LUKA 23
23
Pilata hmaah Isua an hruai
(Mt. 27:1-2,11-14; Mk. 15:1-5; Jn. 18:28-38)
1An za chuan an tho va, Pilata hnênah an hruai ta a. 2“He mi hian kan chite hel tûrin a fuih a, Kaisara hnêna chhiah chawi a khap a, amah hi Lal, Krista chu niin a insawi tih kan hre chhuak a ni,” tiin an hêk a. 3Pilata chuan a hnênah, “Juda-te lal i ni maw?” a ti a. Ani chuan a chhâng a, “Chu, i tih chu,” a ti a. 4Pilata chuan puithiam lalte leh mipuite hnênah chuan, “He mi chungah hian thu pawi eng mah ka hmu lo ve,” a ti a. #Tirh. 13:28. 5Nimahsela, anni chuan, “Hel tûra mite fuihpawrhin Judai ram khaw tinah mi a zirtîr ṭhîn tih kan hria, Galili ramah a ṭan a, hetah pawh a lo thlen tâk hi,” tiin an bei lehzual sauh va.
Heroda hmaah Isua
6Pilatan chu chu a han hriat chuan Galili mi a nih leh nih loh a zâwt a: 7Heroda biala mi a ni tih a hriat chuan Heroda hnênah a tîr ta a; ani pawh chu Jerusalemah a lo awm lai tak a ni. 8Herodan Isua a lo hmuhin a lâwm hle a, a chanchin a hriat fo avângin hmuh a châkna a rei hle tawh rêng a; a thil mak tih eng emaw tal hmuh pawh a beisei a. #Lk. 9:9; Tirh. 4:27,28. 9Thu tam tak a zâwt a; nimahsela, a eng mah a chhâng lo. 10Puithiam lalte leh Dân zirtîrtute pawh chu an ding ve a, an hêk chiam a. 11Tin, Heroda pawh chuan, a sipaite nên, Isua chu an hmusit hle a, nuihza siam nân an hmang a, puan ropui tak an sintîr a, Pilata hnênah a tîr kîr leh ta a. 12Pilata leh Heroda chu tûn hma chuan an intai hle ṭhîn a, chumi ni aṭang chuan an inngeih leh ta a.
Isua thi tûra tih a ni
(Mt. 27:15-26; Mk. 15:6-15; Jn. 18:39—19:16)
13Pilata chuan puithiam lalte leh Dân zirtîrtute leh vântlângho chu a ko khâwm a, an hnênah, 14“He mi hi mite hel tûra fuihah in rawn puh a, in hma ngeiah ka chhuahchhâl a, in hêkna thu-ah thil pawi eng mah a khawih ka hmu lo. 15Heroda pawhin a hmu hek lo, kan hnênah a rawn tîr kîr leh ta mai a nih hi. Ngai rawh u, thihna khawp meuh eng mah tih a nei lo va; 16tichuan, ka han zilh hlek ang a, ka chhuah mai dâwn a ni,” a ti a.#23:16 Mss ṭhenkhatah ‘17 Kût laiin mi pakhat chhuahsak ṭhin tûr a ni rêng a,’ tih a tel.
18Nimahsela, an za chuan an au rual a, “He mi hi chu tiboral la, Baraba kha min chhuahsak rawh,” an ti a. 19Chu mi chu khawpuia helna avâng leh tual thah avânga tân ina tâng a ni. 20Pilata chuan Isua chu chhuah a duh a, an hnênah thu a sawi leh a; #Tirh. 3:13,14. 21mahse, “Khêngbet rawh, krawsah khêngbet rawh,” tiin anniho chu an au ta tuar tuar a. 22Tin, ani chuan a vawi thumnaah, “Engah maw? Eng nge a tihsual? Thihna khawp meuh eng mah pawi a khawih ka hmu lo; ka zilh ang a, ka chhuah mai dâwn,” a ti a. 23Anni chu ring takin an au va, krawsa khêngbet tûrin an ngên lui tlat a, an aw chuan a vau dai ta a.
24Pilata chuan an ngên ang chuan thu a titlu ta a. 25Helna leh tual thah avânga tân ina mi tâng an dîl kha a chhuah a, Isua erawh chu an duh duha tih tûrin a pe ta a.
Isua khenbeh
(Mt. 27:32-44; Mk. 15:21-32; Jn. 19:17-27)
26Tichuan, an hruai ta a; Simona, Kurini khaw mi, thingtlâng lam aṭanga lo kal chu an man a, Isua hnungah kraws chu an puttîr a.
27Tin, vântlâng mipui nasa tak leh lungchhiaa ṭap ṭap hmeichhiaten an zui dûl dûl a. 28Isua chuan an lam a hawi a, “Jerusalem nute u, mi ṭah suh u, nangmahni leh in fate tân ṭap zâwk rawh u. #Lk. 21:23,24; 19:41-44. 29‘Hmeichhe ching te, nau pai ngai lo pum te, nau hnêk loh hnute te chu a nihlawh e,’ an tih hun a lo thleng dâwn. 30Chûng hunah chuan tlâng hnênah, ‘min delh rawh,’ an ti ang a, mual hnênah pawh, ‘min khuh rawh,’ an la ti ang. #Hos. 10:8; Thup. 6:16. 31Thinghring mah hetiang hian an ti a, a ro chu engtin tak la ti ang maw,” a ti a.
32Tihhlum tûr mi dang, mi sual pahnih a rual chuan an hruai ve a. 33Luruh an tih hmun chu an va thleng a; mi sualte pawh chu a ding lamah pakhat, a vei lamah pakhat an khêngbet bawk a. 34Isuan, “Ka Pa, anniho hi ngaidam rawh, an thiltih hi an hre lo a ni e,” a ti a.#23:34 Mss ṭhenkhatah hêng thu hi a tel lo. A silhfênte chu ṭhumvâwrin an insem a.#Sam. 22:18; Tirh. 7:60. 35Vântlângho chuan dingin an thlîr a. Hotute pawh chuan, “Mi dang mah a tidam ṭhîn a, Pathian mi ruata, Krista chu a nih meuh chuan amah pawh intidam ang hmiang,” tiin an ṭawng el a.#Sam. 22:7. 36Sipaihote pawh chuan an nuihzat a, a hnênah an kal a, uain thûr an pe a, #Sam. 69:21. 37“Juda-te lal i nih zet chuan intidam ta che,” an ti a. 38A chungah chuan, “He mi hi Juda-te lal a ni,” tih#23:38 Mss ṭhenkhatah ‘Grik ṭawngte, Rom ṭawng te, Hebrai ṭawngtea ziak,’ tih a tel. ziak an târ a.
39An khenbeh ve mi sual pakhat zâwk pawh chuan a ân khum a, “Krista chu i ni lo vem ni? Intidam la, keini pawh min tidam ve ta che,” a ti a. 40Nimahsela, pakhat chuan a lo khak a, a zilhhau va, “Pathian meuh pawh i hlau na nge, thuhmun renga an hrem che hi? 41Keini pahnih hi zawng hrem âwm rêng kan ni, kan thiltih man kan hmu a nih hi; he mi hi zawngin eng mah a tisual si lo,” a ti a. 42Tichuan, “Isu, i ram i thlen hunah mi hre reng ang che,” a ti a. 43Ani chuan a hnênah, “Thu dik ka hrilh a che, ka hnênah vawiinah hian paradis-ah i awm ve ang,” a ti a. #2 Kor. 12:3; Thup. 2:7.
Isua a thi
(Mt. 27:45-56; Mk. 15:33-41; Jn. 19:28-30)
44Chhûn dâr sâwm leh pahnih vêl aṭanga tlai dâr thum thlengin khawvêl a lo thim ta vek a; 45ni a êng ta lo va, Tempul chhûng puanzâr chu a laiah a thlêr thla a. #Exod. 26:31-35; Heb. 9:8; 10:19. 46Isua chu ring takin a au va, “Ka pa, ka thlarau i kutah ka kawltîr a che,” a ti a. Chu chu a sawi zawh chuan a hnuk a chat ta a. #Sam. 31:5.
47Sipai za hotu chuan thil lo thleng chu a hmuhin Pathian a fak a, “He mi hi mitakzet a ni phawt mai,” a ti a. 48Chûng thil en tûra mipui lo kal khâwmte chuan thil lo thleng chu an hmuhin an lungngai a, an âwmte chûm chûmin an haw leh ta a. 49A hmêlhriathote erawh chu hla feah an ding reng a, Galili ram aṭanga amah zuitu hmeichhiate nên khân chûng thil chu an thlîr ho va. #Lk. 8:2,3; 23:55,56; 24:10.
Isua an phûm
(Mt. 27:57-61; Mk. 15:42-47; Jn. 19:38-42)
50Tin, mi pakhat, a hming Josefa, rorêltu zînga tel, mi dik leh ṭha tak a awm a. 51Ani chuan an rorêl leh an thil tih chu a remtihpui ve lo rêng a. Juda-te khua Arimathai-a awm a ni, Pathian ram beisei ve ṭhîntu a ni bawk a. 52Chu mi chu Pilata hnênah a kal a, Isua ruang a va dîl a. 53Tin, a la thla a, puan zai sînin a tuam a, tu mah la zalh ngai lohna lung ker thlânah a zalh ta a.#Tirh. 13:29. 54Chumi ni chu Juda-te Inrinni a ni a; mahse, Juda-te sabat ni a inṭan lek lek tawh a. 55Galili ram aṭanga rawn zuitu hmeichheho pawh chuan an zui ve zêl a, thlân leh a ruang an zalh dân chu an en a. 56Tin, an haw a, rimtuite leh hriak rimtuite an siam a. #Exod. 12:16; 20:10; Deut. 5:14.
Currently Selected:
LUKA 23: MIZCLBSI
Tõsta esile
Share
Copy
Want to have your highlights saved across all your devices? Sign up or sign in
Mizo (Lushai) C.L. Bible - PATHIAN LEHKHABU THIANGHLIM
Copyright © 1995 by The Bible Society of India
Used by permission. All rights reserved worldwide.