KANTHOUNA 22
22
Isaacya Malamthut Khoini Makatnungei Abraham'nung Chay Pikur
1 #
Heb 11.17-19. Heihillou Dunpune Abrahamya aiyei ukningya marshakthibi anungei shun, “Abraham!” toubi ungnarou ani, “Kouwo, Keiri ara leileime!” toubi loumallangkur. 2Heirou Ane shun, “Neiyei khatchatom klei, neiyei malungshidui chanapawa Isaacya ruilouheibi, Moriahyei ramra, Keine neinungei shunmandorou kyou Lhungdou khatra kabini, nangni aya malamthut thuinaput khoini meira hongbini makatlak.” 3Heisi tounarouri Abraham'ne ningshun manma kanthoubi, heirou aiyei sapuk put sheembini, heitoubi ani aiyei shok kartlang douwa napung'khnile kalhonni, aiyei chanapawa Isaacya ruilouheibi, heirou ani malamthut putya hongnanungei heengdang khatkhi marshikbini, Dunpune anungei shunmutpikur ramranungei chakur. 4Heitoubi tlaini khyumni tlungnirouri Abraham'ne aiyei mitni thrilthinarou, tlatnarei ram heiwaya ani heimukur. 5Heirouri Abraham'ne aiyei shok rapnungei shun, “Nakhuntari bi atamrou sapuk'le kalhonni louleilak, heitoubi keine keiyei chanapawa kasini duinara lhaduibini Dunpuya khrumcharou, heitoubi naileinara hanui yenkallengthurou.” 6Heirou Abraham'ne malamthut put hongnanungei heengdang khaangloubini, heitoubi aiyei chanapawa Isaac'nung chungbaangpikur; heitoubi ani meiyu'matumle shonle aiyei hutne shinloukur. Heitoubi yakhu'pacha pulni chamalnakur. 7Heirouri Isaacne aiyei pawa Abraham'nung heikyun, “Pawa!” Heirou ani loumallang, “Kouweiyo, keicha samranwa?” Heirou Isaacne kyun, “Thilak, meiyutumle heengdangri leiyura, heiya meira hongbini makatnungei yaoshunri kourawo?” 8Heirou Abraham'ne loushun, “Keicha samranwa, meira hongnungei malamthut put yaoshunri Dunpune marshikbi Aitam piheiroume.” Heisitoubi yakhu pacha pulni chamalnakur.
9 #
Jas 2.21. Heirouri Dunpune Abraham'nung shunpikur ram bi heitamrou yani ka'tlungkur. Abraham'ne bi heitamrou khrahpal khat sabaangkur, heitoubi heiyei doura heeng rapya thang knaini marpeibaangkur, heitoubi aiyei chanapawa Isaac'ya phonbini heitoubi khrahpal dourei heeng doura khangbaangbini fneikur. 10Heirou Abraham'ne aihutra shon shinbini katlhangkur, heitoubi aiyei chanapawaya shaat'hatnungei marshikkur. 11Heiya Umpuei Thangringni nungthourei Abrahamya ungbini yukshun, “Abraham, Abraham!” Heirou ani loumallang, “Kouweiyo? Keiri ara leileime!” 12Heirou Thangringni kyun, “Neiyei chanapawaya neihut lhakbini hatmakka, heirou aya koukhi toupimakka; kouweiyo toulanungri, nangni Dunpuya chi-rikraileime touri Keine muwurla; ngamri neiyei khatchatom klei neiyei chanapawa heiyakhi Keinung'tlim horkhoumakni makatkur manileime touri Keine muwurla.” 13Heirouri Abraham'ne mangalthutbini kallekthinarouri, thilak, aihilla yaoshun pa khatcha thruyam hangra karpanbini heikleiya mukur; heirouri Abraham'ne yaoshun heichaya loubini aiyei chanapawaei rungkhlang khoini meira hongbini makatkur. 14Heingamei Abraham'ne bi heiwaya Jehovah-Jireh touri Umpune Marshikpi toubine min thulkur. Heirou bi heiwaya “Umpuei Lhungdoura Ane marshikpirou” toubine angtu ramphani munaleihui,
15Heirou Umpuei Thangringni Abrahamya khnui tlungni nungthourei ungbini yukshunthu; 16#Lk 1.73; Heb 6.13,14; 11.12. “Keine neinungei tlou kantombini yunlei touri Umpune shunpilei, neiyei khatchatom klei neiyei chanapawa heiyakhi nangni makatkur maniwurnei ngamrou; 17Keine neiyari phor piwurla, heirou Keine neiyei yu-cha rapya nungthourei sorwanakni, heirou samadru ruirei shitnruini chungnaksini chungyerpirouwa. Heitoubi neiyei yu-cha rapne yaiyei yeekna rapyakhi manirouwa. 18#Pao 3.25; Gal 3.16. Heirou nangni Keiyei shunya chanthungnei ngamrou, neiyei yu-cha raprouwei tlaipangpal Lim nammaya phor phayerrouwa.” 19Heisitoubi Abraham'ne aiyei shok rapbei leithungurna bira yenkallengbi, heirou yakhuntaya thouloubi pulni Beer-sheba'ra yenkallengkur. Heitoubi Abraham'ne bi heitamrou paalkur.
Nahoryei Yu-charap
20Heiyei hillouri Abraham'nung paotamwurla, “Thilak, Milcah'nekhi neiyei naowa Nahornungei cha'mranglam napungchot pukpiwurla; 21Yarap heiri: Uz'ne chanapawa upa, heirou Ruz'ne aiyei naowa, heirou Aramyei pa Kemuel; 22Chesed, Hazo, Pildash, Jidlaph heirou Bethuel.” 23Heitoubi Bethuel'ri Rebecah'yei pa, Milcahni Abrahamei naowa Nahornung ya'teinao napungchot rapya pukpikhou. 24Heiyakhi duinara aiyei nukhu Reumah'nekhi anungei Tebah, Gaham, Tahash heirou Maacah, ya'teinao phaliya pukpikhou.
Currently Selected:
KANTHOUNA 22: MARIBSI
Tõsta esile
Share
Copy
Want to have your highlights saved across all your devices? Sign up or sign in
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.