Matayo 11
11
1Nu gasilile Yesu kukakizia beigisibua bage ikumi na babili, nuwe atukileko kuigisia nu kusambala mu mino zabo.
Yoana Mubatizi Asingile Beigisibua Bage Kubuzia Yesu.
Lk. 7:18-35.
2Nu gabezaga Yoana mu kikando ongule ku misagu za buakitaga Klisto asingile beigisibua bage babili bamubuzie bune, 3Ndi uwe u wozo wavue, aba ndi tukike ungo? 4Yesu abakuide bune, Endazi musambalile Yoana bumungua kubo nu bumuamona kubo: 5biuku bise biamona, bitunga bise biatabanga, beiya bibali bengibua, bimbula matuzi bise biungua, bakuzi bayukibua, nu bazambi basambalilua musagu musoga. 6Nu mbogimbogi ku wozo utakuina mutima nanne. 7Nu gabendile, Yesu alingile kubula musanganano bitondo bia Yoana, ababuide bune, Muendaga kulonda kikizi mu kalula? Kulola lusolu lukutengatenga na lumpumpu? 8Kikizi kimuendaga kulola? ndi muntu wavuala nsulu zabota? Unguililazi, babo bavuala nsulu zabota beli mu numba za bakota. 9Tondo muendile kulola kikizi? Ndi mulengania? E, nkumubula bune, Wozo watinga mulengania, 10Wozo uwasanzilue bune,
Unguililazi, nalinga kusinga mugenzi wane,
Kukunga nzila zobe. #Malaki 3:1.
11Lebelebe nkumubula bune, Takumonekaga muntu munene wabutua na bakikulu, watinga Yoana Mubatizi, tondo wozo uli mukeke mu bukota bua meigulu amutinga. 12Kutukila ku bindi bia Yoana Mubatizi aba nu kano kaluma bukota bua meigulu bukuluaninua bita, nubo baluani ba bita ubekubutola. 13Kubuno balengania bansania nu mulembe balenganizie aba nu ku Yoana. 14Nu ndi mukutunda kubumenyinina, wono u Eliya, wavue. 15Wozo uli na matuzi makunguilila, nti unguilila. 16Tondo nkalingimania kibuti kino na kikizi? Kili anga bana beikile kuisoko, bekubula banyabo, 17nu bekutenda bune, Tuamuidide mpengu, nu tamuaminine; tuamulilide na kasina, nu tamuigombile ga makuba. 18Kubuno Yoana avule nu ntalile nu ntanune, nu batendile bune, Eli na musumbu. 19Muana wa muntu avule, ekulia nu ekunua, nu bekutenda bune, Muntu kiliagundu nu munuzi wa maku, nu muida wa bandelelombe nu bagi! Nu menge makubingibua ku misako zamo.
20Nu alingile kuzugila zezo mino nu akitile migeleko mingi muzo, nubo tabeiyanizie. 21Kabebe ku Kolazina! kabebe ku Betesaida! songo migeleko mingi zakitilue kumuli, uzakitilue mu Tula nu Sidona, songo beyanizie kalazi banekeide mu nsulu za nsago nu mu luito. 22Tondo nkumubula bune, Lusungio lua Tula nu Sidona lukaba neibineibi ku busi bua lusungio kutinga lusungio lueinyu. 23Nu uwe Kapenuma, ndi ukabakamibua aba kuigulu? Ukakegibua ku Kiziki kia Bakuzi: songo migeleko zakitilue kumuli, uzakitilue mu Sodomo songo wono muino ukili aba nu lelo. 24Tondo nkumubula bune, Lusungio lua Sodomo lukaba neibineibi ku busi bua lusungio kutinga lusungio lueinyu.
25Mu nkungu zezo Yesu akuide buno, nakusima Tatane, Mukota wa meigulu nu kisi, kubuno wabisile malagi mano ku beli na menge nu bumenyinino, nu wamamenesia ku bana; 26bubo, Tatane, kubuno bubo buabezaga buakutananina. 27Tatane ankasile binsania: takuli wizi Muana, tugu Isi; takuli wizi Isi tugu Muana, nu unsania Muana ekutunda kumulolesia. 28Vuazi kundi, bansania bakutua na mikambo, nu bakutua na mizigo, nunne namumuzie. 29Muiyambike kisanga kiane kia mukambo, nu muiyigisie kundi kubuno nne nabota, nu nili bubobelelo mu mutima: nuinyue mumunue mubenyene. 30Kisanga kiane kia mukambo kiatamba, nu muzigo wane uli mugu.
Currently Selected:
Matayo 11: NTKI57
Tõsta esile
Share
Copy
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.