Yoane Eundakle manda
Eundakle manda
Yoane gɨñgɨt manda youkuk endɨ Yesulok gwañgwañii endoñnan nanin no, gan enlok koi tɨke-louptok nɨm nandɨmbi, kɨmɨt-sembɨmbi, enlok plon ñɨndɨñ e-yout tɨñguk, “gwañgwa nin Yesulɨ gɨnañlɨ kasɨleñguk” (13:23, 19:26, 21:7,20) ba “gwañgwa no” (18:15-16, 20:2-8).
Matayo wakɨt Maleko ba Lukalɨ gɨñgɨt manda kasatsɨ wɨn ikan youkɨlɨñ, wala tɨmbi Yesulɨ kundit engano tɨñguk asup wɨn Yoanelɨ lapɨpi, dɨwɨn no biennat sɨnɨk wɨngot youpi, ñɨndɨñ eñguk, “kundit youyoulɨn patak walɨ kusei ñɨndɨñda youyoulɨn: sɨndɨ manda ñɨn pinat nandɨ tɨmbi, Yesu en Mesia, Kunum Yambattok Nɨñañ, wɨn nandɨ-kwambɨñ danekalɨñ, tɨmbi nandɨ-kwambɨñ dañɨpi, endok gɨñgɨtñii kuañda tɨmbi kuñgu sɨsɨnɨk wɨn kasɨlenekalɨñ.” (20:31)
Yesulɨ e-yout manda asup eñguk wɨn Yoanelɨ wɨndɨñgangot lapɨpi, tɨpetgot youkuk. Gan endɨ Yesulok kusal wakɨt kuñgu sɨsɨnɨk ba nandɨ-kɨlɨktɨlok plon manda asup ñɨndɨñ youkuk: Yesulɨ Kunum Yambattok Man Mandan sɨsɨnɨk, tɨmbi nepek gɨtɨñgɨtɨk ep tɨmbɨ indañguk. Endɨ Kunum Yambattoñ lololok yama wakan; endɨ telaktok kusei, manda biañgan sɨsɨnɨktok kusei, ba kuñgu sɨsɨnɨktok kusei; endɨ kuñgulok nanañ tuk biañgan sɨsɨnɨk ba kolsalen kuñgu emlak en wakan; endɨ mɨlamɨlat ba kuñgu molom; tɨmbi endɨ sipsiplok kandɨkñenjɨ kɨndem ba wain komba sɨsɨnɨk en wakan. Nin endɨ Yesu nandɨ-kɨlɨktɨ tɨñmɨlak, endɨ kuñgu sɨsɨnɨk kasɨlembi, papat kwambɨñgan kulak, gan nin endɨ Yesu siñgi wɨlmɨlak, endɨ kɨmlok gɨñgɨt kulak, tɨmbi kolandok tambon ombɨ-tɨkeukak.
Yoanelɨ kasat youkuk wolok sambat
Yesulɨ ama sɨnɨk indambi, kena kusei kɨmɨkuk (1)
Yesulok mandan ba kundil walɨ endɨ Kunum Yambattok Nɨñañ wɨn tɨmbɨ inda-dakleñguk (2-12)
Yesulɨ kɨmbepi, gwañgwañii tɨ-pañgɨpañgɨle tɨ-semguk (13-17)
Yesulɨ enlok kusal tɨmbɨ inda-dakleuktok kɨm mɨlapi, gwañgwañiiloñ inda-semguk (18-21)
Currently Selected:
Yoane Eundakle manda: nifPNT
Tõsta esile
Share
Copy
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved