GENESIS 19
19
Sodom Mite Khelhdan
1Huan angel nih in nitaklam in Sodom khua aphasuk ua, Sodom khokulh kongkhak ah Lot ana tu hi. Lot in amaute ana mu a, va tuak ding in adingh a, amai a lei si in chibai abuk a, 2“Ngai un, ka toupate aw, hehpih in na sikha inn ah hong lut phot unla, giak unla, na khete uh sil un. Na thou baih ding ua, na pai nawn na ding uh,” achi hi. Huan amau, “Hilou e, kholak ah ka giak zaw ding uh,” achi uhi.
3Himahleh ama'n nakpitak in akun a; akiang ah api a, huchi in a-inn ah alutta uhi. Ama'n meh abawlsak a, tanghou silngou soh louh akang a, aneta uhi.
4Alup ma un khopi a mite, Sodom khomite, veng teng a mi tengteng, atek-akhang in a-inn ava umkimvel uhi. 5Lot kiang ah, “Tuzan a na inn a hong lut mite koi a om uh ahia? Amau ka kithuahpih theihna ding un ka kiang uah hon pikhia in,” ahong chi uhi.
6Kongkhak bul ah akiang uah Lot ava pawt a, kongkhak akhak hi. 7“Ka unaute aw, hehpih in, hichi tel in gilou dah un. 8Ngai un, pasal' kithuahpih ngei nai louh tanu nih ka nei hi. Hon hehpih unla, na kiang uah amaute ka hon pikhe ding a, hoih na sak bang un, atung uah na hih na ding uh. Hiai mite tung ah zaw bangmah hih mahmah kei un. Hiai ding a ka insung a hong lut lah ahi ngal ua,” achi hi.
9Amau, “Hon hon mai in,” achi uhi. Amau mah in, “Hiai mi sop lai hiai a teng ding in ahong pem lut a, vaihawmpa a om maw atup vial. Tu'n amaute tung a hih sang in nang tung ah ka hihse zaw sem ding uh,” achi uhi. Lot abohta ua, kongkhak hihse ding in hon naih uhi. 10Himahleh mite'n akhut uh agolhkhia ua, akiang uah insung ah Lot akailut ua, kongkhak akhak bikbek uhi. 11Kongkhak bul a mite, aneu-alian mit atawsak ua, huchi in kongkhak amuzouta kei uh.
Lot In Sodom Apawtsan
12Mite'n Lot kiang ah, “Hiai mite lou hiai ah inkuanpih dang na nei hia? Na makpate, na tapate, na tanute leh khosung a na neih peuhmahte khua a kipan pikhia in. 13Toupa ma a, akikou husa uh anasat luat tak ziak in hiai khua hihmang ding ka hi uh. Hihmang ding in Toupa'n hon sawl ahi,” achi uhi.
14Lot apaikhia a, atanute kitenpih, amakpate kiang ah ava gen hi. “Thou unla, hiai khua a kipan pawtkhia un, Toupa'n khua hihmang ding ahi,” achi hi. Himahleh amakpate ngaih in chiamnuih thu gen bang lel ahi. 15Phalvak in angelte'n, “Thou inla, na zi leh hiai a na tanu nih omte pikhia in. Huchi lou in zaw hiai khua gawtna ah na mangkhawm kha ding uh,” chi in Lot anohta uhi. 16Himahleh a-awltat mahmah lai a, Toupa'n amah ahehpih ziak in, mite'n ama khut leh azi khut leh atanu nihte khutte manbet in apikhia ua, kho polam ah akoihta uhi. 17Huan polam a apikhiak khit un, khat in akiang ah, “Na hinna ding in taikhia in; na nunglam nga ke'nla, phaizang himhim ah leng khawl ke'n. Huai tang sang ah suahtak san in, huchi lou in zaw na mangkhawm kha ding hi,” achi hi.
18Himahleh Lot in akiang uah, “Ka toupate aw, huai zaw hi kei hen. 19Ngai in, na sikha in na mitmuh in deihsakna atang a, ka hinna humbitna ding in zahngaihna thupi na hon musak lai hi. Himahleh huai tang sang ah zaw ka tai thei kei ding, thil hoih lou khat in hon pha in ka si kha ding hi. 20Ngai in, hiai khua taina ding in anaipen a, kho neuchik leng ahi. Aw, huai ah, kho neuchik ahi kei a hia! Hon taisak zaw in, huchi in ka hing ding hi,” achi hi. 21Ama'n, akiang ah, “Ngai in, hiai thil tungtang ah leng ka hon mang, na kho gen ka hihmang dah ding. 22Kin inla, huai ah tai in. Huai mun na tun mateng lah bangmah ka hihthei ngal kei a,” achi hi. Huaiziak in huai kho min Zoar chih in a-omta hi.
Sodom Leh Gomorrah Hihsiatna
23Zoar a Lot atun in leitung ah ni asuak khinta hi. 24Toupa'n Sodom leh Gomorrah kho tung ah van a Toupa kiang a kipan mei leh kaat azusak hi. 25Huai khuate, phaizang tengteng, khua a mite tengteng leh leitung a thilpoute tengteng ahihmang vekta hi. 26Himahleh Lot nung ah azi in nunglam a-en a, huchi in chikhuam ahong suakta hi.
27 Toupa ma a adinna mun ah beltak in Abraham ahohtou hi. 28Sodom leh Gomorrah kholam leh phaizang gam lam tengteng a-en hi. Ngai in, huai gam a meikhu, haltuina meikhu bang mai in akhutou ngoingoi hi. 29Huan hichi ahong hi a, Pathian in phaizang khopite, Lot tenna mun ngei ahihman lai in, Pathian in Abraham atheigige a, manthatna lak a pan Lot asawlkhia hi.
Moabte Leh Ammonte Kipatna
30Zoar a kipan Lot apaitou a, tang ah ateng a, atanu nihte leng akiang ah ateng uhi. Zoar ah lah ateng ngam kei a, amah leh atanu nihte kohawm ah atengta uhi. 31Huchi in atanu upazaw in anauzaw kiang ah, “I pa a-upata a, leitung tengteng dan bang a hon kithuahpih ding lei ah pasal khat leng a-om nawn kei hi. 32Kisa in, i pa uain i dawnsak ding a, huchi a i pa chisuan bei lou a i bawltheihna ding in akiang ah i va lum ding,” achi hi. 33Huai zan in apa uh uain adawnsakta uhi. A-upazaw alut a, apa kiang ah ava lum a; ama'n alup lam ana phawk kei a, athoh lam leng aphawk kei hi.
34Huan hichi ahong hi a, azing in a-upazaw in anaupangzaw kiang ah, “Ngai in, zan in ka pa kiang ah ka va lum a; tuzan in leng uain i dawnsak nawn ding a; nang va lut inla, huchi a i pa chisuan bei lou a i bawltheihna ding in akiang ah va lum in,” achi hi. 35Huai zan in leng apa uh uain adawnsak nawn ua; anaupangzaw athou a, akiang ah ava lumta hi. Ama'n alup lam aphawk kei a, athoh lam leng aphawk kei hi. 36Huchibang in Lot tanu nihte'n apa ua pan nau apai tuak uhi. 37A-upazaw in tapa anei a, amin Moab asa a, huai mi tulai a Moabte suangpa ahi. 38Anaupangzaw in leng tapa anei a, amin Ben-ammi asa a, huai mi tulai a Ammonte suangpa ahi.
Currently Selected:
GENESIS 19: PAITBSI
Tõsta esile
Share
Kopeeri
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.