Yoana 2
2
Kisagulo kia Isonga lia Kana.
1Mu kindi kia bisatu, isonga liabezaga mu Kana wa Galela; nu nina wa Yesu abezaga kuko: 2nu bamanine Yesu nu beigisibua bage ku kisagulo. 3Nu gasilile maku nina wa Yesu amubuide bune, Tabeli na maku. 4Nu Yesu amubuide bune, Mukikulu, nili nobe buni? Nkungu zane tazika. 5Nina abuide bakambi bune, Nti muakita tugu anga buamubulage. 6Kuabezaga malega mutuba ma makozi mabikagua mu mazi ma koga anga lukita lua baYuda, nalio nalio naliakukaga mu litele makumi mubula. 7Yesu ababuide bune, Iyaziazi malega na mazi. Nu beyaziziemo bundo. 8Ababuide bune, Matagazi, nu muende namo ku wozo mukota wa kisagulo. 9Nu gasondile mukota wa kisagulo ku mamo mazi magalukile maku, ntamenyine kumatukile (tondo bakambi bamatagaga ubamenyine buno mazi), wozo mukota wa kisagulo amanine musongi, 10nu amubuide bune, Na muntu na muntu nokukasanaga maku masoga, nu ndi bamanua, nu kusila nti abakasa mango mabi: tondo uwe walangile maku masoga aba nu kano kaluma. 11Wozo umugeleko mutangi wakitile Yesu mu Kana wa Galela, nu alolesezie bantu lutanuno luage; nu beigisibua bage bamukatizizie.
12Nu endile na nina nu bato bage, nu beigisibua bage ku Kapenuma; nu tabezizizieko bindi bingi.
Yesu Ekuyanga Bantu Bakunzagia mu Numba za Kukumbamina.
Mat. 21:12, 13; Mk. 11:15-17; Lk. 19:45, 46.
13Nu kisagulo kia baYuda kiabezaga buigi, nu Yesu abakamine ku Yelusalema. 14Nu asangile bakunzia ba ngombe nu mikoko nu nkulimba, nu bagalukia ba falanga beikile mu numba za kukumbamina: 15nu agondile kasusula ka musinge, nu embizie babo bansania mu zezo numba, nu mikoko nu ngombe; nu abalanganizie falanga za bagulania, nu edukizie meza mabo; 16nu ababuide bakunzia ba bilinga bune, Tukiazi bibino; tamunakita numba za Tatane anga numba za kagulilo. 17Beigisubua bage bakengede idagi liasanzilue bune, Kangonongono ka ku numba zobe kandia.#Luimbo 69:9. 18Nu baYuda bamubuzizie bune, Ukutulosia kalolesio kakizi kakukita bubuno? 19Yesu atendile bune, Itazi zeno numba zakukumbamina, nu nazobake lingo ku bindi bisatu. 20BaYuda batendile bune, Bobakile zeno numba nnene zakukumbamina miaka makumi manazi nu mutuba, nu uwe gunazobaka ku bindi bisatu? 21Tondo atendaga ku numba nnene za kukumbamina za mubili wage. 22Gayukile ku bakuzi, beigisibua bage bakengede buno abatendile bubo; nu bakatizizie lilio isanzo, nu bubo buabatendaga Yesu.
23Gabezaga mu Yelusalema ku kisagulo kiesuluko, bantu beingi bakatizizie izina liage, gabamonine migeleko zakitile. 24Tondo Yesu ntabetabizizie, kubuno abezaga eizi bansania, 25kubuno nteiyaninaga bulongeki bua muntu; kubuno wenyene amenyaga makengelo ma muntu.
Currently Selected:
Yoana 2: NTKI57
Tõsta esile
Share
Copy
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.