Mak 1
1
1Gɔc de welpiɛth ke Yecu Kritho Wen de Nhialic.
2Acit man e cene ke gɔɔr ne Yithaya nebi,
Ye ŋɛmka, an tooc dutunydie tueŋ bi yi ŋɔɔr,
Bi dholdu lɔ juir;
3Ror de toŋ ye coot roor,
Ye juɛrka dhol de Bɛnydit,
Cakka dhɔlke lacith;
4Go Jɔn bɛn, yen man e ye kɔc baptith roor, ku ye ke wɛɛt ne baptinh de wel de piɔu ne pɛl de karac. 5Go kɔc ke piny de Judaya kedhia ku kɔc ke Jeruthalem lɔ roor te tɔ yen; go ke baptith ne ciir cɔl Jordan, ku gamki karɛcken. 6Jɔn ee ci rɔt piɔth ne alanh ci cuec ne nhim ke thɔrɔt, ku laak ethar, ku ye cam ne kɔriɔm ku miok de ciec. 7Ku yee weet, jiɛm, Ye ran tok abiɔth ɣa rir ne ɣɛn, an ce piath a ɣan ci bi guŋ ku dak cou de waarde. 8An ye we baptith ne piu; ku kabi we baptith ne Jɔŋdiit Lajik.
9Ku tɔ ne kaakolka, bɔ Yecu ne Nadhareth de Galili, go baptith ne Jɔn ne Jordanic. 10Elantoŋ e bii en bei ne piu yic, go nhial ŋem ne ci yic lɔ pec, ku Jɔŋdit ne cit guɔp kure ne lony yen: 11ku bɔ ror nhial, jiɛm, Ye yin ye Wendien nhiar, yin yan piɔu lɔyum.
12Ku jɔl Jɔŋdit guɔ laar roor nelantoŋtɛi. 13Ku le ceŋ roor ne nin keethiɛrŋuan, theme Catan ke yen; ku ye ceŋ ne lai roor yic, ku yee malaikai yeki luɔi.
14Na ɣɔn ci Jɔn mac, ke Yecu bɔ Galili, ye weet ne welpiɛth ke Nhialic, 15jiɛm, Ye akɔl ee ɣeet, ku ceŋ de Nhialic ee bɛn: wɛlka wepiɔth, ku yaka welpiath gam.
16Ku te ciɛthe Yecu ne bar kɔu de Galili, ke ŋem Thimon ku Andereya manhe de Thimon e ke cuɛt abuɔiken bɛɛr: ake ye thany. 17Go Yecu ke yɔɔk, Ye biathka ɣɛn, ku we ba cɔk ye dudeep ke kɔc. 18Goki abuɔiken nyaaŋ piny ne etoŋe, ku biɔthki. 19Ana ye cot rɔt tueŋ, ke ŋem Jakob wen de Dhebedayo, kene manhe Jɔn, e ke tɔ riɛi cuecki abuɔiken. 20Go ke dac cɔɔl: goki wuɔnden Dhebedayo nyaaŋ riɛi kene awuut yeke riɔp, ku kuanyki cok.
21Goki lɔ Kapernaum; ɣɔn ne akol de thabath ke Yecu lɔ luɛɛk le pioc. 22Goki gai ne weetde: ne ke yen ke piɔc ci toŋ nɔŋ riɛr, ku ci cit dugɛɛr. 23Ku raan ee tɔ luak ran cii jɔŋ rac dɔm; go coot, 24jiɛm, Ye yeŋo buk loi wɔne yin, yin Yecu de Nadhareth? ca bɛn ba wɔ riɔk? Yin nyiɛc, ke yin ye Toŋ Lajik de Nhialic. 25Go Yecu waai, ku jiɛm, Ye mim, ku bar bei enɔŋ yen. 26Te ci jɔŋ rac ye reet, ke cot ne ror dit, ku bii bei. 27Go kɔc gai areet kedhia, agut te thiec kek roth, jamki, Yi yee kanŋo yekene? ku ye weet jote! anɔŋ riɛr yen jak rac yɔɔk, ku yiki gam. 28Go thoŋde jal guɔ thiɛi piny de Galili ebɛn.
29Wen, aacik bɛn bei luaak, e ke lɔ ɣon de Thimon ku Andereya, kene Jakob ku Jɔn. 30Ku dhiɔm de Thimon anɔŋ guɔp atuɔr; goki dac lɛk Yecu: 31go bɛn ku dɔm ciin, ku jot nhial; go atuɔr guɔ jal ne yeguɔp, go rɔt jɔt le ke luɔi.
32Ana ye piny ye le moor, ke kɔc bii kɔc bec kedhia, biike enɔŋ en, ku kɔc ci jak rac ke dɔm. 33Ku ci baai ebɛn gueer luak thok. 34Go kɔc juec cɔk piɔl, ku ciec jak rac ne kɔc gup, ku jiɛi jam de jak rac, ne ke nyic kek yen.
35Ɣɔn miakdur, aŋoot piny ke ye dudur, ke jɔt rɔt ku ler telaau, lee lɔŋ. 36Go Thimon ku kɔc eke tɔ kene yen goki biɔth cok; 37goki lɔ yok, ku yookki, Yi raan ebɛn akɔr yin. 38Go ke yɔɔk, Ye loku ne bɛi kɔk, ba ke lɔ wɛɛt eya; yekene yenekee bii ɣɛn. 39Go lɔ weet ne luekken yic ne Galili ebɛn, ku ciec jak rac.
40Go ran de abil bɛn enɔŋ yen, lɛŋ, ku tuk enhiɔl ne yenom, ku yook, Ye na tɔ ne yipiɔu, ke kaleu ba ɣa cɔk piɔl. 41Go Yecu piɔu kac, ku thiu yeciin, ku jiɛk, ku yook, Ye katɔ ne apiɔu; piale guɔp. 42Go abil dac jal nelantoŋtɛi, ku jɔl guɔp piath. 43Go lom thok areet, ku cɔk dɔc jal, 44ku yook, Ye ŋem, duɔne lek ran dɛ: lɔɔr dholdu, nyuɔthe yiguɔp bɛny de ka ke Nhialic, ku kɔce rɔt ne ke cin guɔp pial ci man e cii Mothe ye luel, bi ya nyinyden. 45Go lɔ biyic, ku gɔl ne luɛl lek raan ebɛn, ku thiɛi yethoŋ de yeluɔine, a go Yecu cuɔk ye cath ne bɛi yic ke nyooth rɔt, ku ye ceŋ roor telaau: ku ye kɔc jal bɛn enɔŋ yen ne baai ebɛn.
Currently Selected:
Mak 1: LEKJOT
Tõsta esile
Share
Copy
Want to have your highlights saved across all your devices? Sign up or sign in
© British and Foreign Bible Society 1940, 2017
Learn More About Lek Jot de Jecu Kritho 1940