METIU 21
21
Jisunii takoi nah tongsii Jerosalem ki kaliit
(Mrk 11.1-11; Luk 19.28-40; Jon 12.12-19)
1Sateichii ahnyiinii Jerosalem ki pimanangsii, Olip zang kito kalei Bethpage ki gong wosek-kii, Jisunii boumei hangna dakii ai tamsii lang matu aitakle, 2“Gonei doito kalei nam kitei tat tulo, sateichii goneinii tatliit sekchii, takoi pwina reng kuikabam tei goneinii ngousek tangle, ahnyiigo reng hek mpat tosii guda baagonglo.” 3Sa- teichii mei kata hangninanii goneigo sam kata tam leponii, Abangpiinii ahnyiigo mareile, sii goneinii tam tangle, sateichii ahnii ahnyiigo manoisek-kii tat matutangle.
4Lungkakalingmeinii tam kabam tei gong matwi matutang karam jangpii ai ai pat takle:
5“Zion kito kalei ralhiimeinah dakii tam pyiilo,
Julo, gonyii mah sagong tei gonyiida gong leile!
Mpounii lung sanale ninado takoi gam tong leile,
sateichii takoi nah gamto gong leile.”
6Sateichii boumei teinii maasii Jisu mah kakhatsam taiswisii tiitakle; 7takoi ninado takoinah tei ahnyiinii baagongsii ahnyii gamkii ahnyii mah pei tei tak kaitakle sateichii Jisunii tei phyiiryii tei tubam wotakle; 8mei kamoilam teinii pwidiki teikii ahnyii mah pei tei kam takle, sateichii kakimei hangteinii tingkaa tat m-mangsii pwidikii kam takle. 9Sateichii mpou doito tat kalei ninado mpou tai swikalei meihang teinii saale, “Devit nah sapfii mpou gotei Hosanna! Bangpii zei kito gong kalei mpou ai sadoi bile! Kasagoi goisang gamto Hosanna!”
10Sateichii mpounii Jerosalemki tat kaliit tinglang kak, namdi kito kalei hang teinii tui-nrungsii “Ai ai tapo?” sii n-nhii takle.
11Sateichii meimoi teinii “Ai ai Galili sazyii kito kalei Nazaret kito kagong Lungkakalingpii Jisu teilesii tamle.”
Jisunii Jerosalem Saraa kamaningki lung tat kaliit
(Mrk 11.15-19; Luk 19.45-48; Jon 2.13-22)
12Sateichii Jisunii Saraa kamaning ki lungtei liitsii Saraa kamaning kilung teito joisii kalei ninado lyiisii kalei ahnyii hang gotei baatoi aitakle, sateichii sanahswi heksii kalei mei mah dung kabam abam hangteido, mahou joisii kalei mei mah bam teido, kok kadat toi aitakle. 13Sateichii mpounii ahnyii dakii tamle, “Aitiisii ryiibamle, ‘Gu ki ai kariita mah ki sii lat tangle;’ nlenii gonyiinii teitei karagamei jangpii ka-mbei bam hangninii tii aitakle.”
14Sateichii mik kachet ninado pi katwimei teinii Saraa kamaning ki lung teito mpouda gongle, sateichii mpounii ahnyiigo tii mbipyii takle. 15Nlenii Tingdimei ninado ajaiting- shang kati ojamei hang teinii mpounii kamadat tha hang tiikalu, ninado “Devit nah sapfii mpou gotei Hosanna!” Sii saa kalei nahmei hang gotei ngou wosek-kii, rarhiisii mpoudakii tamle, “Ahnyiinii tam kalei ai nang shiimakpo?” 16Teito Jisunii ahnyii dakii tamle, “Nle; ‘nahmei kacheng ninado rana naka- lei nahmei mah mwi kito nangnii sajek kaga tam kamatoi tei pung gongpyii takle katu gonyiinii mahdou kado fiisang fiimakde?’ ”
17Sateichii mpounii ahnyiigo toi aisii mpounii namdi kiteito tat pat tosii Betani ki maasii mpounii tei kito ntak takle.
Jisunii kadhiitbang go kasheeng
(Mrk 11.12-14, 20-24)
18Tingchoi nukii mpounii nam- diki nlai kagong tinglang kak, mpou moi majyii takle, 19sateichii pwidi kuto kadhiitbang hangninii ngousii mpounii teiki katang tat patle, nlenii mah kado dousutakle, nhii roinii takle. Teito mpounii ruibang gotei tamle, “Nangnii ati matisang matiloi lakle,” teisek-kii kadhiitbang tei kiga takle.
20Sateichii boumeinii teitei ngou wosek-kii sung gasii tamle, “Kada takumpii kadhiitbang ainii binasek- kii kigapo?”
21Jisunii ahnyiigo khekalatle, “Inii gonyii dakii kasangpii tam leile, gonyiinii malum leponii sateichii maning riirhii suleponii, kadhiitbang gamkii Inii tiikabam ai gonyiinii tiikabui roisupiinii ai zang ai katang godo. ‘Nang gungtusii dwijai lungkii goroinapii toikai ailo’ sii tamleponii, teitei tiitangle. 22Sateichii gonyiinii kamalum tei leileponii, gonyiinii riita kakhang hangtei gonyiinii doutangle.”
Jisu mah teimaham mah kaang kito kachyiinhii katu
(Mrk 11.27-33; Luk 20.1-8)
23Sateichii mpounii Saraa kama- ning kilung tat kaliit tinglang kak, Tingdimei ninado katingmei hangnii, mpounii ralipyii kalei kak, mpouda gongsii tamle, “Nangnii kadapei tei- mahampii aihang ai tiileipo, sateichii teimaham ai tanii n-go pyiipo?”
24Jisunii ahnyiigo khekalatle, “I-do gonyiigo sam hangninii kachyiinhiile, teitei gonyiinii n-gu khelapyii leponii, I-do aihang ai kadapei teimaham leisii tiileipo katu tei Inii gonyii dakii tam tangle. 25Jon-nii dwi mpum kapyii tei kada kito gongpo? sating gamto manii mak-kii meinah datopo?”
Ahnyii roinapii ahnyii kak kito kajyiitu takle, “Sating gamto lesii nyiinii tam leponii; mpounii nyii dakii tam tangle, ‘teitiileponii go- nyiinii mpougo kadajangpii malum makpo?’ 26Nlenii nyiinii ‘meinah dato lesii tamleponii,’ nyiinii meimoigo hingle, kadapokii meihangnii Jon go Lungkakalingmei hangninii lesii poile.” 27Teipiinii ahnyiinii Jisu dakii khekalatle, “Nyiinii timakle.” Sateichii mpounii ahnyii dakii tamle, “Kadapei teimaham leisii Inii aihang ai tiileipo katu tei Iniido gonyii dakii tampyii lakle.”
Nah sapfii mpou hangna mah ndasam
28“Gonyiinii kadapei maningpo? Mei hangninanii nah sapfiimei hangna leile, mpounii katingpiida patsii tamle, ‘Gunah, tingnei darkha toipyiilu ki maasii tha tiitulo.’ 29Teito mpounii ‘Inii maa lakle’ sii khekalatle, nlenii natei mpounii lung kaliwosii maatu takle. 30Sateichii mpounii nah tiinapiida patsii teitakumpii tamle, ‘I-maa tangle Pfii-o’ sii mpounii khekalatle; nlenii mpounii maasutakle. 31Hangna kak ki aito tapiinii mpou pfiimah kamaning kamazhii tei tiipo?”
Ahnyiinii tamle, “Katingpii teiniile.”
Jisunii ahnyii dakii tamle, “Inii gonyii dakii kasangpii tam leile, Aha kahamei ninado sahapwimei teinii gonyii doi reisii Saraa mah sating sazyiiki tat leile. 32Kadapokii Jon-nii kasang kamajyii mah pwidi kito gongle, sateichii gonyiinii mpougo malum makle, nlenii aha kahamei ninado saha kahameinii mpougo malum wotakle sateichii gonyiinii teitei ngoukalu tai katangdo gonyiinii lung kali wosii mpougo malum womakle.
Darkha toipyiilu kito tha katii mei mah ndasam
(Mrk 12.1-12; Luk 20.9-19)
33“Ndasam kaki hangninii shiilo, sazyii bangmei hangninii leile, mpounii darkha toipyiilu hangninii tiiwosii toipyiilu tei araangh katbang aitakle, sateichii mpounii darkha dwi karyii tang karam bam hangninii lai wotakle, sateichii koitang karam alaangki hangninii tiiwosii, lu lapaimei dakii darkha toipyiilu tei mpounii paitoi aisii sazyii kaki hangniniiki tat tutakle. 34Sateichii riiti kare tinglang tei gongsek-kii, mpounii lu lapaimei dateikii mpou- mah riiti njai tei poigong matutang karam jangpii mpouki kaleimeigo lang matu takle; 35Sateichii lulapai mei teinii kikalei mei gotei jumsii mei hangniniigo dat takle, kaki hang- niniigo girang aitakle sateichii kaki hangniniigo kuitupii rot takle. 36Nlailoisii mpounii sung karei kisung kisii moisii kikalei kakimeigo lang matu takle, sateichii ahnyiinii kikalei mei gotei asung kareiki takumpii tiitakle. 37Kana nasang kito ‘Gunah Sapfii mpou gonii ahnyiinii soisupii sadzyii ngariit tiitangle katupii mpou nah sapfii mpou gotei mpounii ahnyii dakii lang matu takle.’ 38Nlenii lulapai mei teinii nah sapfii mpou gotei ngou wosek-kii, ahnyii karapii tamle, ‘ai ai mahtou toutang karampii teile; nje patlo, nyiinii mpougo gi aisii mpou mah luha tei dou woleje.’ 39Sateichii ahnyiinii mpougo jum wosii darkha toipyiilu kiteito mpougo sabakii rat toi aisii mpougo gi aitakle.
40“Teijangpii darkha toipyiilu mah abangpii teinii kagong tinglang kak, lulapai mei gotei mpounii kadapei tiitangpo?”
41Ahnyiinii mpougo khekalatle, “Mpounii kashyii kahongmei gotei madousupii gitat aitangle sateichii tinglang tinglangdou riiti tei mpougo pyiitang karam kaki lulapaimei dakii darkha toipyiilu tei pyiitoi aitangle.”
42Jisunii ahnyii dakii tamle, “Ki katiimeinii rat toi kalei kuitu tei sekteinii hang kak kito phyiikasat tei tiiwo takle; ‘Ai ai abangpiinii tiikalu teile; ai ai nyiimah mik kitonii kama- datle, sii, kabi rasam kito katam ai gonyiinii fiisang fiimakde?’
43“Teijangpii Inii gonyii dakii tam leile, Saraa mah sating sazyii tei gonyii dato poitoi aitangle, sateichii teimah riiti tiigatpii mati tang karam Lui hangninii dakii pyii tangle.” 44Sateichii kuitu aiphyiiryiito ka- koumei hang tei pakchet chet tangle, nlenii ainii mei kata hangninii phyiiryii tak kamang kak, ahgo buinei takumpii karyiichet chet toi aitangle.
45Sateichii Tingdimei ninado Farasismei hangteinii mpou mah ndasam hang tei shii wosek-kii, ahnyii mah kaang kito tam leile katu ahnyiinii titakle. 46Nlenii ahnyiinii mpougo jumlesii tiikido, ahnyiinii meimoi gotei hing takle; kadapokii ahnyiinii mpougo Lungkakalingmei hangniniilesii poile.
Currently Selected:
METIU 21: NAG2
Tõsta esile
Share
Kopeeri
Want to have your highlights saved across all your devices? Sign up or sign in
Maram Naga, KARANU KABI SAMTAM © Bible Society of India, 2007.