Маттэ 5
5
ЯТФЭНЭРЭШЪХЬ
Исус Ӏуашъхьэм тетэу Тхьэм игущыӀэхэр зэригъэӀугъэр
(Маттэ 5–7)
1Исус цӀыф купышхохэр зелъэгъум, Ӏуашъхьэм дэкӀуаий, тӀысыгъэ. ЗэтӀысым, игъогу рыкӀохэрэр къыбгъодэхьагъэх, 2Исус ахэмэ Тхьэм игущыӀэхэр аригъашӀэу ыублагъ.
Гъогу мафэ теуцуагъэхэр
(Лука 6:20-23)
3– Гурэ псэрэкӀэ тхьамыкӀэхэр#5:3 гурэ псэрэкӀэ тхьамыкӀэхэр – Тхьэр зэрящыкӀагъэр зыдэзышӀэжьхэрэр ары. гъогу мафэ теуцуагъэх, сыда пӀомэ, ахэр Тхьэу уашъом щыӀэм и Тетыгъошхо ыӀэчӀэгъ чӀэтых.
4Гукъао зиӀэхэр гъогу мафэ теуцуагъэх, сыда пӀомэ, ахэмэ ягукъао Тхьэм ашъхьащихыщт.
5Зыгу пэгагъэ имылъхэр гъогу мафэ теуцуагъэх, сыда пӀомэ, ахэмэ ӀахьышӀоу къалъыӀэсыщтыр чӀылъэр ары.
6Шъыпкъагъэм фэзэщхэу, фалӀэхэрэр гъогу мафэ теуцуагъэх, сыда пӀомэ, ахэмэ афикъун шъыпкъагъэ агъотыжьыщт.
7ГукӀэгъу зыгу илъхэр гъогу мафэ теуцуагъэх, сыда пӀомэ, ахэмэ гукӀэгъу агъотыжьыщт.
8Зыгу къабзэхэр гъогу мафэ теуцуагъэх, сыда пӀомэ, ахэмэ Тхьэр алъэгъущт.
9ЗэшӀуныгъэ цӀыфмэ ахэзылъхьэхэрэр гъогу мафэ теуцуагъэх, сыда пӀомэ, ахэмэ Тхьэм ибынхэкӀэ яджэщтых.
10Шъыпкъагъэм пае цӀыфхэу къин зэрагъэщэчыхэрэр гъогу мафэ теуцуагъэх, сыда пӀомэ, ахэр Тхьэу уашъом щыӀэм и Тетыгъошхо ыӀэчӀэгъ чӀэтых.
11– Сэ сигъогу шъузэрэрыкӀорэм пае, цӀыфхэр къышъохъонхэмэ, къин шъуагъэщэчмэ, шъуимыфэшъуашэу Ӏэегъэ пстэури къышъуаӀуалӀэмэ, гъогу мафэ шъутеуцуагъ. 12ШъугушӀу, шъучэф, сыда пӀомэ, Тхьэм уашъом ӀахьышӀоу къыщышъуфигъэшъошэщтыр инышъ ары. Аущтэу шъо шъуапэкӀи пегъымбархэм къин арагъэщэчыщтыгъ.
Щыгъумрэ нэфынэмрэ
(Марк 9:50; Лука 14:34-35)
13– ЧӀылъэм ищыгъур шъоры. Ау щыгъум ищыугъагъэ хэкӀымэ, сыдэущтэу ар пщыущта? ЗыкӀи ишӀуагъэ къэкӀожьыщтэп. Ар ратэкъужьынышъ, цӀыфмэ аулъэгущт.
14– Дунаим инэфынэр шъоры. Ӏуашъхьэм тет къалэр бгъэбылъышъущтэп. 15Зыми остыгъэ хигъанэу, щэлъэ чӀэгъым чӀигъэуцорэп, тетыпӀэ лъагэм тырегъэуцо нахь. ЕтӀанэ унэм ис пстэуми ащ инэфынэ анэсы. 16Арышъ, цӀыфмэ апашъхьэ шъуинэфынэ щэрэнэф, шъуишӀушӀагъэхэр алъэгъунхэшъ, шъуя Тэ лъапӀэу уашъом щыӀэм шытхъу фашӀыным пае.
Тэурат хабзэм ехьылӀагъ
17– Муса и Тэурат хабзэ#5:17 Тэурат хабзэр – пегъымбар Мусэ тхылъитфэу ытхыгъэхэр ары. Тэурат хабзэр джуртхэм ятхылъ лъапӀэхэм ащыщэу апэрэ Ӏахь мэхъу. итхэмрэ пегъымбархэм атхыгъэ тхылъхэм#5:17 пегъымбархэм атхыгъэ тхылъхэр – джуртхэм ятхылъ лъапӀэхэм ащыщхэу ятӀонэрэ Ӏахь мэхъу. арытхэмрэ згъэкӀодынхэу сыкъэкӀуагъэкӀэ шъумыгугъ. Ахэр згъэкӀодынхэу арэп сыкъызкӀэкӀуагъэр, изгъэкъунхэу ары нахь. 18Шъыпкъэр шъосэӀо, уашъомрэ чӀылъэмрэ щэӀэхэфэ, Мусэ и Тэурат хабзэ итхэу хьарыфхэм анахь цӀыкӀуи зы уцупӀи хэкӀодыкӀыщтэп, ащ ит пстэури къэшъыпкъэжьыфэ.
19ЦӀыфэу мы унашъохэм анахь цӀыкӀухэм ащыщэу зыгорэм емыдэӀоу, адрэ цӀыфхэри а унашъом емыдэӀунхэу язгъашӀэрэм Тхьэу уашъом щыӀэм и Тетыгъошхо ыӀэчӀэгъ чӀэт цӀыфхэм анахь цӀыкӀу дэдэкӀэ еджэщтых. Ау мы унашъохэр зыгъэцакӀэу, цӀыфмэ ахэр язгъашӀэрэр Тхьэу уашъом щыӀэм и Тетыгъошхо ыӀэчӀэгъ чӀэт цӀыф инхэм ащыщкӀэ еджэщтых. 20Шъыпкъэр шъосэӀо, шъуишъыпкъагъэ Тэурат егъэджэкӀо пащэхэмрэ фарисейхэмрэ яшъыпкъагъэ нахьи нахь ин мыхъумэ, Тхьэу уашъом щыӀэм и Тетыгъошхо ыӀэчӀэгъ шъучӀэхьащтэп.
Губжыным ехьылӀагъ
21– Пэсэрэ цӀыфхэм зэрараӀуагъэр#5:21 цӀыфхэм зэрараӀуагъэр – еплъ Пегъымбар Мусэ ятӀонэрэ тхылъэу ытхыгъэм 20:13. шъо зэхэшъухыгъэ: «ЦӀыф умыукӀ. ЦӀыф зыукӀырэр хьыкумэшӀым#5:21 хьыкумэшӀыр – цӀыф горэ хыемэ е мысэмэ, хабзэм иунашъо тетэу зэхэзыфырэр ары. ыпашъхьэ ращэщт». 22Ау сэ шъосэӀо, хэтми ежь ыш#5:22 зэшыхэр – зы дин зылэжьыхэрэр ары. фэгубжырэр хьыкумэшӀым ыпашъхьэ ращэщт. Ежь ыш «О ушъхьэнэкӀ!» езыӀорэр Тхьэмэтэ Хэсэшхом#5:22 Тхьэмэтэ Хэсэшхор – дин Ӏофхэм яхьылӀагъэу хьыкум зышӀэу, анахь тетыгъо зиӀэ хасэу джуртхэм яӀагъэр ары. Тхьэмэтэ нэбгырэ 70-рэ Тхьэмэтэ Хэсэшхом хэтыгъ. А хэсэшхом итхьэматэр дин пэщэшхор арыгъэ. Тхьэмэтэ Хэсэшхом загъорэ «СинедрионкӀэ» еджэх. ыпашъхьэ ращэщт. Ау ыш «О удел!» езыӀорэр джэхьнэм машӀом кӀоныр фэшъуашэу мысэ хъущт.
23– Арышъ, Тхьэм ептынэу тыныр къурмэншӀыпӀэм зыпхьыкӀэ, о пшы гукъанэ горэ къыпфыриӀэу угу къэкӀыжьмэ, 24уитын къурмэншӀыпӀэм ыпашъхьэ къыщыгъани, ыпэ рапшӀэу кӀуи, пшы ешӀужь. ЕтӀанэ къакӀуи, уитын тыжь.
25– О уидэогъу псынкӀэу ешӀужь, уригъусэу гъогум утетыфэ. Армырмэ хьыкумэшӀым ыпашъхьэ урищэщт. ХьыкумэшӀыми иӀофшӀакӀо уӀэкӀилъхьащт, хьапсыми учӀадзэщт. 26Шъыпкъэр осэӀо, аужырэ чапычыр#5:26 чапычыр – лептитӀу мэхъу. Лептэр анахь осэ цӀыкӀу зиӀэ гъоплъэ ахъщэ жъгъэеу щыӀагъэр ары. отыжьыфэ, хьапсым укъычӀэкӀыжьыщтэп.
Зинэ шӀэным ехьылӀагъ
27– ЗэраӀуагъэр#5:27 зэраӀуагъэр – еплъ Пегъымбар Мусэ ятӀонэрэ тхылъэу ытхыгъэм 20:14. зэхэшъухыгъ: «Зинэ умышӀэ». 28Ау сэ шъосэӀо, хэти бзылъфыгъэ горэм енэцӀэу еплъымэ, ыгукӀэ зинэ ышӀэгъах. 29Арышъ, о унэ джабгъу псэкӀод пшӀэнэу удихьыхмэ, къитхъыжьи чӀэдз. О ппкъы зэкӀэ джэхьнэмым хадзэным нахьи, пӀэпкъ-лъэпкъхэм ащыщэу зы пшӀокӀодыныр оркӀэ нахьышӀу. 30О пӀэ джабгъуи псэкӀод пшӀэнэу удихьыхмэ, пыупкӀыжьи, чӀэдз. О ппкъы зэкӀэ джэхьнэмым кӀоным нахьи, пӀэпкъ-лъэпкъхэм ащыщэу зы пшӀокӀодыныр оркӀэ нахьышӀу.
Шъхьэгъусэ тӀупщыжьыным ехьылӀагъ
(Маттэ 19:9; Марк 10:11-12; Лука 16:18)
31– Пасэм мыри аӀуагъ#5:31 мыри аӀуагъ – еплъ Пегъымбар Мусэ ятфэнэрэ тхылъэу ытхыгъэм 24:1.: «Зишъуз зытӀупщыжьырэм къызэритӀупщыжьырэ тхылъ рерэт». 32Ау сэ шъосэӀо, ишъуз зинэ ымышӀагъэу, хэтми зытӀупщыжьырэм шъузым зинэ ригъашӀэу мэхъу, (етӀанэ шъузыр джыри дэкӀожьмэ). Ащ фэдэу хэтми лӀы горэм къытӀупщыжьыгъэ шъуз къэзыщэжьырэм зинэ ышӀагъэу мэхъу.
ТхьарыӀоным ехьылӀагъ
33– Джыри пэсэрэ цӀыфхэм зэрараӀуагъэр#5:33 цӀыфхэм зэрараӀуагъэр – еплъ Пегъымбар Мусэ ящэнэрэ тхылъэу ытхыгъэм 19:12, яплӀэнэрэ тхылъэу ытхыгъэм 30:2, ятфэнэрэ тхылъэу ытхыгъэм 23:21. шъо зэхэшъухыгъ: «ЗыкӀи пцӀыкӀэ тхьарыӀо умышӀы, ау Зиусхьаным фэпшӀыгъэ тхьарыӀохэр гъэшъыпкъэжьых». 34Ау сэ шъосэӀо, тхьарыӀо зыкӀи шъумышӀы. УашъомкӀи тхьарыӀо шъумышӀы, сыда пӀомэ, уашъор Тхьэм итӀысыпӀэ лъапӀ. 35ЧӀылъэмкӀи тхьарыӀо шъумышӀы, сыда пӀомэ, ар Тхьэм ылъакъохэр зытет лъэгукӀэтын лъапӀ. ЕрусалимкӀи тхьарыӀо шъумышӀы, сыда пӀомэ, ар пачъыхьэшхом икъал. 36ПшъхьэкӀи тхьарыӀо умышӀы, сыда пӀомэ, зы шъхьац налъ нэмыӀэми шӀуцӀи фыжьи пшӀын плъэкӀыщтэп. 37Ау «Ары» шъуӀуагъэмэ, ар жъугъэцакӀэ, «Хьау» шъуӀуагъэми, ари жъугъэцакӀэ. Ащ блэкӀырэр шэйтаным иӀоф щыщ.
ЦӀыф бзаджэм шъупэмыуцужь
(Лука 6:29-30)
38– Мыри зэраӀуагъэр#5:38 зэраӀуагъэр – еплъ Пегъымбар Мусэ ятӀонэрэ тхылъэу ытхыгъэм 21:24. зэхэшъухыгъ: «О унэ къеӀэрэм ынэ еӀэжь, о пцэ къеорэм ыцэ еожь», 39ау сэ шъосэӀо, цӀыф бзаджэм шъупэмыуцужь. Ау хэти о унэгушъо джабгъу къеорэм адрэ нэгушъори фэгъаз. 40Зыгорэ уиджанэ пӀихынэу къыодэонэу фаемэ, уищыгъын кӀыӀутелъ къыфэгъан. 41Лъэбэкъу мин дэпкӀунэу уезгъэзырэм лъэбэкъу минитӀу дэкӀу. 42О зыгорэкӀэ къыолъэӀурэм ет, чӀыфэ пӀызыхынэу фаеми уакӀыб фэмыгъаз.
Шъуипыйхэр шӀу шъулъэгъух
(Лука 6:27-28, 32-36)
43– ЗэраӀуагъэр#5:43 зэраӀуагъэр – еплъ Пегъымбар Мусэ ящэнэрэ тхылъэу ытхыгъэм 19:18. зэхэшъухыгъ: «Уигъунэгъу шӀу лъэгъу, уипый уджэгъу». 44Ау сэ шъосэӀо, шъуипыйхэр шӀу шъулъэгъух, цӀыфхэу къин шъозгъэщэчыхэрэм Тхьэм шӀукӀэ шъуафелъэӀу, 45шъуя Тэ лъапӀэу уашъом щыӀэм ибын шъухъуным пае. Ащ итыгъэ цӀыф бзаджэхэми цӀыфышӀухэми къафыкъуегъэкӀы, шъыпкъагъэ зиӀэхэми зимыӀэхэми ощх къафырегъэщхы. 46ШӀу шъузылъэгъухэрэм язакъоу шӀу шъулъэгъухэмэ, сыд фэдэ ӀахьышӀуа шъузщыгугъырэр? Хьакъулахь ахъщэр#5:46 хьакъулахь ахъщэр – цӀыфхэр къалэ горэм зыдахьэхэкӀэ е зыдэкӀхэкӀэ, псэуалъэхэу, хьапщыпхэу, лэжьыгъэхэу яӀэхэм атырилъхьэщтыгъэу Рим къэралыгъошхом ахъщэу ратын фэягъэр ары. ЦӀыфхэм, анахьэу дин тхьэматэхэм, хьакъулахь ахъщэр хэзыххэрэр зэрапэсыщтыгъэхэп, гъэнэфэгъэу дин унашъохэм ахэр зэрямыдэӀущтыгъэхэм пае. хэзыххэрэм а дэдэр арыба ашӀэрэр? 47Шъо шъушыхэм анэмыкӀ зыми ыӀапэ шъумыубытмэ, илыягъэу сыда шӀугъэу шъушӀэрэр? Хымэ лъэпкъхэми а дэдэр ашӀэба? 48Арышъ, шъуя Тэ лъапӀэу уашъом щыӀэм ишъыпкъагъэ щыкӀагъэ зи имыӀэу, ежь зэрэикъугъэм фэдэу, шъори зишъыпкъагъэ щыкӀагъэ зи имыӀэу, цӀыф икъугъэ шъухъун фае.
Currently Selected:
Маттэ 5: AdgNT14
Tõsta esile
Share
Copy
Want to have your highlights saved across all your devices? Sign up or sign in
© Институт перевода Библии, 1991, 1992, 2014. Стокгольм