Lik 14
14
Zezi I Geri En Zonm Zour Saba
1En zour saba, Zezi ti antre dan lakaz enn bann sef Farizyen pour pran en repa. Sa bann dimoun ki ti la ti pe vey li. 2En zonm ki son maladi ti fer son lekor anfle, ti la devan Zezi. 3Zezi ti demann bann profeser Lalwa ek bann Farizyen, “Eski nou Lalwa i permet geri en malad zour saba oubyen non?”
4Me zot ti reste trankil. Alor, Zezi ti tous sa zonm. I ti geri li e les li ale. 5Apre, i ti dir zot, “Lekel parmi zot si i annan en garson oubyen en bef ki'n tonm dan en pwi pa pou tir li deswit, menm en zour saba?” 6Me zot pa ti kapab reponn li lo sa size.
Limilite ek Lospitalite
7Zezi ti remarke ki bann envite ti swazir bann premye plas. Alor i ti dir zot, 8“Kan ou ganny envite dan en repa maryaz, pa asiz dan premye plas. Annefe, i posib ki en dimoun pli enportan ki ou, i'n osi ganny envite. 9Sa dimoun ki'n envit zot, ava kapab vin dir ou: Sed li sa plas. Alor, avek laont, ou ava bezwen al pran dernyen plas.
10Me kan ou ganny envite, al asiz dan dernyen plas, pour ki sa dimoun ki'n envit ou, ava vin dir ou: Mon zanmi! Monte, pran en pli bon plas. Ensi, sa i ava en loner pour ou devan tou lezot envite. 11Annefe, sa enn ki monte, pou bezwen desann, e sa enn ki abes li menm, ava monte.”
12Zezi ti osi dir avek sa zonm ki ti'n envit li, “Kan ou donn en dezennen, oubyen en dinen, pa envit ou bann zanmi, ou bann frer, ou fanmir, ni ou bann vwazen ris, akoz i posib ki zot ava envit ou an retour; konmsa, ou ava ganny rekonpanse. 13Me kan ou fer en festen, envit bann pov, bann envalid, bann ki bwete ek bann aveg. 14Alor, ou ava ere, akoz zot, zot pa kapab rekonpans ou. Annefe, ou ava ganny ou rekonpans zour rezireksyon bann zis.”
Parabol Gran Festen
(Mat 22.1-10)
15Kan enn bann envite ti antann sa, i ti dir Zezi, “Ere sa enn ki pou pran son repa dan Rwayonm Bondye!”
16Zezi ti reponn li, “Ti annan en fwa, en zonm ki ti fer en gran festen, e i ti envit bokou dimoun. 17Kan ti'n ariv ler pour festen konmanse, i ti anvoy en serviter dir bann envite: Vini, tou keksoz in pare.
18Me zot tou, zot ki konmans rod leskiz. Premye ti dir avek sa serviter: Mon'n aste en propriyete ki mon bezwen al vizite; mon demann ou eskiz mwan.
19En lot ti dir: Mon'n aste dis bef; mon pe al esey zot, eskiz mwan.
20En lot ankor ti dir: Mon fek marye, mon pa kapab vini.
21Sa serviter ti retournen e raport tousala avek son met. Son met ti ankoler e i ti dir avek son serviter: Al deswit dan tou semen ek santye dan lavil, e anmenn bann pov, bann envalid, bann ki pa war kler, e bann ki bwete.
22Son serviter ti dir li: Met! Mon'n fer sa ki ou'n ordonn mwan, me i annan ankor plas. 23Alor, son met ti dir li: Al dan bann semen lakanpanny e fors dimoun vini, pour ki mon lakaz i ranpli. 24Mon dir zot, personn parmi sa bann dimoun ki ti'n ganny envite pa pou gout mon festen.”
Sa Ki I Koute pour Vin En Disip
(Mat 10.37-38)
25En gran lafoul ti pe akonpanny Zezi. Zezi ti tourn ver zot. I ti dir zot tou, 26“Sa enn ki vin kot mwan, i devre prefer mwan plis ki son papa, son manman, son fanm ek son zanfan, son frer ek son ser, e menm son prop lavi. Otreman i pa kapab vin mon disip. 27Sa enn ki pa port son lakrwa e swiv mwan, i pa kapab vin mon disip.
28Annefe, lekel parmi zot ki bezwen konstri en tour, ki pa asize dabor pour estimen konbyen i pou koute, e war si i annan ase larzan pour fini sa travay? 29Otreman, si apre ki i'n poz fondasyon, i pa kapab fini son konstriksyon, tou dimoun ki war sa, pou riy li. 30Zot pou dir: Sa zonm in konmans konstri, me i pa'n kapab fini.
31Lekel sa lerwa ki pe al lager kont en lot lerwa, ki pa pou asize dabor e mazinen si i pou kapab avek 10,000 zonm, fer fas sa lot lerwa ki annan 20,000 zonm? 32Si i war ki i pa pou kapab, letan lot lerwa i ankor byen lwen, i anvoy en anbasader pour diskit kondisyon lape.
33Ensi, nenport parmi zot ki pa abandonn tou sa ki i annan, i pa kapab vin mon disip.”
Disel ki'n Perdi Gou
(Mat 5.13; Mrk 9.50)
34“Disel i bon, me disel ki'n perdi son gou, koman ou pou fer li vin sale ankor? 35I pa bon ni pour later ni pour fimyen, i bon zis pour zete. Sa enn ki annan zorey pour antann, tande.”
Currently Selected:
Lik 14: BSK
Tõsta esile
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.