Matie 4
4
Zhezü wɔɛ̀n-nyan
(Nyɛ́n nyan Markɛ̀n 1:12-13; mán Lükɛ̀n 4:1-13 wrú lɔ mɛ̀n)
1Zɛtɛn Ɔwɔ Hɛ́n kɛ́n Zhezü sɩ́ ɛnnùwì ô nɛ̀n dú ɔwɔɛ̀nnyan mɛ̀n anwa-wrɔn tamɛ̀n. 2Ɛnvra léyi Zhezü bɩ́ kìshe trɔ ɛbi ɛkoẅi-anhyrɛ̀, ɛnnyran mán ɛcɛ̀n nɛ̀n sɩ̀ zî ɛci, ɔmùanwù kɛ ẅɛn nɛ̀n. 3Anwa-wrɔn sɔnba nɛ̀n ɛtɛ̀sɛ̀n kɩ kɛ dɔ́ nɛ̀n le: “Ke dú kɛ è dú Ɔwɔ Ẅì hô, ɛ̀ wá tán ɛbù ndɔ hɔ̀n lɔ kɛ̀ srɔ ɛci-zî.” 4Zhezü mrɛ́n ɔmùan le: “Owrú Prɔnprɔn kɛ dɔ̀ le: ‘Kè sɩ̀ dù ɛci-zî zri kɩ kè dù ɔwrɔnẅì wúvà lɔ mɛ̀n, tɛ́n Ɔwɔ mùan-ankà-dɔ̀ totɔtɔ̀n mán dú ɔwrɔnẅì ci-zî.’ ”
5Zɛtɛn anwa-wrɔn bɩ́ nɛ̀n hɔ́n Zherüzalɛmɛ̀n anmàn prɔnprɔn, nɛ̀n hɛ́n yi Ɔwɔ-cice-wɔn lɔ wú 6kɩ nɛ dɔ́ yi le: “Ke dú kɛ è dú Ɔwɔ Ẅì hô, dù ɔwɔn lɔ wú trɛ̀n shɛ́n; ɔmuhi Owrú Prɔnprɔn ndɔ̀ le:
‘Ɔwɔ kɛ lɛ wá tán n'ɛkùyüre-bɔ̀
kɛ wá mɛ́n esùva, kɩ yɔ lɛ vɛ́ mɛ́n antamɛ̀n ô,
ɛnan ke bɩ́ sɔ́n mɛ́n obù.’ ”
7Zhezü mrɛ́n nɛ̀n ɔmùan le: “Owrú Prɔnprɔn vru dɔ̀ le: ‘E bɩ́ wɔɛ́n Ɛẅɛnwrɔn v'Ɔwɔ ɛ nyan.’ ”
8Anwa-wrɔn vru bɩ́ nɛ̀n hɔ́n ɛnkpò vri tɔ̀n wú, yé nɛ̀n ɛnhibù wú nɛ̀ncüì-di-ci hɔ̀n lɔ fɛn mán y'ɛgbrɛ́n, 9kɩ kɛ dɔ́ nɛ̀n le: “Mɛ lɛ tán mɛ́n ɛci ndɔ hɔ̀n lɔ fɛn, ke dú kɛ ɛ shɛ́n mɛ̀n ezìwú annankruemɛ̀n e cüe mɛ̀n ankɔ̀rɛ̀ ezìwúɛ.” 10Zɛtɛn Zhezü kɛ dɔ́ nɛ̀n le: “Sɔ̀n hɔ́n ɛmɛẅi, Anwa-wrɔn! Ɔmuhi Owrú Prɔnprɔn kɛ dɔ̀ le: ‘È cüe Ɛẅɛnwrɔn v'Ɔwɔ ankɔ̀rɛ̀ ezìwúɛ, ô ɛ̀ sɛ́n nɛ́n zri kɩ.’ ” 11Ɛnvra zri ndɔ lɔ mɛ̀n, anwa-wrɔn teze nɛ̀n. Zɛtɛn Ɔwɔ-kùyüre-bɔ̀ vá Zhezü ɛtɛ̀sɛ̀n kɩ wá nɛ̀n esùva.
Zhezü bú n'ɔkɔ̀hɔ̀n-hán kru Galile kpɔsɔ wú
(Nyɛ́n nyan Markɛ̀n 1:14-15; mán Lükɛ̀n 4:14-15 wrú lɔ mɛ̀n)
12Ɛnvra léyi Zhezü yá le yɛ wá Zhan anwɔn mɛ̀n nɔn, nɛ̀n hɔ́n Galile kpɔsɔ wú. 13Nɛ̀n sɩ̀ yɛ̀ Nazarɛtɛ̀n anmàn, tɛ́n nɛ́n hɔ̀n yɛ́ Kapɛrnahümɛ̀n, anmàn léyi dú Galile nɛnbà gbàtà mùan, Zabülɔn mán Neftali kpɔsɔ wú. 14Ndú ɔmu lɔ, ô Ɔwɔ-mùanwú-ankà-dɔ́-wrɔn Ezàhi ankà léyi dɔ̀ nɔn, kɛ̀ sá nmù:
15“Zabülɔn kpɔsɔ wú, Neftali kpɔsɔ wú,
ecüe gbàtà mùan, Zhurdɛn shi mɛẅi,
Galile léyi anwrɔn hɔ̀n léyi kè sɩ̀ dù Zhüifɛ̀n-bɔ̀hɩ yɛ́ nɔn!
16Fɛcüè léyi dú ɛnshi-nyran mɛ̀n nɔn kɛ lɛ kán ɛyri-kàn vri tɔ̀n!
Anwrɔn léyi dú owù-yri-yɔwɔ anmàn nɔn, ɛyri-kàn ke le dú yɔ tɛn!”
17Ɛnvra ndɔ lɔ mɛ̀n, Zhezü bukru ke yé Ɔwɔ ankà kɩ kɛ dɔ̀ le: “Nyɛ́n crɔn ɛnkru, ɔmuhi Anhobɩ́-Nɛ̀ncüì-dúyri bá ɛtɛ̀sɛ̀n nɔn!”
Zhezü ke bi ɛnshiemɛ̀n kɔ̀hɔ̀n-hán-bɔ̀ anzɔ̀
(Nyɛ́n nyan Markɛ̀n 1:16-20; mán Lükɛ̀n 5:1-11 wrú lɔ mɛ̀n)
18Zhezü kɛ nán esù Galile nɛnbà cɛ gbàtà mùan kɩ nɛ̀n kán anwrɔn-nɛ́n-muan-ẅì hɔ̀n anhyrɛ̀ léyi kɛ hán ɛnshiemɛ̀n kɔ̀hɔ̀n, Simɔn (léyi ye bi Piɛrɛ̀n nɔn) mán nɛ́n muan-ẅì Andre; yɔ ze ɛdàn nɛnbà cɛ lɔ mɛ̀n. 19Zhezü kɛ dɔ́ yɔ le: “Nyɛ́n kɛ́n mɛ̀n ɛsɛ̀n ô mɛ̀n srɔ nyɛ̀n anwrɔnẅì ẅɛn-bɔ̀.” 20Ɛnvra zri lɔ yɔ tecüe y'ɛdàn hɔ̀n lɔ kɩ yɔ kɛ́n nɛ̀n ɛsɛ̀n. 21Zhezü hɔ́n ezì esù-she kɩ kán Zhakɛ̀n mán nɛ́n muan-ẅì Zhan, yɔ dú Zebede ẅì hɔ̀n. Yɔ dú y'anhàka lɔ mɛ̀n yɔ mán yɔ zi Zebede mɛhi, kɩ yɔ brɛ́ yɔ ɛdàn lɔ. Zhezü bi yɔ; 22ɛnvra zri lɔ, yɔ tecüe yɔ anhàka lɔ mán yɔ zi, kɩ yɔ kɛ́n nɛ̀n ɛsɛ̀n. 23Zhezü ci Galile kpɔsɔ lɔ fɛn wú; ne yé yɔ ankà Ɔwɔ-sɛ́n-wɔn hɔ̀n lɔ fɛn léyi dú ɔkpɔsɔ lɔ wú nɔn mɛ̀n, nɛ dɔ́ Ɛmɛẅi ankà Ankrànkràn léyi dú Anhobɩ́-Nɛ̀ncüì-dúyri ankà, kɩ nɛ kɔrɛ y'ɛnlɔẅiɛ lɔ fɛn mán ɔkpɔ̀cɔ-lɔẅiɛ mɛ̀ntɛ mɛ̀ntɛ. 24Yɛ yá n'ankà Siri ɛnhi wú anmàn kɩ ye bɩ́ anwrɔn hɔ̀n léyi kɛ kán ɛnlɔẅiɛ mɛ̀ntɛ mɛ̀ntɛ gbàn: yɔ hɔ̀n léyi anhɛ́n gbàngbàn dú edomɛ̀n, eci-gɔ́n-lɔẅiɛ-bɔ̀ mán ɔkpɔ̀cɔ-bɔ̀, yɛ vá sɩ́ nɛ̀n. Kɩ Zhezü kɛ kɔrɛ yɔ. 25Fɛcüè bobrebe kɛ kɛ́n nɛ̀n ɛsɛ̀n; yɔ dú Galile, anmàn ɛvà kpɔsɔ wú, Zherüzalɛmɛ̀n anmàn, Zhüde kpɔsɔ wú mán ɛnhi wú anmàn léyi dú Zhurdɛn shi mɛẅi nɔn, yɔ và.
Currently Selected:
Matie 4: ƐAA03
Tõsta esile
Share
Copy
Want to have your highlights saved across all your devices? Sign up or sign in
Alladian: Ɛmɛẅi ankà ankrànkràn © Alliance Biblique de Cote d'Ivoire, 2003.