KANTHOUNA 16
16
Hagarle Ishmael
1Abramei nu Sarai'ri kheen heiramphani chanao pukmakhui; heiya aiyei shok, Egyptrei napuiya, aiyei min Hagar toubi ung khatpi leikhou. 2Heirouri Sarai'ne Abram'nung shun, “Asinungri thilak, Umpune keiyari chanao pukyermakni khungyerwurla; heineri keine neinungei shuncha'kniri, nangni keiyei shok-napuiyawi leinara changlaka, heiyanungri ani chanao puklanungri keiyeikhi cha hoinarou.” Heisitoubi Abram'ne Sarai'yei shunya ninglhakbi chanthungkur. 3Heirouri Abram'ne Canaanra kumchip palwurkhou hillou, aiyei nu Sarai'ne aiyei shok-napuiya Hagarya loubini aiyei shal Abram'nung nu hoinanungei pilhakkur. 4Heirouri ani Hagaryei leinara changbi rkhum tilrilkur, heirouri Hagar nao uryouwura; heirou Hagarni a heiwiri nao urrurame toubi mukur'rouri, ani aiyei nutangwi Saraiyari koukhi thimi khoini manthapimakni thi'msityouwura. 5Heirouri Saraini Abram'nung shun, “Keiyei mral heiri neidoura dalaksu, keine keiyei shok-napuiya heiwiya neinungei pilhakkur, heiya ari nao urrurame toubi ningmukur heirouri ani keiyari thi'msitpi; heiyanungri Umpune kasiyei tlakra pichar toupilaksu.” 6Heiya Abram'ne Sarainung loushun, “Thilak, neiyei shok-napuiya heiwiri neihutra kulchalbi klei heiriya; heine neiyei lhangairoume toubi kningya anungei heisi toupilaka.” Heirouri Sarai'ne aya thuithini mareknayoukur heirouri Hagarni leichangmaknei airouwei trukthutkur.
7Heirou Umpuei Thangringni Hagar'ya Shur wana lhangrei ramhangra lampallei klei yuisho pongra rorilbi murilkur. 8Heirouri Thangringni loukngai, “Sarai'yei shok-napuiyawi Hagar, nangya koulhangrei leibiyo? Heitoubi kou'lhangranungo?” Heirouri Hagar'ne loumallangbi kyun, “Keiri keiyei nutang Saraiyei bom'rouwei trukthutkurame.” 9Heirouri Thangring heini Hagarnung shun, “Neiyei nutangei bira hanui kallengthuwalo; heitoubi nangni anungei hungrochalak.” 10Heirou Umpuei Thangringni anungei asitoubikhi shunpithu, “Keine neiyei yu-cha rapya mshing chungyerrou, heirou yari chungachaknei ngamrou mshing sherchichangmakrou.” 11“Thilak, nangri nao urwura, heineri chanapawa khat pukrou, heitoubi aiyei minri Ishmael#16.11: Dunpune ninglhakpi. toubine ungrou; ngamri Umpune neiyei klah-mrimkur heiya mupiwurla. 12Heirou a heiri mine wachuchangmak gadha khraangnaksi napawa khat hoirou; heirou aihut heini thimi kantangya karhani lhou touweirou; heirou thimi kantangnikhi aidoura karhani lhou tourou; heisitoubi ani aiyei teinao rapbei hangra karhourilbini paallou.” 13Heisi tounarouri Hagar'ne anungei tlou shunpikur Umpuei minya ungbini ani kyun, “Nangri mupibi klei Dunpume,” ngamri ani kyun, “Keine tanghakpani Dunpuya mulhakurbi heitoubi Aya mulhakur hillou ringbi klei nimaka?” 14Heitounei ngammei yuiphum heiya Beer-Lahai-Roi#16.14: Mupibi heirou ringbini klei Aiyei yuiphum. toubine min thulkur; thilak, bi heiri Kadesh'le Beredyei tlakra leileihui. 15Heirouri Hagarni Abram'nungei chanapawa khat pukkurla; heirou Abram'ne Hagaryei pukkur aiyei chanapawa heiyei minri Ishmael toubi thulkur. 16Heirou Hagarni Abram'nungei Ishmaelya pukyei kheenrou Abramei kum somshri'le thruk tlungura.
Currently Selected:
KANTHOUNA 16: MARIBSI
Tõsta esile
Share
Copy
Want to have your highlights saved across all your devices? Sign up or sign in
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.