YONI 8
8
Minana vivila ibanaisi leikikailasi
E taitala taitala ilokaiasi osi bwala.
1Mitaga Yesu ilokaia Koya Umilela Olibe.#Koya makwaina katitaikinela mapilana Yerusalem opilibomatu, sakala Kidironi mapilana ewaiwa. 2E bulubuvisiga ikaimilavau wa Bwala Kwebumaboma, e tomota komwaidosi imakaiasi matauna; e isili, ivituloki#Omitibogwa kidamwa tovituloki mwada biuvituloki ikugwa bisili e tomota binikolaisi makateki bivitouula la vituloki. matausina. 3E toninitalapula paila Karaiwaga toyo Parisi imaiyaisi natana vivila leibanaisi tutala leikikailasisi. E isailisi minana omitasi mabudona. 4Ilukwaisi matauna, kawasi, “Tovituloki, lakabanaisi minana tutala leikikailasisi. 5E ola Karaiwaga Mosese igini kidamwa bitakabidikunaisi availa ivagi makawala. Yokugwa avaka kudoki paila minana?” #Tol 20.10; Kak 22.22-24 6Si biga makawala mwada biwakolaisi matauna, kidamwa bibanaisi kabotabinona. Mitaga Yesu isitotu, e deli misikwaikwela iginigini opwaipwaia.
7Mitaga tutala ikatupoivauwaisi, isimalaula e iluki matausina, kawala, “Ibodi taitala yokomi gala isim la mitugaga biluvabogwa dakuna baisa minana.” 8Isitotu tuvaila, e deli misikwaikwela iginigini opwaipwaia. 9Mitaga tutala ilagaisi baisa, komwaidosi isusunapulasi taitala baisa taitala, e kasi tommoya leikugwasi; e kalamwaleta wala Yesu isisu toyo minana eitotu omatala matauna. 10E Yesu isimalaula e ikatupoi minana, kawala, “Ve! Am mtosina? Ki, gala availa ikamogaim?”
11E ikaibiga, kawala, “Tomoya, gala wala availa.”
E Yesu ikaibiga, kawala, “Makawala goli yeigu gala bakamogaim. Kula; tuta oluvi taga kumitugaga tuvaila.”#Bidubadu buki pilabubogwa gala wala iginisi 8.1-11. Mimilisi iginisi kala katumkovila Yoni 21.24, mimilisiga ivigakaisi kala katumkovila Luka 21.38, e pilatala eisaili kala katumkovila Yoni 7.36.
Yesu kala lumalama valu watanawa
12E tuvaila Yesu ilivala baisa matausina, kawala, “Yeigu kala lumalama valu watanawa; availa ibokulaigu gala bililoula odudubila, mitaga bikau momova kala lumalama.” #Md 5.14; Yn 9.5
13E Parisi ilukwaisi matauna, kawasi, “Kukukwamitulaim titoulem; m kwamituli gala ikibuboti avaka.” #Yn 5.31
14Yesu ivitakaula, kawala, “Kalubikoya akamituli paila titoulegu goli, ulo kamituli baisa mokwita; paila anikoli ammatoya lama e ambaisa bala, mitaga yokomi gala kunikolaisi ammatoya lama, kaina ambaisa bala. 15Yokomi kuniganagasi makawala mina watanawa si kateta; yeigu gala availa akamogi. 16E kidamwa bakamwaga ulo kamwaga baisa mokwita, paila gala agumwaleta bakamwaga mitaga kamataiyu Tamagu agu towitala. 17E ola Karaiwaga Mosese igini baisa makawala; kidamwa taiyu tomota bisolasi makawala paila avaka, e baisa biga mokwita. 18Yeigu akamituli paila titoulegu, e Tamagu agu towitala isilasola paila yeigu.”
19Mapaila ikatupoiyaisi matauna, kawasi, “Ambaisa Tamam?”
Yesu ikawota, kawala, “Gala kunikolaisi yeigu kaina Tamagu; kidamwa kunikolaigusi, bukunikolaisi Tamagu goli.”
20Biga mabigasina leililivala katitaikina kabosakaila semakavi, tutala iuvituloki wa Bwala Kwebumaboma. E gala availa iyosi matauna, paila la tuta igau gala bima.#Kugisi Yn 2.11 kala katumiki.
Ambaisa bala gala igagabila bukuwaisi
21Tuvaila Yesu iluki matausina, kawala, “Basilavaimi. Bukunevaigusi, mitaga bukukwaligasi paila uula mi mitugaga. Ambaisa bam, gala igagabila bukuwaisi.”
22E mina Yudia ikaibigasi, kawasi, “Ki, kaina bilou? Paila kawala, ‘Gala igagabila bukuwaisi ambaisa bam.’”
23E iluki matausina, kawala, “Yokomi mina watanawa; yeigu guma walakaiwa. Yokomi tosisula valu watanawa, e yeigu gala. 24Baisa uula lalukwaimi bukukwaligasi paila uula mi mitugaga; paila kidamwa gala kudubumaisi ‘Yeigula matauna’#Baisa ikibuboti maigana Yaubada omitibogwa eikavitagi mwada bivituloki titoulela baisa mina Isireli (kugisi Sun 3.14). goli, bukukwaligasi paila uula mi mitugaga.”
25Mapaila ilukwaisi matauna, kawasi, “Availaga yoku?”
Yesu iluki matausina, kawala, “Bogwa lalukwaimi metoya wa tuta ikugwa.#Bogwa lalukwaimi metoya wa tuta ikugwa. Gagabila bitagini, “Wi! Ammakawalaga ibodaigu balukwaimi avaka!” 26Isisu bidubadu vavagi balivala banagi paila yokomi; mitaga matauna eiwitalaigu ikamokwita; e avaka lalagi metoya baisa matauna, makwaisina asilasola baisa mina watanawa.”
27Gala ivitusaisi kidamwa ilivala baisa matausina paila Tamala. 28Mapaila Yesu ikaibiga, kawala, “Tutala bukulupaigusi#Kugisi Yn 3.14 kala katumiki. yeigu Latula Tomota, wa tuta matutona bukunikolaisi ‘Yeigula matauna’, e tuvaila bukunikolaisi gala bavagi avaka metoya baisa titoulegu, mitaga alilivali vavagi makwaisina makawala Tamagu ivitulokaigu. 29E matauna eiwitalaigu isikailigu; gala isilavaigu agumwaleta; paila tuta tuta auvagi avaka iyomwasali matauna.”
30Tutala ililivala makawala, bidubadu idubumaisi matauna.
Biga mokwita bitanekwaimi
31Mapaila Yesu iluki mina Yudia, availa availa bogwa leidubumaisi matauna; kawala, “Kidamwa bukusisuaisi ogu vituloki, yokomi mokwita ulo toligalega. 32E bukunikolaisi biga mokwita, e biga mokwita bitanekwaimi.”
33Ivitakaulokaisi matauna, kawasi, “Yakamaisi tubumaisi Eberaam, e gala kwaitala tuta availa bikatupipaimasi paila bikaraiwogaimasi. Ammakawala lokukwaibiga, kawam, ‘Bitanekwaimi’?” #Md 3.9; Lk 3.8
34Yesu ivitakauloki matausina, kawala, “Biga mokwita alukwaimi, availa imitugaga, mitugaga makwaina bogwa ikatupipi matauna, paila bikaraiwogi matauna. 35E avai ula bogwa ikatupipaisi paila bikaraiwogaisi, matauna gala bisigaga baisa tolibwala yumyambwata; mitaga tolibwala latula isigaga yumyambwata. 36Mapaila kidamwa yeigu Latula batanekwaimi, bukusibwabwailasi mokwita. 37Anikoli tubumi Eberaam; mitaga yokomi mwada bukukwatumataigusi, paila ulo biga gala bikanubwabwaila olumoulemi. 38Alilivala avaka Tamagu bogwa ivitulokaigu, mitaga yokomi goli kuuvagaisi avaka tubumi bogwa ivitulokaimi.”
Yokomi metoya tubumi Diabolo
39Ivitakaulokaisi matauna, kawasi, “Yakamaisi tubumaisi Eberaam.”
Yesu iluki matausina, kawala, “Kidamwa yokomi tubumi Eberaam, bogwa bukuvagaisi la vavagi Eberaam. 40Mitaga baisa tuta mwada bukukwatumataigusi, yeigu goli, bogwa lalukwaimi biga mokwita avaka lalagi metoya baisa Yaubada; Eberaam gala eivagi makawala. 41Yokomi kuuvagaisi la vavagi tubumi.”
Ilukwaisi matauna, kawasi, “Gala isikubukubuyaimasi. Tamamasi taitala, Yaubada goli.”
42Yesu iluki matausina, kawala, “Kidamwa Yaubada Tamami, bogwa bukuyebwailigusi; paila yeigu lama matoya baisa matauna e laviloubusi lama. Paila gala lama titoulegu, mitaga leiwitalaigu. 43Avaka paila gala bukukwatetasi bonagu? Uula wala gala igagabila bukulagaisi ulo kamituli. 44Yokomi mokutoyasi baisa tubumi Diabolo, e magimi bukuvagaisi avaka nanola tubumi. Metoya wa tuta ikugwa, matauna tokwatumata. Gala kwaitala tuta bikamokwita, paila kamokwita gala isisu olumoulela matauna. Tutala isasopa, ililivala avaka bonala mokwita; paila matauna tosasopa e tabula sopa. 45Mitaga yeigu alilivala avaka mokwita, e mauula gala kudubumaigusi. 46Kaina availa yokomi bikamitulaigu kidamwa lamitugaga? E kidamwa alilivala avaka mokwita, avaka paila gala kudubumaigusi? 47Kidamwa availa eima metoya baisa Yaubada, matauna bilagi la biga Yaubada. Baisa uula gala bukulagaigusi, paila yokomi gala mokutoyasi baisa Yaubada.”
Igau gala bikaloubusi Eberaam, yeigula asibogwa
48Mina Yudia ivitakaulokaisi matauna, kawasi, “Ki, kaina gala lakakamokwitasi kidamwa yoku guma Sameria#Kugisi Yn 4.4 kala katumiki. e baloma gaga leisikailam?”
49Yesu ivitakaula, kawala, “Baloma gaga gala bisikailagu; mitaga atemmali Tamagu e yokomi gala kutemmalaigusi. 50Yeigu gala anainevi agu yakaula; mitaga taitala inainevi agu yakaula, e matauna goli einagi gala isim agu pakula. 51Biga mokwita alukwaimi, kidamwa availa bikabikuwoli ulo vituloki matauwena gala bikaliga.”
52Mina Yudia ilukwaisi matauna, kawasi, “Baisa tuta kavitusaimsi baloma gaga eisikailam. Eberaam ikaliga e tuvaila tovitoubobuta; mitaga yoku kawam, ‘Kidamwa availa bikabikuwoli ulo vituloki, matauwena gala bikaliga.’ 53Ki, yoku kukwalisau tubumaisi Eberaam, matauwena leikaliga? E tovitoubobuta tuvaila ikaligasi. Avaka kudokaim availa yoku?”
54Yesu ivitakaula, kawala, “Kidamwa bayakawolaigu titoulegu, uli yakaula gala dimlela. Tamagu goli iyakawolaigu - e paila matauna lokukwaibigasi, kawami, ‘Matauwena goli da Yaubadasi.’ 55E gala kunikolaisi matauna, mitaga yeigu anikoli matauna. E kidamwa balivala, ‘Gala anikoli matauna’, basasopa goli, makawala yokomi; mitaga anikoli matauna e akabikuwoli la biga. 56Tubumi Eberaam imwasawa paila bigisi ulo tuta; e, igisi, imwamwasila nanola.”
57Mapaila mina Yudia ilukwaisi matauna, kawasi, “Kam taitu gala iboda kweluwolima e, ki, yoku lokugisi Eberaam?”#Yoku lokugisi Eberaam? Mimilisi buki pilabubogwa iginisi, “Ki, Eberaam bogwa leigisaim?”
58Yesu iluki matausina, kawala, “Biga mokwita alukwaimi, igau gala bikaloubusi Eberaam, yeigula wala Tosibogwa.”#Kugisi mailela 24 kala katumiki.
59E isauwaisi dakuna mwada bikabidikunaisi matauna; mitaga Yesu ivakium, e isilavi Bwala Kwebumaboma.
Currently Selected:
YONI 8: PNGKIR
Tõsta esile
Share
Copy
Want to have your highlights saved across all your devices? Sign up or sign in
Kiriwina Bible (Buki Pilabumaboma) © Bible Society of Papua New Guinea, 2011.