Лукаца бицараб Рохалил хабар 22
22
22 бетӏер
Ягьуда Искариот Гӏисае хилиплъула
1Жинда Пасхаян цӏар лъураб Реччичӏел Панкъазул Байрам гӏагарлъулеб букӏана. 2Чӏахӏиял кашишзабиги диниял гӏалимзабиги ургъулел рукӏана Гӏиса тӏагӏинавизе санагӏат ккелародайилан, амма халкъалъукьаги хӏинкъулел рукӏана гьел. 3Дов анцӏила кӏигоясул цояв, Искариотин тӏокӏцӏар бугев Ягьудал рекӏелъе илбис лъугьана. 4Чӏахӏиял кашишзабаздаги Мукъадасаб Рукъ цӏунулел рагъухъабазул бутӏруздаги аскӏове ун, гьезулгун къотӏи-къай гьабуна Гӏиса гьезул кверде кьезе. 5Гьел рохана ва гьесие гӏарац кьезе къотӏи гьабуна. 6Ягьуда гьелда разилъана. Цинги гьес балагьулеб букӏана гӏадамал гьечӏеб бакӏалда Гӏиса гьезул кверде кьезе санагӏалъи бугеб заман.
Пасхаялъул квен
7Реччичӏел панкъал режулеб ва къурбаналъе пасхаялъул кьегӏер хъолеб къо тӏаде щвана. 8Гӏисаца Пётридаги Иоаннидаги абуна, нилъеего пасхаялъул квен хӏадур гьабизе аян. 9Киб нижеца гьеб гьабизе дуе бокьун бугебилан гьикъана гьез Гӏисада. 10Гӏисаца гьезда абуна:
– Балагьея, шагьаралде жанире лъугьараб мехалъ, лъадал гӏеретӏги цӏун вачӏунев цо чи ватила нужеда. Гьев жаниве лъугьараб рокъоре а нужги гьесда хадур. 11Цинги нужеца рукъалъул бетӏергьанасда абе: «Мугӏалимасе лъазе бокьун буго жиндирго муридалгун цадахъ пасхаялъул квание рукъ киб бугебали». 12Гьес нужеда бихьизабила цо гӏатӏидаб къачӏараб тӏасарукъ. Гьеле гьениб хӏадуре нужеца квен.
13Шагьаралде щведал, Гӏисаца абухъе тӏубана гьез иш. Цинги пасхаялъул квенги хӏадур гьабуна. 14Къаси кванил ригь щвараб мехалъ, вачӏун Гӏиса кваназе гӏодов чӏана, гьесда аскӏов вукӏана анцӏила кӏиявго чапарги. 15Гӏисаца гьезда абуна:
– Дица гӏазаб-гӏакъуба хӏехьезе ккелалде гьаб Пасхаялъул квен нужеда цадахъ кваназе цӏакъ гӏащикълъун вукӏана дун. 16Дица нужеда абулеб буго: Аллагьасул Парччахӏлъиялда ахирисеб пасхаялъул байрам тӏобитӏизегӏан тӏокӏаб кваназе гьечӏо дица гьеб.
17Цинги гьес, чагъиралъул цӏураб щурунги босун, тӏаде дугӏаги гьабун, абуна:
– Ма, нужедаго гьоркьоб бикье гьаб. 18Дица нужеда абулеб буго: Аллагьасул Парччахӏлъи рещтӏинегӏан гьанжеялдаса нахъе тӏокӏаб гьекъезе гьечӏо дица гьаб цӏолбол цӏцӏураб жа.
19Цо чедги кодобе босун, тӏаде дугӏаги гьабун, гьезухъе кьолаго Гӏисаца абуна:
– Гьаб буго нужее гӏоло къурбанлъулеб дир черх. Дунги ракӏалде щун, нужецаги гьабе гьадин.
20Кванан рахъараб мехалъ, додинго щурунги кодобе босун, Гӏисаца абуна:
– Гьаб буго нужее гӏоло тӏолеб дир би – Цӏияб Къотӏи щулалъиялъе тӏолеб би. 21Амма дида цадахъ гьаб кванде квер бегьана дие хилиплъизе вугев чиясги. 22Гьедин Гӏадамил Лъимер жиндирго къадаралде щвела, амма гьесие хилиплъарасдеги балагь бачӏина.
23Гьел цоцаздехун гаргадизе лъугьана: щивдай гьевилан, лъицадай гьеб гьабизехъин бугебилан.
«Бищунго кӏудиявлъун щив кколев?»
24Цоги гьезда гьоркьоб дагӏба-къец ккана жидеда гьоркьов бищунго кӏудиявлъун щивдай кколаян. 25Гӏисаца гьезда абуна:
– Парччахӏзабаз халкъазе ханлъи гьабула, гӏадамазги гьел кверщелчагӏи рикӏкӏуна лъикӏлъи гьабулел чагӏилъун. 26Амма нужеда гьоркьоб гьедин букӏине бегьуларо: нужер бищунго кӏудияв чӏа бищунго гьитӏинав вугев гӏадин, кверщел бугевги чӏа цогидазе хъулухъалъе. 27Щив кӏудиявлъун рикӏкӏунев: кваналев вугев чийищ яги кваналезе хъулухъалъе чӏарав чийищ? Кваналев вугев чи гурищ? Гьале дун гьанив нужее хъулухъалъе чӏун вуго. 28Нужни дида цадахъ къо хӏехьарал чагӏи руго. 29Гьединлъидал дир Инсуца дие ирсалъе кьураб Парччахӏлъи дица нужееги ирсалъе толеб буго. 30Дир Парччахӏлъиялда нужги дида цадахъ квана-гьекъолел рукӏине руго ва Исраилил анцӏила кӏиябго наслуялъе суд гьабизе тахазда тӏад гӏодорги чӏезе руго.
«Дуца дидаса инкар гьабила»
31Симон! Симон! Ворегиха! Илбисалъ гьарана нуж цӏалкӏизе риччайилан, цӏалкӏица кколелги кколарелги ролъул мугьал ратӏа гьарулеб гӏадин. 32Дица дуе дугӏа гьабуна мун иманалдаса ватӏалъунгутӏизе, цинги дида аскӏове тӏадвуссараб мехалъ, дурго вацазул ракӏбатизабе.
33Пётрица гьесда абуна:
– Я, Бетӏерчӏахъад! Дуда цадахъ туснахъалде инеги хвезеги хӏадурав вуго дун.
34Амма Гӏисаца гьесда абуна:
– Дица дуда абулеб буго, Пётр: радакье хӏелеко бахъиналде дуца лъабцӏулго абила дун дуда лъаларилан.
Гӏисаца хӏадурлъейилан абула
35Гӏисаца гьезда абуна:
– Я гӏарац лъун таргьа босичӏого, я къайи лъун къвачӏа босичӏого, я хисун ретӏине хьитал росичӏого дица нуж ритӏараб мехалъ, сундулниги къварилъи букӏанищ нужее?
Букӏинчӏилан жаваб кьуна гьез.
36Гьес гьезда абуна:
– Гьанже гӏарцул таргьа бугес гьебги цадахъ босе, гьединго къвачӏаги босе. Хвалчен гьечӏес, чухъа-гужгатги бичун, гьеб босизе санагӏат гьабе. 37Дица нужеда абулеб буго: «Гьев такъсирчилъун рикӏкӏина», – ян Илагьиял Тӏухьдузда дир хӏакъалъулъ хъван букӏарабги тӏубазе буго, дир рахъалъ букӏараб кинабго гьанже тӏубазехъин бугелъул.
38– Я, Бетӏерчӏахъад! Гьале, кӏиго хвалчен буго гьаниб, – ан абуна гьез.
– Гӏела, – ян абуна Гӏисаца гьезда.
Зайтуналъул магӏарда Гӏиса Аллагьасде гьардола
39Цинги гьениса къватӏиве вахъун, кидаго гӏадин, Зайтуналъул магӏарде ана гьев, муридалги рахъана гьесда хадур. 40Доре щведал, Гӏисаца гьезда абуна:
– Гьари-дугӏаялде русса, нужго къосинарунгутӏизе.
41Рехараб гамачӏ щолеб манзилалъ гьездаса рикӏкӏадегӏанги ун, суждаялдаги чӏун, дугӏа гьабизе лъугьана Гӏиса. 42Гьес абулеб букӏана:
– Я, дир Эмен, дур хӏукму бугеб батани, гьеб хвалил лълъар гьекъезабуге дида. Амма дие бокьухъе гуреб, дуего бокьухъе букӏине биччанте.#22:43-44 Инжилалъул цо-цо хъвай-хъвагӏаязда ратула гьадинал калимабиги:43 Зодисан рещтӏун малаикас гьесул ракӏ къвакӏизабуна. 44 Гьебмехалъ рекӏелъ кутакаб хӏалуцингун дагьавги цӏикӏкӏун гьардезе лъугьана гьев Аллагьасде. Бидул тӏираби гӏадин тӏинкӏулел рукӏана ракьалде гьесул гӏетӏул гарал.
45Дугӏаги лъугӏизабун, муридазда аскӏове щведал, пашманлъиялъ тату хун, кьижун ратана Гӏисада гьел.
46– Щай нуж кьижарал? – ан абуна гьес. – Тӏаде рахъа ва гьари-дугӏаялде русса, нужго къосинарунгутӏизе.
Гӏиса ккун вачун уна
47Гӏисаца гьедин абулаго, гьале тӏаде щвана гӏемераб халкъ, ва цеве-цеве вукӏана дол анцӏила кӏигояздасан цояв Ягьуда абулев чиги. Гӏисада убач гьабизе аскӏовегӏан вачӏана гьев. 48Гӏисаца гьесда абуна:
– Ягьуда! Убачги гьабунищ дуца Гӏадамил Лъимер тушбабазухъе кьолев вугев?
49Гьениб ккезехъин бугеб иш бихьидал, сверухъ рукӏараз Гӏисада абуна:
– Я, Бетӏерчӏахъад! Хвалчаби рахъилищ? – ан. 50Гьезул цояс хвалчен кьабун кӏудияв кашишасул цо рагьтӏателасул кваранаб гӏин къотӏана.
51– Гӏела! Те! – ян абуна гьезда Гӏисаца ва, квер хъван, дов рагьтӏателасул гӏин сахлъизабуна.
52Жинда хадур рачӏарал чӏахӏиял кашишзабаздаги, Мукъадасаб Рукъ цӏунулел рагъухъабазул бутӏруздаги, чӏухӏби-хӏакимзабаздаги Гӏисаца абуна:
– Хвалчабигун, тӏилалгун, хъачагъ кквезе рачӏунел кинигин, рачӏун руго нуж дун вачине. 53Щибаб къоялъ нужеда цеве Мукъадасав Рокъов вукӏунаангури дун, гьениб диде квер борхичӏо нужеца. Амма гьанже нужер заман бачӏун буго, бецӏаб къуваталъухъе#22:53 Шайтӏан-илбис абураб магӏна буго гьелъул. кверщел щун буго.
Пётрица Гӏисадаса инкар гьабула
54Ккун вачун гьез Гӏиса кӏудияв кашишасул бакӏалде щвезавуна. Нахъа-нахъа чӏун гьезда хадув вачӏунев вукӏана Пётрги. 55Гьеб минаялъул азбар бакьулъ цӏаги бакун, сверухъ гӏодор чӏана рагъухъаби. Гьезда гьоркьов Пётрги вукӏана. 56Цӏадухъ гьев вихьидал, гьесухъ ялагьунги чӏун, цо гъаравашалъ абуна гьавги досда цадахъ вукӏанилан. 57Пётрица, нагӏадала ккун, абуна:
– Дида лъаларо, яц, гьев.
58Гьелдаса гӏемер мех иналдего, цоги чиясги абуна, гьев вихьидал, мунги дозул чи вугилан. Пётрица абуна:
– Гуро, гьудул.
59Сагӏатгӏан заман индал, цоги чияс цӏакъ ракӏчӏун абуна:
– Гьав хӏакъикъаталдаги досда цадахъ вукӏарав чи вуго, Галилеялдасалъидалха гьавги, – ян.
60Амма Пётрица абуна:
– Дуца бицунеб жо щиб, гьудул?
Гьебсагӏат хӏелеко гӏегӏедизе лъугьана. 61Гьебмехалъ гьесдехун вуссун Пётрихъ валагьана Тӏадегӏанав Гӏиса, ва Пётрида ракӏалде щвана хӏелеко бахъиналде лъабцӏул дуца жиндаса инкар гьабилилан Тӏадегӏанав Гӏисаца жиндаго абун рукӏарал рагӏаби. 62Къватӏиве ун гӏек-гӏекиялда гӏодана Пётр.
Гӏиса тӏадегӏанаб судалда цеве чӏезавула
63Гӏиса цӏунун рукӏарал гӏадамаз гьев къабихӏ гьавулев вукӏана, гьесда кьабулеб букӏана. 64Беразда чӏортоги бухьун абулаан, мун авараг ватани, лъица кьабурабали бицейилан. 65Цогидалги къабихӏал-инжитал рагӏаби гӏемер абуна Гӏисада гьез.
66Дуниял рогьараб мехалъ, халкъалъул чӏухӏби-хӏакимзабиги, кӏудиял кашишзабиги, диниял гӏалимзабиги данделъана гьенире, Гӏисаги вачун вачӏана суд гьабулеб рокъове.
67– Бице, мун Масихӏищ? – ан гьикъана Гӏисада.
68Гьес абуна:
– Дица жаваб кьуниги, нуж божиларо. Дица суал кьуни, нужеца жавабги кьеларо. 69Гьанжеялдаса нахъе Гӏадамил Лъимер гӏодов чӏезе вуго Къудратав Аллагьасул кваранаб рахъалда.
70Киназго гьикъана:
– Гьедин батани, мун Аллагьасул Васищха?
Гӏисаца гьезда абуна:
– Нужецаго абулеб бугогури дун гьев вугилан.
71Гьез абуна:
– Цоги нугӏзал щай нилъее. Гьасул жиндирго кӏалдисан рачӏарал рагӏаби рагӏанагури нилъеда.
Currently Selected:
Лукаца бицараб Рохалил хабар 22: AvrNT
Tõsta esile
Share
Copy
Want to have your highlights saved across all your devices? Sign up or sign in
© Библия таржама гьабиялъул институт Москва 2008