Kusintii Andunya 8
8
Kugbɛi inyi nlau
1Amma Ilaaɔ̃ kù gbɛjɛ idei Nowee do mɛɛmui sako ŋau do mɛɛmui inɔ ilu ŋa iyi aŋaò ŋa à wa inɔ akɔi inyiu fei. Nɔ í jɔ̀ fufu nla gɔ í ce si ilɛu nɔ inyiu í kaye. 2Ijĩu í leekĩ, nɔ tengi bii ilɛ í lu fokĩ ŋau fei í dĩ. 3Inyiu wa kaye kpɛlɛ kpɛlɛ hee í ceò ajɔ cĩɔ do ciitaa. 4Si cukpa mɛɛje do ajɔ maatũ do minjisiau ŋɔi akɔi inyiu í koo í leekĩ si antaii iri kutai Ararati. 5Inyiu wa kaye hee í koo í toò cukpa mɛɛwasia. Si ajɔ sintei cukpa mɛɛwasiau ŋɔi antaii iri kuta ŋau í sinti ku boli.
6Si anyii ajɔ ciiji má ŋɔi Nowee í cĩ fɛrɛntii akɔi inyiu. 7Nɔ í jɔ̀ gaagaa í fita, í wasi ku fo bii fei hee inyiu í koo í kaye si ilɛ. 8Si anyiɛ nɔ í jɔ̀ ankasiidi í fita má ku cɔò mà inyiu í kaye si ilɛ. 9Amma ankasiidiu kù ba bii á de si ilɛ, nɔ í nyi wa inɔi akɔu má, domi inyi í gbe si ilɛ bii fei titã. Nɔ Nowee í yɔ awɔ í muu í dasiɛ si inɔi akɔu má. 10Nɔ í degbe hee í ce ajɔ mɛɛje í bɛi í jɔ̀ ankasiidiu í fita má. 11Nɔ ankasiidiu í baa bi tɛɛ alɛ. Amma waati iyi wa baa í kpã wuai jĩi ndii olivi wa muu si gɛlɛɛ. Nɔ Nowee í mà iyi inyiu í kaye má si ilɛ. 12Nɔ í degbe hee í ce ajɔ mɛɛje í bɛi í jɔ̀ ankasiidiu í fita má. Amma kù baa bi tɛɛ má.
13Si adɔ̃ cĩɔ mɛɛfa do akãsiai Nowee si cukpa sinteɛ si ajɔ sinteɛi inyiu í gbɛ si ilɛ. Ŋɔi Nowee í foti lelei akɔi inyiu í cɔ, ŋɔi í ba wee ilɛ í gbɛ. 14Cukpa minjisia si ajɔ kaafɛtũ do minjisiau ilɛ í gbɛi woko woko.
15Ŋɔi Ilaaɔ̃ í sɔ̃ Nowee í ni, 16i fita hai si inɔi akɔi inyiu ŋa, awɔ do amaɛ ŋa do aboɛ do aboi amaɛ ŋa ajɔ. 17Nɔ i fitaò iŋa dimi ikã ikã ŋau fei, hai yɛi ŋa hee ku koo si mɛɛmui inɔ ilu fei do iŋa hai nɛ nto ŋa, nɔ a bí ku kpɔ, ilɛ ku kɔ̃. 18Ŋɔi Nowee í fita, nŋu do amaɛ ŋa do aboɛ do aboi amaɛ ŋa ajɔ. 19Ŋɔi hai mɛɛmu ŋau do iŋa hai nɛ nto ŋau do yɛi ŋa fei, dimii mɛɛmu iyi í wa si ilɛ fei de à fita hai si inɔi akɔu, aŋa fei do dimi nŋa ikã ikã.
Nowee í ce kuwee
20Waati iyi Nowee í fita hai si akɔi inyiu ŋɔi í ma tengi bii á ya cea Aɔ̃ Lafɛ̃ɛ kuwee. Nɔ í cica si mɛɛmu ŋa iyi à maaju fei do si yɛi dimi ikã ikã iyi à maaju fei nɔ í koo í ceò kuwee iyi à ya jo si ina fei sãa sãa si antaii bi kuweeu. 21Ŋɔi Aɔ̃ Lafɛ̃ɛ í gbɔ inunu didɔ̃ nɔ í ni si idɔɛ, n kaa n ceekpe ilɛ na irii amanɛ ŋa má domi lasabui idɔi amanɛ ŋa í jɛ laalɔ hai keeke nŋa. N kaa n kpa irii andunya fei bɛi ǹ ceu bɛ má.
22Hee andunya koo tãu,
waatii kugbɛ̃ do kuda,
waatii tũtũ do inya gbãa,
waatii ayɛ do atɛ,
do dasã do idũ,
kãmaɛ kaa tã.
Currently Selected:
Kusintii Andunya 8: MKL
Tõsta esile
Share
Copy
Want to have your highlights saved across all your devices? Sign up or sign in
2021, SIM International et UEEB