Mātiu 8
8
Ko e Fakamo‘ui ‘e Si̇̄sū ‘a e Tangata Kilia
(Ma‘ake 1:40-45; Luke 5:12-16)
1Pea ʻi he ‘alu hifo ‘a Si̇̄sū mei he moʻungá, naʻe muimui atu kiate ia ha fuʻu kakai tokolahi. 2Pea ‘iloangé naʻe ha‘u ha tangata kilia ‘o tū‘ulutui hifo ʻo ne kole atu: ‟‘Eiki, kapau ko ho finangaló ia, ʻoku ke lava fakamaʻa hoku kiliá.”
3Pea ala ange ‘a Si̇̄sū ki he tangatá mo ne folofola, ‟ʻOku ou loto ki ai. Ke ke maʻa koe!” Pea naʻe ma‘a leva ʻa e kilia ‘o e tangatá.
4Pea toe folofola ange ‘e Si̇̄sū ki ai, ‟‘Oua te ke tala ki ha taha. Ka ke ‘alu pē ki he taula‘eiki̇́ ‘o fakahā ange kuó ke sai, pea ‘ave ʻa e me‘a‘ofa naʻe tuʻutuʻuni ʻe Mōsesé, ke fakamoʻoni, kuo fakamaʻa koe.”
Ko e Fakamo‘ui ‘a e Tamaio‘eiki ‘a e ‘Ōfisa Loma
(Luke 7:1-10; Sione 4:43-54)
5Pea kuo a‘u ‘a Si̇̄sū ki Kāpaneume, ‘iloangé kuo fakafetaulaki mai kiate ia ha ʻeikitau Loma, ‘o kole tokoni kiate ia 6ʻo pehē: ‟‘Eiki, ‘oku ‘i ai si‘eku tamaio‘eiki ‘oku tokoto ‘i ‘api ʻoku puke ʻi he mamateá, pea ‘oku faingata‘ā‘ia lahi ‘aupito.”
7Pea pehē ange ki ai ‘e Si̇̄sū: ‟Te u ‘alu atu ‘o fakamo‘ui ia.”
8Ka naʻe talaange ‘e he ‘eikitau Lomá, ‟‘Oua ‘Eiki, he ko hoku falé ‘oku ‘ikai taau ia ke ke hū ki ai. Fai pē ha‘o folofola, pea ‘e mo‘ui ai ‘eku tamaio‘eiki̇́. 9He ko aú, foki, ko e tangata ma‘u mafai. ‘Oku ‘i ai ‘eku kau sōtia ‘oku nau fakaongo kiate au. pea ʻ
ʻO ka u ka tuʻutuʻuni ki ha taha, ‟‘Alu,” pea ʻokú ne ‘alu. Pea ʻoka u ka tuʻutuʻuni ki ha taha, ‟Ha‘u,” pea ʻokú ne ha‘u; pea ʻo ka u ka tuʻutuʻuni ki ha‘aku pōpula, ‟Fai ē,” pea ʻokú ne fai ia.
10Pea ofo ‘aupito ‘a Si̇̄sū ʻi he lea ‘a e ‘eikitau Lomá, peá ne pehē ange ki he kakai na‘e muimui mai̇́, ‟Ko hono mo‘oni̇́ ʻeni ‘oku ou tala atú, kuo te‘eki te u fetaulaki mo ha taha, ‘i ‘Isileli̇́, kuo lahi pehē ʻene tui̇́.”
11Pea ko eni ʻoku ou tala atu kiate kimoutolu, ‘e omi ha tokolahi mei he hahaké mo e hihifó ‘o kai kātoanga fakataha mo ‘Ēpalahame mo ‘Aisake pea mo Sēkope ‘i he Pule‘anga ‘o Hēvani̇́. 12Ka ko e kakai ‘oku lau ko e kakai totonu ‘o e pule‘angá, ‘e kapusi kinautolu ki he fakapo‘uli̇́ ʻi tuʻaʻā, ʻa ia te nau toki tangi ai mo feto‘eaki ʻi he mamahi̇́.”
13Pea pehē ange ‘e Si̇̄sū ki he ‘eikitaú, ‟Foki atu koe, he kuo fai kiate koe ʻo fakatatau ki ho‘o tui̇́.”
Pea naʻe mo‘ui ai pē ‘a e tamaio‘eiki ‘a e ‘eikitau Lomá, mei he taimi ko iā/.
Ko hono Fakamo‘ui ‘a e Kakai Tokolahi
(Ma‘ake 1:29-34; Luke 4:38-41)
14Pea kuo a‘u atu ‘a Si̇̄sū ki he ‘api ‘o Pitá, ʻo ne ʻilo ai ʻa e fa‘ē ‘o e mali ‘o Pitá, kuo tokoto, he kuo ne puke ʻi he mofi̇́. 15Pea ala atu ‘a Si̇̄sū ki hono nimá, pea mahu‘i leva meiate ia ‘a e mofi̇́, pea tu‘u hake leva ‘a e fefiné ‘o tauhi kiate ia.
16Pea ʻi heʻene efiafi hifó, kuo ‘omi ‘e he kakai̇́ kia Si̇̄sū ha tokolahi naʻe puke fakatēvolo, pea naʻá ne kapusi ʻa e fanga tēvoló, ‘aki pē ha‘ane folofola, pea ko kinautolu kotoa pē na‘e mahamahaki, na‘á ne fakamo‘ui. 17Pea toki fakamo‘oni ai ‘a e lau ‘a e palōfita ko ‘Aiseá:
‟Na‘á ne ʻave ʻe ia hotau ngaahi faingataʻaʻiá,
Peá ne fua hotau ngaahi mahakiʻiá.”
Ko e Fie-kaungā Fononga mo Si̇̄sū
(Luke 9:57-62)
18Pea ʻi he tokanga‘i ‘e Si̇̄sū ‘oku tokolahi ʻa e kakai̇, ʻoku ō mo iá, naʻá ne tuʻutuʻuni ke nau folau ki he kauvai ‘e taha ʻo e Tahi Kāleli̇́. 19Pea naʻe fakafetaulaki mai kiate ia ha faiako ʻo e Laó, ʻo ne pehē: ‟Tangata‘eiki, neongo pē ko e fē ha feitu‘u te ke ‘alu ki ai, te u muimui kiate koe.”
20Pea tali ‘e Si̇̄sū ki ai;, ‟Ko e fanga fōkisi̇́ ‘oku ‘i ai honau tafu, pea ko e fanga manupuná ‘oku ‘i ai honau pununga. Ka ko e Foha ‘o e Tangatá ‘oku ‘ikai hano mālōlō‘angá.”
21Pea toe pehē ange ‘e ha taha ʻi he kau akó, ‟‘Eiki, tukumai mu‘a ke u tomu‘a ‘alu ‘o tanu ‘eku tangata‘eiki̇́.”
22Ka naʻe tala ‘e Si̇̄sū ki ai, ‟Ha‘u koe ʻo muimui kiate au, kae tuku ʻa e kau maté ke nau tanu ʻa e mate ʻanautolú!”
Ko e Tō mai ʻa e Taufá
(Ma‘ake 4:35-41; Luke 8:22-25)
23Pea heka vaka leva ‘a Si̇̄sū mo ‘ene kau akó. 24Pea fakafokifā kuo tō ha fu‘u matangi ʻi he Tahi̇́, ‘o hake ʻa e ngaahi peaú ki he vaká, ka naʻe toka pē ‘a Si̇̄sū ia. 25Pea haʻu ʻene kau akó ‘o fafangu ia mo nau kaila: ‟‘Eiki ē, Fakahaofi kitautolu, he te tau tuʻutāmaki!” 26Ka naʻe folofola ‘e Si̇̄sū kiate kinautolu, ‟Ko e hā ‘oku mou manavahē ai̇́? Ko e hā ‘oku siʻi pehē ai ho‘omou tui̇́?” Pea toki malanga hake ia ‘o ne taʻofi ʻa e matangi̇́ mo e tahi̇́, pea naʻe nonga ka ko ha nonga.
27Pea fakatumutumu ai ‘a e kau akó mo nau pehē: ‟Ko e tangata fēfē eni, he ʻoku talangofua kiate ia ʻa e matangi̇́ mo e tahi̇́?”
Ko e Fakamo‘ui ‘o e Ongo ‘āveá
(Ma‘ake 5:1-20; Luke 8:26-39)
28Pea ʻi he a‘u atu ‘a Si̇̄sū ki he kauvai ʻe tahá, ko e feituʻu ia ‘o e kakai Kātalá, naʻe fakafetaulaki mai ha ongo tangata puke fakatēvolo, pea kuó na omi mei ʻi he ngaahi fa‘itoká. Ko e ongo tangata fakatuʻutāmaki ‘aupito, he na‘e ‘ikai ha taha ‘e lava ke fou atu he feituʻu naʻá na ʻi ai̇́. 29Pea fakafokifā naʻá na kaila mai: ‟‘E Si̇̄sū, ‘Alo ‘o e ‘Otuá! Ko e hā ʻa e me‘a ‘okú ke ha‘u ai ki heni̇́? ‘Ikai ko ho‘o ha‘ú ke faka‘auha kimaua, teʻeki ke hokosia hono taimi totonú?” 30Pea feʻunga iá, ‘oku ‘i ai ha fanga puaka ‘oku nau huohua ofi mai kiate kinautolu.
31Pea kole ange ‘e he fanga tēvoló kia Si̇̄sū: ‟Kapau te ke kapusi kimautolu, peá ke fekau mu‘a ke mau hū ʻi he fanga puaká.” 32Pea fekau ‘e Si̇̄sū kiate kinautolu: ‟Mou ʻalu,” pea nau matua mai ki tu‘a mei he ongo tangatá ‘o hū ʻi he fanga puaká, pea ‘oho hifo leva ‘a e fanga puaká ʻi he tahifohifó ‘o tūʻulu kotoa ki he Tahi̇́ ‘o nau melemo ai.
33Pea feholaki leva ʻa e kau tauhi̇́, ʻo nau hū ki kolo ‘o talanoa ai ki he kakai̇́ ʻa e me‘a kuo hokó, kae tautautefito ki he me‘a na‘e hoko ki he ongo tangata naʻe puke fakatēvoló.
34Pea ko eni, naʻe holo mai ‘a e kakai kotoa mei he koló ‘o fakafetaulaki kia Si̇̄sū, pea ʻi heʻenau mamata kiate iá, naʻa nau kole ange ke ne hiki mu‘a mei honau feitu‘ú.
Currently Selected:
Mātiu 8: TCNT
Tõsta esile
Share
Copy
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.