Matayo 5
5
Kusambala kua Yesu ku Muiduko.
Lk. 6:20-49.
1Gamonine ku musanganano wa bantu, abakamine ku muiduko: nu geikede gansi, beigisibua bage bamuvuilide: 2nu galimbuide kanua kage, abeigisizie bune,
3Mbogimbogi ku babo beli bazambi mu muuza wabo: kubuno bukota bua meigulu buli buabo.
4Mbogimbogi ku babo beli na kabebe: kubuno bakabobelezibua.
5Mbogimbogi ku babo babota; kubuno bakapiena kisi.
6Mbogimbogi ku babo bekukua na nzala nu mpusia za kuisanana: kubuno babo bakeikuta.
7Mbogimbogi ku babo bekukua kiombo; kubuno babo bakakuilua kiombo.
8Mbogimbogi ku babo beli na mutima wasuaga; kubuno babo bakamona ku Kalaga.
9Mbogimbogi ku basungi; kubuno bakamanua bana ba Kalaga.
10Mbogimbogi ku babo bababazizibue ku kabamba ka kuisanana: kubuno bukota bua meigulu buli buabo.
11Mbogimbogi kumuli inyue bakalingua, nu kubabazibua, nu kuekua buza ku mulondo na mulondo mubi ku kabamba kane. 12Bogazibogazi nu mube na kielele: kubuno lukalilo lunene lueinyu lusoga luli muigulu: kubuno ububo bubababazagia balengania balingaga kuba nti tamubutua.
Bantu baKalaga beli Munkange nu Kiengi kia Kisi.
Mk. 4:21-23; Lk. 8:16-18.
13Inyue muli munkange wa kisi; tondo ndi munkange taguli nse, unasuagibua na kikizi? Tagunasuaga lingo nunse, umpanga nti watebua kumbuga nu kunyantua na bantu. 14Inyue muli kiengi kia kisi. Muino tagunabisama ndi wobakua gantata ga muiduko. 15Aba bantu tabanagulumizia kasuku, nu kukabika kunsi kua luzi, tondo gantata ga kibikilo kia kasuku; nuko nti kakusania bansania beli mu numba. 16Bubo kiengi kienyu kisane ku bantu, bamone ku makitilo meinyu masoga, nu nti baganune Soeinyue uli muigulu.
Mulembe wa Mose.
17Tamukengele buno, navule kubigia mulembe aba bulengania: nsiavule kubibigia, tondo kubizindilizia. 18Lebelebe, nkumubula bune, Igulu nu kisi bikazimina tondo keisanzo kamozi kakeke ka masanzo ma mulembe takakazimina aba mansania makazindilizibua. 19Muntu unsania ukakagulaga ikakizio limozi ku mamano nu kuigisia bango bantu bubo, akakegibua mu bukota bua meigulu: tondo ukamanzaga nu kuigisia bango bantu bubo, wozo akakutibua mu bukota bua meigulu. 20Kubuno nkumubula nunse, ndi kuisanana kueinyu takuatinga kuisanana kua basanzi nu baFalese, nti tamukeingila mu bukota bua meigulu.
21Mungule buatendagua ku bantu ba wakalazi bune, Ntuite muntu; ukeitaga muntu nti akaba na katati ku lusungio: 22tondo nne nkumubula bune, Muntu unsania ukongelua mubuto wage akaba na katati ku lusungio; nu muntu unsania ukabula mubuto wage buno, kikongolo, akaba na katati mu luusu lua milondo; nu muntu unsania ukabulaga mubuto wage buno, Uwe u kioto, akaba na katati mu kiziba kia keiya. 23Umpanga, ndi usakasana lukaso ku kayulo, nu ndi wakengela buno, uli na mulondo na mubuto wobe, 24siga tanga lukaso ku kayulo, nu nti wenda ku mubuto wobe buno ugomie nage, nu nti wasubia kukasana lukaso luobe. 25Sasia kugomania na wakusomba nkungu ziguli nage mu nzila; wozo wakusomba anavua kukubasia ku ngatu, nu ngatu nti akubasia ku bakoloboyo, nu nti wakandua. 26Lebelebe, nkumubula bune, Ntukatuka nunse kuko ndi ntusila nsombi zobe insania.
27Mungule buatendagua bune, Ntuite meiga: 28Tondo nne nkumubula bune, muntu unsania ukulola mukikulu na lutundo lua kumulimbia, nti asila kalazi kuita meiga mu mutima wage. 29Nu ndi liso liobe liakuinia mutima, nti walitikia, nu nti walisa bulazi nobe: wanulumba wazimina kiganza kimozi, kuteli mubili wobe unsania kuingila mu kiziba kia keiya katanakuzinda. 30Nu ndi kuboko kuobe kua seidume kuakuinia mutima, nti wakusesa, nu nti wakuisa bulazi nobe: wanulumba wazimina kiganza kimozi, kuteli mubili wobe unsania kuingila mu kiziba kia keiya katanakuzinda. 31Buatendilue lingo bune, Muntu unsania ukatikagia mukikulu wage nti amukasa mukanda wakuita isonga: 32Tondo nne nkumubula bune, Ndi wamulume atikia mukikulu wage, kuteli ku kabamba ka butazi, nti amubika muiti wa meiga nu unsania wasonga wozo watukibua nti eita meiga.
33Lingo, mungule buatendagua ku bantu ba wakalazi buno, Ntulumbile kilumbilo kia buza tondo mukitile Mukota bilumbilo biobe binsania: 34tondo nne nkumubula bune, Tamulumbile nunse; aba kuigulu, kubuno igulu lili kisumbi kietangatanga lia Kalaga; 35aba ku kisi kubuno kisi ukibikilo kia magulu mage; aba nu ku Yelusalema, kubuno muino wozo uli wa Mukota Munene. 36Aba ntulumbile kuitoe liobe, kubuno ntunavuama kugalukia luzuili lumozi kuluengia aba kuluinia. 37Tondo kuitabizia kueinyu kube bune, E, nti, E, nu tobo nti, tobo; Iyuki liakutalika likutuka ku wozo mubi.
38Mungule buatendagua bune, Liso, ku liso, nu linyo, ku linyo: 39tondo nne nkumubula bune, Tamuluane na muntu mubi: tondo ndi muntu akulibula lugizi kuitama lia seidume, nti wamutimbulila lingo lia seikazi. 40Nuwe wakusongela, nu kutola nsulu zobe za kuntata, mukase ingo za kunsi. 41Nuwe ukakuenzia lugendo lua mutandi umozi, ku magala mage, wende nage lugendo lua mitandi ibili. 42Kasa wozo ukukusega, nu wozo ukukuambia ntumukase mugongo.
43Mungule buatendagua bune, Tunda munyobe, nu somba wozo wakusomba: 44tondo nne nkumubula bune, Tundazi babo bamusomba, nu segelazi babo bekumubabazagia; 45bubo muabe bana ba Soinyue uli muigulu: kubuno ekusanizia bantu babi nu bantu basoga kisongo kiage kia busi, nu ekulokezagia bantu beisanana nu bateisanana mbula. 46Ndi mukutunda bakumutundaga, mukaba na lukalilo lukizi? Bandelelombe ndi tabakukitaga bubo? 47Nu ndi mukusekela mibuto zeinyu tugu, nti unatinga bango bantu buni? Ndi baBilongo tabakukitaga nubo bubo? 48Umpanga mube basililila, anga buasililila Soinyue uli muigulu.
Currently Selected:
Matayo 5: NTKI57
Tõsta esile
Share
Copy
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.