ⵎⵜⴰ 26
26
ⵎⵍ ⵓⵏ ⴾⵤ ⴶⴰ ⵗⵢⵙⴰ ⵢ ⵜⵎⵜⵏ⵿ⵜⵏⵜ ⴹⴶⵢ ⵓⴰ ⴼⵍⵙ ⵤⴶⵏ ⵢⵜⴹⵏ ⵗⴼ
1ⵙ ⵗⵔⴹ ⵗⵢⵙⴰ ⵍⴼⵢⴹⵜⵏ ⵛⵏ ⴾⵍ ⵏⴰ ⵢ ⵏⵜⵍⵀⵏⵜ 2«ⵜⵙⵏⵎ ⵙ ⵎⴹ ⵓⵏ ⴾⵢ ⵀⵙⵏ ⵛⵏ ⴹⵏ ⵎⵔⵏ ⴹⵢ ⴹⵗ ⴹ ⵤⴰ ⵜⵓⵙⵜⵔⵎⵙⴰ ⵏⴾ ⴶ ⴶⴹⵎ ⵢⴹ ⵜⵓⵜⵢⵜⵢⴰ ⴼⵍ ⵜⴶⵜⵓⵜ⵰» 3ⵙ ⵜⴶⵓ ⵓⵏ ⵎⵤⵔⵏ ⵏⵍⵎⵎⵏ ⴹⵎⵤⵔⵏ ⵏ⵿ⴾⵍⵍⵢⵂⴹ ⴹⵓⵏ ⴹⵗ ⵗⵔⵗⵔ ⵏⵗⵢⵓⵏ ⵏ⵿ⴾⵢⴼ ⵙⵏ⵿ⵜⴰ ⵎⵙⵏ ⵍⵎⵎ ⵓⴰ ⵤⵓⵔⵏ 4ⵏⵎⵔⴹⵏ ⴼⵍ ⵜⵎⵔⴾⵙ⵿ⵜ ⵜⵙ ⵤⵀⵤⵏ ⵗⵢⵙⴰ ⴶⵏ ⵎⵏⵜ⵰ 5ⴹⵔ ⴶⴰ ⵓⵏ ⴹⴰ ⵢⴰ ⴶⵏⵏ ⴹ ⵓⵔ ⵏⴶⵓ ⴹⵢ ⴹⵗ ⴹⵏ ⵏⵎⴹ ⴼⵍ ⴹ ⵓⵔ ⵌⵏⵌⵔⵓⵢ ⵓⵏ ⵜⵎⵜⵢ⵰
ⵀⴰ ⵏ⵿ⵗⵢⵙⴰ ⴹⵜⵏⴾⵔⵏⵜ ⴹⵗ ⵜⵎⵜⵏ⵿ⵜ
ⵜⵔⵎⵙ ⵏ⵿ⵗⵢⵙⴰ ⴹⵜⵓⵜⵢⵜⵢⵏⵜ ⴹⵀⵏⵜ
ⵜⵓⵏ⵿ⵗⵍ ⵏⵍⵓⵔⴹⵢ ⴼⵍ ⵗⵢⵙⴰ ⴹⵗ ⵀⵜⵏⵢ
6ⵂⴰ ⵗⵢⵙⴰ ⵜⵗⵔⵎ⵿ⵜ ⵏⵀⵜⵏⵢ ⵆⵎ ⴹⵗ ⵂⵏ ⵏ⵿ⵙⵎⵗⵏ ⵓⵙ ⴾⵍⴰ ⵜⴶⵔⵓ ⴾⵜⵔⵓ 7ⵙ ⴹⵜⵙⴰ ⵜⵏ⵿ⵜⵜ ⵢⵜ ⵜⵂⵤⵜⵏ ⴹⵗ ⵎⵤⵢ ⴹⵗ ⵙⵗⵎⵔ ⵜⵜⵓ⵰ ⵜⵏ⵿ⵜⵜ ⵜⵏ ⵜⵓⵢ ⵀⵜⵍⵢ ⴶⵏ ⴹⵗ ⵜⵂⵏ⵿ⵜ ⵜⴾⵏⵜ ⵛⵂⵙⵢ ⵂⴰ ⵍⵓⵔⴹⵢ ⵢⵏ ⵍⵏ ⵍⵎⵆⵎ ⵓⵍⵏ⵰ ⵜⵤⵔ ⴹ ⵜⵏⵆⵍ ⵍⵓⵔⴹⵢ ⵓⵏ ⴼⵍ ⵗⴼ ⵏ⵿ⵗⵢⵙⴰ ⵎⵙ ⵓⵏ ⵍⵗⵍⵎⵜ ⵏ⵿ⵙⵗⵎⵔ⵰ 8ⵙ ⵏⵢⵏ ⵏⵜⵍⵀ ⵔⵜ ⵓⵏ ⵛⴾⵏ⵿ⵜⵓ ⵓⵍⵏ ⵏⵏ «ⵎⴰ ⵏ⵿ⴼⴰ ⵂⵍⴾ ⵏⵍⵓⵔⴹⵢ ⴰ⵰ 9ⵍⵓⵔⴹⵢ ⵓⴰ ⵍⵏ ⵍⵎⵆⵎ ⴰ ⵏⵔ ⵏⵤⵏ ⴹⵏⵜⵓⴶⴰ ⵤⵔⴼ ⴶⵏ ⵜⵓⴾⴼⵏ ⵏⵤⵏⵜ ⵢ ⵜⵍⵆⵓⵏ⵰» 10ⴶⵔⵏ ⵗⵢⵙⴰ ⵓⵏ ⵏⵙⵏ «ⵎⴼⵍ ⵜⵗⵛⴹⵎ ⵎⵏ ⵢ ⵜⵏ⵿ⵜⵜ ⵜⴰ⵰ ⵎⵤⵍ ⵍⵗⵏ ⴹⵜⴶⴰ ⴹⴰ⵰ 11ⴼⵍⵙ ⵛⵍⵆⵓⵏ ⴼⵓ ⴹⴰ ⵍⵏⵜ ⵗⵔⵓⵏ ⵏⴾ ⵎⵔⵏ ⵓⵔⴶ ⴼⵓ ⵍⵗ ⵗⵔⵓⵏ⵰ 12ⵍⵓⵔⴹⵢ ⵓⴰ ⵜⵏⵗⵍⴰ ⵜⵜⴶⴰ ⴼⵍ ⵜⵗⵙⵏⵏ ⴼⵍ ⴹⵜⵙⵎⵜⴶ ⵢⵤⴾⵏⵏ⵰ 13ⴶⵢⵗ ⵙⵍⴾⵏⵗⵓⵏ ⵙ ⴹⴶ ⴹⵗ ⵜⵎⵍ ⵍⵏ⵿ⵌⵍ ⴹⵗ ⴹⵏⵜ ⴾⵜⵏⵜ ⴹⵗⵙ ⵜⵎⵍ ⵓⴰ ⵜⴶⴰ ⵜⵏ⵿ⵜⵜ ⴰ ⵜⵜⵓⴾⵜⴹⵓ⵰»
ⴶⵤ ⵏⵢⵂⵤⴰ ⵛⵎⵔⴾⵙ ⵛⵏ ⵙ ⵤⵜⵔⵎⵙ ⵗⵢⵙⴰ
14ⵤⵍ ⵓⵏ ⴹⴰ ⴹ ⵏ⵿ⴾⵔ ⵢⵏ ⴹⵗ ⵏⵜⵍⵀ ⵓⵏ ⵎⵔⵓ ⴹⵛⵏ ⴶⵏ ⵙⵎ ⵢⵂⵤⴰ ⵓⵙ ⵜⵓⵏⵓ ⵙⵈⵔⵢⵜⵢ ⴾⴰ ⵎⵤⵔⵏ ⵏⵍⵎⵎⵏ 15ⵏⵙⵏ «ⵎⴰ ⴹⵤⵜⴾⴼⵎ ⴹⵓⵏ⵿ⵜⴶⴰ ⴹⵗ ⴼⵙⵏ ⵏⴾ ⵎⵏⵏ⵰» ⵜⵤⵔ ⵏⵎⵔⴹⴰ ⴹⵔⵙⵏ ⴾⴼⵏ⵿ⵜⵓ ⴾⵔⴹⵜ ⵜⵎⵔⵓⵏ ⵏ⵿ⵜⴼⵍ⵿ⵜ ⵏⵤⵔⴼ⵰ 16ⵀⵤⵏ ⵗⵔ ⵎⵤⵢ ⵓⵏ ⴹⴰ ⴹ ⴶⵤ ⵛⵏ ⴶⵎⵢ ⵏ⵿ⵜⵎⵤⵢⵜ ⵜⴰ ⴹⵗ ⵤⴶⵓ ⵗⵢⵙⴰ ⴹⵗ ⴼⵙⵏ⵰
ⵎⵜⴶ ⵏⵎⵏ⵿ⵙⵢ ⵏⵎⴹ ⵓⵏ ⴾⵢ
17ⵙ ⴹⵓⴹ ⵤⵍ ⵓⴰ ⵤⵔⵏ ⵏⵎⴹ ⵓⴰ ⴹⵗ ⵜⵎⵜⵛⵏⵜ ⵜⴶⵍⵓⵏ ⵛⵏ ⵓⵔ ⵂⴰ ⵈⵎⵔⴰ ⵂⵤⵏⵏ ⵏⵜⵍⵀ ⵗⵢⵙⴰ ⵏⵏⵙ «ⵎⵏⴹ ⵜⵔⵗ ⴹⴾⵏⵙⵎⵜⴶ ⵎⵏ⵿ⵙⵓⵏ ⵏⵎⴹ ⵓⵏ ⴾⵢ⵰» 18ⵏⵙⵏ «ⴶⵤⵜ ⵗⵔⵎ ⵜⴾⵎ ⵓⴹⵏ ⵢⵏ ⵍⵏ ⴹⵏ ⵜⵏⵎⵙ "ⵏⴾ ⵛⵈ ⵍⵓⵆ ⵏ⵿ⵜⵎⵜⵏ⵿ⵜⵏ ⵂⵤ⵰ ⴾⵢ ⵗⵔ ⵤⴰ ⵏⵎⵏ⵿ⵙⵓ ⴹⵗ ⵎⴹ ⵓⵏ ⴾⵢ ⵏⴾ ⴹⵏⵜⵍⵀⵏ⵰"» 19ⵎⵤⵍⵏ ⵏⵜⵍⵀ ⵓⵙ ⵜⵏⵎⵔ ⵗⵢⵙⴰ ⵙⵎⵜⴶⵏ ⵎⵏ⵿ⵙⵓⵏ ⵓⵏ ⴾⵢ⵰ 20ⵙ ⵜⴹⴰ ⵜⴼⴾ ⵏⵗⵎⴰ ⵗⵢⵙⴰ ⴹⵏⵜⵍⵀⵏⵜ ⵏ ⵎⵔⵓ ⴹⵛⵏ⵰ 21ⵜⵜⵏ ⴹⵏ ⴹⵗ ⵙ ⵏⴰ «ⴶⵢⵗ ⵙⵍⴾⵏⵗⵓⵏ ⵙ ⵢⵏ ⴹⵗⵓⵏ ⴹⵤⴶⵏ ⴹⵗ ⴼⵙⵏ⵰» 22ⵀⵜⵓ ⵜⵏ ⵜⵓⵢⴹⵓ ⵙⵔⵙⵏ ⵙ ⵗⵛⴹⵏ ⵎⵏⵙⵏ ⵓⵍⵏ ⴹⵙⴶⵏⵓ ⴾⵢⵏ ⴹⵗⵙⵏ «ⵎⵍⵢ ⵏ⵿ⴶⵎ ⵓⵔⴶⵗ ⵏⴾ ⴾⵢⵤⴶⵏ ⴹⵗ ⴼⵙⵏ⵰» 23ⵜⵌⵓⵀⵙⵏ ⴶⵏⵙⵏ «ⵓⴰ ⴹⵤⴶⵏ ⴹⵗ ⴼⵙⵏ ⴹⵔⵓⴰ ⴹⵔⵙ ⴹⴰ ⴹⴰ ⴹⵗ ⵗⵤⵓ ⵢⵏ⵿ⴹⴰ⵰ 24ⵜⴹⵜ ⵙ ⵏⴾ ⴶ ⴶⴹⵎ ⴹⵀⴰ ⵙⵎⴾ ⵓⴰ ⵎⵍⵏ ⵍⴾⵜⵀⵏ ⴹⵗ ⵀⵜⵏⵏ⵰ ⵎⵛⵏ ⵢⴰ ⴾⵜ ⵍⵗⵤⵀ ⴹ ⵜⴶⵓ ⵓⴰ ⴹⴶⵏ ⵏⴾ ⴶ ⴶⴹⵎ ⴹⵗ ⴼⵙⵏ⵰ ⵓⴹⵏ ⵓⴹⵢ ⴹⵙⴼⵓ ⴼⴹⴰ ⴹⵓⵔⴶⵤ ⴹⵏⵜ⵰» 25ⵜⵤⵔ ⵛⵓⵍ ⵢⵂⵤⴰ ⵙⵏ⵿ⵜⴰ ⵜⵤⴶⵏ ⴹⵗ ⴼⵙⵏ ⵏⵙ «ⵏ⵿ⴶⵎ ⵓⵔⴶⵗ ⵏⴾ ⵙ ⵜⴶⵏⵗ ⴹⵢ ⵛⵈ⵰» ⵏⵙ ⵗⵢⵙⴰ «ⴾⵢ ⵎⵏⴾ ⵙ ⵜⵏⵗ ⴹⵢ⵰»
ⵜⴹⵔⵓⵜ ⵜⴰ ⵜⵍⴾⵎⵜ ⴶⴰ ⵗⵢⵙⴰ ⴹⵏⵜⵍⵀⵏⵜ
26ⵎⵤⵢ ⵓⵏ ⴹⵗ ⴹⵗ ⵜⵜⵏ ⴹⵏ ⴹⵗ ⴹⴹⴾⵍ ⵗⵢⵙⴰ ⵜⴶⵍⴰ ⴶⴰ ⴶⴹⵏ ⵢ ⵎⵛⵏⴰ ⵔⵤⴰ ⵜⴶⵍⴰ ⵜⵏ ⵤⵏ⵿ⵜⵜ ⵢ ⵏⵜⵍⵀⵏⵜ ⵏⵙⵏ «ⵜⵛⵓⵜ ⴹⴰ⵰ ⵜⵗⵙⵏⵏ ⴹⵢ⵰» 27ⴹⴼⵔ ⵓⵏ ⴹⴾⵍⴹⵓ ⵜⴾⵀⵔ⵿ⵜ ⴶⴰ ⴶⴹⵏ ⵢ ⵎⵛⵏⴰ ⴾⴼⵙⵏ⵿ⵜⵜ ⵏⵙⵏ «ⵛⵓⵜ ⴹⵗⵙ ⴾⵜⵏⵓⵏ 28ⴼⵍⵙ ⵤⵏⵏⵏ ⴹⵢ ⵙⵜⴹⵏ ⵤⵏⵢ ⵓⵏ ⵔⴾⵓⵍ ⵏ⵿ⵜⵙⵆ ⴶⵔ ⵎⵛⵏⴰ ⴹⵜⵎⵜⵢⵏⵜ⵰ ⵤⵏⵢ ⵓⴰ ⴹ ⵏ⵿ⵗⵍ ⴼⵍ ⴹ ⴶⵔⵓⵏ ⵢⵜⴹⵏ ⴶⵜⵏⵏ ⵜⵙⵔⴼ⵿ⵜ ⵏⵀⴾⴹⵏⵙⵏ⵰ 29ⵙⵍⴾⵏⵗⵓⵏ ⵙ ⵀⵤⵏ ⵗⵔ ⵎⵔⴹⴰ ⵓⵔ ⵤⵍⵙⴰ ⵜⵙⵢ ⵏⵙⵎⴹ ⵏⵍⵗⵏⵀ ⵓⴰ ⴾⵜ ⵓⵔ ⴹⵓⴹ ⵤⵍ ⵓⴰ ⴹⵗ ⵤⵛⵓⴰ ⵓⴰ ⵢⵏⵢⵏ ⵏⴾ ⴹⵔⵓⵏ ⴹⵗ ⵜⵗⵎⵔ ⵜⵏ ⵀⵏⵏ⵰» 30ⵜⵤⵔ ⵙⴶⴹⵏ ⴹⵗ ⵜⵎⵍⵏ ⴹⴶⵎⴹⵏⵏ ⵤⵀⵔ ⵙ ⵜⵏⵜⵗⵔⴹⵏ ⴾⵏ ⴹⵗⵗ ⵓⵏ ⵛⴾⵏ ⵏ⵿ⵤⵢⵜⵏ⵰
ⵎⵍ ⵏ⵿ⵗⵢⵙⴰ ⵜⵓⵢⵏⵜ ⴹⵜⵓⵏ⵿ⴾⵔⵏⵜ
31ⵂⵏ ⵜⵔⵢⵜ ⴹⵏ ⴹⴰ ⵙ ⴹⵙⵏⵏⴰ ⵗⵢⵙⴰ «ⵂⴹ ⴹⴰ ⴾⵜⵏⵓⵏ ⵙ ⴹⵓⵏ⵿ⵤⵆⵍⵗ ⵙⵀⵀ ⵏⴹ ⵓⵍⵓⵍ ⵤⴶⵤⵏⵓⵏ ⴼⵍⵙ ⵏⵏ ⵍⴾⵜⵀⵏ "ⴹ ⵓⵜⵗ ⵎⴹⵏ ⵀⵜⵓ ⵜⵤⵔ ⵓⵤⵓⵤⵏⵜ ⵢⴼⴹⵏⵜ⵰" 32ⵎⵛⵏ ⴹⴼⵔ ⵜⵓⵙⵏ⵿ⴾⵔⵏ ⴹⵗ ⵜⵎⵜⵏ⵿ⵜ ⴹⵓⵏⵏⵤⵔⵗ ⵙⴾⵍ ⵓⵏ ⴶⵍⵍⵢⴰ ⵆⵍⵗⵓⵏ ⴹⵗⵙ⵰» 33ⵛⵓⵍ ⵀⵜⵔⵙ ⵏⵙ «ⴾⴹ ⵓⵍⵓⵍ ⵤⴶⵤⵏⵙⵏ ⴾⵜⵏⵙⵏ ⴹⵗ ⵀⵜⵏⴾ ⴹⴰ ⵓⵏⵏ ⵓⵔ ⵍⴾⵎ ⴹ ⵓⵍⵓⵍ⵰» 34ⵏⵙ ⵗⵢⵙⴰ «ⴶⵢⵗ ⵙⵍⴾⵏⵗⴾ ⵙ ⵂⴹ ⴹⴰ ⵙ ⵤⵗⵔⵓ ⴾⵌⵢ ⵗⵔⴰ ⵜⴶⴹⵗⵢ ⵂⵔ ⴾⵔⴹⵜ ⵜⴾⵍⵜⵏ⵰» 35ⵏⵙ ⵀⵜⵔⵙ «ⴾⴹ ⵆⵍ ⵙ ⵜⵓⵏ⵿ⵗⴰ ⴾⵔⵤ ⵤⴰ ⵏⴶⵓ ⵏⴾ ⴹⵔⴾ ⴹⴰ ⵓⵔ ⴾⵢⵤⴶⴹⴰ⵰» ⵏⵏ ⵏⵜⵍⵀ ⴾⵜⵏⵙⵏ ⵓⵏ ⴹⴰ⵰
ⵜⵓⵜⵔⵢ ⵏ⵿ⵗⵢⵙⴰ ⴹⵗ ⴶⵜⵙⵎⵏⵢ
36ⵓⴹ ⴹⵔⵙⵏ ⵗⵢⵙⴰ ⴼⵔⴶ ⵏⵛⴾⵏ ⵏ⵿ⵤⵢⵜⵏ ⵙ ⵜⵓⵏⵓ ⴶⵜⵙⵎⵏⵢ ⵏⵙⵏ «ⵆⵎⵓⵜ ⴹⵢ ⴹⴰ ⴹ ⴾⵗ ⴹⴶ ⵏ ⴹ ⴶⴰ ⵛⵓⵜⵔⵓⵏ⵰» 37ⵤⵏ⵿ⴾⵤ ⴼⵍⵙⵏ ⵗⵢⵙⴰ ⴹⵓ ⴹⵀⵜⵔⵙ ⴹⵛⵏ ⵎⴹⵏ ⵏⵎⴹⵏⵙ ⵏ⵿ⵤⵀⴹⵢ ⵜⵤⵔ ⵙⵏ⵿ⵜⵏ ⵎⵏⵜ ⵗⵛⴹ ⵛⵓⵛ⵰ 38ⴹⵏ ⴹⵗ ⴹⵙⵏⵏⴰ «ⵓⴰ ⴶⵏ ⵎⵏⵏ ⴹⵗ ⵗⵛⴹ ⵀⴾⵗ ⴹⵀⴰ⵰ ⴹ ⵓⵔ ⵜⴼⵍⵎ ⴹⴰ ⴹ ⵏⴾⵢ ⵏⴾ ⴹⵔⵓⵏ⵰» 39ⵜⵤⵔ ⴶⴰ ⴼⵍⵙⵏ ⵔⵜ ⵏⵤⵏ⵿ⴾⵤ ⵙⵌⴹ ⵜⵔ ⵏⴰ «ⵀⵏⵏ ⴾⴹ ⵎⴾⵏ ⴹⵢ ⵜⵙⴶⴶⵗⵢ ⵜⴾⵀⵔ⵿ⵜ ⵜⵏ ⵍⵗⵤⵀ ⴹⵢ⵰ ⴹⵔ ⴶⴰ ⵓⵏ ⴹⴰ ⵢⴰ ⵓⵔⴶⵗ ⵓⴰ ⵔⵗ ⵏⴾ ⵜⴶⵏ ⴾⵍⵔ ⵓⴰ ⵜⵔⵗ ⴾⵢ ⵤⴶⵏ⵰» 40ⴹⴼⵔ ⵓⵏ ⵆⵍⴹⵓ ⵗⵢⵙⴰ ⵏⵜⵍⵀⵏⵜ ⵓⵏ ⴾⵔⴹ ⵏ ⵙⵏ⵿ⴹⵓ ⵏ⵿ⵙⵏ⵰ ⵏⴰ ⵢ ⵀⵜⵔⵙ «ⴹⵗ ⴹⵢ ⵏ⵿ⴹⵔⵓⵏ ⴹ ⵜⴶⵎ ⵍⵓⵆ ⵢⵏ⵿ⴹⴰ ⵜⴾⵢⵎ ⵏⴾ ⴹⵔⵓⵏ⵰ 41ⴾⵢⵜ ⵜⵏ⵿ⵙⵢⵎ ⵎⵛⵏⴰ ⴾⵓⵏⴶⵤⵏ ⴹⵗ ⵌⵔⵀⵜⵏ ⵏⵀⵍⵙ⵰ ⵜⴹⵜ ⵙ ⵏⵢⵜ ⵏⴶⴹⵎ ⵜⵙⴹⵔⵏ ⴶⵢ ⵏⵓⴰ ⵍⵗⵏ ⵎⵛⵏ ⴶⴹⵍⵙ ⵔⴾⵎ ⵏ⵿ⵜⵗⵙⵏⵜ ⵓⵏ⵰» 42ⵍⵙ ⵤⵏ⵿ⴾⵤ ⴼⵍⵙⵏ ⴹ ⵜⴶⵓ ⵛⵓⵜⵔⵓⵏ ⵏⴰ «ⵢⴰ ⵀⵏⵏ ⴾⴹ ⵓⵔ ⵜⵍⴰ ⵎⴾ ⵙ ⴹⵜⵗⵍⵢ ⵜⴾⵀⵔ⵿ⵜ ⵜⵏ ⵍⵗⵤⵀ ⴹⵢ ⴾⴹ ⵍⵤⵎⵢ ⵜⵜⵛⵓⴰ ⵓⴹⵢ ⵜⴶⵓⵜ ⵜⵔⵏⴾ⵰» 43ⵍⵙ ⵆⵍⵏ ⵏⵜⵍⵀⵏⵜ ⵓⵏ ⴾⵔⴹ ⴶⵤⵜⵏⵏ ⵆⵍⵏ ⵜⵙ ⴼⵍⵙ ⵓⴰ ⴹⵙⵏⴶⴰ ⵜⵙ ⴹⵗ ⴶⵤ ⵀⵙ ⴼⵔⴶⵏ ⵔⴰ ⵏⵛⵜⵓⵏⵙⵏ⵰ 44ⵍⵙ ⴼⵍ⵿ⵜⵏ ⴾⴰ ⴹⵏ ⴶⴰ ⵜⵓⵜⵔⵢⵏⵜ ⵜⵏ ⴾⵔⴹⵜ ⴹⵗ ⵏⴰ ⵔⵜ ⵓⴰ ⵏⴰ ⴹⵜ ⵓⵏ⵰ 45ⴹⴼⵔ ⵓⵏ ⵆⵍⴹⵓ ⵏⵜⵍⵀⵏⵜ ⵏⵙⵏ «ⴾⵓⵏⵢ ⵂⵔⵓⴰ ⴹⴰ ⵜⵏ⵿ⵙⵎ ⵜⵙⵏ⵿ⴼⵎ⵰ ⵏⵢⵜ⵰ ⵍⵓⵆ ⵂⵤⴹⵓ ⵓⴰ ⴹⵗ ⵤⴰ ⵜⵓⴶⴰ ⴹⵗ ⴼⵙⵏ ⵏⵙⵀⴾⴹⵏ ⵏⴾ ⴶ ⴶⴹⵎ⵰ 46ⵏ⵿ⴾⵔⵜⵏ ⵏ⵿ⴹⵓⵜ⵰ ⵏⵢⵜ⵰ ⵓⴰ ⴹⵤⴶⵏ ⴹⵗ ⴼⵙⵏ ⵓⴹⵓ⵰»
ⵜⵔⵎⵙ ⵏ⵿ⵗⵢⵙⴰ
47ⵛⵓⵍ ⵂⵔⵓⴰ ⴹⴰ ⵙ ⴹⵓⴹ ⵢⵂⵤⴰ ⵎⵙⵏ ⵢⵏ ⴹⵗ ⵏⵜⵍⵀⵏⵜ ⵓⵏ ⵎⵔⵓ ⴹⵛⵏ ⴹⵓ ⴹⵜⵎⵜⵢ ⵜⴶⵜ ⴹⵙⴶⵍⵏ ⵎⵤⵔⵏ ⵏⵍⵎⵎⵏ ⴹⵎⵤⵔⵏ ⵏ⵿ⴾⵍⵍⵢⵂⴹ⵰ ⵜⵎⵜⵢ ⵜⵏ ⵜⵓⵢ ⵛⴾⵀⵓⵏ ⴹⵜⵀⵔⴶⵏ⵰ 48ⵓⴰ ⵜⵤⴶⵏ ⴹⵗ ⴼⵙⵏ ⵎⵍⵙⵏ ⵍⵗⵍⵎⵜ ⵜⵙ ⵤⵜⵓⵙⵏ ⵏⵙⵏ «ⵓⴰ ⵤⵍⵎ ⴹⵗ ⵎⴹⵏ ⵏ ⵙⵏⵜ ⵙ ⵏ⵿ⵜⴰ ⵜⵀⵤⵎ⵿ⵜⵓ⵰» 49ⵙⴹⵓ ⵢⵂⵤⴰ ⵗⵙ ⵂⵤⵏ ⵗⵢⵙⴰ ⵏⵙ «ⵎⴰ ⵜⵈⵍⴾⵗ ⵛⵈ⵰» ⵜⵤⵔ ⵤⵍⵎⵜⵓ⵰ 50ⵏⵙ ⵗⵢⵙⴰ «ⵎⴹⵏⵏ ⵔⵜ ⵓⴰ ⴾⵢ ⴹⵓⵢⵏ ⴶⵢ⵰» ⵜⵤⵔ ⵓⴹⵏ⵿ⴹⵓ ⵀⵤⵏ ⵗⵢⵙⴰ⵰ 51ⵎⵤⵢ ⵓⵏ ⴹⴰ ⴹⵗ ⴹⵍⵀⵢ ⵢⵏ ⴹⵗ ⵏⵜⵍⵀ ⵏ⵿ⵗⵢⵙⴰ ⵜⴾⵀⵏⵜ ⵓⵜ ⵙⵔⵙ ⴾⵍⵢ ⵏⵍⵎⵎ ⵓⴰ ⵤⵓⵔⵏ ⴼⵔⵙⴹⵓ ⵜⵎⵤⴾⵏⵜ⵰ 52ⵜⵤⵔ ⵏⵙ ⵗⵢⵙⴰ «ⵙⵗⵍ ⵜⴾⵀⵏⴾ ⵜⵜⵔⵜ ⴼⵍⵙ ⵢⵜⴹⵏ ⴾⵍ ⵓⵏ ⵛⵆⵍⵏⵏ ⵙ ⵜⴾⵀⴰ ⵜⴾⵀⴰ ⵙ ⵤⵎⵜⵏ⵰ 53ⵓⵔ ⵜⵔⴹⵗ ⵙ ⴼⵔⴶⵗ ⴹ ⴶⵎⵢⴰ ⵜⵍⵍ⵿ⵜ ⴹⵗ ⵀⵏⵏ ⵙⴶⵍⴹⵓ ⵎⵔⴹⴰ ⴶⵔⵏ ⵎⵔⵓ ⴶⵏⵏ ⵏⵏ⵿ⴶⵍⵙⵏ ⴹⵛⵏ⵰ 54ⵎⵛⵏ ⵙ ⴶⴰ ⴹⵢ ⵎⵙ ⵤⵏ⵿ⴹⵓ ⵓⴰ ⵏⵏ ⵍⴾⵜⵀⵏ ⵎⵍⵏⵏ ⵙ ⵓⴰ ⴾⵍ ⵍⵤⵎ ⴹ ⵏ⵿ⴹⵓ ⵙⵎⴾ ⵓⴰ ⴹⴰ⵰» 55ⵜⵤⵔ ⵏⴰ ⵗⵢⵙⴰ ⵢ ⵜⵎⵜⵢ «ⵎⴼⵍ ⵜⵙⵎⴹⵓ ⵜⵓⵢⵎ ⵛⴾⵀⵓⵏ ⴹⵜⵀⵔⴶⵏ ⵢⴹⵜⵀⵤⵎ ⵤⵏ ⵙ ⵜⴶⵎⵢⵎ ⵌⵌⵀ ⵢⵏ ⵏⵀⵢⴹⴶ⵰ ⵏⴾ ⵓⵔⴶⵗ ⵤⵍ ⴾⵍ ⵏⵗⵎⴰ ⴹⵔⵓⵏ ⴹⵗ ⵂⵏ ⵓⴰ ⵤⵓⵔⵏ ⵏⵍⵗⵀⴹⴰ ⵙⵙⵗⵔⴰ ⴹⵗⵙ ⵎⵔⵏ ⵓⵔ ⴹⵜⵀⵤⵎ⵰ 56ⵎⵛⵏ ⵙⵏⵜ ⵙ ⵓⴰ ⴶⵏ ⴹⴰ ⴾⵜⵏⵜ ⴶⴰ ⴼⵍ ⴹ ⵏ⵿ⴹⵓ ⵓⴰ ⵏⵏ ⵍⴾⵜⵀⵏ⵰» ⴹⵏ ⴹⵗ ⵜⴼⵍⵏ ⵏⵜⵍⵀⵏⵜ ⴾⵜⵏⵙⵏ ⴹⴶⴶⵏ⵰
ⵜⵀⴹⵢ ⵏ⵿ⵗⵢⵙⴰ ⴹⵜ ⵙⴶⵓⵔ ⵓⴰ ⵤⵓⵔⵏ
57ⵢⵜⴹⵏ ⵓⵏ ⵀⵤⵏⵏ ⵗⵢⵙⴰ ⵓⵢⵏ⵿ⵜⵓ ⵙ ⴾⵢⴼ ⵙⵏ⵿ⵜⴰ ⵎⵙⵏ ⵍⵎⵎ ⵓⴰ ⵤⵓⵔⵏ⵰ ⵏ⵿ⵜⴰ ⵗⵔ ⵎⵏⵢⵏ ⵎⵙⵏⵏ ⵏⵜⵓⵔⵜ ⴹⵎⵤⵔⵏ ⵏ⵿ⴾⵍⵍⵢⵂⴹ⵰ 58ⴶⴰ ⵀⵜⵔⵙ ⵢ ⵗⵢⵙⴰ ⵍⴾⵎ ⵤⴶⵔⵏ ⵂⵔ ⵓⴹ ⵗⵍⴰ ⵏⵗⵢⵓⵏ ⵏⵍⵎⵎ ⵓⴰ ⵤⵓⵔⵏ ⴶⵤⵜⵓ ⵏⵗⵎⴰ ⴹⵎⵛⵗⵍⵏ ⵙⵓⴹ ⵢⴹ ⵏⵢ ⵓⴰ ⵤⴶⵏ⵰ 59ⵏ⵿ⴾⵔⵏ ⵎⵤⵔⵏ ⵏⵍⵎⵎⵏ ⴹⵙⴶⵓⵔ ⵓⴰ ⵤⵓⵔⵏ ⴾⵜⵏⵜ ⴹ ⴶⵎⵢⵏ ⵓⴹⵏ ⵆⵍⵏ ⵜⴶⵢⴰ ⵏⵀⵂⵓ ⴼⵍ ⵗⵢⵙⴰ ⴼⵍ ⴹ ⴶⵔⵓⵏ ⵜⵔⵢⵜ ⵏⴶⵢ ⵏⵎⵏⵜ⵰ 60ⵎⵛⵏ ⵛⴶⵢⵓⵏ ⴶⵜⵏⵏ ⵏⵀⵂⵓ ⵛⵏ ⴼⵍⵙ ⵜⴶⵏ ⴹⴰ ⵀⵙⵏ⵿ⴹⵓ ⴹⵗⵙⵏⵜ ⴹⵍⵍ ⵙⵂⵏ ⴼⵍ ⵜⵓⵏ⵿ⵗⴰ⵰ ⵈⵙⵍ ⵙⵏⵜⴹⵓ ⵜⴶⵢⵓⵏ ⵛⵢⴹ ⵙⵏⵜⵜ 61ⵏⵏⵜ «ⵓⴹⵏ ⵓⴰ ⵏⴰ "ⴼⵔⴶⵗ ⵌⵀⵔⵌⵢ ⵏⵂⵏ ⵓⴰ ⵤⵓⵔⵏ ⵏⵍⵗⵀⴹⴰ ⵏⵎⵛⵏⴰ ⵍⵙⵆⵓ ⴾⵔⵙ ⴹⵗ ⴾⵔⴹ ⴹⵏ⵰"» 62ⵜⵤⵔ ⵀⴹⴹ ⵍⵎⵎ ⵓⴰ ⵤⵓⵔⵏ ⵏⴰ ⵢ ⵗⵢⵙⴰ «ⴾⵢ ⵓⵔ ⵜⴶⵏⴰ ⵓⵍⴰ ⴹⵗ ⵜⵗⵜⵙ ⵛⵏ ⴹⴾⵜⵓⴶⵏⵏ ⴹⴰ⵰» 63ⵎⵛⵏ ⴶⵍⴰ ⵗⵢⵙⴰ ⴼⵙ⵿ⵜⴰ⵰ ⵍⵙ ⵍⵎⵎ ⵓⴰ ⵤⵓⵔⵏ ⵏⵙ «ⴶⵎⵢⴰ ⴹⵗⴾ ⴹⵜ ⵎⵛⵏⴰ ⴹⵢ ⴹⵔⵏ ⴹⵏⵗⵜⵎⵍⴰ ⴾⴹ ⴾⵢ ⵎⵙⵏ ⵍⵎⵙⵈ ⵀⵔⵔ ⵏⵎⵛⵏⴰ ⵓⵍⴰ⵰» 64ⵏⵙ ⵗⵢⵙⴰ «ⵓⵍⴰ ⴾⵢ ⵎⵏⴾ ⵏⵏ ⴹⵢ⵰ ⵎⵔⵏ ⵎⵍⵗⵓⵏ ⵙ ⵀⵤⵏ ⵗⵔ ⵎⵔⴹⴰ ⴹⵜⵏⵢⵎ ⵏⴾ ⴶ ⴶⴹⵎ ⵆⵎⴰ ⴹⵗ ⵗⵍ ⵏⵎⵍⵢ ⵏ⵿ⵜⵔⵏⴰ ⵜⵏⵢⵎⵢ ⴹⵗ ⵤⵢⴹⵓ ⵓⵔⴰ ⵛⴶⵔⴾⵏ ⵏ⵿ⵌⵏⵓⵏ⵰» 65ⵜⵤⵔ ⵤⵤⵔⵜ ⵍⵎⵎ ⵓⴰ ⵤⵓⵔⵏ ⵜⴾⵜⴾⵜⵏⵜ ⴼⵍ ⵓⴰ ⴶⵏ ⵎⵏⵜ ⴹⵗ ⵗⵛⴹ ⵏⴰ «ⵍⵙ ⵓⴰ ⵎⴹⵔⵓ ⴶⴰ ⵢ ⵎⵛⵏⴰ⵰ ⵓⴾ ⵎⴰ ⵏⴾⴰ ⵢ ⵜⴶⵢⵓⵏ ⵛⵢⴹ⵰ ⵓⵔ ⵜⵙⵍⵎ ⵢⵎⴹⵔⵓ ⵓⴰ ⴶⴰ ⴹⴰ⵰ 66ⵎⴰ ⵜⵏⵎ⵰» ⵏⵏⵙ ⴾⵜⵏⵙⵏ «ⵍⵙ ⵓⴰ ⵛⵔⵗⵏⵜ ⵜⵎⵜⵏ⵿ⵜ⵰» 67ⵜⵤⵔ ⴹ ⵙⵜⴼⵏ ⴼⵍ ⴹⵎⵏⵜ ⴶⵜⵏ⵿ⵜⵓ ⵜⵆⵙⵏⵙ 68ⴶⵏⵏⵙ «ⵍⵎⵙⵈ ⴹⴹ ⵤⵎⵙ ⴾⵢ ⵏⵀⵢ ⵎⵍⵏⴰ ⵓⴰ ⴾⵢⴶⵜⵏ⵰»
ⵛⴶⵜ ⵏⵀⵜⵔⵙ ⵗⵢⵙⴰ
69ⵙ ⵜⴶⵓ ⵓⵏ ⵀⵜⵔⵙ ⵆⵎ ⴹⵜ ⵂⵏ ⴹⵗ ⵗⵍⴰ ⵏⵗⵢⵓⵏ ⵓⵏ⵰ ⵜⵂⵤⵜⵏ ⵜⵎⵛⵗⵍ⵿ⵜ ⵢⵜ ⵏⵗⵢⵓⵏⵏ ⴹⴰ ⵜⵏⵙ «ⴾⵢ ⴹⴰ ⵜⵜⴹⵓⵗ ⴹⵗⵢⵙⴰ ⵓⵏ ⴾⵍ ⵏ⵿ⴶⵍⵍⵢⴰ⵰» 70ⵎⵛⵏ ⴶⴹ ⵀⵜⵔⵙ ⵓⵏ ⴹⵜ ⵢⵜⴹⵏ ⴾⵍ ⵏⴰ «ⵓⵔ ⵙⵏⵗ ⵍⵎⵗⵏⴰ ⵏⵀⵜⵏⵎ⵰» 71ⵜⵤⵔ ⴹⴶ ⵀⵜⵔⵙ ⵙⴰ ⵙⵔ ⵎⵢ ⵏⵗⵢⵓⵏ ⵜⵏⵢⵜⵓ ⵜⵎⵛⵗⵍ⵿ⵜ ⵢⵜ ⵜⵏⴰ ⵢⵢⵜⴹⵏ ⵓⵏ ⵍⵏⵏ ⴹⵏ «ⵍⵙ ⵓⵏ ⵜⴹⵓ ⴹⵗⵢⵙⴰ ⵓⵏ ⵗⵔⵎ ⵏⵤⵔⵜ⵰» 72ⵍⵙ ⴶⴹⵜⵓ ⵂⴹ ⵏⴰ «ⵓⵔ ⵤⴹⵢⵗ ⵍⵙ ⵓⵏ⵰» 73ⵙ ⴶⴰ ⵔⵜ ⵏⵎⵤⵢ ⴹⴼⵔ ⵓⵏ ⵂⵤⵏ⵿ⴹⵓ ⵎⴹⵏ ⵓⵢⴹ ⵀⴹⴹⵏⵏ ⴹⵏ ⵏⵏ ⵢ ⵀⵜⵔⵙ «ⵍⴾⵏ ⵙ ⴾⵢ ⴹⴰ ⵢⵏ ⴹⵗ ⵢⵜⴹⵏ ⵓⵏ ⴹⵗ ⴹⵏ ⵜⵎⵙⴰ ⴼⵍⵙ ⵓⵍⵏⴾ ⴹⴰ ⵎⵏ⵰» 74ⵜⵤⵔ ⴹ ⵂⴹ ⵀⵜⵔⵙ ⴶⵏⵓ «ⵎⵛⵏⴰ ⵢⴰ ⵜⵍⵗⵏⵗⵢ ⴾⴹ ⵀⵂⵓ ⴶⵗ ⵙ ⵓⵔ ⵤⴹⵢⵗ ⵍⵙ ⵓⵏ⵰» ⵎⵤⵢ ⵓⵏ ⴹⵗ ⴹ ⵗⵔⴰ ⴾⵌⵢ ⵗⵔⴰ⵰ 75ⴾⵜⴹⵓ ⵀⵜⵔⵙ ⵜⵏⴰ ⵜⴰ ⴹⵙⴶⴰ ⵗⵢⵙⴰ «ⴹⵜ ⵜⵗⵔⵢ ⵏⴾⵌⵢ ⵗⵔⴰ ⴹⵜⵏ⵿ⴾⵔⴰ ⵂⵔ ⴾⵔⴹⵜ ⵜⴾⵍⵜⵏ⵰» ⵜⵤⵔ ⴶⵎⴹ ⵙⴹⵢ ⴹ ⵂⵍⵓ ⴼⵍ ⵓⴰ ⴶⴰ ⴹⵗ ⵜⵎⴶⵔⵤ⵰
Currently Selected:
ⵎⵜⴰ 26: TTQtg
Tõsta esile
Share
Kopeeri
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.