Апостолмуд 5
5
Хананий болн Сапр
1Хананий залу Сапр гидг гергтәһән эврәннь һазран хулдҗ. 2Тер гергтәһән хоюрн негдәд, авсн мөңгнәннь нег хүвинь бийдән үлдәҗ. Наадкинь апостолмудт күргҗ өгч.
3– Хананий, эрлг яһад чини зүркнд: «Әрүн Сәкүснд худл кел» гисн сана орулад оркв? Чи һазриг хулдад авсн мөңгнәс нууввч. 4Хулдхин өмн тер һазр чини билүс. Терүг хулдад авсн мөңгн бас чини. Юн учр деерәс худл келвч? Чи олн улст биш Бурхнд худл келвч, – гиҗ Пётр келв.
5Пётрин келсиг соңссн Хананий унад үкҗ одв. Энүг үзсн улс сүрдәд әәлдцхәв. 6Дәкәд баахн көвүд өөрдҗ ирәд, цогцинь ораһад һарһад оршав.
7Һурвн час давхла, гергнь ирнә. Залутань юн болсинь тер медҗәсмн уга бәәҗ. 8Орҗ ирхләнь Пётр терүнәс сурв:
– Тадн һазран иим үнәр хулдвт?
– Э, э, – гиҗ гергн хәрү өгв.
9– Залутаһан хоорндан үгцәд, Деед Эзнә Сәкүснд худл яһад келвт? Соңсҗанч, чини залуг оршасн улс орад аашна. Тедн чамаг бас һарһх, – гиҗ Пётр терүнд келв.
10Терүг соңссн Сапр унад үкв. Орҗ ирсн көвүд әмнь һарсн герг үзнә. Тедн терүг өргәд залуһиннь хаҗуд оршав. 11Теднә туск зәңг соңссн олн улс сүзгтни багинхн икәр әәҗ бәәцхәв.
Өвәрц болн онц темдг
12Олн улс дунд апостолмуд өвәрц болн онц темдгүд күцәв. Христост иткдг улс цугтан Соломонин гидг һол сүмин һазрт цуглрдг болв. 13Талдан улс тедниг күндлдг болв чигн теднүр өөрдҗ чадад бәәв. 14Деед Эзнд итксн улс улм-улм тооһарн өсәд йовв. 15Әмтн гемтә күүһән һазаран орта-дертәһинь һарһад, йовҗ йовсн Пётрин сүүдр чигн тустха гиҗ нәәлцхәв. 16Ерусалимин хаҗудк балһсдас әмтн олар ирцхәв. Тедн гемтә болн хар сәкүстә улсан авч ирәд, гем-зовлңгаснь, шалтг-шаваснь һарһҗ эдгәв.
Апостолмудын зовлң
17Ах гелң, энүнә ханьмуд (тедн цадукмудын багин гешүд бәәҗ) теднд үлү үзв. 18Тедн апостолмудыг бәрәд, улсин бәрәнд орулна. 19Болв Бурхна элч сөөһәр бәрәнә үүд секәд, апостолмудыг сулдхв.
20– Йовтн эндәс. Һол сүмд күрәд олн улст шин җирһлин тускар келҗ өгтн, – гиҗ тер келв.
21Апостолмуд Бурхна элчиг соңсад, өрүһәр һол сүмд ирәд, олн әмтиг сурһна. Тер хоорнд ах гелң болн энүнә ханьмуд теднә йовдлын тускар медәд уга бәәҗ. Эдн эврән Израилин медәтнриг цуглулад Деед хург кеһәд, апостолмудыг бәрәнәс авхулв. 22Илгәсн улс тенд ирәд, апостолмуд бәрәнд угаһинь үзәд, хәрү ирәд иигҗ зәңглв:
23– Бәрәнә үүдн батар хаалһата. Үүднд харул зогсҗана. Болв бидн бәрәнд орхла, дотрнь нег чигн күн уга бәәҗ.
24Иим зәңг соңссн харулын ахлач болн ах гелңгүд «эн юн гидг юмн болҗахмб?» гиһәд өврв. 25Дәкәд нег күн ирәд иигҗ келв:
– Тана бәрәнд орулсн улс һол сүмин һаза олн әмтиг сурһҗана.
26Тиигәд харулын ахлач цергүдтәһән йовад, апостолмудыг дахулҗ ирв. Дахулхларн чидләр биш эвәр авч. Эс тиигхлә олн улс тедниг чолуһар шивх гиһәд саглв. 27Апостолмудыг Деед хургин ах гелң тал сурлһанд авч орулв.
28– Бидн тадниг Исусин тускар бичә сурһтн гиһәд чаңһар заклавидн. Тадн болхла Ерусалимиг эврәннь номарн дүүргәд, Тер Күүнә үклиг маднд даалһхар седҗәнәт, – гиҗ ах гелң келв.
29– Бидн олн әмт биш Бурх соңсх йоставидн, – гиҗ Пётр болн апостолмуд хәрү өгцхәв. – 30Модн деер тадна хадад алчксн Исусиг мана өвкнрин Бурхн әмдрүлв. 31Израиль килнцтә җирһлән үлдәтхә гиһәд, килнцинь тәвҗ өгүлхәр Бурхн Исусиг барун талан суулһад, Нойн болн Аврачд Терүг өрглә. 32Терүнә герчнр бидн болн Әрүн Сәкүсн. Бурхн Бийән соңссн улст Әрүн Сәкүсиг өгв.
33Иигҗ келсиг соңссн Деед хургин гешүд ууртан бүтәд, апостолмудыг алчкхар седв. 34Тедн дунд олн әмтн күндлдг нег парш бәәҗ. Тернь закана багш Гамалиль гидг нертә бәәҗ. Эн ормасн босад апостолмудыг ахр болзгт һартха гиҗ һарарн докъя өгч закв.
35– Израилин залус! Эн улсиг яахан сәәнәр ухалтн. 36Одахн энд Түд гидг күн ирлә. Тер бийән алдрт тоолҗала. Терүг дөрвн зу шаху улс дахлдв. Болв Түдиг алгдхла түүнә дахачнр цугтан тарад гүүлдәд йовҗ одцхав. Тернь тиигәд төгсв. 37Терүнә хөөн Һалильяс Йуда ирнә. Эн олн әмтнә то авчах цагт ирәд нег баг улс дәәлдәнд босххар седв. Йуда бас алгдв. Энүнә үлмәд йовсн улс бас тарлдна. 38Тиигәд эн учрт мини селвг эн: Эн улсан сулдхтн. Кемр теднә зурань болн кеҗәхнь күүнәс эклҗәхлә, бас эвдрәд тарҗ одх. 39Кемр Бурхнас тернь күцәгдҗәхлә, кен чигн күн эвдҗ чадшго. Зуг эврән Бурхна өмнәс сөрхәс саглтн, – гиҗ Гамалиль келв.
40Деед хург Гамалилин келсиг иткв. Тедн апостолмудыг дуудҗ авад, маляһар цокв. Дәкәд тедниг Исусин нерн деерәс бичә күүндвр кетн гиҗ бас нег закад сулдхв. 41Исусас көлтә бийән даҗрулад цокулсндан байрлад, апостолмуд Деед хургас һарад йовв. 42Эврән тедн өдр болһн һол сүмд, гермүдт болв чигн цуглрад, Исус – Бурхна илгәсн Аврач гиһәд байрта зәңг тархаҗ олн әмтнд келҗәв.
Currently Selected:
Апостолмуд 5: ХКО_ӘБ
Tõsta esile
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023