1 Kòríntì ŋa 14
14
Bí è kpérí si, è náa tse iŋɛ́, tsí kó nɛ́ èrè fú ɔ̀nyà kpó
1È múgírí, tsí e wà nɛ́ àmúɖɔ̃̀ fúnɛ. Àŋgbɛ̃-iŋɛ́ yèé ŋa Mímí-Ɔ̀ɖáyé† gbo náa fúnɛ#ɛ́ kó wà gbɛ̃ ŋɛ́ kpíkpɔ̀, tsí àŋgbɛ̃ ti e wà gbɔ́ afɔ̀-Ɔ̀ɖáyé fɔ̀ fúnɛ kó wà gbɛ̃ ŋɛ́ lárè. 2Bí ɔ̀nyà-kã̀ wà wí ìlú-òmírɛ̃̀#ɛ́, kò wà wíi fú ɔ̀nyà ŋa. Ɔ̀ɖáyé ní ó wà wíi fú#ɛ́. Iŋɛ́ yèé tse#ɛ́, ɔ̀nyà-kã̀ kpókpó kò wà gbɔ́ òkpì-iŋɛ́ yèé ó wà fɔ̀ ŋa#á. Mímí-Ɔ̀ɖáyé ní wà mɔ́wɔ́ gbè fúu, tsí ó wà wíìnyɛ̀ ti nára-iŋɛ́ yèé ŋa òkpì-ŋà ŋa gbígbɔ́ ɖúkù si#ɛ́. 3Ó ɖi, ɛnɛ yèé wà gbɔ́ afɔ̀-Ɔ̀ɖáyé fɔ̀ fúnɛ#ɛ́ òŋu náa tse tsí àkaralé-ɔ̀nyà ŋa náa ta ogùgù múlɛ̀ máa. Tsí náa wà ɖáàmí lenɛ, tsí wà tunɔ́ fúnɛ gbo. 4Ɛnɛ yèé wà wí ìlú-òmírɛ̃̀#ɛ́, àkaralé tòŋu ká‐ɛ̀ gé ní náa ta ogùgù múlɛ̀ máa#á. Ó ɖi, ɛnɛ yèé wà gbɔ́ afɔ̀-Ɔ̀ɖáyé fɔ̀ fúnɛ#ɛ́ òŋu náa tse tsí àkaralé-ɔ̀nyà ŋa nɛ́gbɛ́-Kírísítò#ɛ́ náa ta ogùgù múlɛ̀ kpó kpãŋu. 5Ǹ wà wò ní ɛ̀ŋɛ kpó e wà wí ìlú-òmírɛ̃̀ ŋa. Ó ɖi, iŋɛ́ yèé ǹ wà wò fú ŋɛ́ lárè#ɛ́ ní dzɛ́ ní e wà gbɔ́ afɔ̀-Ɔ̀ɖáyé fɔ̀ fúnɛ#ɛ́. Ká gbɔ́ afɔ̀-Ɔ̀ɖáyé fɔ̀ fúnɛ, ó nɛ́ èrè láre ká wà wí ìlú-òmírɛ̃̀. Ni ó ɖi, bí ó dzɛ́ ní ɔ̀nyà-kã̀ wà gbɔ́ ìlú-òmírɛ̃̀#ɛ́ fɔ̀ fúnɛ, tsí kó tse tsí àkaralé-ɔ̀nyà ŋa nɛ́gbɛ́-Kírísítò#ɛ́ kó ta ogùgù múlɛ̀ máa géɖé ni.
6Ìnàbí-mi ŋa, ká fɔ̀ ní ǹ wá ńɖi-ŋɛ́ báàyí, tsí ǹ wà wí ìlú-òmírɛ̃̀ fú ŋɛ́. Bí ǹ tse bɛ́ɛ̀ fe, ǹ wà tse iŋɛ́-kã̀, tsí kó nɛ́ èrè fú ŋɛ́ ńnɛ̀ɛ́ɛ̀? Tã́ná kó dzɛ́ ní iŋɛ́ yèé ǹ tse#ɛ́ nɛ́ èrè fú ŋɛ́#ɛ́, ó wà ní Ɔ̀ɖáyé kó nya iŋɛ́-kã̀ ŋà ŋɛ́ nàmí kó tse tsí e ma iŋɛ́-kã̀, nàmí ká gbɔ́ afɔ̀‐ɛ̀ fɔ̀ fú ŋɛ́ nàmí e gba ɛ̀kɔ́-kã̀ ti ńɖɔ̀‐ɛ̀ ni. 7Bɛ́ɛ̀ ké ní bí àa kɛ́ ìsàwé-iŋɛ́-idzó ŋa, fèrè nàmí aɖùrù#ɛ́, àa nákó rí ní bí oŋù-ŋa kò wà ɖɔ̃́ dzì ńǹɖì-ŋà ŋa rere#ɛ́, à kàkó nyáa ma idzó-ìrɔ́ yèé à wà dzó#ɛ́. 8Bí àa kɛ́ ikpè gbo#ɛ́, bí à fɔ̃ɔ̃́, tsí ó ɖɔ̃́ oŋù-ìrɔ́-kã̀#á, ó wà dzíkɔ̀ fú olí-ɔ̀kpá ŋa ní ká ǹɖe, tsí ká kpé ogu dzídzɛ ńnɛ̀ɛ́. Ó ɖi, bí ikpè#ɛ́ wà ɖɔ̃́, tsí oŋù yèé ó wà fɔ̀#ɛ́ kò má#á, nɛ̀ɛ́ nákó kpaɖí fú ogu dzídzɛ? 9Bɛ́ɛ̀ ké ní ó wà fú ɛ̀ŋɛ gbo#ɛ́. Bí è wà wí ìlú-òmírɛ̃̀, tsí ɔ̀nyà-kã̀ kpókpó kò wà gbɔ́ ìlú#ɛ́ fe, bí à nákó tse fáà, tsí ma iŋɛ́ yèé è wà fɔ̀#ɛ́ ni? È wà wíìnyɛ̀-akpotu ńnɛ̀ɛ́ nɔ̀! 10Ìlú kpíkpɔ̀ wà náyé gbaŋgba#á, tsí à náa fɔ̀. Tsí ìlú kã̀kã̀ yèé ɔ̀nyà ŋa wà fɔ̀ kpó#ɛ́, à nɛ́ òkpì. 11Ó ɖi, bí ǹ kò wà gbɔ́ ìlú yèé à wà fɔ̀ fú mi#ɛ́, ǹ ɖi àledzò fú ɛnɛ yèé wà fɔ ìlú#ɛ́ fú mi#ɛ́, tsí ɛnɛ nyɛ̀ŋɛ̀ gbo ɖi àledzò fú mi ńnɛ̀ɛ́. 12Bɛ́ɛ̀ ké ní ó wà fú ɛ̀ŋɛ gbo#ɛ́. Ńǹrɔ́-kíbí ó wà wù ŋɛ́ tó ní Mímí-Ɔ̀ɖáyé kó fú ŋɛ́ ńkpá-ɔ̀fɛ́‐ɛ̀ ŋa#á, è múgírí, tsí e wò ŋá. Ó ɖi, è wò ní yèé ŋa nákó tse tsí àkaralé-ɔ̀nyà ŋa nɛ́gbɛ́-Kírísítò#ɛ́ kó ta ogùgù múlɛ̀#ɛ́ kó tɔwɔ́-ŋɛ́. 13Náàtsùgbée bɛ́ɛ̀#ɛ́, bí ɔ̀nyà-kã̀ wà wí ìlú-òmírɛ̃̀#ɛ́, ó wà ní ɛnɛ nyɛ̀ŋɛ̀ kó wúùre, tsí bere Ɔ̀ɖáyé ní kó tse tsí òŋu kó nyáa wà gbɔ́ ìlú#ɛ́ fɔ̀.
14Bí ó dzɛ́ ní ǹ wà wúùre, tsí wà wí ìlú-òmírɛ̃̀ báàyí#ɛ́, Mímí-Ɔ̀ɖáyé ní wà wúùre ńnɔ́-mi#ɛ́. Ó ɖi, ìsérè tèmi òŋu kò wà tsitsɛ́-kã̀ ró. 15Bí ó dzɛ́ bɛ́ɛ̀ fe, bí màa tse fáà ńǹkɛ̀ɛ́? Màa tse tsí Mímí-Ɔ̀ɖáyé kó wà mɔ́wɔ́ gbè fú mi, tsí n wà wúùre ti ńnɔ́-mi fú Ɔ̀ɖáyé, tsí màa wà lo ìsérè-mi gbo, tsí wà ń wúùre fúu. Mímí-Ɔ̀ɖáyé nákó mɔ́wɔ́ gbè fú mi, tsí màa wà kɔ̃rĩ gbo ti ńnɔ́-mi fú Ɔ̀ɖáyé, tsí màa wà lo ìsérè-mi gbo, tsí wà ń kɔ̃rĩ fúu. 16Ká fɔ̀ báàyí ní ò wà wúùre, tsí wà ń ɖɔ́kpɛ́ fú Ɔ̀ɖáyé, tsí ìlú yèé Mímí-Ɔ̀ɖáyé mú si nárũ fɛ́ɛ#ɛ́ gé ní ò wà ń ɖɔ́kpɛ́#ɛ́, tsí ɔ̀nyà-kã̀ wà bɛ̀, tsí wà rɛ̃tígbè‐ɛ̀ɛ. Bí ɛnɛ nyɛ̀ŋɛ̀ kò gbɔ́ òkpì-iŋɛ́ yèé ò wà wí#ɛ́ fee, bí nákó nyáa tse fáà, tsí fɔ̀ ní ɛ̀tsɛ fú ɔkpɛ́ yèé ò wà ɖá fú Ɔ̀ɖáyé#ɛ́ ni? 17Ń tɛ̀ɛ òŋu, ò wà ɖɔ́kpɛ́ fú Ɔ̀ɖáyé rere ńnɛ̀ɛ́. Ó ɖi, iŋɛ́ yèé ò tse nyɛ̀ŋɛ̀#ɛ́ kò mɔ́wɔ́ gbè fúu, tsí àkaralé‐ɛ̀ kó wɔlɛ̀ nɔ́ɔ̀nà-kã̀ kpókpó. 18Ǹ wà ɖɔ́kpɛ́ fú Ɔ̀ɖáyé ní èmi ǹ wà wí ìlú-òmírɛ̃̀ ŋa láre ɛ̀ŋɛ kpó. 19Ó ɖi, bí ó dzɛ́ ní ǹ wà náàŋírĩ-ìnàbí ŋa si nɛ́gbɛ́-Kírísítò-kã̀#á, mà wo n wíìnyɛ̀ nóŋù-afɔ̀ mɛ́ɛrú, tsí ɔ̀nyà kpó kó gbɔ́ òkpì‐ɛ̀, tsí kó dzɛ́ ɛ̀kɔ́ fú ɛnɛ-àtíbɔ̀ ŋa gbo. Bí ǹ tse bɛ́ɛ̀#ɛ́, náa sã̀ fú mi láre n wà wíìnyɛ̀ tsùù ɖà ńlɛ̀ gé, tsí kó dzɛ́ ní ńǹlú-òmírɛ̃̀ ní ǹ wà fɔ̀ɔ́#ɛ́.
20Ìnàbí-mi ŋa, è máa wà tsèsérè kíbí maɖé ŋa ró. Kíbí ɔma nɔ́wɔ́ kà ma iŋɛ́-kã̀ ti nára-íbàɖí tsítse#ɛ́ fee, ɛ̀ŋɛ gbo, è wà bɛ́ɛ̀. Ó ɖi, ti nára-ìsérè tsítse òŋu, ìsérè-onùgbó kó wà nɔ́wɔ́-ŋɛ́. 21À kɔ si ńǸwé-Ɔ̀ɖáyé† si ní:
“Màa gbà ńǹtá-ɔ̀nyà yèé ŋa wà wí ìlú-òmírɛ̃̀ ŋa#á
òŋu afɔ̀ yèé ɔ̀nyà-àledzò ŋa wà fɔ̀#ɛ́,
tsí ń wíìnyɛ̀ fú ɔma-Ìsàràyɛ́lì† ŋa,
tsí à kàkó sì rɛ̃tígbè-mi.”#14:21 Ìwé-Yèsáyà 28:11-12 (Ésaïe 28:11-12)
22Ó ɖi, ìlú-òmírɛ̃̀ wíwí#ɛ́ fee, iŋɛ́ nyínyà ɖíre-kã̀ ní ó dzɛ́ fú ɛnɛ yèé ŋa kò gba Yèésù Kírísítò gbɔ́#ɛ́. Kò dzɛ́ iŋɛ́ nyínyà ɖíre-kã̀ fú ɛnɛ yèé gba Yèésù Kírísítò gbɔ́ ŋa#á òŋu. Ó ɖi, bí ɔ̀nyà-kã̀ òŋu wà gbɔ́ afɔ̀-Ɔ̀ɖáyé fɔ̀ fúnɛ#ɛ́, nyɛ̀ŋɛ̀ òŋu dzɛ́ iŋɛ́ nyínyà ɖíre-kã̀ fú ɛnɛ yèé ŋa gba Yèésù Kírísítò gbɔ́#ɛ́. Kò dzɛ́ iŋɛ́ nyínyà ɖíre-kã̀ fú ɛnɛ yèé kò gba Yèésù Kírísítò gbɔ́ ŋa#á òŋu. 23Ká fɔ̀ ní ɛnɛ yèé ŋa kpó wà nɛ́gbɛ́-Kírísítò#ɛ́, à kpérí si, tsí àŋa kpó à wà wí ìlú-òmírɛ̃̀ ŋa. Tsí ɔ̀nyà kã̀ŋa yèé kò wà gbɔ́ ìlú yèé è wà fɔ̀#ɛ́ nàmí ɛnɛ yèé ŋa kò gba Yèésù Kírísítò gbɔ́#ɛ́ kã̀ŋa wɔ̀ náàŋírĩ-ŋa. À nákó fɔ̀ fú ŋa ní à wà sṹrṹ nɔ̀. 24Ó ɖi, bí ó sì dzɛ́ ní àŋa kpó, à wà gbɔ́ afɔ̀-Ɔ̀ɖáyé fɔ̀ fúnɛ, tsí ɔ̀nyà-ìrɔ́-bɛ́ɛ̀-kã̀ wɔ̀ náàŋírĩ-ŋa#á, afɔ̀ yèé ŋa nákó wà gbɔ́#ɛ́, nákó tse tsí nákó rí mà ní òŋu dzàbi-Ɔ̀ɖáyé, tsí Ɔ̀ɖáyé bòkó kpɛdzɔ́ bá òŋu. 25Tsí ìsérè yèé ŋa ɛnɛ nyɛ̀ŋɛ̀ ń ɖúkù si ńnɔ́ si#ɛ́, Ɔ̀ɖáyé nákó tsí atsɔ nódzú-ŋa. Tsí nákó kálɛ̀, tsí mú erí kãlɛ̀ fú Ɔ̀ɖáyé, tsí sɛ̃̀ɛ̃́, tsí fɔ̀ ní: Ìɖéǹɖè ni, Ɔ̀ɖáyé wà náàŋírĩ-ŋa si.
Ńǹwèrè yèé olí-Yèésù ŋa nákó kpérí si nɛ́gbɛ́-Kírísítò#ɛ́, iŋɛ́ ŋa kó wà lɔ nɛ́kpa nɛ́kpa
26Ìnàbí-mi ŋa, bí àa kó tse fáà ńǹkɛ̀ɛ́ ni? Fee, ńǹwèrè yèé è náa kpérí si, tsí wà sɛ̃ Ɔ̀ɖáyé#ɛ́, ɔ̀nyà-kã̀ nákó nyáa wà kɔ̃rĩ, tsí ɔ̀nyà-kã̀ gbo nákó nyáa wà kɔ́nɛ náfɔ̀-Ɔ̀ɖáyé, tsí Ɔ̀ɖáyé nákó nyáa nya iŋɛ́-kã̀ ɖíre fú ɔ̀nyà-kã̀ gbo, tsí ɔ̀nyà-kã̀ gbo nákó nyáa wà wí ìlú-òmírɛ̃̀-kã̀, tsí ɔ̀nyà-kã̀ gbo nákó nyáa wà gbɔ́ ìlú yèé ɛnɛ nyɛ̀ŋɛ̀ wà wí#ɛ́ fɔ̀ fúnɛ. Ó ɖi, bí è wà tse iŋɛ́ yèé ŋa kpó#ɛ́, ká tse tsí àkaralé-ɔ̀nyà ŋa kó wà ta ogùgù múlɛ̀ máa nɛ́gbɛ́-Kírísítò#ɛ́. 27Tsí bí ó dzɛ́ ní à wà wí ìlú-òmírɛ̃̀#ɛ́, ɛnɛ yèé ŋa nákó wà wí ìlú#ɛ́, ká máa láre ɔ̀nyà méèdzì nàmí mɛ́ɛta. Ká wà wíi nɛ́kpa nɛ́kpa. Tsí ɔ̀nyà-kã̀ gbo kó wà, tsí wà gbɔ́ ìlú#ɛ́ fɔ̀ fúnɛ. 28Tsí bí ɔ̀nyà-kã̀ kò wà, tsí kó gbɔ́ ìlú#ɛ́ fɔ̀ fúnɛ ná, ó wà ní ɛnɛ nyɛ̀ŋɛ̀ kó tsikó. Ó ɖi, kó wà wíi ńnɔ́-ara‐ɛ̀ fú Ɔ̀ɖáyé. 29Tsí ɛnɛ yèé ŋa gbo nákó wà gbɔ́ afɔ̀-Ɔ̀ɖáyé fɔ̀ fúnɛ#ɛ́, ká máa láre ɔ̀nyà méèdzì nàmí mɛ́ɛta. Tsí ɛnɛ-àtíbɔ̀ ŋa ká wà kpa afɔ̀ ŋa#á wò ní fee, afɔ̀ ŋa#á ti ńɖi-Ɔ̀ɖáyé ìɖéǹɖèè? 30Ó ɖi, bí ó dzɛ́ ní Ɔ̀ɖáyé nya iŋɛ́-kã̀ ɖíre fú ɔ̀nyà-kã̀ gbo#ɛ́, ó wà ní ɛnɛ yèé wà gbɔ́ afɔ̀-Ɔ̀ɖáyé fɔ̀ fúnɛ#ɛ́ kó mú tɛ̀ɛ̀ gbè bɛ̀. 31Fee, ɛ̀ŋɛ kpó, è nákó nyáa gbɔ́ afɔ̀-Ɔ̀ɖáyé fɔ̀ fúnɛ, tsí bí ɔ̀nyà-kã̀ fɔ̀ tã́, ni enìkéèdzì kó fɔ̀ tɛ̀ɛ́, àtsùgbée ɔ̀nyà kpó kó gba ɛ̀kɔ́ ti ńnɔ́‐ɛ̀, tsí kó ɖáàmí lenɛ gbo. 32Ɛnɛ yèé dzɛ́ agbáfɔ̀-Ɔ̀ɖáyé fɔ̀†#ɛ́ nákó nyáa mú ara‐ɛ̀ ńǹwèrè yèé ó wà gbɔ́ afɔ̀#ɛ́ fɔ̀#ɛ́. 33Iŋɛ́ yèé tse#ɛ́, Ɔ̀ɖáyé wà wò ní àa kó wà tse iŋɛ́ ŋa nɛ́kpa nɛ́kpa ni. Tsí ó wà wò gbo ní àa kó gbé ńtútùúrɔ̀ si. Bɛ́ɛ̀ ní iŋɛ́ ŋa#á wà lɔ si nɛ́gbɛ́-Kírísítò ŋa kpó#ɛ́ ńnɛ̀ɛ́.
34Bí è kpérí si nɛ́gbɛ́-Kírísítò, ó wà ní ɔnɔbɛ̃̀ɛ̃ ŋa gbo kó wà tsikó. Iŋɛ́ yèé tse#ɛ́, à kò fú ŋa nɔ́ɔ̀nà ní ká wà wíìnyɛ̀. Ó ɖi, kíbí à kɔɔ́ si nɛ́kpa-ɔma-Ìyúɖà† ŋa#á, ó wà ní ká wà tɛ ara-ŋa bɔlɛ̀ fúnɛ. 35Bí à wà wò ní ká nya òkpì-iŋɛ́-kã̀ fú àŋa, ká bere ɔkɔ-ŋà ŋa ńlé, tsí ká nya òkpì‐ɛ̀ fú ŋa. Iŋɛ́ yèé tse#ɛ́, ká kpérí si nɛ́gbɛ́-Kírísítò, tsí ɔnɔbɛ̃̀ɛ̃ kó gba afɔ̀, tsí wà wíìnyɛ̀#ɛ́, kà lɔ bɛ́ɛ̀.
36Fee, è ɖédzú ńɖi-ŋɛ́ ní afɔ̀-Ɔ̀ɖáyé wà ti#ɛ́ɛ̀? Nàmí è ɖédzú ɛ̀ŋɛ sɔ̃́ŋú gé ní wà gba afɔ̀#ɛ́ ni? 37Bí ɔ̀nyà-kã̀ wà tsèsérè ní òŋu dzɛ́ agbáfɔ̀-Ɔ̀ɖáyé fɔ̀ nàmí Mímí-Ɔ̀ɖáyé† wà ńǹtá-òŋu si tó bɛ́ɛ̀#ɛ́, ɛnɛ nyɛ̀ŋɛ̀ kó rí mà ní iŋɛ́ yèé ǹ wà kɔ fú ŋɛ́ ŋa bɛ́#ɛ́ ti ńɖi-Ɔlá-wa ni. 38Bí ɔ̀nyà-kã̀ kò ríi mà bɛ́ɛ̀, Ɔ̀ɖáyé gbo kàkó rí ɛnɛ nyɛ̀ŋɛ̀ mà. 39Ìnàbí-mi ŋa, kíbí ó dzɛ́ bɛ́ɛ̀#ɛ́ fee, e wà gbɔ́ afɔ̀-Ɔ̀ɖáyé fɔ̀ fúnɛ kó wà wù ŋɛ́ kpíkpɔ̀ lárè. Tsí è máa ɖí ɔ̀nà fú ɔ̀nyà ŋa ní ká máa wí ìlú-òmírɛ̃̀ ŋa gbo. 40Ó ɖi, iŋɛ́ ɔ̀kã̀lɔ́ɔ̀kã̀ kpó yèé è nákó wà tse#ɛ́, è tseé si ńǹɖì‐ɛ̀, tsí kó wà lɔ nɛ́kpa nɛ́kpa gbo.
Currently Selected:
1 Kòríntì ŋa 14: ngl
Tõsta esile
Share
Kopeeri
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.