Mark 11
11
Zezi I Antre Zerizalenm
(Mat 21.1-11; Lk 19.28-40; Zn 12.12-19)
1Kan zot ti pe apros Zerizalenm, pre Betfaze ek Betani, an montan ver montanny Zolivye#11.1 Montanny Zolivye i en kolin ki sitye Les avek Zerizalenm; i ganny separe avek lavil par vale Sedron., Zezi ti anvoy de son bann disip. 2I ti dir zot, “Al dan vilaz ki devan zot. Zis koman zot antre, zot ava war en pti bourik anmare, ki personn pa'n deza monte. Delarg li e anmenn li isi. 3Si en dimoun i demann zot akoz zot pe delarg li, dir li: Senyer i bezwen. I ava fer anvoy li isi deswit.”
4Bann disip ti ale e zot ti war en pti bourik anmare pre avek laport en lakaz obor semen. Zot ti delarg li. 5Dimoun ki ti pe debout la, ti demann zot, “Akoz zot pe delarg sa pti bourik?”
6Zot ti reponn parey Zezi ti'n dir zot e sa bann zonm ti les zot ale. 7Zot ti anmenn sa pti bourik kot Zezi e tal zot lenz lo li. Zezi ti asiz lo li. 8Bokou dimoun ti tal zot lenz lo semen; lezot ti tal bann feyaz ki zot ti'n koupe dan lakanpanny#11.8 War 2 Rwa 9.13.. 9Serten dimoun ti mars devan Zezi e lezot ti swiv li an kriyan, “Ozana! Beni sa enn ki vin lo non Senyer. 10Beni sa rwayonm ki pe vini, rwayonm nou Papa David! Ozana dan lesyel!”
11Zezi ti antre dan Zerizalenm e i ti al dan Tanp. Apre ki i ti'n byen get otour li, i ti al Betani avek son 12 disip, akoz aswar ti pe fer.
En Pye Fig san Fri
(Mat 21.18-19)
12Lannmen, ler zot ti kit Betani, Zezi ti lafen. 13I ti war dan lwen en pye fig kouver avek fey. Alor, i ti ale pour war si ti annan fri lo la. Me kan i ti ariv obor, i ti war zis fey, akoz pa ti lasezon fig. 14I ti dir avek sa pye fig, “Personn pa pou zanmen manz ou fri ankor.” Son bann disip ti antann li dir sa.
Zezi I Antre dan Tanp
(Mat 21.12-17; Lk 19.45-48; Zn 2.13-22)
15Zot ti ariv Zerizalenm. Zezi ti antre dan Tanp kot i ti konmans sas bann vander ek bann aster. I ti savir latab bann ki ti pe sanz larzan, ek sez bann ki ti pe vann pizon. 16I pa ti les personn transport nanryen atraver Tanp. 17I ti ansenny sa bann dimoun. I ti dir zot,
Pa i'n ekri:
Mon lakaz pou ganny apele
en lakaz lapriyer pour tou nasyon?
Zezi ti azoute, “Me zot, zot in fer li vin en kavern bann bandi.”
18Kan bann gran-pret ek bann profeser Lalwa ti antann sa, zot ti kontinyen rod fason pour touy Zezi. Annefe, zot ti per li, akoz lafoul antye ti enpresyonnen par son lansennyman.
19Kan aswar ti fer, Zezi ek son bann disip ti kit lavil.
Leson lo Pye Fig
(Mat 21.20-22)
20Lannmen bomaten, letan zot ti pase lo semen, zot ti war ki sa pye fig ti'n sek ziska son rasin. 21Pyer ti rapel sa ki ti'n pase. I ti dir avek Zezi, “Met, gete! Sa pye fig ki ou ti modi in sek.”
22Zezi ti reponn zot, “Fodre krwar dan Bondye. 23Mon dir zot, sa i laverite: Si en dimoun i dir avek sa montanny: Sorti la e al zet ou dan lak. Si i napa okenn dout dan son leker, e i krwar ki sa ki i'n dir pou realize, sa pou arive. 24Pour sa rezon, mon dir zot: Tou sa ki zot demande dan lapriyer, krwar ki zot in deza gannyen e i ava realize pour zot.
25Kan ou debout pour priye, si ou annan keksoz kont nenport ki, pardonn li, pour ki ou Papa ki dan lesyel ava osi pardonn ou, ou bann pese. 26Me si zot pa pardonnen, zot Papa osi ki dan lesyel pa pou pardonn zot, zot pese#11.26 napa sa verse dan plizyer ansyen maniskri. War Mat 6.15..”
Lotorite Zezi
(Mat 21.23-27; Lk 20.1-8)
27Zezi ek son bann disip ti retourn Zerizalenm. Pandan ki i ti pe marse dan Tanp, bann gran-pret, bann profeser Lalwa ek bann ansyen ti vin kot li. 28Zot ti demann li, “Par ki lotorite ou pe fer tousala? Lekel ki'n donn ou en tel lotorite?”
29Zezi ti dir zot, “Mon pou demann zot zis en kestyon. Si zot reponn mwan, mon ava dir zot par ki lotorite mon pe fer tousala. 30Dir mwan, eski batenm Zan ti sorti kot Bondye, oubyen kot zonm? Reponn mwan#11.30 War 1.4-5..”
31Zot ti konmans diskit ant zot, lo ki zot pou dir. Dan zot menm zot dir: Si nou dir i sorti dan lesyel, i pou demann nou: Akoz zot pa ti krwar Zan? 32Me si nou dir, i ti sorti kot zonm… Zot ti per lafoul, akoz zot ti konsider Zan koman en vre profet. 33Alor, zot ti reponn Zezi, “Nou pa konnen.”
Zezi ti dir zot, “Mwan osi mon pa pou dir zot par ki lotorite mon fer tousala.”
Currently Selected:
Mark 11: BSK
Tõsta esile
Share
Kopeeri
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.