KANTHOUNA 20
20
Abraham Heirou Abimelech
1Heirou Abraham'ne Mamre ram'rouweini Canaan'yei khate lhangei ri'karchunna ramra yuwurbi, heitoubi Kadesh'le Shuryei tlakra paalkur; heihillouri ani Gerar'ra lepcha paalkhou. 2Kheen heirouri Abraham'ne aiyei nu Sarahyei ngamrou, “Ari keiyei charme,” toubi kyun. Heitounei ngamrou Geraryei Krung Abimelech'ne thimi heiyilbi Sarahya walouyerkur. 3Heiya Dunpune Abimelechnung masanang rmongra muyerbini loushunkur, “Thilak, neiyei walouyerkur napuiya heiwiyei ngamrou nangri khi thimi hoiyura, ngamri a heiri shal klei napuiya khatme.” 4Heiya kheen heinungri Abimelech'ne napuiya heiyari rkhum iptilmakhui; heisi tounarouri ani kyun, “Umpu, tharmu chim thimiyakhi Nangni maangyerouwako? 5Napawa ai'mshani ‘Ari keicharme’ heirou napuiya heiwinekhi ai'mshahakni ‘Ari keiyei trahme’ toubine yunkhou nimaka? Heitounei ngammei keinekhi ukning khyingni khalwurbi, heirou keihutkhi borhmakni keine aya loukurme.” 6Heirouri Dunpune anungei rmongra loushun, “Moi, heiri nangnikhi neiyei ukningra khyingni toukurme touri Keinekhi kmu; ngamri Keinekhi neiyari napuiya heiwiya palbini Keiyei maibongra karhani borh lhou touyermakkur. 7Ngam heini asinungri nangni napawa heiyei nuya mallengpilak; ngamri napawa heiri thimkhui khat, heirou ani neinung'tlim shunchapirou; heiyanungri nang ringrou. Heiya nangni aya mallengpimanungri, nangni ningmulak, touri nangle, neiyeime touwei'mkhei namma shuimakni hichirou.”
8Heisi tounarouri Abimelech'ne ningshun manma kanthoubi, heitoubi aiyei shok rapya namma unglhakbini tloubomrap namma heiya yanungei yunthutpikur; heirouri thimi rapne beimakni chirilkur. 9Heirouri Abimelech'ne Abrahamya ungbi aya shun, “Nangni keinungei toupikur awaya kouweiyo? Heirou keine neinungei karhananungei koulhou touwurnei nangni keidoura heirou keiyei Krungbommei doura anakei tangni klal dayernanungei lhouya toukurawo? Nangni kanungei toumaknungei lhouya touwurla.” 10Heihilloukhi Abimelech'ne Abraham'nung shunthu, “Nangni kouya ningchabi keinungei anaksi lhouya toukurawo?” 11Heirou Abraham'ne loumallangkur, “Keine anak lhouya touwurnei ngamri, bi arou Dunpuya chi thimiri hukhatkhi makrousame toubi keine ningchakhou, heirou keiyei nuyei ngamrou yani keiya hatdurousane toubi keine khalwurkhou. 12Tanghakpani a heiri keiyei char thuk, a heiri kai pawaei pukkhou chanapuiya khat, heiya kai nuwiyei pukkhou cha napuiyari nimak; heitoubi kakhu lourilbini a heiri keiyei nu hoikur. 13Heirou Dunpune keiya kai pawayei cheemya horkhouwurbi chananungei chay pikur tlaini heirouwei waiyoubi, keine anungei, ‘Nangni keinungei toupinung kringpi'kheiyei watlhouri: Kai yenchaheina ram bi kantangrou keiyei ngamrou, Ari keiyei trahme’ toubine nangni yunlak” toubi shunkur. 14Heirouri Abimelech'ne yaole halpa raple, heirou aiyei shok-napuiya raple, napawa shok rapkhi urthutbini aiyei nu Sarahyakhi pulni Abraham'nung mallengpikur. 15Heirouri Abimelech'ne shun, “Thilak, neimaibongrei klei ram heiri keiyeithil; neiyei leinina bira nangni leilaka.” 16Heirou ani Sarahyakhi shun, “Thilak, keine neiyei trahwanung kulshan tuy lishingkhat piwurla; heini neiyei maibongrei klei neiyei thimi rapbei heirou thimi dei rapbei maibongrakhi nangri klal makme toubi mutyerwurla.” 17Heirouri Abraham'ne Dunpunung shunchakur; heirou Dunpune Abimelech'ya kukpikur, heirou aiyei nuyakhi heirou aiyei shok-napuiya rapyakhi kukpiwurbi, heitoubi yani chanaokhi pukkur. 18Ngamri Abrahamei nu Sarah'yei ngamni Umpune Abimelech'yei cheemmai thimi rapya chanao tlayermakni shullam namma tipburkhou.
Currently Selected:
KANTHOUNA 20: MARIBSI
Tõsta esile
Share
Copy
Want to have your highlights saved across all your devices? Sign up or sign in
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.