kan daa daam dek la, alege fi pai damaŋka ate bu paari yɔgyɔgla de.>> 11Yeezu a piilim tom wakperikaliika de ase daana la Kena tɛŋka ate ka bo Galili po la, a sak wa zulaŋa ate wa ŋaaŋviirɔma a ta siaka ale wa.
12Nipok fiaka diintaŋa ale jam taam la, Yeezu ale wa mawa ale wa yuama ale wa ŋaaŋviirɔma a yaa basi dula jigini ale ge cheŋ Kapernaum a yaa bo dula daa maga.
13Gaambasika Tigini a jam moata kama ate Yeezu ale wa ŋaaŋviirɔma a yaa cheŋ Jerusalem tɛŋka. 14Ba yaa ga jo Wen yenni po, a nya nuruba a ta niiga ale piisa ale nangbaŋsa a da. Baai mɛ jam ta ligra a tagri. 15Yeezu yaa yaali miisa a melim chaab ase fiŋ la a yiak niiŋa ale piisaŋa ate ŋa nyini Wen yenni po, ale yik baai ale a tagri ligra la ligraŋa a kpiiri basi, ale tulim ba ŋanzaanitaŋa a kpib. 16Wa yaa weeni baai ale ta nangbaŋsaŋa a da la ayen, <<Ni pai ŋantaŋa de meena dela a ta nyini. Ni kan basi ate m Kowa yenni a chim geruŋ jigi ya.>> 17Wa ŋaaŋviirɔma yaa teeri dii ate ba jam ŋmarisi ayen, <<Fi yenni wie nyiini ale bo m suinum po a dɛ nna ase bolim la.>> (Yiila 69:9) 18Juuma yaa jam weeni Yeezu ayen, <<Fi ta ka boan daana ayen fi nye a sak fi pagrimu tuimaŋa de meena po?>> 19Yeezu yaa weeni ba ayen, <<Ni be nak yenni de a lɔnsi tɛŋ ate mi a ŋman se di a nueri daa ŋata po.>> 20Ba yaa weeni wa ayen, <<Tama nuruma a pai ka bena pisinaansi ale ŋayuebi a se di. Fi ale baga a pai daa ŋata a ŋman se di a nueri?>> 21Alege yenni ate Yeezu jam a biisi la a magsi chaab ale ka wadek nyiŋka. 22Yeezu ale jam a kpi ate Wen a basi ate wa yiti kum po la, wa ŋaaŋviirɔma a yaa jam teeri dii ate wa weeni la. Ba yaa jam ta siaka ale Yeezu ale weeni ba diila, ale ba le ŋmarisi wa wie Wen gbaŋka po diila ka wensie.
23Yeezu ale jam boro a dɛ Gaambasika Tigini Jerusalem tɛŋka po la, nuruba yegayega a jam nya wa wakperikaliik sii ate wa jam tom ase daana la, a yaa ta siaka ale wa. 24Alege Yeezu an jam a pai wadek a te ba. 25Dii nyiŋla wa jam seba nuru meena kama, wa an jam a yaali waai weeni nurubiik ale ka dii la a sak wa, wadek a seba dii ale bo nuru po la kama.
Currently Selected:
Jɔɔn 2: BWU
Tõsta esile
Share
Copy
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation