Yoana 4
4
Yesu Ekuenda ku Galela.
1Gamenyine Mukota buno baFalese bongule buno, Yesu atinga Yoana ku beigisibua nu ku kubatizia 2(tondo Yesu wenyene ntabatizagia, tondo beigisibua bage ubabatizagia tugu), 3atukile ku Yudaya, nu asubanizie lingo ku Galela.
Mukikulu wa Samalia.
4Nu buamutunganene buno atinge mu Samalia. 5Avule ku muino wa Samalia, izina liago Sikala, buigi na lilio isoa lia Yakobo liakasaga muana wage Yosefu: 6nu gago ugabezaga kanua balongo ka Yakobo, Yesu akutilue na lugendo, eikeide buigi na kanua balongo. Zabezaga zise nkungu mutuba. 7Mukikulu wa mu Samalia avule kutaga mazi. Yesu amubuide bune, Nkase mazi ma kunua. 8Kubuno beigisibua bage babezaga basila kuenda ku muino kukunza idia. 9Nu wozo mukikulu wa mu Samalia amubuide bune, Buni bunili nobe uwe muYuda ukutunda nkukase mazi, nunne nili mukikulu wa mu Samalia? (Kubuno baYuda nu baSamalia tabakugomanagia.) 10Yesu amuakuide bune, Songo wizi lukaso lua Kalaga, nu nazi ukukubuzia, buno nkase mazi ninue, songo unamusegile, nuwe anakukasile mazi ma kalamo. 11Wozo mukikulu amubuide bune, Mukota, ntuli na kituma kia kutaga, kubuno kanua balongo keli kazindu: nu kuni kuwasangile mazi ma kalamo? 12Ndi uwe watinga tateisue Yakobo, watukasile kanua balongo kakano, kanuaga muko na bana bage nu bituganua biage? 13Yesu amuakuide bune, Wanua ku mazi mamano anakua na mpusia lingo: 14tondo wanua ku mazi manamukasa ntanakua na mpusia nunse; tondo mazi manamukasa manaba mueli anga kanua balongo ka mazi kakukulungukaga mu kalamo katanakuzinda. 15Wozo mukikulu amubuide bune, Mukota, nkase mamo mazi buno nsikue na mpusia lingo, buno nsivue kutaga lingo gano. 16Yesu amubuide bune, Enda umane iba wobe, uvue nage gano. 17Wozo mukikulu amuakuide bune, Nsili na wamulume. Yesu amubuide bune, Watenda buligo nunse, ntuli na wamulume: 18kubuno wabezaga na bamulume batano, nu wozo uli kueli kano kaluma nteli iba wobe: watenda buligo. 19Wozo mukikulu amubuide bune, Mukota, namenya buno, uli mulengania. 20Batateisue bakumbaminaga ku muiduko wono; tondo inyue mukutenda buno, mu Yelusalema muli kiziki kiatunganana kukumbaminuamo. 21Yesu amubuide bune, Mukikulu, nkatizie, nkungu zikakuka tamukakumbamina Tatane ku muiduko wono, aba ku Yelusalema. 22Inyue mukukumbamina kimutizi: isue tukukumbamina kituizi; kubuno lonio lukutuka ku baYuda. 23Tondo nkungu zikakuka, nu ziseli, buno bakumbamizi ba lebelebe bakukumbamina Tatane mu muuza nu bulili: kubuno Tatane ekulonda bantu anga babano buno bamukumbamine. 24Kalaga eli Muuza; nubo bansania bakumukumbamina batunganana kumukumbamina mu muuza nu mu bulili. 25Wozo mukikulu amubuide bune, Nkumenya buno Masiya ekuvua (ekumanua buno, Klisto): gakavua, akatumenesia bunsania. 26Yesu amubuide bune, Unne wono gukutenda nage.
27Nu beigisibua bage bavule mu nkungu zezo; nu bangamine kubuno atendaga na mukikulu; takuli wamubuzizie bune, Kikizi kiukulonda? aba buni bukutenda nage? 28Nu wozo mukikulu asigile idega, nu endile ku muino, nu abuide bantu bune, 29Vuazi mulole muntu wabulaga misako insania zinakitaga: ndi wono nteli Klisto? 30Batukile ku muino, nu bamuvuilide. 31Mu zezo nkungu beigisibua bamusegile bune, Labi, lia. 32Tondo ababuide bune, Nili neidia limutizi. 33Beigisibua babuzanizie bune, Ndi kuli muntu wamuvuilide neidia? 34Yesu ababuide bune, Idia liane lili kukita kusombola kua wozo wansingile, nu kusila mulimo wage. 35Ndi tamunatenda buno, kusila kua miezi inazi nti matubulo meika? Nkumubula bune, Galaminazi, mulole masoa, kubuno mese mela nu mese buigi na kutubulua. 36Ukutubula eli na mutali, nu ekukundamania biguma biage ku kalamo katanakuzinda; bubo muyiki nu mutubuzi babogeboge gamozi. 37Bubuno buligo, Umozi ekuyikaga, nu ungo ekutubulaga. 38Namusingile kutubula bimutakitide mulimo; bango bakitile mulimo, nuinyue muingila mu mulimo wabo.
Basamalia Beingi Bekukatizia Yesu.
39Nu baSamalia bengi ba mu muino wozo bamukatizizie ku kutenda kua mukikulu kuatendaga bune, Ambuide bunsania bunakitaga. 40Gamuvuilide baSamalia, bamusegile buno, ekale nabo nu eiyombekile kuko bindi bibili. 41Nu bango bantu beingi bamukatizizie ku kutenda kuage; 42nu babuide mukikulu bune, Tuamukatizia kano kaluma, ta ku kutenda kuobe: tondo kubuno tuiyunguila isue benyene, nu tuamenya nunse buno, wono u Monia wa kisi.
43Nu gatingile bindi bibili atukile kuko, nu endile ku Galela. 44Kubuno Yesu wenyene atendile bune, Mulengania ntekuanzua kuabo. 45Gabasile ku Galela, baGalela bamusekede, kubuno bamonine ku misako insania zakitaga ku Yelusalema mu nkungu za kisagulo; kubuno babo bendile ku kisagulo.
Yesu Ekonia Muana wa Mukota.
46A vule lingo ku Kana wa Galela, kuagalukagia mazi buno mabe maku. Nu mukambi wa mukota abezaga na muana wage wasambaga ku Kapenuma. 47Gongule ku musagu buno, Yesu atuka ku Yudaya, nu avua ku Galela, amuendede, nu amusegile bune, Vua, wonie muana wane; kubuno ese buigi na kulekana. 48Yesu amubuide bune, Ndi inyue tamukumona ku tulolesio nu migeleko, inyue tamunakatizia nunse. 49Mukambi wa mukota amubuide bune, Mukota, vua wonie muana wane nti ntelekana. 50Yesu amubuide bune, Enda; muana wobe alama. Wozo mukambi akatizizie bubo buamubuide Yesu, nu endile. 51Nu gendaga mu nzila, bakambi bage bakulumene nage, bamubuide bune, Muana wobe alama. 52Ababuzizie nkungu zonine. Bamubuide bune, Walubi mu nkungu mutuba kamo muzuzo wasilile. 53Bubo isi amenyine buno, mu nkungu zezo zamubuide Yesu buno, muana wobe alama: nu akatizizie na numba zage insania. 54Wono uli mugeleko weibili wakitile Yesu gatukile mu Yudaya, gendile ku Galela.
Currently Selected:
Yoana 4: NTKI57
Tõsta esile
Share
Copy
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.