Malako 14
14
Bekukalila Yesu Luango lua Kumuita.
Mat. 26:2-5; Lk. 22:1, 2.
1Kusila kua bindi bibili kuabezaga kisagulo kiesuluko, nu tumpampa tutagaga; nu basankoga banene nu basanzi balondile bubamukata mu lumbisombiso, nu bamuite: 2kubuno batendile bune, Ta mu kisagulo, mu musanganano munakivua kuba kazege.
Malia wa Betania Ekubongia Yesu Bulago Kuitoe.
Mat. 26:6-13; Yoana 12:1-8.
3Nu gabezaga ku Betania mu numba za Simona muiya bibali, abezaga asalia, kuavule mukikulu umozi wabezaga na kabongelo ka alabasata, muko muabezaga bulago bua bukunza bubibu; abugizie kako kabongelo, nu amukubulide gantata geitoe. 4Tondo bantu bamozi bongilue, nu batendile bune, Buni bukuzimizia bulago bubuno? 5Kubuno bunakunzilue ku falanga nkama isatu #Mk. 6:37. nu zinakasilue bazambi. Nu bamutekuide nunse. 6Tondo Yesu atendile bune, Musigazi; buni bumukumuzangiazangia? ankitila busoga. 7Kubuno bindi binsania mukubezaga na bazambi, nu nkungu insania zimunatunda kubakitila busoga, munavuama: tondo tamuli nanne bindi binsania. 8Akita buavuama kubuno abongia mubili wane bulago ku kabamba ka kuyikua kuane. 9Nu lebelebe nkumubula bune, Kunsania kukasambalua musagu musoga mu kisi kinsania, bakasambala lingo buakitile mukikulu wono, bukaba kabali kage.
Yuda Isikaliote Ekugabula Yesu.
Mat. 26:14-16; Lk. 22:3-6.
10Nu Yuda Isikaliote, umozi weikumi nu babili, endile ku basankoga banene, buno amugabule kubeli. 11Nu babo, gabongule kubo, babogilebogile, nu bamulagile buno bamukase falanga. Nu alondile nkungu nsoga buanamugabula.
Bekulongekela Yesu Galila Idia lia Kisagulo na Beigisibua Bage.
Mat. 26:17-19; Lk. 22:7-13.
12Nu gabeide busi butangi bua tumpampa tutagaga, nu bazindilizizie kisagulo kiesuluko, beigisibua bage bamutendile bune, Kuni kukutunda tulongeke kiziki kia kulia kisagulo kiesuluko? 13Nu asingile beigisibua bage babili, nu abatendile bune, Endazi ku muino, nu muakulumane na wamulume eite idega lia mazi: muyangazi; 14nu kunsania kuingilage, nti muabuzia nyene numba buno, Musozi atenda bune, Kuni kuli busio bua bageni, nilie kisagulo kiesuluko na beigisibua bane? 15Nuwe amulolesie busio bunene buli kuigulu buse kayikayika, nu bualongekua bunsania kalazi: mumo umumutulongekela. 16Nu beigisibua bage batukile nu bendile, nu bamonine ku binsania anga buabulaga; nu balongekile kisagulo kiesuluko.#Ekesode 12:18-20.
Kuzinda kua Kisagulo Kiesuluko.
Mat. 26:20-24; Lk. 22:14, 21-23; Yoana 13:18-19.
17Nu gabuabeide buse muigolo abasile neikumi nu babili. 18Nu gababezaga ku meza bakulia, Yesu abatendile bune, Lebelebe nkumubula bune, Umozi wa kumuli nkulia nage gamozi, uwangabule. 19Nu babeide na kabebe, nu nawe nawe nawamubuzizie bune, Ndi nne? 20Nu abatendile bune, Umozi wa kumuli inyue ikumi na babili wozo unakatile nage kiandindi mu lupepe. 21Kubuno Muana wa muntu ende, anga buasanzilue: tondo kabebe ku wozo muntu ukugabula Muana wa muntu! bunabeide busoga songo muntu wono ntabutilue.
Yesu Ekubatenda Bubaliaga nu Bubanuaga u Kakengelezio ka Mubili Wage nu Mikila Zage.
Mat. 26:26-29; Lk. 22:17-20; I Kol. 11:23-26.
22Nu gababeide bese balia, atolile kampampa, nu asegile, nu akabunguide, nu abakasile, nu atendile bune, Tolazi, kakano keli mubili wane. 23Nu atolile kituma, nu gasilile kusega abakasilekio; nu bansania banune kukio. 24Nu abatendile bune, Kikino kili mikila zane zeidagano, zakubuka ku kabamba ka beingi. 25Lebelebe, nkumubula buno, nsikanua lingo biguma bia mizigi aba nu busi bubo bunkanua lingo mu bukota bua Kalaga.
Yesu Ekubula Petelo nu Bango Buamutune Petelo.
Mat. 26:31-35; Lk. 22:31-34; Yoana 13:36-38.
26Nu gabasilile kuimba luimbo, bendile ku muiduko wa Oleve. 27Nu Yesu abatendile bune, Inyue bansania muine nanne mitima: kubuno buasanzilue bune, Nkalibula mulangi, nu kibombo kia mikoko kikabalangana. 28Tondo ganabe nayuka, nalinge kumutanga kuenda ku Galela. 29Tondo Petelo amutendile bune, Ndi bango beina mitima nobe, tondo tanne. 30Nu Yesu amutendile bune, Lebelebe nkukubula buno lelo, mu kindi kikino, gabe mulume wa nkoko ntebika mambizi mabili, nti wantune mambizi masatu. 31Nuwe atendile lingo bubibu, Busoga kukua nobe, ndi nsiakutuna. Nu bansania batendile bubo.
Yesu Eli na Kabebe mu Getesemane.
Mat. 26:36-46; Lk. 22:40-46; Yoana 18:1.
32Nu bavule muisoa liamanagua buno, Getesemane; nu atendile beigisibua bage bune, Ikalazi gagano niki nasega. 33Nu endile na Petelo, nu Yakobo, nu Yoana, nu alingile kukonkomana nu akonkeidue. 34Nu abatendile bune, Nnenyene nili na kabebe kanene aba nu ku lukuo; sigalazi gano, nu kesiazi ntende. 35Nu gabeide esalombozia, aguide gansi, nu asegile buno, ndi bunakulungana, zeno nkungu zintingile. 36Nu atendile bune, Aba, Tatane, binsania binakulungana kuguli; ntikizie kituma kikino, tondo ta anga bunku sombola, tondo anga bukutunda. 37Nu gasubizie, asangile beigisibua bage beiyombeka ku tulo, nu atendile ku Petelo bune, Simona ndi wiyombeka ku tulo? Ndi ntunavuama kukesia ntende nkungu imozi? 38Kesiazi ntende nu segazi, buno munavua kuingila mu malindiko, mutima ukutunda, tondo mubili watamba. 39Nu endile Iingo, nu asegile, atendile bubo lingo. 40Nu asubizie lingo, nu abasangile beiyombeka ku tulo, kubuno bazenzelaga; nu tabamenyine bubamuakula. 41Nu avule lingo kubeli limbizi lia masatu, nu ababuide bune, Iyombekazi lino nu umunuazi: umpanga; nkungu zise buigi, nu Muana wa muntu agabulue mu maboko ma bagi. 42Zanzukazi, tuendazi; kubuno wozo ukungabula ese buigi.
Bekukata Yesu.
Mat. 26:47-56; Lk. 22:47-53; Yoana 18:3-11.
43Nu kazanga kongo anga buatendaga, Yudasa abasile, umozi wa babo ikumi nu babili, na musanganano babezaga na mapanga nu nkoma, basingilue na basankoga banene nu basanzi nu bakulu. 44Nu wozo wamugabulaga abanine kakengelezio bune, Wozo unamumage uwozo umuakate, nu muende nage bulonge bukata. 45Nu gabasile, kazanga kongo endile kueli nu atendile bune, Labi; nu amumumine. 46Nu babo bantu balambizie maboko kueli, nu bamukatile.
Petelo Asesa Muntu Umozi wa Kubabo Kutuzi.
Mat. 26:51-56.
47Nu umozi wa babo babezaga gago, abasizie bupanga buage mu musagi, nu abangile mukobe wa sankoga munene, nu amusesile kutuzi. 48Nu Yesu abakuide bune, Kubuni muavua, anga bakuvua ku muibi, na mapanga nu nkoma, kuvua kunkata? 49Busi na busi nabezaga neinyue neigisagia mu numba za kukumbamina, nu tamuankatile: tondo kubuno bunsania buabeide buno masanzo mazindilizibue. 50Nu bansania bamusigile, nu batinine.
51Nu musikila umozi amuyangile, abezaga eibiga tugu keindi ka nsulu; nu bamukatile; 52tondo asigile kako keindi ka nsulu, nu eitumine lubilo mundulu.
Bendile na Yesu ku Sankoga Munene.
Mat. 26:57-68; Yoana 18:12-14, 19-24.
53Nu bendile na Yesu ku sankoga munene: nu basankoga banene bansania bakundameine nu bakulu nu basanzi. 54Nu Petelo amuyangile bulazi, aba nu ku lusu lua sankoga munene; nu geikeide na bakambi, nu onguaga keiya. 55Nu basankoga banene nu bakazi ba luango bansania balondile bulongeki bua kuita Yesu; tondo tababumonine. 56Kubuno beingi bamukandikile, nu tabuabeide bumozi. 57Nu bamozi bemanine, nu bamukandikile batendile bune, 58Tungule kuatendaga bune, Nasambule numba zezo za kukumbamina zakitilue na maboko, nu mu bindi bisatu nobake zitobakue na maboko. 59Tondo bulongeki buabo tabuabeide bumozi. 60Nu sankoga munene emanukile munkatini muabo, nu abuzizie Yesu bune, Ndi ntuakule bubakukulongekela? 61Tondo eikede kibibi, nu ntakuide wampa. Nu sankoga munene, amubuzizie lingo, nu amutendile bune, Ndi uwe U Klisto Muana wa wozo mukiti wa mponga? 62Nu Yesu amutendile bune, Nnowe: nu mukamumona Muana wa muntu eikala ku kuboko kua seidume kua Magala, nu akavua mu bimpa bigulu. 63Nu sankoga munene eyatide nsulu zage, nu atendile bune, Kubuni lingo kutukulindila bango balongeki? 64Mungua bualinga Kalaga: mukukengela buni? Nu bansania bamusungizie bune, Atunganana kukua. 65Nu bamozi balingile kumusuila matazi, nu kumuziba ku meiso, nu bamutendile bune, Lengania: nu bakambi bamulibuide ngizi.
Petelo Ekutuna Yesu.
Mat. 26:69-75; Lk. 22:56-62; Yoana 18:16-18, 25-27.
66Nu Petelo abezaga ekile ga lusu, nu mukikulu mukambi wa sankoga munene avule: 67nu amonine ku Petelo ekungua keiya, amulolile kisozi, nu atendile bune, Uwe wabezagile na wozo Yesu muNazaleta. 68Tondo atunine, nu atendile bune, nsikungua bukutenda: nu abasile ku kabelabela, nu mulume wa nkoko abikile. 69Nu wozo mukikulu mukambi, amumueineko lingo, nu atendile lingo ku babo babezaga gago bune, Wono eli umozi wa ku babo. 70Nu atunine lingo. Nu gatingile nkungu nkeke babo babezaga bemana gago, babuide Petelo bune, Lebelebe uwe uli umozi wa ku babo; kubuno uli muntu wa Galela. 71Tondo alingile kuisuilila, nu kulumbila bune, Nsizi wozo muntu umukubula. 72Nu kazanga kongo mulume wa nkoko abikile limbizi lia mabili. Nu Petelo akengeide lilio idagi liamutendaga Yesu buno, gabe mulume wa nkoko ntebika mambizi mabili, wantune mambizi masatu. Nu gabukengeide, alilile.
Currently Selected:
Malako 14: NTKI57
Tõsta esile
Share
Copy
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.