San Juan 7

De bicy Jesuuz wagyicy cup dey consuel lom

1Despuees ni de nu ndeꞌ, orzeꞌ gusam de lugaar ni Galilea. Orzeꞌ wangalagy mi ñgyes sam Judea, gun lugaar zeꞌ rded de yu zub lo ni de mbecy Israeel ryub yum par nu cut dey mi. 2Na tiem zeꞌ bi yad shuub dzi nu chuꞌ de mbecy Israeel tub saꞌ nu la saꞌ ni ramad. 3Orzeꞌ na de bicy mi rab yum:

―Cueꞌ gyiyeeñ ru ii. Gush nez yaa par lo de yu ni Judea, gun orzeꞌ de yu nu rsyaꞌ lor zac dey de coz ily nu ricy ru. 4Gun ni tub la mbecy wayicy yu coz ngach benu rlagy yu nu nap cuꞌ lo mbecy yu. Como bi ricy ru de coz ily, orzeꞌ rlagy ñi nu lyuur de coz nu ricy ru lo dela mbecy ni gyishlombecy ―na dey.

5Gun gashtal de bicy mi wangyicy cup dey consuel lom. 6Orzeꞌ na Jesuuz rab mi dey:

―Gaal zi nigul shuub tiem ne̱ nu chu̱ꞌ Jerusaleeng. Zeꞌ par de ru la ziꞌl tiem ndeꞌ coz nu nap. 7De mbecy ni gyishlombecy wac gazi lagy dey lo de ru, tees lo ya̱ rzi lagy dey, gun naal la ricya̱ nu rabee nu de coz nu ricy dey, ndeꞌ coz a̱ꞌ nap. 8De ru yaa der saꞌ, gun ya̱ waya̱ na, gun gaal zi nigul shuub tiem ne̱ nu gya̱ ―nam.

9Ornu blazh mniim de riidz zeꞌ, orzeꞌ byeeñ gam Galilea.

Jesuuz yam saꞌ ni ramad

10Na despuees ornu bi gush nez de bicy mi nu ya dey saꞌ zeꞌ, orzeꞌ gush nezaꞌ ub mi yam. Nomaas walab nu suelt la yam, sinu yam tub mod nu dze ga. 11Na de mbecy zub lo ni de mbecy Israeel byub dey mi lat saꞌ. Orzeꞌ na dey rab yu losaꞌy:

―¿Ca rded yu zeꞌ na? ―na dey.

12Na lat de mbecy zigy brugyiꞌ ro dey riidz dze ga nu rzat dey mi. Yuꞌ dey nay: “Yu zeꞌ nac yu tub mbecy nap.” Tees yuꞌ gaꞌ dey rniiy: “Yu zeꞌ walab mbecy nap nac yu, sinu ricy yu nu radza mbecy”, na dey.

13Nunu ni tub la mbecy wansat dey mi ye ga la nu nac nu rdzib dey lo de yu zub lo ni de mbecy Israeel.

14Na ornu bi guzeel saꞌ, orzeꞌ guꞌ Jesuuz loliꞌ ni yuꞌ nu driib zily de mbecy Israeel Ñgyoozh. Orzeꞌ brugyiꞌ rlyuum ni dey. 15Orzeꞌ tonaꞌ la za nu ic de yu zub lo ni de mbecy Israeel:

―¿Lac bicy yu ii nu gud lagy yu ni de coz nu rniiy, gun wanchay scuel? ―na dey.

16Orzeꞌ na Jesuuz rab mi dey:

―Riidz nu rlyu̱u̱, ndeꞌ walab riidz nu bruu nañ shcab ni uba̱, sinu ndeꞌ riidz nu bruu lo Ñgyoozh, biñ nu bzuu nez ya̱. 17Cyu ziꞌl mbecy benu shet ic yu nu gyicy yu coz nu rlagy Ñgyoozh, orzeꞌ gad lagy yu benu riidz nu rlyu̱u̱, ndeꞌ bruuñ lo Ñgyoozh, o nu rlyu̱u̱ riidz nu rlagy ub ziꞌl la̱. 18Gun benu mbecy nu rnii nu shcab ni ub ziꞌl, yu zeꞌ ni rniiy gun rlagy yu nu gyabic mbecy gyel mbecy niy. Zeꞌ yu nu ryub gyel mbecy par yu nu bzuu nez yu, yu zeꞌ coz nu rniiy, ndeꞌ coz nu rishli, nunu sac la gyel rguu nañ lardooy.

19’¿A walab nu rishli nu Moisees bzeeñ yu leey yaa der? Tees ni tub la der wagyicy yac der niñ. Orzeꞌ ¿zeꞌ lagu ryub der mod nu cut ru ya̱? ―nam.

20Orzeꞌ na la be de mbecy zigy zeꞌ rab yum:

―¡Ru bicy ni nuras ru! ¿Zeꞌ cyu nu rlagy cut ru zeꞌ beni? ―na dey.

21Orzeꞌ na gaꞌ Jesuuz rab mi dey:

―Dela de ru za nu ic der nu nac tub zi coz nu bicya̱ sab, dzi nu rzu lagy mbecy Israeel. 22Tees Moisees pcaay der nu caar beey sircunsision cuerp ni de yu nguzh ni der. Mas sab, dzi nu rzu lagy mbecy Israeel, rcaa der beey ni sircunsision cuerp ni yu nguzh ni der, como ndeꞌ coz nu pcaa Moisees der nu gyicy ru. Tees ndeꞌ walab coz nu bzuub Moisees gyiꞌñ, sinu ndeꞌ coz nu nil ricy de gyitoo bel ni den. 23Benu de ru rcaar beey sircunsision cuerp ni yu nguzh ni der mas sab, dzi nu rzu lagy mbecy, par nu cueꞌ chuꞌ falt ni der nu leey ni sircunsision nu bzeeñ Moisees, orzeꞌ ¿lagu rzi lagy der lo̱ gyiꞌ nu bicy yaca̱ dutuub la cuerp ni tub mbecy rat, sab, dzi nu rzu lagy mbecy Israeel? 24Cueꞌ nii too der la na tub coz tub nu rgüii ziꞌl der looñ. Ornu nii too der la na tub coz, orzeꞌ bicy der mod nu seꞌñ.

Jesuuz rniim ca ledz mi

25Na la be de mbecy nu yuꞌ Jerusaleeng, orzeꞌ brugyiꞌ rgugyiꞌ dey lo losaꞌy:

―¿Zeꞌ a walab yu ii yu nu ryub dey mod nu cut yu zeꞌ? 26¡Güii ñuu! Lo rgüii la mbecy rniiy. Nunu ni tub la mbecy wagnii dey nu yuꞌ falt niy. ¿Posib a walab nu rad lagy de fushtiz nu rishli gaal nu yu re nac yu Mesías? 27Tees ornu cyid Mesías, orzeꞌ ni tub la mbecy wad lagy dey ca gruum. Zeꞌ yu ii rad lagy den ca ledz yu ―na dey.

28Na tiem zeꞌ zu Jesuuz loliꞌ ni yuꞌ nu driib zily de mbecy Ñgyoozh, nunu rlyuum ni dey. Orzeꞌ brugyiꞌ ye ga la rniim:

―¡Laab ni yuꞌ lo der ya̱, nunu rad lagy der ca bru̱u̱! Tees walab nu yapa̱ nu nac nu rlagy ub ziꞌl la̱, tees biñ nu bzuu nez ya̱, mi zeꞌ nac mi biñ nu ricy paa, nunu mi zeꞌ a̱ꞌ yuꞌ lo der mi. 29Tees ya̱ yuꞌ lo̱m, gun ya̱ bru̱u̱ lom, nunu mi zeꞌ bzuu nez mi ya̱ yapa̱ ―nam.

30Yuꞌ mbecy ngulagy dey ñgya nu dey mi pres, tees ni tub la dey wanshet yaay mi gun nigul shuub tiem nu ni gyicy nu dey mi. 31Tees zigy mbecy bicy cup dey consuel lom. Orzeꞌ na dey:

―Ornu cyid Mesías, ¿walab gaal gyicy zir mi nusuriidz, gazeꞌ gal nu ricy yu ii? ―na dey.

De mbecy fariseo bicy pee dey nu shet lag yu Jesuuz pres

32Na ornu güeñ de mbecy fariseo de riidz nu bee de mbecy dze ga nu nac Jesuuz, de yu zeꞌ gal nu de yu zub lo ni de uz bzuu nez dey la be de yu nu rña nañ yuꞌ ni Ñgyoozh nu cha nu dey mi pres. 33Orzeꞌ nam rab mi dey:

―Gabee chesa du̱ de ru se la be dzi. Orzeꞌ gru̱u̱ lat der nu gya̱ lo biñ nu bzuu nez ya̱ nu yapa̱. 34De ru yub der ya̱, tees wayada̱ꞌ ni der, gun wac cha der lugaar zeꞌ nu ya̱ gya̱.

35Na de yu zub lo ni de mbecy Israeel brugyiꞌ ro dey riidz nu losaꞌy. Orzeꞌ na dey:

―¿Zeꞌ ca cha gaꞌ yu ii nu wayadaꞌy ni den? ¿Walab gaal chay lat de mbecy Israeel nu rcyiiñ reñaꞌ nasyoong nu cha lyuuy ni de mbecy nu walab mbecy Israeel? 36¿Lac yaruu de riidz nu rniiy: “Yub der ya̱, tees wayada̱ ni der, gun wac cha der lugaar zeꞌ nu ya̱ gya̱”, nay? ―na dey.

Nañ lardoo mbecy gyac ñi gal nu na zeꞌ nu driib nis; nis zeꞌ, ndeꞌ nis ni gyel mbañ

37Laab ndeꞌ la dzi nu bded ni saꞌ zeꞌ; ndeꞌ dzi nu ricy zir ñi presis. Orzeꞌ dzi zeꞌ wes su Jesuuz. Orzeꞌ ye la mniim:

―Benu ca na der rbigy ru nis nañ lardoor, orzeꞌ da der lo̱. Ya̱ grica̱ nis goꞌ der. 38Ndeꞌ gal nu rniiñ lat de riidz ni Ñgyoozh. Rniiñ nu de yu nu gyicy cup consuel lo̱, grib nis nu cuic gyel mbañ nañ lardoo dey, rniiñ ―nam.

39Na nis nu bzat Jesuuz zeꞌ, ndeꞌ Espiriit Yon ni Ñgyoozh, biñ nu cuic Ñgyoozh ni de yu nu gyicy cup consuel lom, gun tiem zeꞌ Ñgyoozh nigul cuic mi Espiriit Yon nim ni mbecy, gun Jesuuz nigul cush cyam nu gyam lo gyel lily nim.

Byac cyup nac de mbecy

40Na lat zeꞌ yuꞌ la be mbecy. Ornu güeñ dey de riidz zeꞌ, orzeꞌ na dey:

―Segur la yu ii nac yu yu nu mnii por cuen ni Ñgyoozh, yu nu ca lo cuen nu cyid ―na dey.

41Zeꞌ yuꞌ gaꞌ dey nay:

―Laab mi ii nac mi Mesías, biñ nu ca lo cuen nu co mbañ de ub na ―na dey.

Tees yuꞌ gaꞌ dey nay:

―Walab, gun Mesías walab Galilea ca lo cuen nu gruum ―na dey―. 42¿A walab nu rniiñ lat de riidz ni Ñgyoozh nu Mesías gruum lat de nez rey Dabi, nunu gal mi Beleeng, laab lugaar zeꞌ nu gul rey Dabi? ―na dey.

43Orzeꞌ de mbecy byacyup nac dey nu nac Jesuuz. 44Yuꞌ dey ngulagy yu ñgya nuy mi pres, tees ni tub lay wancuꞌ yaay mi.

45Orzeꞌ bish cya de yu nu rña nañ yuꞌ ni Ñgyoozh nu yay lo de mbecy fariseo, gal nu lo de uz zub lo. Orzeꞌ na de yu zeꞌ rab yu de yu nu rña zeꞌ:

―¿Lagu wancyiid nu der Jesuuz? ―na dey.

46Orzeꞌ na gaꞌ de yu nu rña zeꞌ:

―¡Rila wagrusu ni tub la mbecy nu gniiy gal nu rnii yu zeꞌ! ―na de yu nu rña zeꞌ.

47Orzeꞌ na gaꞌ de mbecy fariseo rab yu dey:

―¿A niꞌ ziꞌl de ru bi bguu gaꞌy der? 48Guncar ni tub la de fushtiz ni den, ni de mbecy fariseo wacheña lagy dey nu nac yu Mesías. 49Tees de mbecy nu a̱ꞌ yuꞌ lo leey nu bzeeñ Moisees, de yu zeꞌ cuic Ñgyoozh cashtig ni dey ―na dey.

50Zeꞌ ri tub mbecy fariseo nu la Nicodemo lat dey. Yu zeꞌ yu nu gua güii Jesuuz anzir. Orzeꞌ nay rab yu dey:

51―Gun lo leey nu bzeeñ Moisees ni den rniiñ nu wac niin nu yuꞌ falt ni tub mbecy anzir nu gyeñ na de coz nu rniiy, nunu anzir nu gad lagy na de coz nu bicy yu ―nay.

52Orzeꞌ na gaꞌ dey rab yu Nicodemo:

―¿Walab gaal gazaꞌr nac ru mbecy Galilea? Nap psyaꞌ lat de riidz ni Ñgyoozh, gun orzeꞌ gad lagy ru nu rila waruu ni tub yu nu rnii por cuen ni Ñgyoozh Galilea ―na dey.

53Orzeꞌ tub ga la mbecy ya dey yuꞌy.

Actualmente seleccionado:

San Juan 7: zpz

Destacar

Copiar