Matiyu 4
4
Yesu n Kalijani
(Mar. 1:12-13; Luk. 4:1-13)
1Ayinviki a̱ Ka̱shile a ɗikai Yesu a kubana a kakamba, adama a na Kalijani† ka piya yi. 2U ka̱na̱i una̱ ali ayin amangere kanna n kayin. Ana ayin a nan lo o kotsoi, ɗa kambulu ka̱ ka̱na̱i ni ka̱u.
3Ɗa Kalijani ka banai ka danai ni, “Avu Maku ma̱ Ka̱shile† maꞋa baci vi mayun, bonoko atali a nam pa a o okpo burodi.”
4Ɗa wu ushuki, “A ɗana ta̱ a Katagarda ka Ciɗa:
‘N ilikulyaꞋa i ɗa koci i kuzuwa vuza u kuyongo n wuma ba,
amma n kadanshi ka na Ka̱shile ka danai dem.’ ”#K.Wil. 8:3.
5Ɗa Kalijani ka ɗikai ni u bankai a̱ ubirini u ciɗa u Urishelima, ɗa u zuwai ni a̱ ubuta̱ u na u laꞋi nu ugaɗi dunduꞋun wa̱ A̱Ꞌisa̱ a Gbayin.† 6Ɗa u danai, “Avu ɗa baci Maku ma̱ Ka̱shile mayun, ikpangu a iɗika, adama a na wi ta̱ uɗani a Katagarda ka Ciɗa:
‘Ka̱shile ki ta̱ a kuzuwa alingata a̱ ni a inda wu.
I ta̱ e kukeɓe wu n ekiye e le,
ciya̱ kune ku nu ka̱ kuta̱ɗa̱tsa̱ a katali ba.’ ”#Ishp. 91:11-12.
7Ɗa Yesu wu ushuki, “Amma Katagarda ka Ciɗa ka dana ta̱ feu, ‘Ka̱ta̱ vu kondo Vuzavaguɗu Ka̱shile ka̱ nu ba.’ ”#K.Wil. 6:16.
8Ɗa Kalijani ka ɗikai ni u bankai gaɗi vu kusan, ɗa u yotsongi ni tsugono tsa aduniyan kakau n tsugbayin ci le. 9Ɗa u danai, “Vi baci a̱ kukuɗa̱ngu ka̱ta̱ vi cikpa mu, mi ta̱ e kuneke wu ili i nam pa ra̱ka̱.”
10Amma ɗa Yesu wu ushuki ni, “Ɗenga̱ mu lo, MalyaꞋi!† Katagarda ka Ciɗa ka dana ta̱:
‘Cikpa Ka̱shile Vuzavaguɗu vu nu,
a̱yi endeꞋen ɗa kpamu vu kuyaꞋanka tsugbashi!’ ”#K.Wil. 6:13.
11Ɗa Kalijani ka̱ ka̱sa̱kpa̱i Yesu, ɗa alingata a̱ ta̱wa̱i a̱ ɓa̱nka̱i ni.
Yesu u gita̱i ulinga u ni
(Mar. 1:14-15; Luk. 4:14-15)
12Ana Yesu u panai a̱ ka̱na̱ ta̱ Yahaya ali ɗa a zuwai ni a̱ kunu ku ugbashi, u ka̱sa̱kpa̱i Yahuda ɗa u bonoi uɓon u Ga̱lili. 13Ana u uwai a̱ Ga̱lili, ɗa u gita̱i kubana a̱ likuci i Nazara. Ɗa u banai ɗa u da̱sa̱ngi a Kafarnahum ɗevu m Mala ma̱ Ga̱lili, a ukambu u Zabalun n Nafutali. 14Ili i nam pa ya i yaꞋan ta̱ adama a na uzuwakpani u Ka̱shile u shana uteku u na keneki Ishaya u danai:
15“Uma o yoku i ta̱ punu a ukambu u Zabalun n Nafutali a uye u na u banai a mala.
Ubuta̱ u le wi ta̱ a kapashi ko yoku ko Kuɗolu ku Urdu, punu a uɓon u Ga̱lili.
Ubuta̱ u ɗaɗa Aza̱ka̱yimbi† n a̱bunda̱i i ida̱shi.
16Uma a nam pa a na i ida̱shi a̱ ka̱yimbi
i ta̱ e kene kutashi ku gbayin.
I ta̱ ida̱shi a̱ ka̱ra̱Ꞌa̱ upali n kululu ku ukpa̱,
amma kutashi ki ta̱ a kakana le.”#Ish. 9:1-2.
17A ayin a nan lo, ɗa Yesu u gita̱i kudana uma kadanshi ka̱ Ka̱shile, “Shika̱i unushi u ɗa̱ ka̱ta̱ i bono u Ka̱shile, adama a na tsugono tsu gaɗi ci yawa ta̱ ɗevu.”
Yesu u zagbai osoruku a̱ na̱shi
(Mar. 1:16-20; Luk. 5:1-11)
18Kanna ke te, ana Yesu wi a nwalu a̱ ka̱kina̱ ka Mala ma̱ Ga̱lili, ɗa we enei uma e re, vuza n vangu vi ni. Vuza te kula ku ni ku ɗa Sima, a̱yi ɗa kpamu e ci ɗeke Biturusu, vuza te tamkpamu a̱yi ɗa Andarawu. Ele osoruku a ɗa, i ta̱ kpamu a kutaɗuku maza ma̱ bilili me le a mala. 19Ɗa u danai le “Ta̱wa̱i i tono mu! Mi ta̱ o kuyotsongu ɗa̱ uteku u na i kutuka̱ n uma, an ya̱ tuka̱ n adan.” 20GogoꞋo lo ɗa a̱ ka̱sa̱kpa̱i maza ma̱ bilili me le, ɗa o tonoi ni.
21Ana u lazai kelime kenu, ɗa we enei uma o yoku aza e re vuza m mokoshi ma̱ ni, Yakubu n Yahaya dem muku n Zabidi. Ele punu asuvu a kpantsu ku le n esheku e le, o kufoɓuso maza me le. Ɗa Yesu u danai le o tono yi. 22GogoꞋo va lo, ɗa a̱ ka̱sa̱kpa̱i esheku e le m kpantsu ka, ɗa o tonoi ni.
Yesu u yaꞋin kuyotsongusu n u potsokpoi uma
(Luk. 6:17-19)
23Yesu u banai a̱ ubuta̱ dem a̱ Ga̱lili, n u yaꞋansai kuyotsongusu a̱ unu a avasa. Ɗa feu u yaꞋansai kadanshi ka Arabali a Singai† o tsugono tsu gaɗi. U potsokposoi kpamu uma ra̱ka̱ a na i nu mbanaki icuꞋu kakau. 24Arabali a̱ ni a̱ ka̱ra̱Ꞌi ali sai ulaji wu uɓon u Ga̱lili ali ɗa aza a mbanaki a na i a iɗika i Siriya a̱ gita̱i kubana adama a na u potsokpo le icuꞋu yi mbanaki n na n ka̱na̱i le dem, koɓolo n atakaci a ikyamba. Ele vi yoku i ta̱ n wunla̱i u gbani-gbani a ikyamba i le, aza o yoku i ta̱ atakaci n ipoyo, aza o yoku tamkpamu nkutsuma̱ n ɗa. Amma ɗa Yesu u potsokpoi le dem. 25Ka̱bunda̱i ka uma ko tonoi ni a̱ ubuta̱ u na u banai dem, uma kakau a na a̱ uta̱i Ga̱lili, n Dikafoli, n Urishelima, n aza a na a̱ uta̱i Yahuda n uka̱ra̱Ꞌi, n aza a na a̱ uta̱i ukambu u kasana ko Kuɗolu ku Urdu.
Currently Selected:
Matiyu 4: asgNT
Tõsta esile
Share
Copy
Want to have your highlights saved across all your devices? Sign up or sign in
© 2012 Wycliffe Bible Translators, Inc. All rights reserved