Imilimo AMASHIWI YAKULONDOLOLA PALI ICI CITABO
AMASHIWI YAKULONDOLOLA PALI ICI CITABO
Ici citabo ca Milimo ya Basole uwalemba ni Luka. Uyu wine Luka ewalemba ne Mbila Nsuma yabutatu iyo twita “Imbila Nsuma umo Luka ailembele”. Mu Mbila Nsuma, Luka atulondolwela imilimo Yesu abombele nefyo alefunda ukufumafye apo atampile ukufika na ku nshita anininepo ku mulu (Imili 1:2). Mu Milimo ya Basole, Luka akonkanyapofye ukutulondolwela ifyo abasole babombeshe nganshi mukufwaya ukufikilisha icipope Yesu abapeele icakuti, “Muli nokuba bakambone bandi mu Yerusalemu, mu Yudeya monse, mu Samaria, mpakafye no kwapelela icalo (Imili 1:8).” Luka aleendauka na Paulo mukubombela Lesa, ngefyo camoneka mu milembele yakwe pakutila “Ifwe” (Imili 16:10-17; 20:5—21:18; 27:1—28:16).
Kanshi ici citabo ca Milimo ya Basole cakonkanyapofye Imbila Nsuma umo Luka ailembele. Umulimo ukalamba uo citwebako, kutulanga ifyo Mupashi Wamushilo aletungulula abasambi bakwa Yesu abapakubala mu mulimo wakusalanganya Imbila Nsuma mu Yerusalemu, mu Yudeya monse, mu Samaria, mpakafye no kwapelela icalo. Kabili citushimikilako nefyo ubwina Kristu bwatampile mu Bayuda, nefyo icisumino ca bena Kristu cakumene isonde lyonse. Luka mukulemba ici citabo, asakamene ukulanga uulebelenga ukushininkisha ukuti, abena Kristu tabaiminine pakulwisha ubuteko bwa bena Roma. Kabili asakamene no kulanga ukuti mu cisumino ca bena Kristu emwafikilishiwe imipepele ya Bayuda.
Kuti twayakanya icitabo ca Milimo ya Basole mu fipande fitatu:
1 Ifyo ubwina Kristu bwatampile mu Yerusalemu panuma yakubwelelamo kwakwa Yesu ku mulu.
2 Ifyo bwina Kristu bwalundulukile mu ncende shimbi mu calo ca Palesitaini.
3: Ifyo ubwina Kristu bwalundulukileko mu fyalo fyashinguluka bemba wa Meditelaneani, bwafika na ku musumba wa Roma.
Icintu cimo icikalamba ico icitabo ca Milimo ya Basole cakomailapo, kubomba kwakwa Mupashi Wamushilo. Aishile na maka nganshi pa basambi mu Yerusalemu pa bushiku bwa Pentekoste. Kabili Mupashi Wamushilo akonkenyepofye ukutungulula no kukosha abena Kristu ne ntungulushi shabo muli fyonse ifyo balecita ifyalembwa muli ici citabo.
Imilandu yatantama ifi
Ukupekanya abasambi pakuti bakabe bakambone 1:1-26
(a) Icipope cakwa Yesu, abalaya na Mupashi Wamushilo 1:1-14
(b) Impyani yakwa Yuda wa ku Kelyoti 1:15-26
Bukambone bwa basambi mu Yerusalemu 2:1—8:3
Bukambone mu Yudeya na mu Samaria 8:4—12:25
Ifyo Paulo abombele 13:1—28:31
(a) Ulwendo lwapakubala 13:1—14:28
(b) Icilye mu Yerusalemu 15:1-35
(c) Ulwendo lwabubili 15:36—18:22
(d) Ulwendo lwabutatu 18:23—21:16
(e) Paulo mu cifungo mu Yerusalemu, mu Kesalia, na mu Roma 21:17—28:31
Currently Selected:
Imilimo AMASHIWI YAKULONDOLOLA PALI ICI CITABO: ILL15
Tõsta esile
Share
Copy
Want to have your highlights saved across all your devices? Sign up or sign in
Bible Society of Zambia