Génesis 7
7
Ipaxaalec ana 'alhua
1Qaq ime, nache Ñim Nataxala' 'enapega so Noé, 'eeta':
«'Aunoxonoigui añi notaxaqui, 'arỹatreuo 'enauaque naua 'aỹa'alqa, cha'aye nache 'amta da qoqueelec nam sheetapeguecpi, saishet da qoneta'am nam 'aualecta'aguet shiỹaxauapi. 2Qataq 'auaconeua'alo qome caua siete nauaxaỹaxau', ỹale qataq 'alo 'enauac na shiguiỹacpi maye qui'itta. Qalaxaye 'oonolec ca ỹale qataq 'oonole aca 'alo nam shiguiỹacpi maye saishet da qui'itta. 3Qataq nataqa'en 'auaconeua'alo caua siete nauaxaỹaxau' nam ỹotta'a't maỹopi, yaqto' nache 'eetai' saishet da daqat da lataxac da netalec ana 'alhua. 4Cha'aye qom inoxoorec caua siete na'axa'te, nache anac ñaqa'en ca auot, maye huaiguilo caua cuarenta na'axa'te qataq cuarenta pe' da anactac camaye. ¡Sapalaxat qome 'enauac nam huo'o da lca'alaxa maye ỹo'onatacpi, nam netalec ana 'alhua!»
5Qaq so Noé, ỹo'ot co'ollaxa 'enauac nam ỹamaxalecpi Ñim Nataxala'.
6Qaq co'ollaq ipaxaalec ana 'alhua, nache so Noé mashe ivi' soua seiscientos vi'iye da nachaalaxataxac. 7Qaq huaña co'ollaxa nache inoxonoigui aso notaxaqui, lỹatreuo soua llalqa, lhua, qataq soua latel, da yaqto' naneltaxaareguet so auot lta'araic. 8Qaq som shiguiỹacpi maye qui'itta qataq som saishet da qui'itta, qataq so maỹopi, qataq 'enauac som hualectapigui'pi, 9lỹateuo co'ollaxa so Noé da inoxonoigui aso notaxaqui, dosta'ape, ỹale qataq 'alo. Qaq ipacchigui da ỹamaxalec co'ollaxa Ñim Lo'onatac 'Enauacna.
10Qaq co'ollaq inoxoorec soua siete na'axa'te, nache so auot lta'araic talec ana 'alhua, 11huetoigui so na'a'q diecisiete so ca'agoxoic dos, co'ollaq so Noé mashe ivi' soua seiscientos vi'iye da nachaalataxac, qaq nache huetoigui se'eso na'a'q da nachepiaxatasheguem na 'etaxat maye pa'atañi, qataq nauatec na llecpi na 'etaxat na piguem.
12Qaq cuarenta na'axa'te, qataq cuarenta pe' da anactac so auot da tateguelec ana 'alhua. 13Qaq nacheso se'eso na'a'q, da so Noé inoxonoigui aso notaxaqui, lỹatreuo soua llalqa, Sem, Cam qataq Jafet, qataq aso lhua, qataq soua tres latel. 14Qataq nache lỹatreuo soomaye, 'enauac so ỹotta'a't shiguiỹacpi maye huauec, qataq so shiguiỹacpi nlopi, qataq 'enauac som hualectapigui'pi, qataq 'enauac so maỹopi. 15Qaq 'enauac se'eso shiguiỹacpi lỹateuo co'ollaxa so Noé da inoxonoigui aso notaxaqui, dostega't somayepi. 16Qaq ipacchigui dam ỹamaxalec co'ollaxa Ñim Lo'onatac 'Enauacna so Noé, da ỹale qataq 'alo, som ỹotta'a't shiguiỹacpi maye inoxonoigui aso notaxaqui. Ime co'ollaxa, nache Ñim Nataxala' ỹapogui so lasom aso notaxaqui.
17Qaq se'eso auot lta'araic, iviraxattrec soua cuarenta na'axa'te da anactac, tateguelec ana 'alhua. Qaq co'ollaq nquictasheguem so 'etaxat, nache aso notaxaqui nyiisheguem, nache huaỹoxootapigui'. 18Qaq so 'etaxat nache nquictasheguem co'ollaxa, qaq aso notaxaqui nache huaỹoxootapigui'. 19Qaq souaxat da nquittasheguem so 'etaxat, nache ivitta'a da imoolec naqa'en aso qaỹoqotcheguemec qasoxonaxapi. 20Qaq co'ollaq imoolec naqa'en aso qasoxonaxapi so 'etaxat, nache ivi' siete metros so ỹapacasheguem. 21Qaq 'era da 'eetec co'ollaxa, da ileu 'enauac so shiỹaxauapi maye netalec ana 'alhua, qataq so maỹopi, shiguiỹacpi nlopi, qataq so shiguiỹacpi maye huauec, qataq so hualectapigui'pi. 22Qaq ileu co'ollaxa 'enauac so huetalec ana 'alhua som huo'o da lca'alaxa, qataq som huo'oi naua la'a'che. 23Qaq nachaqsota so Noé qataq soua nqotta'ato asa'aso notaxaqui da nca'alde'c. Qaq so laỹepi qalaq 'enauac nlachiguiñi: shiỹaxauapi, qataq so shiguiỹacpi nlopi, qataq so maỹopi, qataq som shiguiỹacpi maye hualectapigui'pi, 24cha'aye ana 'alhua co'ollaq ipaxaalec so 'etaxat nache ivittrec soua ciento cincuenta na'axa'te.
Actualmente seleccionado:
Génesis 7: LÑLE13
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.
