Génesis 11

Aso naue ye Babel

1Qaq se'eso na'a'q so shiỹaxauapi ana 'alhua, nache 'eeta'a't co'ollaxa naua la'aqtaqa. 2Qaq co'ollaq ca'ai yem 'alhua maye pa'aỹa'ague da nala' lliguisheguem, nache ilalec so nalochiguiñi 'alhua, maye huaigui ye 'alhua Sinar. Qaq, nache naña co'ollaxa yemaye. 3Qaq huo'o so na'a'q, nache ñi 'oonolec 'enapega ñi lỹa, 'eeta':

«So'otaq qome ca losoc, nache sauoqta'a ca norec da sauotaq.»

Qaq 'era da 'eetec da do'onataxana co'ollaxa so losoc, nmeneguet naqa'en so coma'. Qaq so 'eco' qo'oipaq lcha'q, qalaq nmeneguet naqa'en so nshaxa. 4Qaq ime co'ollaxa, nache 'enapeco' somayepi:

«Ña qauanaqui, ño'oxonaxasheguem ca huaqta'a't nỹecpi, qataq aca qaraue, iviro'ot ñaqa'enaq na piguem. Yaqto' qomi' ỹo'oxora'q, qataq yaqto' saishet da ñelagaxataxalec 'enauac ana 'alhua.»

5Qalaxaye Ñim Nataxala', huenotec co'ollaxa da yaqto' imeten so huaqta'a't nỹecpi, qataq aso naue maye no'oxootapiguisheguem so shiỹaxauapi, 6nache 'eeta':

«Namayepi maiche nhuo' le'ecpi, qataq 'eeta'a't naua la'aqtaqa, ỹoqo'oye ỹacoolec de'era no'onataxanaxac, qaq nagui, nache qaica ca nqanaxat qome de'era ỹacoolec da ỹo'ot. 7Qaq no'on da senotaxauec, nache ỹotta'a't ñaqa'enaq na la'aqtacpi, yaqto' ñi 'oonolec saishet hua'axaiguet ca lỹa.»

8Qaq 'era da 'eetec Ñim Nataxala', co'ollaq laguelec naqa'en 'enauac ana 'alhua, nache somayepi ỹaxaañi co'ollaxa da no'oxooteguisheguem so huaqta'a't nỹecpi. 9Qaq ỹoqo'oye se'eso huaqta'a't nỹecpi, qoỹanagui da le'enaxat Babel, cha'aye nache huaña co'ollaq Ñim Nataxala' ỹotta'a't naqa'en na la'aqtacpi 'enauac na shiỹaxauapi ana 'alhua, qataq nache chegoqchiguiña co'ollaxa da ilagaxaalec 'enauac ana 'alhua.

So chegoxoguetpi so Sem

10Qaq 'ana ana le'enaxat lmalate som chegoxoguetpi so Sem. Qaq co'ollaq mashe dos vi'iye soua huetaiguilo da ỹoxogue so auot lta'araic, co'ollaq so Sem, mashe ivi' soua cien vi'iye da nachaalataxac, nache ñiguiñi so llalec le'enaxat Arfaxad. 11Qaq co'ollaq ime de'era, nache so Sem, qaltaq queuoiguilo soua quinientos vi'iye da nachaalataxac, nache huo'o so dalaxaic llalaqpi, ỹalleppi qataq 'alpi.

12Qaq so Arfaxad mashe ivi' co'ollaxa soua treinta y cinco vi'iye da nachaalataxac, co'ollaq ñiguiñi so llalec le'enaxat Selaj. 13Qaq co'ollaq ime de'era, nache so Arfaxad qaltaq queuoiguilo soua cuatrocientos tres vi'iye da nachaalataxac, nache huo'o so dalaxaic llalaqpi, ỹalleppi qataq 'alpi.

14Qaq so Selaj, mashe ivi' co'ollaxa soua treinta vi'iye da nachaalataxac, co'ollaq ñiguiñi so llalec le'enaxat Éber. 15Qaq co'ollaq ime de'era, nache so Selaj, qaltaq queuoiguilo soua cuatrocientos tres vi'iye da nachaalataxac, nache huo'o so dalaxaic llalaqpi, ỹalleppi qataq 'alpi.

16Qaq so Éber mashe ivi' co'ollaxa soua treinta y cuatro vi'iye da nachaalataxac, co'ollaq ñiguiñi so llalec le'enaxat Peleg. 17Qaq co'ollaq ime de'era, nache so Éber qaltaq queuoiguilo soua cuatrocientos treinta vi'iye da nachaalataxac, nache huo'o so dalaxaic llalaqpi, ỹalleppi qataq 'alpi.

18Qaq so Peleg mashe ivi' co'ollaxa soua treinta vi'iye da nachaalataxac, co'ollaq ñiguiñi so llalec le'enaxat Reu. 19Qaq co'ollaq ime de'era, nache so Peleg qaltaq queuoiguilo soua doscientos nueve vi'iye da nachaalataxac, nache huo'o so dalaxaic llalaqpi, ỹalleppi qataq 'alpi.

20Qaq so Reu mashe ivi' co'ollaxa soua treinta y dos vi'iye da nachaalataxac, co'ollaq ñiguiñi so llalec le'enaxat Serug. 21Qaq co'ollaq ime de'era, nache so Reu qaltaq queuoiguilo soua doscientos siete vi'iye da nachaalataxac, nache huo'o so dalaxaic llalaqpi, ỹalleppi qataq 'alpi.

22Qaq so Serug mashe ivi' co'ollaxa soua treinta vi'iye da nachaalataxac, co'ollaq ñiguiñi so llalec le'enaxat Najor. 23Qaq co'ollaq ime de'era, nache so Serug qaltaq queuoiguilo soua doscientos vi'iye da nachaalataxac, nache huo'o so dalaxaic llalaqpi, ỹalleppi qataq 'alpi.

24Qaq so Najor mashe ivi' co'ollaxa soua veintinueve vi'iye da nachaalataxac, co'ollaq ñiguiñi so llalec le'enaxat Téraj. 25Qaq co'ollaq ime de'era, nache so Najor qaltaq queuoiguilo soua ciento diecinueve vi'iye da nachaalataxac, nache huo'o so dalaxaic llalaqpi, ỹalleppi qataq 'alpi.

26Qaq so Téraj mashe ivi' co'ollaxa soua setenta vi'iye da nachaalataxac, co'ollaq huo'oi soua llalqa: Abram, Najor qataq so Jarán.

So chegoxoguetpi so Téraj

27Qaq 'ana ana le'enaxat lmalate som chegoxoguetpi som Téraj, som lta'a so Abram, Najor qataq so Jarán. Qaq so Jarán, nacheso so lta'a so Lot. 28Qaq so Jarán, ileu co'ollaq ñaq huo'o so lta'a Téraj, huaña ye Ur, maye huaigui ye 'alhua Caldea. Yem 'alhua maye maiche lañoqo' somaye.

29Qaq so Abram, huaroneguet co'ollaxa aso Saraí, qaq so Najor, huaroneguet aso llale so Jarán, asom le'enaxat Milca, maye lqaỹa aso Isca. 30Qaq aso Saraí, qalaq qaica co'ollaxa ca llalec, cha'aye asomaye saishet da deco'o.

31Qaq so Téraj, qalaq ca'ai co'ollaxa ye Ur, yem lma' na Caldeopi, da yaqto' nqo'ona ye 'alhua Canaán, qaq somaye ỹauec co'ollaxa so llalec Abram, qataq so laual Lot, qataq aso late Saraí. Qalaxaye co'ollaq ivitra ye 'alhua Jarán, nache neraña yemaye. 32Qaq so Taré, nache huaña yemaye da ileu, co'ollaq ivi' soua doscientos cinco vi'iye da nachaalataxac.

Actualmente seleccionado:

Génesis 11: LÑLE13

Destacar

Copiar