1 Kòríntì ŋa 9
9
Kpɔ́lù wà fɔ̀ iŋɛ́ yèé ŋa ɔ̀nà wà fúu ní kó tse#ɛ́
1Fee, ɔ̀nà wà fú mi, tsí èmi gbo n tse iŋɛ́ ɔ̀kã̀lɔ́ɔ̀kã̀ yèé ɖé fú mi#ɛ́ nɔ̀. Nàmí kò tsi adzítsɛ́-Yèésù† ní ǹ dzɛ́#ɛ́ɛ̀? Tsí Yèésù Kírísítò Ɔlá-wa#á fe, odzú-tèmi gbo kã̀ã́ nɔ̀. Tsí kò tsi ɛ̀ŋɛ gbo ní dzɛ́ èrè-itsɛ́ yèé ǹ tse fú Ɔlá-wa#áà? 2Bí ɔ̀nyà kã̀ŋa wà, tsí à kɔ̀ ní èmi kò dzɛ́ adzítsɛ́-Yèésù#ɛ́, ɛ̀ŋɛ òŋu, ó wà ní e gbà mí ní èmi dzɛ́ adzítsɛ́-Yèésù nɔ̀. Iŋɛ́ yèé tse#ɛ́, kíbí Yèésù tse ɔ̀kã̀ntso bá ŋɛ́ si#ɛ́, ó wà kíbí e ɖi ìsèdzè-kã̀ bɛ́, tsí ó wà nyà ɖíre ní ǹ dzɛ́ adzítsɛ́-Yèésù ìɖéǹɖè.
3Ɛnɛ yèé wà kpɛdzɔ́ bá mi ŋa#á, ká rɛ̃tígbè, tsí n fɔ̀ afɔ̀-arũ-mi, tsí ká gbɔ́. 4Ká gbɔ́ ní ɔ̀nà wà fú wa, tsí àwa gbo, àa kó wà dzɛ, tsí wà mɔ fú itsɛ́ yèé àa wà tse#ɛ́. 5Ó má dzɛ́ ní àa nɛ́ aya#á, ɔ̀nà wà fú wa, tsí àwa gbo, àa kó wà gbɛ̃́ aya-wa ŋa tɛ̀ náànyì nɔ̀. Bɛ́ɛ̀ ní adzítsɛ́-Yèésù àtíbɔ̀ ŋa òŋu ìnàbí-Ɔlá-wa ŋa gbo má nára-Òkúta gbo náa tse#ɛ́. 6Nàmí èmi Bànàbá méèdzì sɔ̃́ŋú gé ní wà ní àa kó wà tse tã́ná àa kó wà dzɛ#ɛ́ɛ̀? 7Sɔ́dzà yèésí wà, tsí owó-àkpò-ara-tòŋu ká‐ɛ̀ ní náa lò, tsí wà ń tsitsɛ́‐ɛ̀#ɛ́ ná? Tsí nɛ̀ɛ́ gbo wà, tsí bí ó lɛ́ egi síso ni kà dzɛ èso-egi#ɛ́ ni? Ɔ̀nyà-kã̀ gbo kà dzɛ́ aró-ɛrã náàrì mɔ àmɔ́-ɛrã ŋa#á nɛ́?
8Kò tsi ńǹrɔ́-kíbí ɔ̀nyà náa módzú kpurã iŋɛ́ gbà#á gé ní ǹ wà fɔ̀#ɛ́. À fɔ̀ɔ́ si ńǸwé-Ɔ̀ɖáyé† gbo si bɛ́ɛ̀ nɔ̀. 9À kɔɔ́ si ńǹwé-ɛkpa-Mɔ̀ɔ́sè† si ní: “Bí lalá wà tsitsɛ́ fɛ́ɛ, máa mú okù ɖi arũ‐ɛ̀.”#9:9 Ìwé-Àkóro 25:4 (Deutéronome 25:4) Fee, ìsérè-lalá ŋa#á gé ní Ɔ̀ɖáyé wà tse#ɛ́ɛ̀? 10Àwa ní ó fɔ afɔ̀ nyɛ̀ŋɛ̀ si fú#ɛ́ nɔ̀. Àwa ní à kɔ afɔ̀ nyɛ̀ŋɛ̀ ŋa si fú ńǹwé-ɛkpa-Mɔ̀ɔ́sè#ɛ́, àtsùgbée bí ɔ̀nyà-kã̀ wà tɔ́tse oko, odzú-ɛnɛ nyɛ̀ŋɛ̀ kó wà nɔ́ɔ̀nà si ní iŋɛ́-kã̀ nákó fùɖá ńnɛ̀ fú òŋu gé ni. Tsí ɛnɛ yèé wà kpaɖí ìdzɛ-oko gbo#ɛ́, odzú tɛ̀ɛ̀ gbo kó wà nɔ́ɔ̀nà si ní òŋu gbo, òŋu nákó rí tòŋu gbà ńnɛ̀. 11Àa tsitsɛ́ náàŋírĩ-ŋɛ́, tsí è gba iŋɛ́-ire yèé ŋa Mímí-Ɔ̀ɖáyé† náa fúnɛ#ɛ́. Bí àwa gbo, àa gba iŋɛ́-kã̀ nɔ́wɔ́-ŋɛ́#ɛ́, àa kò tsòkṹnù nɛ́. 12Bí è náa dzɔ̀ɔ́ ɔ̀nyà kã̀ŋa, tsí à náa gba iŋɛ́-ìrɔ́-bɛ́ɛ̀ ŋa nɔ́wɔ́-ŋɛ́#ɛ́ fee, àwa gìɖì ní má dzɛ́ ɔlá‐ɛ̀ lárè#ɛ́. Ó ɖi, àa kò bere ɔ̀nyà-kã̀ kpókpó ní kó fú wa ńŋɛ́-kã̀. Kà kàa bɛ́ɛ̀, àa dzɛ́, tsí gba iŋɛ́ ɔ̀kã̀lɔ́ɔ̀kã̀ kpó rù, àtsùgbée iŋɛ́-kã̀ kó máa wáa ɖí ɔ̀nà fú ikɔ̀ ɖíɖɔ̃̀ yèé àa wà dzɛ́ ti nára-Kírísítò#ɛ́ ni.
13È mà rere ní ɛnɛ yèé ŋa wà tsitsɛ́ ńlé-Ɔ̀ɖáyé#ɛ́, ńbí à náa rí, tsí dzɛ#ɛ́ ní dzɛ́ ńŋɛ́ yèé ɔ̀nyà ŋa náa kɛ́ wá ńlé-Ɔ̀ɖáyé#ɛ́ nɔ̀. Tsí atsɛbɔ ŋa gbo#ɛ́, akpálà tiŋa gbo wà, tsí àŋa gbo, à náa gbà ńnɔ́-iŋɛ́ yèé à náa kɛ́ si ńǹdzɛ̀bɔ#ɛ́ nɔ̀. 14Bɛ́ɛ̀ ké ní Ɔlá-wa gbo fɔ̀ si ní ɛnɛ yèé ŋa wà dzíkɔ̀ ɖíɖɔ̃̀ fúnɛ#ɛ́, ńnɔ́-itsɛ́ nyɛ̀ŋɛ̀ tsítse ní àŋa gbo à nákó wà rí, tsí wà dzɛ#ɛ́.#9:14 È káà kã Ìwé-Màtéwò 10:10 òŋu Ìwé-Lúkà 10:7. 15Ó ɖi, èmi òŋu ǹ kò bere iŋɛ́-kã̀ kpókpó nɔ́wɔ́-ɔ̀nyà-kã̀. Tsí ìwé yèé ǹ wà tse fú ŋɛ́ báàyí#ɛ́, kò tsi náàtsùgbée n gba iŋɛ́-kã̀ nɔ́wɔ́-ŋɛ́ ni. Kà kàa bɛ́ɛ̀, bí ǹ kú, ó sã̀ fú mi lárè. Tsí iŋɛ́ yèé ǹ wà ń nya akpá#á, ɔ̀nyà-kã̀ kó máa gbàá nɔ́wɔ́-mi. 16Ɔ̀nà kò wà fú mi ní n wà mú ikɔ̀ ɖíɖɔ̃̀ yèé ǹ wà dzɛ́ fúnɛ#ɛ́, tsí wà ń nya akpá. Ɔ̀ɖáyé ní ɖá itsɛ́‐ɛ̀ bɔwɔ́-mi#ɛ́, tsí ó wà ní n tseé. Tsí bí ǹ kò dzíkɔ̀ ɖíɖɔ̃̀#ɛ́ fúnɛ#ɛ́, ɛ̀rá rá mi ni. 17Ó má dzɛ́ ní itsɛ́#ɛ́, ni èmi ká-mi gé ní ó ɖé fú, tsí ǹ wà tseé#ɛ́, odzú-mi má wà nɔ́ɔ̀nà si ní à nákó sã owó-kã̀ fú mi. Ó ɖi, kíbí ó dzɛ́ ní Ɔ̀ɖáyé ní ɖáa bɔwɔ́-mi#ɛ́, ǹ wà tseé gé ni. 18Kíbí ó dzɛ́ bɛ́ɛ̀#ɛ́ fe, owó yèésí à wà sã fú mi ńǹkɛ̀ɛ́ ni? Òŋu ní wà dzɛ́ ní n wà dzíkɔ̀ ɖíɖɔ̃̀ fúnɛ nɔ́ɔ̀fɛ́#ɛ́. Ǹ kà bere ɔ̀nyà-kã̀ ní kó fú mi ńŋɛ́ yèé dzɔ ní ɛnɛ yèé wà dzíkɔ̀ ɖíɖɔ̃̀ fúnɛ#ɛ́ kó gbà#á.
19Nɔ́wɔ́-ara-mi ní ǹ wà si#ɛ́, tsí ɔ̀nyà-kã̀ kpókpó kàkó nyáa mú mi ńkpá ní èmi kó tse iŋɛ́-kã̀. Ó ɖi, ǹ sɔ ara-mi ɖi arú fú ɔ̀nyà kpó, àtsùgbée n fa ɔ̀nyà kpíkpɔ̀, tsí ká gba Kírísítò gbɔ́. 20Ó ɖi, bí ǹ wà náàŋírĩ-ɔma-Ìyúɖà† ŋa si, mà ɖi ɔma-Ìyúɖà, àtsùgbée n fa ɔma-Ìyúɖà kã̀ŋa, tsí ká gba Kírísítò gbɔ́. Bí ǹ wà náàŋírĩ-ɛnɛ yèé wà rɛ̃̀ si nɛ́kpa-Mɔ̀ɔ́sè ŋa#á gbo, èmi gbo mà ɖi arɛ̃̀ si nɛ́kpa-Mɔ̀ɔ́sè, àtsùgbée n fa àŋa gbo, tsí ká gba Kírísítò gbɔ́. Mà tse bɛ́ɛ̀ tã́ná kò sì kpã́dzú fú èmi òŋu ní n tɔ́ wà rɛ̃̀ si nɛ́kpa#á ró. 21Bí ǹ wà náàŋírĩ-ɛnɛ yèé kò dzɛ́ ɔma-Ìyúɖà ŋa gbo, tsí à kò wà rɛ̃̀ si nɛ́kpa-Mɔ̀ɔ́sè#ɛ́, mà sɔ ara-mi ɖà kíbí àŋa gbo, àtsùgbée n fa àŋa gbo, tsí ká gba Kírísítò gbɔ́. Kò tsi òkpì‐ɛ̀ ní dzɛ́ ní ǹ kò wà rɛ̃̀ si nɛ́kpa-Ɔ̀ɖáyé#ɛ́. Iŋɛ́ yèé tse#ɛ́, ǹ wà rɛ̃̀ si nɛ́kpa-Kírísítò. 22Bí ǹ wà náàŋírĩ-ɛnɛ yèé ŋa àkaralé tiŋa gbo kò wɔlɛ̀ si ńǹtá-Kírísítò rere#ɛ́, mà sɔ ara-mi ɖà kíbí ɛnɛ yèé fɔ̀ ní àkaralé tèmi gbo kò wɔlɛ̀ si ńǹtá-Kírísítò rere bɛ́, àtsùgbée n wà mɔ́wɔ́ gbè fú àŋa gbo, tsí ká nɛ́ àkaralé si. Náàŋírĩ-ɔ̀nyà kpó yèé mà wà si#ɛ́, mà múgírí, tsí tse ara-mi kíbí àŋa gbo, àtsùgbée kó dzɛ́ gé ní Ɔ̀ɖáyé kó gba ɔ̀nyà kã̀ŋa là. 23Tsí iŋɛ́ yèé ŋa nyí kpó mà tse#ɛ́, mà tseé, àtsùgbée ikɔ̀ ɖíɖɔ̃̀#ɛ́ kó wà fì máa àtóoríi èmi gbo n rí èrè yèé wà ńnɛ̀#ɛ́ gbà.
24È kè mà ní nɔ́ɔ̀tara ńbí ɔ̀nyà ŋa náa yáré, tsí ká ma ɛnɛ yèé náa yáré lárè#ɛ́, bí à wà yáré#ɛ́, ɛnɛ yèé yáré lárè#ɛ́ òŋu níìkã̀ntso gé ní náa gba ɔ̀yà#áà? Iré kó yá nɛ́sɛ̀ fú ɛ̀ŋɛ gbo, tsí ɛ̀ŋɛ gbo e gba ɔ̀yà. 25Tsí ɔ̀nyà ɔ̀kã̀lɔ́ɔ̀kã̀ kpó yèé náa wò ní òŋu kó wà ɖugbã̀-nɛ ńŋɛ́-ìrɔ́-bɛ́ɛ̀ ŋa tsítse#ɛ́, náa múgírí, tsí wà nya ɛ̀wɔ̀. Náa tse bɛ́ɛ̀, àtsùgbée kó gba ɔ̀yà-kã̀ ni. Ɔ̀yà nyɛ̀ŋɛ̀#ɛ́ kà sì gba ìwèrè-kã̀ kpókpó. Ó ɖi, àwa òŋu, ɔ̀yà yèé àa bòkó gbà#á nákó wà si títí lɔ náàrìtã́. 26Èmi gbo ǹ wà yáré#ɛ́. Ó ɖi, ǹ kò wà yáré gé. Odzú-mi ta iŋɛ́-kã̀ si ni. Tsí kíbí akpàkɔ̃́-kã̀ náa wà kpàkɔ̃́, tsí kà gú sé#ɛ́, bɛ́ɛ̀ ní èmi gbo ǹ wà dzìdzà#á. Ǹ kà gú sé. 27Kà kàa bɛ́ɛ̀, mà mú ara-mi si kũkũ, tsí mà gba àmí nɔ́wɔ́-kíbí ǹ yà gbà#á. Mà tse bɛ́ɛ̀, àtsùgbée kó máa dzɛ́ ní èmi yèé dzíkɔ̀ ɖíɖɔ̃̀ fú ɔ̀nyà ŋa tã́#á, Ɔ̀ɖáyé kó wáa kɔ̀ mí ńǹtã̀ntã́‐ɛ̀.
Currently Selected:
1 Kòríntì ŋa 9: ngl
Tõsta esile
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.