LUK 24
24
Jisunii ringkakhii
(Met 28.1-10; Mrk 16.1-8; Jon 20.1-10)
1Nlenii hapta kito leimik karei piinei tingchoi nukii tiikada kabam kairum kabi pot tei poisii sapwimei teinii roubam kitei gong takle. 2Sateichii roubam kiteito kuitu tei koktoi kabam tei ahnyiinii ngoutakle. 3Nlenii ahnyiinii rou lung tei tat liitkii Jisu pum tei ngousu takle. 4Sateichii ahnyiinii teijangpii sung gasii sat leibangpii, julo, pei hakamating basii mei hangna binasek-kii ahnyiida gong sat takle. 5Sateichii ahnyiinii hingbeidiju aisii, sazyii nkwimang katu kak, sapfiimei hangna teinii ahnyii dakii tamle, “Katai kakto karing go gonyiinii kadajangpii fiileipo? 6Mpounii aiki gatakle, nlenii mpounii ringkhii takle. Mpounii Galili kito kalei tinglang kak gonyiigo tam kabam tei maning gonglo. 7Katunii meinah sapfii mpou gotei kem kama katiimei bah kikii pyiitoi aisii krosh gamkii dhangsii gitangle sateichii mpounii jangtumnii kashang piinei ringkhii tanglesii tam kabam tei.”
8Teito ahnyiinii mpou samtam hangtei maning nlaigong takle. 9Sateichii ahnyiinii roubam kito nlaigong siinii aihang ai keariisii- nakhii dakiido kakimei hang dakiido tam takle; 10ahnyii teinii: Meri Mekdolen, Jonah sateichii Jems pwi Meri teile, ahnyiinii kaswi katu sapwimei kakimei niido aihang ai Tiilamlwi kapyiimei dakii tampyii takle. 11Nlenii samkang hang ai ahnyii mikjot kito rasam tam kajyiigo reitakle; teipiinii ahnyiinii ahnyiigo malum sutakle. 12Nlenii Pitarnii gungtu sat siinii roubam kitei pakmaa takle, sateichii mpounii nkuimang jukii, kamajyiipei tei roinii ngoule; sateichii pat kalei aigo ngou wosii sung gasii mpounii ki pak nlaigong takle.
Immos sazyii kito katat
(Mrk 16.12-13)
13Sateichii julo, tei piinei leimik sek-kii ahnyii kakto mei hangna ai Jerosalem kito mail sanakii dhiisii kalei Immos sii kalat nam hang- niniiki tat leile. 14Teito pat kalei hang mah kaang kito mpoupiinanii karashii leibangpii, 15Jisu pum sekpiinii manang gong siinii, mpoupiinago kaswisii tat tutakle; 16nlenii mpoupiinanii mpougo tikasu mah tiisii mpoupiina mik tei tiiram- pou ai takle. 17Sateichii mpounii mpoupiina dakii tamle, “Goneinii tatsii tatsii hangninanii hangniniigo karashii kalei tei kadapeipo?”
Teito mpoupiinanii swi kamage katu jutei pungsii sat takle. 18Mpou- piina kakto zei Kaleopas katupii teinii n-nhiile, “Jerosalemki mbui maasii teikito tingneisang pat kalei hang gotei tikasu tei nang roinii takpo?”
19Teito mpounii mpoupiina dakii tamle, “Kada dapei pat tak khe?” Teito mpoupiinanii mpou dakii tamle, “Saraa doito meihang doito tha katii sateichii sam katam hang kito teimaham kabam, Lungkaka- lingmei hangninii tiisii kabam, Nazaret ki Jisumah kaang kitole; 20katunii kanat kajum tingdimei sateichii nyii phyiiryiito apum ka- tiimeinii kada takumpiinii mpougo gitang karam jangpii pyiitoi aisii Krosh gamkii gi aipo siile. 21Nlenii Isrelmeigo keipyii tang karam teinii mpou tei sek lesii nyiinii maningle. Nle, aihang phyiiryiikii, aitoinii tha aihang pat kalei ai tingnei jangtumnii takle. 22Tei phyiiryiikii nyii kakto sapwimei kangkanii nyiigo sung tiimaga wole: ahnyiinii tingchoi nukii roubamni maale; 23teito ahnyiinii mpoupum tei ngousu takle; sateichii mpounii ringkhii tak lesii sating gamluinii madhang kapyii tei ngoutak lesii nlaikai gong ahnyiinii tamle, 24Sateichii nyiigo kaswi katumei kangkanii roubam kitei maa siinii, sapwimei hang teinii tam kabam takumpiinii doutakle, nlenii ahnyiinii mpou pum gonii ngoumakle.”
25Teito mpounii mpoupiina dakii tamle, “Oh kapangmei, ninado lungkakalingmeinii katam sam gotei malum kalang kasumei! 26Krista teinii kamage kalak hang ai lehsanii, mpou mah pumtei kava kitei liit kajyii makpo?” 27Sateikii Moses dato sateichii Lungkakalingmei hang dato haosii mpou kaang kito kabi rasam hang kito kalei tei mpounii ahnyii dakii laat mpatpyii takle.
28Sateichii ahnyiinii gong tang karam nam kitei manang gong sek-kii, mpounii tat madhiiloi tang karamgok tiitakle. 29Teipiinii mpou- piinanii mpougo hai katwumsii tamle, “Neigo kaswisii bam tulo, da- pochiinii tingkhiilam takle sateichii leimikdo ritakle.” teipiinii mpounii mpoupiinago kaswisii tei kito bam takle. 30Sateichii mpounii ahnyiigo kaswisii chiitang karam jangpii bam leibangpii, mpounii tiirok tei poiwosii satoi pyiitakle, sateikii tiirok tei tiirak wosii ahnyiigo pyiitakle. 31Sateichii ahnyii mik tei ngou malu takle, sateichii ahnyiinii mpougo tigong takle; teito mpounii ahnyii kak kito gatu takle. 32Sateichii mpoupiinanii hangninanii hangni- niigo tamle, “Mpounii pwidi lamto neigo kaswisii karashii katu kaktei sateichii nei dakii kabi rasam laat mpatpyii katu tinglang kaktei nyii malung tei mipii ru kajyii takum makpo?”
33Sateichii ahnyiinii teitinglang sek-kii gungtusii Jerosalemki nlai- gong takle, sateichii Boumei kearii- siinakhii tei nei ahnyiigo kaswisii kaleimei hang tei kaswisii ndwisanii, 34“Kasangpiinii Bangpii ringkhii takle, sateichii Simon dakii mangou- pyii takle!” sii rashiisii kalei tei ahnyiinii doutakle.
35Sateichii pwidito pat kalei ninado tiirok tiirak leibangpiinii mpoupiinanii mpougo kada takum- piinii tigong wopo katu tei mpoupiinanii tam takle.
Jisunii mpou boumei dakii kamangou
(Met 28.16-20; Mrk 16.14-18; Jon 20.19-23; Tha 1.6-8)
36Sateichii ahnyiinii sam ai tam leibangpii, mpou pum sek piinii ahnyii sumtei sat tosii, ahnyii dakii tamle, “Gonyiinii kamajung tei doulo!”
37Sateichii ahnyiinii hingbeidiju aisii rangii hangninii ngouwo tak lesii maningwo takle. 38Sateichii mpounii ahnyii dakii tamle, “Kadajangpiinii gonyii hing leipo? gonyii kada tiisii maning kariirhii leipo? 39Gupi, gubah tei julo, I-sekle, n-gu deng julo; kadapokii rangii teinii Inii kabam ai gonyiinii ngou kajyii takumpiinii akang arou gale.”
40Sateichii mpounii ai tam siinii, mpounii mpoupi mpou bah tei ahnyii dakii mangou takle. 41Sateichii ahnyiinii ka-nta piinii malum supii sateichii sung ga leibangpii mpounii ahnyii dakii tamle, “Aiki gonyii mah mah kachii pot mah kado leigapo?” 42Teito ahnyiinii mpougo lang kabam kaa pakkii pyiile. 43Sateichii mpounii teitei poisii ahnyii doito chii wotakle.
44Sateichii mpounii ahnyii dakii tamle, “Inii gonyiigo kaswisii lung kalei kak, Inii gonyiigo kaswisii karashii kalu samkang hangtei aile, katunii, gu kaang kito Moses mah ajaitingshang kito, Lungkakalingmei sateichii tam kamatoi lhiibung kikii ryii kabam matum madum hangtei madou gong matu tangle.”
45Teito ahnyiinii kabi rasam tiwo kabwi jangpii mpounii ahnyii swi tei laatpyii takle. 46Teito mpounii ahnyii dakii tamle, aitiisii ryiibam takle, “Krista teinii kamage kalak leh tangle, sateichii jangtumnii ka- shang piinei kataimei kakto ringkhii tangle. 47Sateichii Jerosalem sekto haosii Lui kaki hang dakii mpou zei kito lung kakali ninado kem kama maga kapyii tei tamroi tang karamle; 48Gonyiinii aihang mah sakchyii teile. 49Sateichii julo, Gu pfiinii riishii tiikabam tei Inii gonyii phyiiryiikii lang m-mangpyii tangle, nlenii kasagoi gamto teimaham teipiinii pei takumpii bakaipyii ka- suta, gonyiinii namdi kiteito bamlo.”
Jisugo sating gam pangkhii katu
(Met 16.19-20; Tha 1.9-11)
50Sateichii mpounii ahnyiigo Be- tani ku katang tei chyiipat pyiisanii, mpoubah poi matusii ahnyiigo satoi pyiitakle. 51Sateichii mpounii ah- nyiigo satoi pyii leibangpii, mpounii ahnyii dato n-nou aisii, mpougo sating gam pangkhiitu takle. 52Teito ahnyiinii mpougo matasii hangkapii ntasii Jerosalem ki nlaigong takle. 53Sateichii ahnyiinii Saraa kama- ning kilungto taksupiinii Saraago tam matoisii bamle.
Currently Selected:
LUK 24: NAG2
Tõsta esile
Share
Copy
Want to have your highlights saved across all your devices? Sign up or sign in
Maram Naga, KARANU KABI SAMTAM © Bible Society of India, 2007.