Yuh 3
3
I Yesu nda Nikwademu
1Mamu sana mndu mataba la *Farisa ta hgə lu ka Nikwademu tekw mataba gwal dagala dagala mataba la *Yahuda. 2Ka sliʼaftá tsi nda rviɗik ka lagha slanaghatá *Yesu. Kaʼa nda tsi mantsa: « Maləma ɗa! Nda sna ŋni kazlay: Mnda tagha skwi ta saha daga da Lazglafta kagha kəʼa, kabga haɗ mndu ta laviŋtá maga tsa mazəmzəmha ta mag kagha ya, ka haɗ Lazglafta kawadaga nda tsi wu, » kaʼa. 3« Kahwathwata ka yu ta mnaghata, ka ya a lu ta mndu ka mahis wu katsi, laviŋ a ta nghaŋtá ga mghama Lazglafta wu, » ka Yesu nda tsi. 4« Waká lu dzaʼa yəglagatá mndu nda ghada halata ni, dzaʼa vrəgladaf vra da huɗa ma ni, ŋa yəglagata ra? » ka Nikwademu nda tsi. 5Ka Yesu mantsa: « Kahwathwata ka yu ta mnaghata, ka ya a lu ta mndu nda imi nda Sulkum wu katsi, laviŋ a ta walaŋtá lami da ga mghama Lazglafta wa. 6Ya yaga mndu ná, mnda səla tsaya. Ya yaga Sulkum ya ná, ŋa Sulkum tsaya. 7Ma ndərmim ka nda ndərmima kabga mnaghata ɗa: “Tkweʼ ka yagatá kaghuni ka mahis” kəʼa. 8Nda ta tvi ta kum tsi ta vyakwa falak. Ta snay ka ta ghudzagani, sna a ka ka ga sliʼafta tsi wu, sna a ka ga ta dzaʼa tsi wa. Mantsa ya nzakwa inda mndu yaga lu ma Sulkum, » ka Yesu nda tsi. 9« Waká skwi mantsa dzaʼa magaku? » ka Nikwademu nda tsi. 10Ka Yesu nda tsi mantsa: « Kagha mndu ta tagha skwi ŋa la Israʼila ná, sna a ka ta tsa ra? 11Kahwathwata ka yu ta mnaghata, skwi snaŋ ŋni ta mnə ŋni, skwi nghaŋ ira ŋni ta gwaɗ ŋni, tsaw tsuʼa a kuni ta skwi ta mnə ŋni wa. 12Gwaɗay ɗa ta skwi ta magaku ta haɗik ŋa ghuni, zlgha a kuni wu, waká kuni dzaʼa zlghaftá skwi ta magaku ta luwa dzaʼa mnaghunata yu tama? 13Haɗ mndu ta kəɗ lafi ta luwa, ka mndu ta saha daga ta luwa a tsi wa. Ba *Zwaŋa mndu yeya ta saha daga ta luwa. 14Manda va ya kapadaf Musa ta nahaɗika ghuva tili ta udzu ma mtak ya, manda va tsaya dzaʼa kapadafta lu ta Zwaŋa mndu, 15kada mutsafta dər wa ta zlghaftá hafu ŋa kɗekedzeŋ.
16« Ɗvu ɗva Lazglafta ta ghəŋa haɗik, kəl tsi ka vlatá Zwaŋa ni turtuktuk, dər wa ta zlghafta, zwaɗuta a wu, mutsaf mutsa ta hafu ŋa kɗekedzeŋ. 17Ghunaga a Lazglafta ta zwaŋa ni ŋa tsanaghatá guma ta mnduha ta ghəŋa haɗik wu, ama ŋa mutsafta mnduha ma ghəŋa haɗik ta mbaku nda ma tsatsi, kəl Lazglafta ka ghunagatá Zwaŋa ni ta ghəŋa haɗik. 18Mndu ta zlghaftá Zwaŋa Lazglafta, haɗ guma ta ghəŋa ni wa. Mndu kul zlghafta, nda ghada tsatá guma ta ghəŋa ni, kabga kwala ni kul zlghaftá Zwaŋa Lazglafta turtuktuk.
19« Wya ghəŋa tsa guma ya: Ma saha tsuwaɗak ta ghəŋa haɗik, ka zlanavatá mndu ta tsuwaɗak ka laghu ɗvatá grusl, kabga slnaha taŋ kul ɗinaku. 20Inda mndu ta maga ghwaɗaka skwi, husaŋ husa tsuwaɗak. Haɗ tsa mndu ya dzaʼa walaŋta sagha da tsuwaɗak wu da maravata slna ni duway ta daɓi. 21Ka ŋərma ni nzakwa mndu kahwathwata katsi ná, dzaʼa sagha sa da tsuwaɗak kada nghavata inda slna ni ta mag tsi tsiɗiɗ kazlay: Skwi ta mag tsi, zɗəgana zɗa ta Lazglafta kəʼa. »
Yuhwana mnda maga batem nda Yesu
22Tahula tsa, ka sliʼaftá *Yesu kawadaga nda duhwalha ni ka laghwi ta haɗika Zudiya. Ka nzəɗavatá tsi tsəɓakw fitik kawadaga nda həŋ hada. Ka mag tsi ta batem ŋa mnduha. 23Ta mag Yuhwana ta batem guli ŋa mnduha ma sana vli ta hgə lu ka Inuŋ, ndusa nda sani vli ta hgə lu ka Salima, kabga dagala imi hada. Ka va sliʼadaghatá mnduha ŋa maganaftá batem ta həŋ. 24Ma tsa fitik ya, ta la a lu ksaghatá Yuhwana da gamak karaku wa.
25Ka sliʼanaftá duhwalha Yuhwana ta zlərɗutawi nda sana mnda la *Yahuda ta ghəŋa gwaɗa ta ghuɓa səla. 26Ka sliʼaftá həŋ ka lagha da mnay ŋa Yuhwana kazlay: Maləma ɗa! Tsa mndu si kawadaga nda kagha ta ɓla ghwa *Yardeŋ si ta mnə ka ta gwaɗa ta ghəŋa ni ya kay ná, waʼa ta maga batem ŋa mnduha. Ta sliʼi inda mnduha da tsi, ka həŋ. 27Ka Yuhwana mantsa: « Haɗ mndu dzaʼa mutsaftá sana skwi ka Lazglafta a ta vlaŋta wa. 28Nda sna kaghuni nda sləməŋa ghuni ta mnə yu tazlay “Kristi a iʼi wu” kəʼa. Ghunaɗik ghuna lu ma kɗaku tsatsi ka sagha. 29Ŋa zwaŋamidzi ta kla lu ta makwa, gra zwaŋamidzi ya guli ná, ta vata ni ta nzata tsi ka sna lwa gwaɗa ta gwaɗagapta zwaŋamidzi. Snaŋta ni ta gwaɗa ta gwaɗagapta tsi ya, rfay ni ta rfu. Manda tsaya ta rfa iʼi ta rfu guli. Ndanana ná, rfu ŋa ɗa ta rfay. 30Ka ŋla tsatsi nda ŋla, ka htakwa iʼi nda hta.
31« Mndu ya ta saha daga ta luwa ná, nzanagha nza tsatsi ta ghəŋa inda skwi demdem. Mndu ya ta ghəŋa haɗik guli ná, ŋa ghəŋa haɗik tsatsi. Gwaɗa ta ghəŋa skwi ta ghəŋa haɗik ŋa ni ta gwaɗay. Mndu ta saha daga ta luwa ná, [ta ghəŋa inda skwi nzanaghata tsatsi.] 32Gwaɗa ta ghəŋa skwi nghaŋ tsi nda ya snaŋ tsi ta gwaɗ tsi. Haɗ mndu ta tsuʼaftá gwaɗa ni wa. 33Mndu ta tsuʼaftá gwaɗa ni ná, graf gra tsa mndu ya ta Lazglafta kazlay: Kahwathwata ya kəʼa. 34Mndu ghunaga Lazglafta ná, gwaɗa Lazglafta ta gwaɗ tsi, kabga zwakuzwakwa Sulkum vlaŋ Lazglafta mida.
35« Ɗvu ɗva Da ta Zwaŋ, ka fanamtá tsi ta inda skwi ma dzva ni. 36Mndu ta zlghaftá tsa Zwaŋ ya mutsaf mutsa ta hafu. Mndu ta kwalaghutá zlghaftá tsa zwaŋ ya mutsafta a ta tsa hafu ya wa. Ta ghəŋa ɓasa ŋuɗufa Lazglafta yeya ta nzaku ta ghəŋa ni, » kaʼa.
Currently Selected:
Yuh 3: xed
Tõsta esile
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.