1 Kòríntì ŋa 13
13
Kpɔ́lù wà wíìnyɛ̀ ti nára-àmúɖɔ̃̀
1Màa nyáa wà wí ìlú-ɔ̀nyà ŋa, tsí wà wí ìlú-adzítsɛ́-ɔ̀rɔ̃† ŋa gbo. Ó ɖi, bí ó dzɛ́ ní ǹ kà nɛ́ àmúɖɔ̃̀ fúnɛ, ǹ wà kíbí à náa wà kpa aŋgo nàmí à náa wà mú iŋɛ́ kpa àwò-aɖáàɖí, tsí náa wà ɖɔ̃́ kũkũ bɛ́#ɛ́ gé ni. 2Màa nyáa wà gbɔ́ afɔ̀-Ɔ̀ɖáyé fɔ̀, tsí ma ètò ɔ̀kã̀lɔ́ɔ̀kã̀ kpó yèé Ɔ̀ɖáyé tse ɖúkù si#ɛ́, tsí ma iŋɛ́ ɔ̀kã̀lɔ́ɔ̀kã̀ gbo kpó. Màa nyáa nɛ́ àkaralé kpàtàkìì-kã̀ gbo si ńǹtá-Ɔ̀ɖáyé títí bí ǹ wíìnyɛ̀, ni kó tse tsí òkè ŋa kó wà sɔ́. Ó ɖi, bí ó dzɛ́ ní ǹ kà nɛ́ àmúɖɔ̃̀ fúnɛ, ǹ dzɛ́ iŋɛ́-akpotu ni. 3Màa nyáa kpɛ̃́ iŋɛ́-mi ŋa kpó bɔwɔ́-olákèmà ŋa. Màa nyáa mú ara-mi gbo fú, tsí n ń nya akpá.#13:3 Ìwé kã̀ŋa òŋu fɔ̀ ní: “Màa nyáa dzɛ́, tsí kɛ́ ara-mi gbo fú ní ká dzoná‐ɛ̀.” Ó ɖi, bí ó dzɛ́ ní ǹ kà nɛ́ àmúɖɔ̃̀ fúnɛ, èrè-kã̀ kpókpó kò wà ńnɛ̀ fú mi.
4Ɛnɛ yèé náa nɛ́ àmúɖɔ̃̀ fúnɛ#ɛ́, náa nɛ́ àtɛ̀si, tsí náa tsɔ̀nyà gbo. Kà dzowú-nɛ gbo. Kà fɔ afɔ̀ lákṹ lákṹ gbo. Kà kɛ́ ara‐ɛ̀ gbo. 5Ɛnɛ yèé náa nɛ́ àmúɖɔ̃̀ fúnɛ#ɛ́, kà ɖánɔ́ múnɛ gbo. Kà wo ti ara‐ɛ̀ sɔ̃́ŋú gbo gé. Kà bínɔ́ gbo. Kà mú afɔ̀-nɛ si ńnɔ́ gbo. 6Ɛnɛ yèé náa nɛ́ àmúɖɔ̃̀ fúnɛ#ɛ́, bí ó rí, tsí à wà tse íbàɖí, ayè kà tɛ́ɛ gbo. Ó ɖi, bí ó rí, tsí à wà tse òtítɔ́, ayè náa tɛ́ɛ. 7Ɛnɛ yèé náa nɛ́ àmúɖɔ̃̀ fúnɛ#ɛ́, náa tóòsũ̀-kó mú iŋɛ́ ɔ̀kã̀lɔ́ɔ̀kã̀ kpó tɔrɛ. Àkaralé‐ɛ̀ kà nyà ńǹtá-nɛ gbo láyé. Náa módzú si nɔ́ɔ̀nà si fúnɛ ńŋɛ́ kpó gbo si gé ni. Bí ó dzɛ́ nɔ́ɔ̀kã̀lɔ́ɔ̀kã̀ gìɖì#ɛ́, náa gbódzú gbo si gé ni.
8Àmúɖɔ̃̀ òŋu kò nɛ́ ìkpàkũ. Afɔ̀ yèé agbáfɔ̀-Ɔ̀ɖáyé fɔ̀† ŋa náa gbɔ́ fɔ̀#ɛ́ gbo, ká wí ìlú-òmírɛ̃̀ ŋa gbo, afɔ̀ yèé ŋa àa mà ti nára-Ɔ̀ɖáyé#ɛ́ gbo, àŋa kpó, arũ-ŋa bòkó wáa kũ nɔ́dzɔ́-kã̀. 9Iŋɛ́ yèé tse#ɛ́, iŋɛ́ kpíkpɔ̀ bɔ̀, tsí àa kò mà. Tsí afɔ̀ yèé agbáfɔ̀-Ɔ̀ɖáyé fɔ̀ ŋa gbo wà gbɔ́ fɔ̀ fú wa ŋa#á bɔ̀. 10Ó ɖi, ìwèrè-kã̀ bàa, tsí iŋɛ́ ɔ̀kã̀lɔ́ɔ̀kã̀ kpó nákó sã̀ dzálɛ̀. Ńǹwèrè nyɛ̀ŋɛ̀#ɛ́, iŋɛ́ yèé kò sã̀ dzálɛ̀ si ŋa#á kàkó wà ró. 11Náàsòkò yèé ǹ dzɛ́ maɖé tsígíɖí si#ɛ́, afɔ̀ yèé mà fɔ̀ ŋa#á náa dzɛ́ afɔ̀-maɖé, tsí ìsérè yèé mà tse ŋa#á gbo náa dzɛ́ ìsérè-maɖé. Ó ɖi, kíbí ǹ ɖonùgbó#ɛ́, ǹ kɔ arũ-iŋɛ́-maɖé tsítse dzɔ̀ɔ́. 12Nɔ́mbɛ́#ɛ́, àa kò wà rírã dzálɛ̀ kérékéré wòná. Ó wà kíbí à náa kɛ́ awò, tsí wà rí ɔ̀nyà-kã̀ fìrìfìrì ńnɛ̀, tsí kà má#á bɛ́ ni. Ó ɖi, náànyìwà yèé bàa#á fee, màa ma Ɔ̀ɖáyé dzálɛ̀ kpó kérékéré ńǹrɔ́-kíbí òŋu ká‐ɛ̀ gbo mà mí#ɛ́. 13Báàyí#ɛ́, iŋɛ́ mɛ́ɛta kã̀ŋa wà si, tsí àŋa ní dzɛ́ àkaralé òŋu ká módzú si nɔ́ɔ̀nà si má nára-àmúɖɔ̃̀#ɛ́. Ó ɖi, náàŋírĩ-àŋa mɛ́ɛta#á, àmúɖɔ̃̀ ní kpàtà lé ńǹtá-àtíbɔ̀ ŋa#á.
Currently Selected:
1 Kòríntì ŋa 13: ngl
Tõsta esile
Share
Kopeeri
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.