Zlr 1
1
Zlaganapta Lazglafta ta inda skwi
1Ma zlrafta inda skwi, ka zlaganaptá Lazglafta ta luwa nda haɗik. 2Tsa haɗik ya, kufaŋ nzakwa ni, ghuduɓul, təɗik ta ghəŋa imi. Ta zawataku Sulkuma Lazglafta ta ghəŋa imi.
Taŋtaŋa fitik
3Ka Lazglafta mantsa: « Ka nza tsuwaɗak, » kaʼa, ka nzaku tsuwaɗak. 4Kəʼa ka Lazglafta nda tsa tsuwaɗak ya ná, ɗina. Ka dəganatá tsi ta tsuwaɗak nda grusl. 5Ka hgə Lazglafta ta tsuwaɗak ka gifitik. Grusl guli ná, ka hgə tsi ka rviɗik. Mamu hawu, mamu sərɗək. Taŋtaŋa fitik tsa.
Mahisa fitik
6Ka Lazglafta mantsa: « Ka nza ghuvaŋata luwa mataba imiha, ka dəganata tsi ta imiha, » kaʼa. 7Mantsa, ka magaftá Lazglafta ta ghuvaŋata luwa, ka dəganatá tsi ta imiha nda mista ghuvaŋata luwa, nda imiha nda ta ghəŋa ghuvaŋata luwa. 8Ka hgə Lazglafta ta ghuvaŋata luwa, ka luwa. Mamu hawu, mamu sərɗək, mahisa fitik tsa.
Mahkəna fitik
9Ka Lazglafta mantsa: « Ka tsəkava tsəka imiha nda mista luwa ma vlaka turtuk ka zlagabta ghwalatá vli, » kaʼa. Ka gi nzaku tsi mantsa. 10Ka hgə Lazglafta ta tsa ghwalatá vli ya, ka haɗik. Tsa tsəkatá imiha ya ná, ka hgə tsi ka drəf. Kəʼa ka Lazglafta nda tsa skwiha ya ná, ɗina. 11Ka Lazglafta guli mantsa, ka ɗya haɗik ta kuzuŋ nda hulfaha nimaya, nda fuha ta yaku nda yakwa taŋ kavghakavgha. Ka nzakwa hulfa taŋ ta haɗik ŋa yəglakwa taŋ, kaʼa. Ka gi nzaku tsi mantsa. 12Ka ɗiygiŋtá haɗik ta kuzuŋ nda nimaya nda yakwa taŋ kavghakavgha. Inda fuha ta yaku nda hulfa mndəra taŋ kavghakavgha guli. Kəʼa ka Lazglafta nda tsa skwiha ya ná, ɗina. 13Mamu hawu, mamu sərɗək, mahkəna fitik tsa.
Mafwaɗa fitik
14Ka Lazglafta mantsa: « Ka nza skwiha ta tsuwaɗaka vli ma ghuvaŋata luwa ŋa dəganata vli gifitik nda vli girviɗik, ka nzakwa tsa skwiha ya ka ŋizlaha ŋa snaŋtá fitika skaluha, nda fitikha, nda vakuha. 15Ka nzakwa həŋ ka skwiha ta wuɗaku ma ghuvaŋata luwa ŋa tsuwaɗaka vli ta haɗik guli, » kaʼa. Ka nzaku tsi mantsa. 16Mantsa tama, ka magaftá Lazglafta ta skwiha dagala dagala his ka tsuwaɗak, mali ma tsa tsuwaɗak ya, ŋa ga mgham gifitik. Sagəŋ ma tsa tsuwaɗak ya, ŋa ga mgham girviɗik. Ka magaftá tsi ta tekwatsaha guli. 17Ka pəghatá Lazglafta ta həŋ ma ghuvaŋata luwa ŋa tsuwaɗaka vli ta haɗik, 18ŋa ga mgham gifitik nda ya girviɗik, ŋa dəganatá tsuwaɗak nda grusl. Kəʼa ka Lazglafta nda tsa skwiha ya ná, ɗina. 19Mamu hawu, mamu sərɗək, mafwaɗa fitik tsa.
Mahutafa fitik
20Ka Lazglafta mantsa: « Ka yaf ya skwiha nda hafu ma imi tusak, ka ndara ɗyakha nda zarakha ta ndaraku ma ghuvaŋata luwa nda ta ghəŋa haɗik, » kaʼa. 21Mantsa tama, ka zlaganaptá Lazglafta ta skwiha dagala dagala ma drəf, nda inda skwiha kavghakavgha nda hafu ma həŋ ta gigiɗa vgha ma imi. Zlaganabha ta inda ɗyaka zlghəŋ nda mndəra taŋ kavghakavgha guli. Kəʼa ka Lazglafta nda tsa skwiha ya ná, ɗina. 22Ka tfanaghatá Lazglafta ta wi ta həŋ. Kaʼa mantsa: « Yawa ya, ka yafta kuni tusak ma drəfha, ɗyakha guli, » ka yafta həŋ tusak ta haɗik. 23Mamu hawu, mamu sərɗək, mahutafa fitik tsa.
Mamkuʼ a fitik
24Ka Lazglafta mantsa: « Ka yigiŋ ya haɗik ta inda skwi nda hafu mida, nda mndəra taŋ kavghakavgha manda, rini, nda tsuɗayha ta mbaɗa nda huɗi, nda nimtak, » kaʼa. Ka nzaku tsi mantsa. 25Mantsa tama, ka magaftá Lazglafta ta nimtak nda mndəra taŋ kavghakavgha, nda rini nda mndəra taŋ kavghakavgha, nda tsuɗayha nda mndəra taŋ kavghakavgha demdem. Kəʼa ka Lazglafta nda tsa skwiha ya ná, ɗina. 26Ka Lazglafta guli mantsa: « Magafma maga ta mndu ta gara vgha nda amu, ŋa nzakwa ni manda amu, ka ga tsi ta mgham ta ghəŋa klipiha ma drəf nda ɗyakha ta ndaraku ta luwa, nda rini ta haɗik demdem, nda ya nda inda tsuɗayha ta gigiɗa vgha ta haɗik, » kaʼa 27Mantsa tama, ka zlaganabtá Lazglafta ta mndu ta gara vgha nda tsatsi. Kahwathwata ka zlaganabtá tsi ta mndu ta gara vgha nda tsatsi. I zgun nda marakw zlaganap tsi. 28Ka tfanaghatá Lazglafta ta wi ta həŋ, kaʼa mantsa: « Yafwa ya, nzawa nza tusak, ndəghanafwa ndəgha ta haɗik, gawa ga ta mgham ta ghəŋa ni. Ka ga kuni ta mgham ta ghəŋa klipiha ma drəf, nda ɗyakha ta ndaraku ta luwa, nda ya ta ghəŋa inda skwiha ta gigiɗa vgha ta haɗik, » kaʼa. 29Ka Lazglafta mantsa: « Wana yu ta vlaghunatá inda kuzuŋa nimaya nda hulfaha taŋ ta inda haɗik, nda inda fuha nda hulfa taŋ ŋa ŋa ghuni, ŋa zay ghuni. 30Ŋa inda rini nda nimtak ta haɗik, nda inda ɗyak nda zarak ta ndaraku ta luwa, nda inda skwiha ta gigiɗavata ta haɗik nda hafu ma həŋ, vlaŋ vla yu ta kuzuŋ ta həŋ ŋa zay taŋ, » kaʼa. Ka nzaku tsi mantsa. 31Kəʼa ka Lazglafta nghanatá inda tsa skwiha magaf tsi ya ná, wya ɗinu ɗina. Mamu hawu, mamu sərɗək mamkuʼ a fitik tsa.
Currently Selected:
Zlr 1: xed
Tõsta esile
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.