Matiu 4
4
Biaŋinba ki Sintaanii din jamm Yisa
(Mak 1.12-13; Luk 4.1-13)
1Ki Yennu Seyeeŋ din te ki Yisa kɔɔ muuk ni a Sintaanii-n saa jammɔ. 2U din be leŋ ki ki dii siar dapiinna yennu ni nan nyiɔk, ki kon ji din tan soorɔ. 3Ki Sintaanii baar u boor ni ki tan yetɔ a “Li-i tee ki a set kii tee Yennu Bijaie, fan yet tana na ki lin kpant jeet ki a di.”
4Ki Yisa jiin ki yetɔ a “Li sɔb Yennu gbouŋ ni a ‘Jeet kuukɔɔ paak kaa te ki nirɔ be, ŋaan maan nba kur ki Yennu pak na paak.’ ”
5Li tonton na ki Sintaanii jiiu ki saan nanɔ Jerusalem, ki saa donnɔ Yennu jiantu ŋasaakak mɔpinyerik paak, ŋaan betɔ a 6“Li-i tee ki a set kii tee Yennu Bijaie, fan yukir mɔb nna na, kimaan li sɔb Yennu gbouŋ ni a ‘U sa te ki u malakanba-ii guua; bi sii dia-a nan bi nii ki a taar kan gbiat tann gbaa ki a la daŋi.’ ”
7Ki Yisa yetɔ, “Li bia sɔb Yennu gbouŋ ni a ‘Sɔɔ daa bikii u Yomdaanɔ Yennu.’ ”
8Ki Sintaanii bia din jiiu ki doo nanɔ jɔɔr nba fɔk bonchiann paak ki saa wannɔ tingbouŋ na yent kur kur nan li mɔkint, 9ŋaan betɔ a “Li-i tee ki a bo sa gbaan ki jiantin, n bo sa tura yent maŋ kura.”
10Ki Yisa betɔ, “Seetir nna Sintaanii. Li sɔb Yennu gbouŋ ni a ‘Nirɔ-ii jiantir u Yomdaanɔ Yennu kuukɔɔe, kii bia kii waa ŋɔɔ kuukɔɔ.’ ”
11Ŋanne ki Sintaanii ji din yaat ŋaan nyikɔ, ki Yennu malakanba sik ki tan teenɔ saauŋ.
Yisa nba din piin u toonn Galilee tiŋ ni biaŋinba
(Mak 1.14-15; Luk 4.14-15)
12Yisa nba din tan gbat nan Jɔɔnn kɔɔ dansarik na, ki u saan Galilee. 13Wa din baar Nasaret na u din ki yukir leŋi, ŋaan gar ki saan Kapenaum doo nba be mɔk-kpiŋ, Sebulun nan Naftali tiŋ ni na. 14Linba na din tun a lin gbeen Yennu sɔkinii Aisaya nba din pak linba na poe a
15“Sebulun tiŋ nan Naftali tiŋ nba be
Jɔɔdann mɔk-pootir po,
ki bia be mɔkgbeŋŋir boor,
nan Galilee tiŋ nba ki binba ki tee Juu teeb na kar li ni;
16binba be bunbɔnn ni na la yentjaann;
binba kar kuun bunbɔnn yent ni na la ki
yentu na yentir ki baatib.”
17Li yoo maŋ ki Yisa din piin ki mɔɔntir Yennu barŋanii ki teen niib a “Nyikin i biit man, kimaan Yennu naan dinu per na.”
Yisa nba din yiin jansoorteeb banna biaŋinba
(Mak 1.16-20; Luk 5.1-11)
18Yisa nba din somm Galilee mɔkgbeŋŋir kpiŋ na, ki u tan la nirɔ wunba ki bi yiu Simon ki bia yiu Piita na, nan u waarɔ Andru, ki bi lubin janlaauŋ mɔkir ni, kimaan bi din tee jansoorae. 19Ki u yetib a “I waan man, ki n sa te ki yii daak nifosaarii kii teen Yennu kaman nan ya so janii biaŋinba na.” 20Ki bi set din nyik bi janlaant yiama ŋaan waau.
21Wa din nyii leŋ ki saan tɔɔnn po waaminna, ki u la Sebedee nan u waas bannlee, Jems nan u waarɔ Jɔɔnn, ki bi be burgbetir ni ki lik bi janlaant; ki u yiimm. 22Li taakpaak ni, ki bi nyik burgbetir na nan bi baa, ŋaan waa Yisa.
Biaŋinba ki Yisa din te ki baatib paak na
(Luk 6.17-19)
23Yisa din lin Galilee tiŋ maŋ kura po, ki want niib Yennu maan, jiantu diit ni, ki mɔɔntir Yennu naan barŋanii mɔɔntii ki teemm, ki te ki binba mɔk yiarboorii boorii kur nan binba mɔk gbanantont kur paak. 24Ki bi din lin ki mɔɔnt u sann Siria tingbouŋ ni kura po. Ki bi din jikit baatboorii boorii kura, ki baat namm u boor ni: binba din yiar yiarbooru nba kur, gbanantont, binba din gbee nan narinbiit, binba din baa gbitgbia, nan gbanankpeenn damm, ki u din te ki bi paak. 25Ki niburchiauŋ nba din nyii Galilee, nan Doi-piik, nan Jerusalem, nan Judea, nan Jɔɔdann mɔk-pootir din bit ki waau.
Currently Selected:
Matiu 4: BIM
Tõsta esile
Share
Copy
Want to have your highlights saved across all your devices? Sign up or sign in