APUNG ANYIM 8
8
Shelei Laolotsün
1Goa nou Noa naiuso apako kheng nai noitsün aa thainian apem, naiuso tsam thainian apem yangsan, küta goumchi nai ahsheih tsak hau yankü khu-i, naiuso khiam nou abkü shin. 2Haiutsongan naiuso aün koukhantso nouso kiapan, naiuso maou ainou saotsün ah-ou laolo; 3naiuso khiam nou goumchi ainou ababkü shikü, nung ajekhaiu 150 nyi thapungkü phiai apem abkü shin. 4Naiuso alei chinyat nouko ajekhaiu chekü chinyat nai kheng nou Ararat king ai saonoi. 5Naiuso alei che ajekhaiu ayanyap nai kingkhaiu nouso epkü iula.
6Naiuso ajekhaiu aopülenyi thon nai, Noaüh kheng koukhantso nou sopsat, 7küta apaüh mükho tsak hongkhon, naiuso khiam nou goumchi ainou mowaikün lektso nung akhu ashi jeikei. 8Naiuso goumchi nai khiam absüne mo-ab ta ngeau apaüh meshen ainou mükham tsak hong. 9Lüko mükham nou meshen hokngam taiuao tsüephe, apa dongai kheng nai laokü shin, tititenai goumchi apemai khiam noiküla. Nung apaüh meshen pha tsatphu küta apa nialokü shikü meshen dongai kheng nai niathio. 10Naiuso apaüh ajekhaiu chinyatnyi taiukü noishiküta loüh mükham nou kheng ainou hongkhunshi. 11Nai mükham nou apa dongai ahsham laoküshin naiuso athaplu, apa son nai Olip paisa ayan piankü noiküla. Nungtiphe Noaüh khiam nouso goumchi ainou abthio-iu ta ngela. 12Naiuso apaüh loüh ajekhaiu chinyatnyi taiushi küta mükham nou hongshi, nungaito apa dongai nung mükham laitso laokü tsüshishi.
13Naiuso pon 601 sim nouko aya alei, naiuso ayating ajekhaiu nai khiam nou goumchi ainou waikü abpan. Naiuso Noaüh kheng nyingjeitsün lowan küta thaplunai goumchi waikü noiküla. 14Naiuso alei nime ajekhaiu kheikü nime küta chinyatnyi nouko goumchi waikü noiküla.
15Goa nou Noa tü ngiom, 16“Ni, naiuso atsammongnyiu, athsoso, naiuso athsoso tsammongnyiuso, kheng ainou ashikhuwan. 17Niko aa noitsün thainian chikü, waio nouso, tsam thainian nouso, achinkeitsün thainian nouso, tilüsong goumchi ko chinkü keiji, niko kheng ainou nialokü ashian, ngüsoüh goumchi nai shingkü chetsinyimkü khuau noin.” 18Nungti Noa naiuso apa ko apa thsoso, naiuso tsammongnyiu, naiuso apa thsoso tsammongnyiuso, 19naiuso thainian chikü, achinkeitsün apem, waio chikü, tilüsong goumchi nai tsakeiji, ngüso apong si asang pungkü kheng ainou sao.
Noaüh Ajah Chaithio Tsak Kiuji
20Noaüh Apaou thaiutha amkham tsam tsak lashan, naiuso asio thainian naiuso waio nouso in pungkü ainou, losan küta apaüh amkham tsam nai ajahtsün chaithio kiukü amkham. 21Naiuso Apaou nou tü angannyam amei nyam; nai Apaou nou meshen mongpemai ngiom, “Ngo khaiuniathso thaiutha goumchi müjam athesan tsükiushi-e, tititenai khaiunia da mongpem nai mongsai methso nai yakü tsümeikü noin; tsüdekünai Ngo aakihlaiu thathunkü ngo chhikü shitsünli müjam loüh tsüangja-ishi-e. 22Goumchi noi nou lektso lelu lethiotsün atao, be-eiuyam atao, atsong si alam tao, aou tao si asaio tao, anyi si asoh tsülaokü noi-e.”
Currently Selected:
APUNG ANYIM 8: KHIABSI
Tõsta esile
Share
Copy
Want to have your highlights saved across all your devices? Sign up or sign in
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.