THAUREYMEI 3
3
Maansei rui Latliammei
1 Ringhpouc Ravguangc rui damcloumei pang khou nrui hei karouh si liang e. Nrui tei rui ntumei khou tei thanv e, “Pikwan khou naimei tabui bui thai pwni tu nuh mak ge twna Ravguangc rui saloumei tuang nai changhna cho?”#Nda 12.9; 20.2
2Ntumei tei rui nrui khou tei daw the, “Pikwan khou naimei thingbang katana thai tu nuh de; 3tiki pikwan kachung khou nai bammei thingbang thai tei thu tu nuh mak ge, kahi sini kahi nuh mak ge; tu rap e thei aney theic puni the, twna Ravguangc rui aney khou kadylou the.”
4Nrui tei rui daw the, “Kiuc hamh e; nangney khat sini theic ni tuang hamh e. 5Nangney hei tei tu e thei nangney Ravguangc kumc puni the twmei Ravguangc kamei thayna hei tei samei tuang e.”
6Kumna mipui tei rui mi thingbang tei adih howgay cho khatni mi thai tei adih tugay ni cho twna zauclou the, khatni ningting pat re thei adih gay ni cho twmei kamei kakhanh the. Kumna kamei rui mi thai tei laana tu the. Kamei rui kagaanv khang ni tii tina kamei ni tu the. 7Khoutei kaney mik rak pat the,Kaney gaanvnei tei paliuc the twmei kaney thay the; kumna tadutnuy hui kariu lana nsuay the.
8Mi nungc tingzyn nchu nripui ganv khou Ringhpouc Ravguangc pikwan khou tei tat bammei khwan chu lana kaney thingbang ding khou dup the. 9Tiki Ringhpouc Ravguangc rui maanseipu ta tei kaucna “Nang tabui thangc bam tu cho” twna sa the.
10Kamei rui sa the, “Pikwan khou tei ai nang khwan chu the; kumna ai nang ta pingna nkamh the. Kalam thu ai paliuc the.”
11“Nang paliuc e twmei thow rui nang khou salou pwna cho? Ai rui nang ta tu riu twna kadyloumei tingthai tei nang tu lana cho?” twna Ravguangc rui sa the.
12“Ai lev bam nchamc khang nang rui tiiloumei ntumei tei rui mi tingthai tei tii pwna ai tu the” twna mipu tei rui daw the.
13“Tabui swna nang heikumna sw bam tu cho?” twna Ringhpouc Ravguangc rui ntumei khou tei sa the. “Nrui rui ata duaih pwna ai tu tina the,” twna ntumei tei rui daw the.#2 Ko 11.3; 1 Ti 2.14
Ravguangc Latzan
14Khoutei Ringhpouc Ravguangc rui nrui khou tei sa the, “Mi zaeng rui nang ta dandi tii puni the; khouringh kaguayna pang khou rui nang mi syang hei phungc nina the: ntaw khou rui thauna nang bung rui tuicna tat puni the, khatni ringh saanv nang taniang tuna lungc puni the. 15Ai rui ntumei lev nangney ta tihowmulou puni the; kakikta khatni nang kikta hei howthou tanh tan bam puni the. Kakikta rui nang py swpiak puni the, kumna nang rui kaphaychwm khou nchow puni the.”#Nda 12.17
16Kamei rui ntumei khou tei sa the, “Nang pumc nrit pwkhou nang ramrianra ai rui ti-mbu nlailou puni the khatni ryanrana nah puanc puni the. Kum bam sini nang gaanv ta kahawna lungc puni, kumna nang kabangc khou bam puni.”
17Kamei rui nggaanvmei khou tei sa the, “Nang now lat chuna ai rui tu riu twna kadyloumei thai tei nang tu the. Hei zaeng rui kandih hei nang zaeng rui syang phungc puni the. Nang panty saanvsaengh nang bung khang ryanrana taancna lungc puni the.#Ibr 6.8 18Nang khang kandih khou sauh bang puc bang thau padik puni the, nang nwmbangc thingnuy paannu tu puni the. 19Nang ta kasiamhloumei taniang khou nang hanc gut dat mak saanv nang tuang talanvdui manv rui nang tu puni the. Kalam thu nang hei taniang e, nang taniang khou hanc gut dat nina e.”
20Adam rui kanow ta Evi twna kaw the, kalam thu kamei hei maansei katana pui e. 21Kumna Ringhpouc Ravguangc rui ramhgic phey Adam lev kanow khang kasiamhna kaney khang piulou the.
Adam lev Evi ta Pikwan khou rui Nthaupatmei
22Khoutei Ringhpouc Ravguangc rui sa the, “Ntaw thu maansei hei aniu kumc the kumna simei gaymei thaymei ningting kaney khou nai the. Kum thena ringhmei thingbang thai tei reituna tingsaengzaeng ringc bam kan khang nuh the.”#Ibr 6.8 23Hei zaeng rui Ringhpouc Ravguangc rui kaney ta Eden pikwan khou rui nthau patna kata damcloumei taniang khou tei kailau titaanc kan the. 24Mi ringhmei thingbang daeng khou tei meic gaanv khat na sini guang mak khang mi pikwan tuang neihpat biak thangc kerubim nunc lou the khatni kazat kathuic kahai nuhmei maibwang baengsaeng rui mi ringhmei thingbang chaeng tei rigaanvlou the.
Currently Selected:
THAUREYMEI 3: RONGBSI
Tõsta esile
Share
Copy
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.