METIU 24
24
Saraa kamaning ki tiimaga tang karam jangpii Jisunii katam
(Mrk 13.1-2; Luk 21.5-6)
1Jisunii Saraa kamaning kilung teito tat patsii tat kalei kak, mpou boumeinii Saraa kama- ning kimah tiikalei hangtei mpou dakii row mangou tang karam jangpii gongtakle. 2Nlenii mpounii ahnyiigo khekalatle, “Gonyiinii aihang ai ngoumakpo? Inii gonyii dakii kasangpii tam leile, aikito kalei kuitu hangninii kagodo ah mah bam kiteikii masaklakle, matum madum gotei toi m-mang tangle.”
Kamage ninado kaset kalak
(Mrk 13.3-13; Luk 21.7-19)
3Jisunii Olip zang gamto bam kalei kak, Boumei teinii makumpii gong n-nhiile, “Aihang ai kadadou pat tangpo, sateichii gomah kagong ninado sazyii pouryii kalui mah tiikamangou siiti tei kadapei tangpo?” nyiidakii tam pyiilo.
4Jisunii ahnyiigo khekalatle, mei kaniido gonyiigo chyiitatma matu kasu tiisii sakai wolo. 5Kadapokii mei hangkanii gu zei kito ‘I kristale sii!’ gong tangle, sateichii ahnyiinii meihangkago masii chyiitat tu- tangle. 6Gonyiinii saryii koi sateichii saryii mah sampao shiigong tangle; nlenii gonyii lung kamage sulo, kada- pokii aihang ai pat tang karamle, nlenii kalui tei makle. 7Kadapokii Lui hangninanii Lui hangninii phyiiryiikii, sateichii sagong sazyii hangninanii sagong sazyii hangninii phyiiryiikii saryii tiipat tangle; sateichii bam katham katham kito tak kateeng sateichii malyii kachyii tei pat tangle; 8nlenii aihang ai kamage kalak mah bang saroi teile.
9“Teito ahnyiinii gonyiigo tiika- mage tang karam jangpii pyiitangle sateichii gonyiigo gitangle ninado Lui hangnii gu zei jangpii gonyiigo ngourou tangle. 10Tei tinglangki mei hangkanii ahnyii mah kamalum tei toi aitangle, sateichii hangninanii hangniniigo schoi choikai tangle sateichii hangninanii hangniniigo kangourou tangle. 11Sateichii ka- sang kasu Lungkakalingmei patsii mei hangka go chyiitatma tangle. 12Sateichii kashyii kahong tei moibuibui katu jangpiinii mei hangka mah kalungsyii kalungset katu tei nkhiitu tangle. 13Nlenii kalui katang leh kalu meigotei keipyii tangle. 14Sateichii sagong sazyii mah rasam ai Lui hang dakii sakchyii tiisii sazyii pouryii bamlyii hang kikii tam ralipyii tangle; teito kalui tei gongtangle.
Ngoukahing tiisii hangkapii kamage
(Mrk 13.14-23; Luk 21.20-24)
15“Lungkakalingpii Danielnii ka- tam, ‘Ngoukahing tiisii kamage tang karam,’ gonyiinii ngou tangle, teitei kamatei bam kito satsii lei tangle!” (Kafiimeinii ai ai tiwolo). 16Tei tinglangki Judiya kito kalei ahnyii teinii zang gamkii pak kai matulo, 17Ki kapouryii gamto kalei ah teinii ki kalungto kalei mah pot tei poitang karam jangpii humsu matulo; 18sateichii lubam kito kalei ah teinii ah mah pei-kabapei poitang karam jangpii nlaigong sumatulo. 19Moi mpung kalei sateichii rana pyiisak kalei sapwimei jangpiinii teiting- langki kadaziikapii kamage tang takpo? 20Sateichii gonyii mah kapak tei sataidou mak-kii bam ntak piinei leimik ki doumatu kasu tiisii Saraago riitalo. 21Kadapokii teitinglangki sazyii pouryii saroi sekto aitoi katangdo patsang pat kasu sateichii madou kado patsang patloi lak tang karam hangkapii kadi kamage katu tei tangle. 22Sateichii tei tinglang leimik tei tiimadui suleponii, meigo kado keipyii wolakle, nlenii kalai kalumei jangpii tinglang leimik tei tiimadui tangle.
23“Teitinglangki julo, ‘Aiki mak- kii luki Krista leile!’ sii mei kata hangninanii gonyii dakii tamleponii malum sulo. 24Kadapokii kasang kasu Krista ninado kasang kasu Lungkakalingmei gong tangle; satei- chii mazhii leponii Saraanii kalai kalumeigo katangdo hemsii kama pwidi kikii chyiitat tang karam jangpii mei tiikalak tiikamangou siiti kadi hang sateichii sung kaga hang tiimangou tangle. 25Julo Inii gonyii dakii pat kasunakii reipii tam takle.
26“Teipiinii ahnyiinii gonyii dakii ‘Julo, mpounii sazyii kamarongki leilesii tam leponii tat pat sulo,’ sateichii ahnyiinii gonyii dakii, ‘Julo, mpounii ki alungpii shang kito leile,’ sii tamchiido, teitei malum sulo. 27Kadapokii leimik kapat lamto sating kapeek sek-kii leimik kaliit- lam katang vakatu takumpii meinah sapfii mpou tei gong tangle.
28“Katai pum kalei nitei kalhang kamyii kachiipii ruinah tei ndwi tangle.
Meinah sapfii mpou mah kagong
(Mrk 13.24-27; Luk 21.25-28)
29“Kamage kalak mah leimik tinglang hangteitai sek leimik myiitu tangle, sakhii teinii ah mah kava tei pyiilakle sageiti hangtei sating gamto takmang tangle, sateichii sating gam mah pumtei hangtei kanuk nlai tangle. 30Teito meinah sapfii mpou mah tiikamangou siiti hangtei sating gamto pat tangle sateichii teimaham nei kadi pumtei kava tei kaswisii meinah sapfii mpou teinii sating gam mah mongjyii phyiiryiito kagong tei ahnyiinii ngoutangle; 31Sateichii mpounii mpou mah sating gamlui hang go kachem kong kalei roktei kaswisii lang mpat tangle sateichii ahnyiinii mpoumah kalei kalumei hang go sating nlai hangninii kito nlai hangninii katang saka madaito poi ndwi tangle.
Kadhiitbang kito ralikalu
(Mrk 13.28-31; Luk 21.29-33)
32“Gonyiinii kadhiitbang kito nda hangninii rali wolo, ah mah boi karanu boisii nhii madek tusek-kii, salum tinglang natakle katu gonyii- nii tile, 33tei takumpii gonyiinii ai hang ai kangou tinglang kak, mpou ai kamwi kisek nagong takle katu gonyiinii titangle. 34Inii gonyii dakii kasangpii tam leile, ai hang ai pat kasuta aiha ai gatu lakle. 35sating ninado sazyiinii gatu tangle, nlenii gu sam-nii gasang galakle.”
Meikado tinglang leimik tei timakle
(Mrk 13.32-37; Luk 17.26-30, 34-36)
36“Nlenii teimah leimik ninado tinglang teinii Pfii teisupiinii, sating gamluinado, meinah sapfii mpou teiniido meikaniido timakle. 37Ka- dapokii Noha haiki pat kalei takumpiinii, meinah sapfii mpounii kagong tei teitakumpii gong tangle. 38Kadapokii dwidigong kasu leimik doitei, Nohanii malyii lung liit kasu leimik katang tei, ahnyiinii chiisii saksii, sapwimei sapfiimei kanoulot- sii leile. 39Sateichii dwidigongsii ahnyii hang go dwinii taipungtu kasuta katang tei ahnyiinii timakle, meinah sapfii mpounii kagong tei teitakum tangle. 40Teito lubam kito mei hangna leitangle, hangniniigo poitat tutangle sateichii hangniniigo kaidek aitangle. 41Sapwimei hangna tchii-tousii lei tangle, hangniniigo poitat tutangle, sateichii hangniniigo kaidek aitangle.
42“Teijangpiinii sakailo, kadapokii gonyii Bangpiinii kadapiinei gong tangpo katu gonyiinii timakle. 43Nlenii ai ai tiwolo, katunii kara- gamei teinii kadadou gong tangpo katu tei ki bangpiinii tileponii, mpounii mik raksii koisii mpouki tei ram malu wolakle. 44Teijangpii gonyiido tiikada tang karamle, kada- pokii gonyiinii maning kasu tinglang ki meinah sapfii mpou tei gong tangle.
Malum kabui ninado malum kalak kikaleimei
(Luk 12.41-48)
45“Teitiileponii malum kabui ninado kasakai kikaleimei ai tapo? Mpou ai tinglang tinglangki ahnyiigo kachii kasak pyii matutang karam jangpii mpoumah apumpiinii ki kalung mah julosii tung kaikabampii teile. 46Mpou mah apumpiinii kagong kak mpou pumpiinii katam tei tiisii kalei doukalu kikaleipii tei sadoi bile. 47Inii gonyii dakii kasangpii tam leile, mpounii mpoumah kabam mahlyiihang pyiiryiito mpougo kaju kashang kaipyii tangle. 48Nlenii tei kikaleipii teinii ‘Gu pumpii risii gong tang takle,’ sii mpouroinapii mpougo tamsii, 49mpougo njoi katu kikaleimei kakimeigo datsii, jousak kapiinhii meigo kaswisii chiisii sak tuleponii, 50kikaleipii teinii maning kasu piinei leimik ninado mpounii tikasu tinglangki apumpii teinii gong tangle; 51sateichii mpougo lungna tiisii tat ndang aitangle, sateichii kabijai katii mei mah sadoi kashyii njai tei mpougo dou njoi matutangle; teibam kiteito mpounii ghii kagetsii hat tangle.
Currently Selected:
METIU 24: NAG2
Tõsta esile
Share
Kopeeri
Want to have your highlights saved across all your devices? Sign up or sign in
Maram Naga, KARANU KABI SAMTAM © Bible Society of India, 2007.