Tuima 4
4
1Ba ale jam boro a biisi ale nuruma la, kaabteerɔba ale Wen yenni limisidɔma kpagni ale Sajusiiba yaa jam ba jigi#4:1 Sajusiiba jam ka niŋdeerɔ baai ale kan ta siaka ayen nuruba a yiti kum po. 2ale suipuurum dii nyiŋla Piita ale Jɔɔn a jam a sak nuruma ayen Yeezu a yiti kum po kama. Dila abe a sak kama ayen baai ale kpi la a le yiti kum po. 3Dila nyiŋ ba yaa yik Piita ale Jɔɔn a lik ate vari veenti dii nyiŋla, ku jam ka junɔi. 4Alege ba yegayega ale wom ba sinsaŋŋa la, a jam siak a te ŋa kama ate ba meena a gum chaab paari nidoaba tusa ŋanu (5,000).
5Vari ale veenti la, niŋdeerɔma ale nisɔmma ale Sinsak sagrɔma a jam tigsi ka chaab Jerusalem tɛŋka, 6ale kaabteerɔ kpioŋku Anasi ale Kayafas ale Jɔɔn ale Alezanda ale baai meena ale ka kaabteerɔ kpioŋku dɔkdemma po la. 7Ba yaa yik tuimtomdɔma a zaani ba niŋ a bek ba ayen, <<Ka boan jaab pagrim nyiŋ yaase yuei boan nyiŋ ate nama nye nna?>>
8Wen Chiika ale jam sueri Piita la, yaa tulisi ba ayen, <<Nuruma niŋdeerɔba ale nisɔmma, 9nama a dan a bek tama jinla wamaŋ kaai ate ti nye a te gbaruku la ale jabuui nyiŋ ate nuruwa de a nya nyiŋyɔgsa la, 10ku a fɛ kama ayen nama meena ale Izirali tɛŋka demma meena a seba ayen ka Yeezu Kirisita Nazaret denɔwa waai ate ni yik kpi jabarimu nyiŋ ate Wen nak wa yiti kum po la, wala yuenni nyiŋ ate nuruwa de a za ni niŋ a ta nyiŋyɔgsa. 11Tintanni de ale nama seerɔma a zɛri la dila ale chim nyubini gugoruku tintain.> (Yiila 118:22) 12Varibasika a va ka wala nyiini nyiŋ a jam. Nuru ka tɛŋzuk de ate Wen a te ate kula nyɔnɔwa a baga vari ti a basi. Ka wala nyiini.>>
13Ba ale jam nya ale Piita ale Jɔɔn a ta pagrim a baga biisi nna alege ba an zamsi gbaŋ a paari niŋ la, ku yaa cha ba nna yegayega ate ba yaa miŋ ayen ba jam boro ale ka Yeezu. 14Alege ba jam ka wari a weeni, dii nyiŋla, nuru waai ate ba tebi la a jam za ale ka Piita ale Jɔɔn. 15Ba yaa weeni ba ayen ba nyini kpaŋŋa dɔkku po a nyini peelim, ba yaa bek chaab ayen, 16<<Ti baga a nye nuruma de ka sɛ? Wakperikaliika de ate ba nye nna ate waai meena Jerusalem tɛŋka po a nya la? Ti be an baga a nak nanpaga ale di mɛ. 17Ti be dan a yaali ayen wanni de a kan ŋman tagli jigi meena, ni basi ate ti kaam ba ayen ba kan ŋman pai Yeezu yuenni nyiŋ a biisi wari ale waai ya.>>
18Ba yaa wi Piita ale Jɔɔn a kaam ba ayen ba kan ŋman pai Yeezu yuenni nyiŋ a biisi yaase ba sak waai ya. 19Alege Piita ale Jɔɔn yaa tulisi ba ayen, <<Nama dek abe weeni nya kude ase ka ku kuna dek ale magsi Naawen jigi ase ka ti zuli nama yaa ti zuli Wen yaa? 20Tama an baga basi dii ate tama nya ale wom la biiga.>> 21Kpaŋŋa yaa ŋman kaam ba ale basi ba ate ba cheŋ, dii nyiŋla ku jam pagra kama ate ba nya suik a te ba waalika, nuruma meena a kasim jam a te ka Wen pimpauk ale dii ale nye la. 22Dii nyiŋla, nuru waai ate wakperikaliika de a jam nye ate wa nya nyiŋyɔgsa la, a jam gaam bena pisinaansi kama.
23Ba ale jam pai Piita ale Jɔɔn a basi la, ba yaa pilim cheŋ ba Kirisita bisa chaama jigi a weeni sak ba kaabteerɔ kpaŋŋa ale nisɔmma ale weeni ba diila. 24Ba ale wom la, ba yaa maa chaab a puusi Wen ayen, <<Nyɔnɔwa, fi waai ale nye wenŋmazuk ale tɛŋzuk de nyakpiemu ale ŋan baai meena ale bo ba po la, 25fi va Wen Chiika nyiŋ a biisi ale ti kokpieŋka Deevid fi tomteerɔwa ate wa weeni ayen, <Ka boa ale soa ate nuru baai ale kan daa Juuba la sue a puuri? Ka boa ale soa ate nuruma ta popola kayaata? 26Tɛŋzuk de nalimaŋa ale nisɔmma a gomsi kama ayen ba nye kpaliŋ ale Naawen ale wa Kirisitawa.> (Yiila 2:1-2) 27Tɛŋ kpieŋka de po Ayerod ale Pontios Paalɔt ale baai ale kan daa Juuba ale Izirali demma a ta ka chaab, ba nye kpaliŋ ale fi tomteerɔ weleŋka Yeezu waai ate fi bobi wa naam la, 28ayen ba kaasi dii meena ate fi ŋaam basi ate fi nisa ale fi popolaŋa a nye la. 29Yɔgyɔgla de, Naawen yaa, nya ba ale a nyigsi ti dii ale popola ŋaai ayen ba nye ti jigi la. Be basi ate tama fi tomteerɔma a ta pagrim a biisi fi wamaŋsaŋa abe ti kan a chali yɔgsum. 30Pa fi pagrimu a tebi nuruba, abe fi te suik ate ti pai fi tomteerɔ weleŋka Yeezu yuenni a nye wakperikaliisa ate nuruba nya.>>
31Ba ale jam puusi a nueri la, juijui ate ba jam kala la, a yaa choa. Wen Chiika a jam sueri ba meena suiniimaŋa kama ate ba yaa deri piilim a biisi Wen wamaŋsaŋa ale nyiŋ pagra.
32Baai meena ale jam ta siaka ale Yeezu la, a jam ta ka nɔiyeŋ ale popola yena. Ba waai jam karo a weeni ayen wa ŋan baai ate wa ta la ka wadek wa nyiini ŋanta, alege ba meena a pai ba ŋantaŋa a chari ka chaab. 33Tuimtomdɔma yaa jam sak kama ale pagrim ayen ba nya Yeezu ale yiti kum po la. Naawen a jam ŋmante ba ka nna yegayega. 34Nuru a jam ka ba po a nam a yaali jaaboa. Baai meena ale jam soa tɛŋsa ale yie la, a pai da kama, a ta ligraŋa 35a jam a te tuimtomdɔma. Ligraŋa de ba yaa pai kama a chari ba meena a magsi chaab ale ba wanyi wanyi ale sum a yaali ligra diila.
36Nuru wanyi ale jam boro. Wa yuei ale Josefi. Wa jam ka Livaima po ate ba biak wa Saipurus tɛŋka. Tuimtomdɔma a jam te wa ka yuei ayen Banabas. Di kiri ale nuru waai ale a deŋsi nuruba kpa la, 37Nuruwa de jam pai ka wa tɛŋ a da a ta ligraŋa a jam te tuimtomdɔma.
Currently Selected:
Tuima 4: BWU
Tõsta esile
Share
Kopeeri
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation