RIPHUTNA 8
8
Tui liansâng a kang
1Pathianin Nova neh mîring a zianga rikuanga omhei khah a riat mai a; Pathianin ithli ân râng a; khanchu, tui khah a hong rikâi zel tâk a. 2Tui inthûk tak nârhei neh rivân tukverhei khom khah a khâr a, rivâna rithoka rua sûr khom ân chât tâk a. 3Tui khah arkâi tîr tîr a, sûn rizalei sômringaka a hek nung, 4thla sarina sûn sômleisarika nî-ah khan rikuang khah Ararat tlângah khan a zuang ringam tâk a. 5Tui khah arkâi tîr tîr mai a; khanchu, a thla sômna sûn masatak nî-ah khan chu itlâng sîphei khah a hong ilang tâk a.
6Sûn sômilika nungah khan Nova khan rikuang tukver ai siam khah â ong a. 7Vaâk ân vuang isua a, kha va khah hong kîr khâi loiin rinêng ata tui khah a kang zoi mâkah chu a vuang ilêng a vuang ilêng a. 8Khangkah ngirin Nova khan rinêng chungah tui arkâi tâk im iti riatna rangin vaṭhu ân vuang isua nôk a; 9nikhomsela, tui khan rinêng pumpui a la chîm vang sikin vaṭhu khan fûkna rang rêng rêng mu mak a, rikuangah a hong kîr nôk a. Nova khan a hang iban a, a hang man a, rikuang sungah a thun nôk tâk a. 10Sûn sarikah a ngâk nôk a; khanchu, vaṭhu ngir khah rikuanga rithokin ân vuang isua nôk a. 11Kholoiah chu vaṭhu khah oliv nâ vângsap arkuma hong riputin a hong kîr nôk a. Khanchu, Nova khan rinênga tui khah arkâi ok tâk iti a riat tâk a. 12Sûn sarikah dang a ngâk nôk a; vaṭhu kha ân vuang nôk a, hi zoro a hin chu hong kîr nôk khâi mak a.
13Nova khah kum rizarukka khatkah a nit kum a thla khatna sûn masatak nî tenah khan chu tui khah rinêng ata a kang zoi tâk a. Nova khan rikuang rikhûna khah a lâi a, a en vêl a, rinêng khah a hûl tâk iti a mu a. 14A thla nikna sûn sôminika sarika nî tenan chu rinêng khah a châr vang tâk a.
15Pathianin Nova ziangah, 16“Nangmah neh ni nupui neh ni naipahei neh ne moihei kha rikuang ata hi suak ta rei. 17Mîringhei murdi khom khah rinêng chungah hin chi itam takkah an hong sem a, an hong pung a, rammual phêk an hong zap zit theina rangin ni ziangah ṭhui isua roh,” a ti a. 18Khanchu, Nova khah a nupui neh a naipahei neh â moihei neh an rêngkan rikuang ata khah an suak tâk a. 19Mîring murdi khom an chi om dân angka chitin a lôm lômin an suak tâk a.
Novan ribôlna a lan
20Nova khan Pumapa rang mâichâm a siam a; sa rithiang neh iva rithiang tinrêng lâia mi khat khatkah a lâk a; mâichâmah khan hâlrivâm thillanin a lan a. 21Ribôlna thillan inam khan Pumapa khah ân lôm a; khanchu, Pumapa khan a lungrilin, “Miriamhei sikin rinêng hih vâni sâm tlak khâi no ning, miriam lungril ngaituanahei chu a naipangte lâi ata suala sip a nit a. Atûna kî that inrimang vang angka hin ringna nei tinrênghei hih that inrimang vang khâi no ning e. 22Rammual om tenah chi chôi zoro neh ât bûm zoro hei, ilum neh idâi hei, fûr neh ṭhâl hei, sûn neh zân hei om mai a ti,” a ti a.
Currently Selected:
RIPHUTNA 8: BIATBSI
Tõsta esile
Share
Copy
Want to have your highlights saved across all your devices? Sign up or sign in
The Bible Society of India
© 2014, Used by permission. All rights reserved. More