Judith 12
12
CAB. 12
1Eisht hug eh sarey dy choyrt lhieu stiagh ee raad va ny siyn argid echey soit: as doardee eh dy begin daue gaarlaghey j’ee jeh’n beaghey echey hene, as dy begin j’ee giu jeh’n feeyn echey hene.
2As dooyrt Judith, Cha n’ee#12.2 [mee]? jeh shen er aggle dy bee eh oyr peccah; agh vees farral er ny yannoo dou jeh ny reddyn ta mee er choyrt lhiam.
3Eisht dooyrt Holofernes ree, My aillys yn farral t’ayd, kys oddys mainyn ’lheid y chur dhyt? son cha vel unnane marin jeh dty ashoon.
4Eisht dooyrt Judith rish, Myr ta dt’annym bio, my hiarn, cha baar dty inney-veyl ny reddyn shen t’aym, roish my vees y Chiarn er n’obbraghey liorish my laue’s ny reddyn shen t’eh er chiarail.
5Eisht hug sharvaantyn Holofernes lhieu stiagh ’sy chabbane ee as chaddil ee derrey’n vean-oie, as dirree ee tra ve er n’gholl lesh cheu arrey yn voghrey.
6As hug ee fys Holofernes, gra, Lhig da my hiarn nish sarey ’choyrt dy vod dty inney-veyl goll magh gys padjer.
7Eisht doardee Holofernes da e ghard gyn ad dy lhiettal ee: myr shen duirree ee ’sy chabbane three laa, as hie ee magh ’syn oie, ayns coan Vethulia, as niee ee ee-hene ayns farrane ushtey liorish y champ.
8As tra haink ee magh, hir ee er y Chiarn Jee dy Israel eh dy ynsagh j’ee yn aght dy hroggal seose cloan e pobble.
9Myr, shen haink ee stiagh glen, as duirree ee ’sy chabbane, derrey ghow ee e beaghey ’syn astyr.
10As er y chiarroo laa ren Holofernes giens da e harvaantyn hene er-lheh, as cha chuirr eh veg jeh ny fir-oik gys y lhongey.
11Eisht dooyrt eh rish Bagoas yn fer-spoiyt, er e churrym va ooilley ny v’echey, Immee nish, as coyrlee yn ven Hebrewnagh shoh ta mayrt, dy heet stiagh hooin as dy ee as dy iu marin.
12Son cur-my-ner, bee eh nearey dooin, my lhigg-ys mayd raad da lheid y ven, fegooish v’er gheddyn y cheshaght eck; son mannagh dayrn mayd hooin ee, gearys ee orrin gys nyn scammylt.
13Eisht jimmee Bagoas veih kionfenish Holofernes, as haink eh huic, as dooyrt eh, Nagh lhig da’n ven aeg aalin shoh ve agglagh dy heet gys my hiarn, as ooashley ’gheddyn kiongoyrt rish, as dy iu feeyn, as ve reagh marin, as ve jeant yn laa shoh myr unnane jeh’n inneenyn ny Assyrianee ta shirveish ayns thie Nabuchodonosor.
14Eisht dooyrt Judith [rish], Quoi ta mish dy derr-in obbal da my hiarn? son shickyrys cre erbee ta e haitnys neem’s dy tappee y yannoo, as bee eh my voggey gys laa my vaaish.
15Myr shen hrog ee urree, as hug ee moo’ee e coamrey as ooilley e garmadyn ben, as hie yn inney-veyl eck as skeayl ee craitnyn meeley er y laare j’ee kiart jeeragh er Holofernes; hooar ee ad voish Bagoas son e hymmyd gagh laa, dy voddagh ee soie gys e bee orroo.
16Nish tra va Judith er jeet stiagh as er hoie sheese, va cree Holofernes er-cannoo lhee, as v’eh dy mooar geearree yn cheshaght eck; son v’eh farkiaght er caa dy violagh ee, er-dyn laa, honnick eh ee.
17As dooyrt Holofernes ree, Iu nish, as bee reagh marin.
18Eisht dooyrt Judith, Nee’m giu nish, my hiarn, er-yn-oyr as dy vel my vea er ny vooadaghey ayn-yms yn laa shoh, ny smoo na dy chooilley laa neayrys ruggyr mee.
19Eisht ghow ee as ren ee gee as giu kiongoyrt rish jeh shen ny va’n ven aeg eck-hene er n’aarlaghey j’ee.
20As ghow Holofernes taitnys mooar ayn-jee, as d’iu eh lane smoo dy feeyn ny v’eh er n’iu ec keayrt erbee ayns laa neayrys ruggyr eh.
Currently Selected:
Judith 12: YNAPBR
Tõsta esile
Share
Kopeeri
Want to have your highlights saved across all your devices? Sign up or sign in
© Yn Cheshaght Ghailckagh 1979, 2017
© Manx Gaelic Society 1979, 2017