Luka 8
8
Yesu Ekonia Bantu ba mu Galela Nsambo,
1Nu kusila kua bubo, wono endile mu mino minene nu mikeke, kusambala nu kukukia musagu musoga wa bukota bua Kalaga, nu babo ikumi na babili babezaga nage, 2nu bakikulu bamozi bonezibue basumbu babi nu nsambo: Malia wamanagua Magadala, watikizibue basumbu mutuba kamo, 3nu Yoali mukikulu wa Kuza, mulangi wa bikulo bia Helode, nu Susana, nu bango beingi bamukitilaga na bikulo biabo.
Musumo wa Muyiki wa Mbuto.
Mat. 13:1-23; Mk. 4:1-20.
4Nu musanganano munene wamukundamanine, nu bantu ba muino na muino bamuvuilide, nu abeisile musumo buno: 5Muyiki wa mbuto endile kuyika mbuto zage: nu gaziyikile; imozi zakolokile mu ntungo mua nzila; nu zanyantilue na magulu, nu tuzoni tua kuigulu tuazilile. 6Ingo zakolokile gantata ga luanda; nu zalingile kuasa, nu zomine, kubuno tagabezaga gatontelua. 7Nuingo zakolokile mu mikele; nu mikele zasile nazo kiandindi, nu zazilimbanizie. 8Nuingo zakolokile ga bisogo bisoga, nu gazakulile, nu zakolamine biguma mambizi lukama. Nu gasilile kutenda bubuno, alalukile neiyuki inene buno, Wozo uli na matuzi makunguilila nti unguilila.
9Nu beigisibua bage bamubuzizie buisulilua bua wozo musumo. 10Nu abakuide bune, Inyue umuakasilue menge makumenya tukungu tua bukota bua Kalaga: tondo ku bango mu misumo; buno bakumona tabamone, nu bakungua tabamenyinine. 11Bubuno ubuisulilua bua wono musumo: Mbuto zili idagi lia Kalaga. 12Nu babo beli mu ntungo mua nzila ubabo bekungua; nu Liabo, u Satana, nti avua kutikia lilio idagi mu mitima zabo buno banavua kukatizia nu konibua. 13Nu babo beli gantata ga luanda, ubabo bekungua, bekusekela lilio idagi na mbogimbogi; nu tabeli na mizi, bakukatizia ku nkungu nkeke, nu bekukindua ku nkungu za malindiko. 14Nuzo zakolokile mu mikele, ubabo bongule ku lilio idagi, nu bekuenda nu bababazibua na tubebe nu bugumi nu mbogimbogi za kalamo kakano, nu tabakukolama biguma biazindilila. 15Tondo zezo zakolokile mu bisogo bisoga, zili anga bantu beli na mitima za bulili nu misoga, nu gabekungua kuidagi lilino, nti balikokomezia, nu bekukolama na komanizia.
Musumo wa Kiengi.
Mat. 5:15, 16; Mk. 4:21-23; Lk. 11:33.
16Nu takuli muntu, gunagulumizia kasuku, nu kukakukila na kiuki, aba kukabisa kunsi kua mugu; tondo akukabika gantata ga meza, bubo bansania bekuingila nti bamone ku kiengi kiako. 17Kubuno takuli kena kabisilue, katakabisulua; nu takuli katendagua ku kakungu, katakongubuako. 18Idangazi na bumukunguako: kubuno uli na kena, akakasua; nu uteli na kena, akatikibua kako kakukengela buno eli nako.
Bantu Bakasuaga ku Kabamba ka Yesu.
Mat. 12:46-50; Mk. 3:31-35.
19Nina nu bato bage bamuvuilide, tababasile buigi na kueli kubuno kuabezaga musanganano munene. 20Nu asambalidue na bantu buno, Nyoko nu bato bobe bemana kumbuga, bekutunda kukumonako. 21Tondo abatendile bune, Mane nu bato bane ubabano bekungua kuidagi lia Kalaga, nu kulikita.
Yesu Ekubotia Bimpumi bia Mazi.
Mat. 8:23-27; Mk. 4:36-41.
22Nu eingide mu buato na beigisibua bage: nu abatendile bune, Tusokazi ku lisilia lia kiziba; nu bendile, 23tondo gabendaga eiyombekile ku tulo: nu kisoa kinene kiavule mu kiziba; nu buato buiyeide na mazi, nu babezaga na kabebe. 24Nu bamuendeide, nu bamuyukizie, batendile bune, Mukota, Mukota, tuakua. Nu ayukile, nu azugide kisoa nu bimpumi bia mazi; nu biasilile, nu kuolile nunse. 25Nu ababuzizie buno, Bukatizio bueinyu buli kuni? Nu bakule boba, nu bangamine, batendeine buabo buabo bune, Wono eli nazi, aba kisoa nu mazi nti bikumuanza?
Yesu Ekonia Muntu Wabezaga na Basumbu ku Kisi kia baGelasa.
Mat. 8:28-34; Mk. 5:1-17.
26Nu babasile ku kisi kia baGelasa, kiabezaga buigi na Galela. 27Nu gatukile mu buato, akulumeine na muntu umozi wa wozo muino nu abezaga na basumbu; nu bindi bingi ntavualaga nsulu, aba ntikalaga lingo mu numba, umpanga ku nsinda. 28Nu gamonine ku Yesu, alalukile bubibu, nu aguide ku magulu mage, nu atendile neiyuki inene bune, Nili buni nobe, Yesu, Muana wa Kalaga Uli Muigulu? Nkukulumbizia buno, ntumbabazie. 29Kubuno akakizizie wozo musumbu atuke mu wozo muntu. Kubuno amubabazagia mambizi meingi; nu akandagua na mizigi za biuma nu azisesaga nu atinaga mu kalula mu magala ma wozo musumbu. 30Nu Yesu amubuzizie bune, Izina liobe? nu amutendile bune, Legioni; kubuno ingidue na basumbu beingi. 31Nu bamusegile buno ntabakakizie buno bende mu muzinga. 32Nu kuko kuabezaga muimba muingi wa ngulube waliaga ku muiduko: nu bamusegile buno abakakizie beingile mu wozo muimba. Nu abakasile buangato. 33Nu babo basumbu batukile mu muntu wozo, nu beingide mu muimba wa ngulube: nu wozo muimba wa ngulube wakumbile mu mpembue, nu wizisile mu kiziba, nu zakule. 34Nu gamueine balangi bazo ku bubo, batinine, nu basambeide musagu wozo ku muino nu mu masoa. 35Nu bendile kumona ku buabeide: nu bendeide Yesu, nu bamonine ku wozo muntu, watukaga basumbu, eikala ku magulu ma Yesu, avuala nsulu nu eli na menge; nu bakule boba. 36Nu babo bamonaga konibagua babasambalide lukita lonizibue wozo wabezaga na basumbu. 37Nu bantu bansania ba kisi kia Gelasa nu ba buigi nakio bamubuide bune, Tuka ku kisi kietu; kubuno bakule boba nunse; nu eingide mu buato, nu asubizie. 38Tondo wozo muntu watukaga basumbu amusegile buno ende nage: tondo amulagile bune, 39Subia kuobe ku numba, nu usambale bubo buakukitila Kalaga. Nu endile, kusambala bubo bunsania mu muino unsania buamukitide Yesu.
Yesu Ekonia Muana wa Yailo nu Mukikulu Umozi Wabezaga na Lusambo lua Mikila Kutukila Miaka Ikumi nu Ibili.
Mat. 9:18-26; Mk. 5:22-43.
40Nu gasubizie Yesu, musanganano wamusekeide na mbogimbogi; kubuno bansania bamulindilaga. 41Nu muntu umozi izina liage Yailo, amuvuilide, nu we abezaga muangati wa numba za musanganano: aguide ku magulu ma Yesu, nu amusegile buno, ingile muage mu numba; 42kubuno muana wage wa mukazi wangomo, abezaga musambi, abezaga ese muana wa miaka ikumi nu ibili, nu abezaga ese buigi na kukua. Tondo gabezaga asenda musanganano wamutimbikanizie.
43Nu mukikulu umozi, abezaga na lusambo lua mikila miaka ikumi nu ibili, nu agabuide bikulo biage binsania ku basakizi, nu takuli umozi wamonezie, 44avule kumbusa kuage, nu eitubizie ku mupimbo wa nsulu zage: nu kazanga kongo zezo mikila zasilile. 45Nu Yesu atendile bune, Nazi witubia kundi? Nu bansania batunine, tondo Petelo nu babo babezaga gamozi nage batendile bune, Mukota, musanganano ugukukusindikasindika. 46Tondo Yesu atendile bune, Kuli umozi witubia kundi; kubuno nungua magala mankoka kumo. 47Nu gamenyine wozo mukikulu buno ntabisama, avule ekuvua agilimina, nu aguide lisa nage nu amusambalide bubo bunsania buitubizagia kueli nu ku bantu bansania nu lukita lonibua kano kazanga. 48Nu Yesu amutendile bune, Mukinga wane, bukatizio buobe buakuonia; enda na bubobelelo.
49Gabezaga eki atenda, muntu umozi avule atukaga ku numba za muangati wa numba za musanganano, atendile bune, Mukinga wobe alekana; ntunakutia lingo Musozi. 50Tondo gongule Yesu ku bubuno, amuakuide bune, Ntunakua boba: katizia tugu, nu onibue. 51Nu geingide mu numba, ntazigile ungo muntu eingila nage, tugu Petelo, nu Yoana, nu Yakobo, nuisi wa wozo muana nu nina. 52Nu bantu bansania balilaga nsanda nene: tondo Yesu atendile bune, Tamunalila; wono muana ntalekana, tondo eiyombeka tugu. 53Nu bamusekile nunse, kubuno bamenyine buno alekana. 54Tondo we, amukatile geikoko, nu alalukile neiyuki inene bune, Mukinga, zanzuka. 55Nu apasizie lingo, nu kazanga kongo azanzukile, nu akakizizie buno, bamukase idia. 56Nu isi nu nina bangamine nunse; tondo abakakizizie buno tabasambalile muntu wampa bubo buakitua.
Currently Selected:
Luka 8: NTKI57
Tõsta esile
Share
Copy
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.