LUK 20
20
Mele Jisu Kekvu Rüla Ketso Kethyü
(Mt 21:23-27; Mk 11:27-33)
1Khenyüme a-le Kershvuka nyu me senthyü lo jolokegwa zope me hi kebin ka peshükeda ju lo lesükeshatsin ju le anyugun pelü ju zen-o ryü, lo anyugun le a-ka, 2“Nyu kekvu sen-o nle tha hidan hi thyü hü nla? Nmvue segü le nno hithyülo tse kethyü kekvu pe ntsü la?” pe agun ka zoshülo.
3Tsüselo Jisu ko anyugun ka, “Ako hagun ka tha nme ketso ti. Lo aka zoshü ta, 4Johan Baptist gü tsüle tsangge le temi kanyu la?” tson-o ketsoshü.
5Tsüselo anyugun le anyugun npvü kenthon-o, “Ngun le tsangge letse kethyü zolo; a-le ngun ka, ‘Tsonlo hagun le nyuthyüo tenyenlo mvula?’ tson so ti. 6Lo temi kanyu letse shülo, ‘temi hi aphu tso pe njon soti,’ kechamvule anyugun le Johan le sidyükeshanyu nme letse kehü genyu.” 7Tson-o anyugun le, “Agun le a-le dikipon ryü yo shamvu,” tse kethyü zola.
8Tsontsin Jisu ko anyugun ka, “Ako nyu kekvu sen-o tha hidan thyülo hüyo tsü pe hagun ka zo loho,” tsonla.
Vain Low Ntsen Kehügü Pe Jokejvü Kezo
(Mt 21:33-46; Mk 12:1-12)
9Tson-o a-le jokejvü hilo pe temi dan ka zoti tseo, “Temi nme le vain low thyüme tsüshüo khipe low ketsünyu ju ben nyu shülao, rünyi kecha nme ki hü thonsa tinla. 10Lo a-le nsha kelo gwünkho ka anyugun le vain low nyu a-sha khipe a-tsü ti ado tseo a-gonyu nme nipe low ketsünyu tsüdan ka shü. Ai low ketsünyu dan tsüle a-vüo thame lope a-tsü mvuo a-no tinla. 11Lo tsüsikae a-le a-gonyu kechanyu nme nishü; ai anyugun le tsügü ko vüo a-nshwen sala, tson-o thame pe a-tsümvuo a-no tinla. 12Tsüselo a-le gwünshen ge gü ka ko nme nishü, ai anyugun le tsügüe vü pe no a-ge tejünshvu hyula njüo akhipe shwenla. 13Tsüselo vain low npugü le, ‘Ale nyu thyülo gwa tila? tson tseo, ale anyu a sogü nishüti; a nyugun ko anyugü we rühvulo ti ado.’ 14Ai low ketsünyu dan tsüle a-hyushü ntsin anyugun npvü kenthon-o, ‘Higü hile a-nyu ketsingü so, ngun a-dushvula nu! tsonla yatselo ngun le a-hon aphu khinlo gwa so!’ tson sola. 15Tson-o anyugun le a-nrhisü zen chwigü vain low ngwen ki a-dushvula.
“Kha, tsonlo vain low npugü le temi tsüdan ge nyu thyü tila?” Jisu le ketso. 16“A-le gü low ketsü tsüdan boshvula njüo vain lo tsügü tsü khipe low ketsü kechanyu ben nyu shüla ti.”
Lo anyugun le jo tsü shashü ntsin, “Aya, tson loshvu tsin lo!” tsonso.
17Jisu le anyugun nrilo njüo ketso-o,
“Tson yatselo nduka ‘Ka kethyünyu le khekela
tso gü
mele tsü lope a-quen nyu tso
kedagü thyülo laso,’ tson thu kenjü jo higü hi pe nyuthyü la mon? 18Temi higühigüe tso tsügü ge cheketsü gü a-jon ketakera lati; lo tso gü tsüle temi lihigü ge-e cheketsü gü, temi tsügüe kemphü hontse lati.”
Khajana Keshü Rüla
(Mt 22:15-22; Mk 12:13-17)
19Tsügwünkho ka tsü lesükeshatsin ju lo peshükeda ju le a-ten kelo rhiso; ai temi dan nshvula. Anyugun le tsonkethyü tsüle kechamvule a-le anyugun genyu jokejvü tsügü tsü zo tsekethyü rüchün kela genyu. 20Tson-o anyugun le a-nden-o a-jo tenlo njüo a-ten pe tejvü gü lo anyugun ahng ben nyu shüla titse kethyü rüchün-o me nishü. 21Lo tsüdan tsü le a-ki gü, “Senkethyü gü, nle joketsin ka tha zokehü lo me ge nkenyünyu thyü mvuo Sunggigü jvü gerho sen-o zope mehi kehü, agun le sha tsentsü laso. 22Agun no Kaisar khajana shü zü le shüzü mvula?” tson-o a-ketso.
23Ai a-le anyugun do shalo njüo anyugun ka, 24“Khülo, pisa tsü pe a hishü shwi. Hile segü men lo segü zan thu njü nla?”
Tsüselo anyugun le, “Kaisar le,” tsonshü.
25Tsügenyu a-le anyugun ka, “Tsonyatselo Kaisar hon lope Kaisar tsü lalo; lo Sunggigü hon lo pe Sunggigü tsüla lo.”
26Tsükatsü anyugun le me mhundyü nyu a-jo tenlo hola; lo anyugun le a-jo genyu anyugun dun thyüo nma tse kü tinla.
Rhünni Keso Rüla
(Mt 22:23-33; Mk 12:18-27)
27Tsüselo Sadukinyu, temi le rhünni keso ndi letse kehünyu dan me le ryüo a-ka, 28“Senkethyü gü, Mosa le agun ka, temi nme le a-nu le bin-o a-nyu ndio sila lo, a-sikezen gü no tenunyu tsügi zen bin-o a-tsagü tsipwen yhunshü lotse thu njü. 29Lo agun dan nyu tsasikezen nyu mi tsenyü le bin hü laryü, a-kerigü le tenu loshüo a-nyu ndi ketseka sila. 30Lo tsüsigü ko tsü hontse la; tson-o mishen güe tenunyu tsügi zen bin. 31Lo tsühontse anyugun mi tsenyü aphu anyugun nyenyu ndio si küla. 32Tson-o kenkhin ki we tenugi ko sila. 33Kha, tsonlo temi le rhünni keso ki tenunyu tsügi le temi tsüdan digü nu thyü tila? Anyugun mitsenyü aphu a-zen bin kethyü genyu,” tson-o ketsoshü.
34Tsüselo Jisu le anyugun ka, “Kazü hinyu we temi le kalu tenulo kethyü jvü pe tsü hünyo, 35ai kazü ligü nyu gunlo kekünyu lo rhünikeso siki we kalu nmvue tenukelo jvü thyü pe tsü loho. 36Lo anyugun le si-e loho so; kechamvule tsangge lokethyü nyu zen-o keme thyü tinla nrün genyu. Tsüntimvule rhüni kesonyu thyüo Sunggigü nyenyu thyü tinla tiso. 37Lo kesinyu le rhünikeso rüla Mosa ko senhvu ge zokeshü rüla nyu Npugü le, ‘Abraham Sunggigü, Isak Sunggigü, Jakob Sunggigü,’ tseo zokeshü ka tsin pe hagun hishü la sele. 38Lo A-le kesinyu mvule kerhünnyu Sunggigü le. Kechamvule a-genyu tsü aphu rhün kebin genyu.”
39Tsüselo lesükeshatsin nyu peha le a-ka, “Senkethyü gü, nle zo tsentsü shü laso!” 40Kechamvule anyugunle a-ka thame ketso nshvu kela genyu.
Mesia Rüla
(Mt 22:41-46; Mk 12:35-37)
41Lo a-le anyugun ka, “Me le nyuthyüo Khrista no David nyugü letse hü nla? 42David le a-npvü nduka Lü lesü nyu,
‘Npugü le a Npugü ka:
43Ale n shwikerüchün nyu khipe
nphasin shüla kemvuthen,
nle aben njüzin bin tse
nye,’ tson zo njü.
44Lo David le a-ka, ‘Npugü’ tsonlo, nyu tsethyüo a-no David nyu thyülo gwa tila?” tson-o ketso sola.
Jisu Le Lesükeshatsin Nyu Kenkhin
(Mt 23:1-36; Mk 12:38-40)
45Tsüselo temi aphu kesha ka a-le senthyükelonyu dan ka, 46“Mirün ketseyho sen kehü, lo hakethyü bin nyu meno a-kelu kehü, lo sinagog ka nyukedanyu bin le a-kenyü kehü lesükeshatsin nyu genyu hagun petsü lo nye. 47Tsüdan le maginyu ka khintyü hünyo, lo kerokon-o kehithyü thon kehü gwünzin le; tsüdan le me nyeki a-shaja tsenkvu ti!”
Currently Selected:
LUK 20: REGSBSI
Tõsta esile
Share
Copy
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.