ማቶሳ 11

ፃማቂያ ዮሃኒሳፔ ዬሱሳኮ ኪቴቴዳ ኣሳቱዋ

(ሉቅ 7፡18-35)

1ዬሱሲ ባሬ ታማኔ ላዑ ካሊያዋንታ ኣዛዚያዋ ፖሌዳ ዎዴ፥ ሄዋፔ ዴንዲዴ፥ ካታማቱዋን ታማሪሳናዉኔ ኦዳናው ቤዳ።

2ፃማቂያ ዮሃኒሲ ቃሾ ጎሌን ዴዒዴ፥ ዬሱሲ ኦዳዋ ሲሲዴ፥ ባሬና ካሊያዋንታ ኣኮ ኪቲዴ፥ 3«ያናዌ ኔኔዬ? ዎይ ሃራ ናጋኔ?» ያጊ ኦቻናዳን ኡዴዳ።

4ዬሱሲ ዛሪዴ፥ ኡንቱንቶ ሃዋዳን ያጌዳ፤ «ቢዴ ሂንቴንቱ ቤዒያዋኔ ሲሲያዋ ዮሃኒሳው ኦዲቴ፤ 5ቆቃቱ ፄሊኖ፤ ዎባቱ ሃሜቲኖ፤ ኦሉ ኦይቄዳዋንቱ ፓፂዴ ጌዪኖ፤ #11፡5 ፓፂዴ ጌዪኖ ጊያዋ ሎይ ኣኬካናው 8፡2 ፃዴና ዴዒያ ቢሌን ፃፌቴዳዋ ቤዓና ዳንዳዬቴ። ቱላቱ ሲሲኖ፤ ሃይቄዳዋንቱ ዴንዲኖ፤ ሂዬሳቱ ዎንጋላ ሚሺራቹዋ ሲሲኖ። #ኢሳ 35፡5-6፤ 61፡1 6ታባ ሲና ኡራይ ኣንጄቴዳዋ» ያጌዳ።

7ዮሃኒሳ ካሊያዋንቱ ሲሚ ቤዳ ዎዴ፥ ዬሱሲ ዮሃኒሳባ ሺቄዳ ኣሳሲ ሃዋዳን ያጊ ሃሳዬዳ፤ «ኣያ ቤዓናው ኣሳይ ዴዔና ሜላ ቢታ ኬሴዲቴ? ጫርኩ ቃያ ማቃ ቤዓናው ኬሴዲቴ? 8ያቲና፥ ኣያ ቤዓናው ኬሴዲቴ? ሎዒያ ማዩዋ ማዬዳ ቢታኒያ ቤዓናው ኬሴዲቴ? ሎዒያ ማዩዋ ማዬዳዋንቱ ካታቱዋ ጎሌን ዴዒኖ። 9ያቲና፥ ኣያ ቤዓናው ኬሴዲቴ? ናቢያ ቤዓናው ኬሴዲቴ? ኤ፥ ታኒ ሂንቴው ኦዳይ፤ ናቢያፔካ ኣያዋ ቤዔዲታ። 10ኣዪሲ ጎፔ፥ ፆሳ ማፃፋን፥

‹ፆሳይ፥ «ቤዓ፥ ታኒ ኪቲያዋ

ኔፔ ሲንው ዬዳና።

ኢ ኔው ኦጊያ ጊጊሳናዋ» ያጌዳ›

ጌቴቲዴ ዮሃኒሳባይ ፃፌቴዳ። #ሚል 3፡1 11ታኒ ሂንቴንቶ ቱሙዋ ኦዳይ፤ ኣቲ ኡሉዋፔ ዬሌቴዳ ኣሳ ኡባን ፃማቂያ ዮሃኒሳፔ ኣያዌ ኦኒኔ ዴንዲቤና፤ ሺን ሳሉዋ ካዉቴን ኡባፔ ላፊያዌ ኣፔ ኣና። 12ፃማቂያ ዮሃኒሳ ዎዲያፔ ዶሚዴ፥ ሃቼ ጋካናው፥ ሳሉዋ ካዉቴታ ዳሮ ናቄታው፤ ሚኒ ባፄቲያዋንቱ ኢዞ ዴሚኖ። 13ኣዪሲ ጎፔ፥ ናባቱ ኡባቱኔ ሙሴ ሂጊ ዮሃኒሳ ዎዲ ጋካናው፥ ቲምቢቲያ ሃሳዬዲኖ፤ 14ሲሚ ሂንቴንቱ ኡንቱንቱ ሃሳዮዋ ኣማናናዋ ጊዶፔ፥ ያናዋ ጌቴቴዳ ኤላስ ሃ ዮሃኒሳ። #ሚል 4፡5፤ ማት 17፡10-13፤ ማር 9፡11-13 15ሲሲያ ሃይይ ዴዒያዌ ሲሶ!

16«ሺን ታኒ ሃ ዎዲያ ኣሳ ኣያና ሌሚሶ? ኡንቱንቱ ቆጫን ኡቲያ ናና ማላቲኖ፤ ኡንቱንቱ ባሬንቱ ላጌቱዋ ፄሲዴ፥ 17‹ኑኒ ሂንቴንቶ ሂፂፂያ ፑኔዶ፤ ሺን ዱሪቤይኪታ፤ ዬኩዋ ዬካ ኬሴዶ፤ ሺን ዬኪቤይኪታ› ያጊኖ። 18ኣዪሲ ጎፔ፥ ዮሃኒሲ ፆሚዲኔ ዎዪኒያ ኤሳ ኡሼናን ዪና ኡንቱንቱ፥ ‹ኣ ቦላ ኢታ ኣያናይ ዴዔ› ያጌዲኖ። 19ታኒ፥ ኣሳ ናዓይ፥ ማዴኔ ኡሻዴ ዪና፥ ኡንቱንቱ ታና፥ ‹ሃ ናፊሳማኔ ዎዪኒያ ኤሳ ኡሺያዋ ቤዒቴ፤ ቃራፃ ቃንፂያዋንቱናኔ ናጋራንቻቱዋና ሲቄቴ› ያጊኖ፤ ሺን ፆሳ ኣዳ ኤራቴይ ባሬ ኦሱዋን ቱማ ጊዲዴ ቤቴ» ያጌዳ።

ኣማኔናን ኢፄዳ ዲራው ቶሼቴዳ ካታማቱዋ

(ሉቅ 10፡13-15)

20ሄዋፔ ጉዪያን፥ ዬሱሲ ባሬ ማላታፔ ዳሪያ ባጋ ኦዳ ካታማቱዋን ዴዒያ ኣሳይ ባሬንቱ ናጋራፔ ሲሚቤና ዲራው፥ ኡንቱንታ ሃዋዳን ያጊዴ፥ ቶሺያ ዶሜዳ፤ 21«ኮራዚኔ ካታማው፥ ኔው ኣዬሮ፤ ቤቴሳይዳ ካታማው፥ ኔዉካ ኣዬሮ፤ ኣዪሲ ጎፔ፥ ሂንቴንቱ ቦላ ፆሳይ ኦዳ ማላታይ ፂሮሳ ካታማኒኔ ሲዶና ካታማን ኦሴቶዋ ጊዲንቶ፥ ኡንቱንቱ ማቂያ ማዪዴ፥ ቢዲን ኦኬቲዴ፥ ቤኒ ባሬንቱ ናጋራፔ ሲማናዋንታሺን። #ኢሳ 23፡1-18፤ ሂዝ 26፡1-28፡26፤ ኢዩ 3፡4-8፤ ኣሞ 1፡9-10፤ ዛክ 9፡2-4 22ታኒ ሂንቴው ኦዳይ፤ ፒርዳ ጋላሲ ፆሳይ ሂንቴፔ ፂሮሳ ካታማዉኔ ሲዶና ካታማው ፒርዳ ካዉሺሳና። 23ቃሲ ቂፊሪናሆማ ካታማው፥ ኔኒ ሳሉዋ ፑዴ ቁ ጋናው ኮያዲ? ኔኒ ሲዖሊያ ዱጌ ዬጌታና፤ ኣዪሲ ጎፔ፥ ኔ ቦላ ፆሳይ ኦዳ ማላታይ ሶዶማ ካታማን ኦሴቶዋ ጊዲንቶ፥ ሶዶማ ካታማይ ሃቼ ጋካናሲካ ዴዓናዋሺን። #ኢሳ 14፡13-15፤ ዶም 19፡24-28 24ታኒ ሂንቴው ኦዳይ፤ ፒርዳ ጋላሲ ፆሳይ ኔፔ ሶዶማው ፒርዳ ካዉሺሳና» ያጌዳ።

ዬሱሳን ሼምፑዋ ዴሚያዋ

(ሉቅ 10፡21-22)

25ዬሱሲ ሄ ዎዴ ዛሪዴ፥ ሃዋዳን ያጌዳ፤ «ታ ኣቦ፥ ሳሉዋ ሳዓ ጎዳው፥ ኔኒ ሃዋ ኣዳ ኤራንቻቱዋፔኔ ኣኬካንቻቱዋፔ ጌንዴ፥ ኤሬና ናናቱዋሲ ቆንጪሴዳ ዲራው፥ ኔና ጋላታይ፤ 26ኤ ታ ኣቦ፥ ኣዪሲ ጎፔ፥ ሃዌ ኔ ሼኒያዳን ኦሴቴዳ።

27«ታ ኣቡ ታው ኡባባ ኢሜዳ፤ ኣዉዋፔ ሃራይ ናዓ ኤሬና፤ ናዓፔኔ ናዓይ ኣዉዋ ቆንጪሳናው ኮዪያ ኣሳፔ ኣቲን፥ ሃራይ ኣዉዋ ኤሬና።

28«ዳቡራንቻቶ፥ ዴፁዋ ቶኮዋንቶ ኡባቶ፥ ታኮ ሃ ዪቴ፤ ታኒ ሂንቴንታ ሼምፒሳና። 29ታኒ ጋራኔ ታ ዎዛናን ኣሺኬ ጊዶ ዲራው፥ ታ ሞርጌ ሚን ዋፄቲቴ፤ ታፔ ታማሪቴ፤ ሂንቴንቱ ሼምፑዋሲካ ሂንቴ ሼምፑዋ ዴማና። #ኤርም 6፡16 30ኣዪሲ ጎፔ፥ ታ ሞርጌ ሚይ ጊጋ፤ ቃሲ ታኒ ሂንቴንታ ቶሴዳዌካ ካዉሻ» ያጌዳ።

Actualmente seleccionado:

ማቶሳ 11: dwrENT

Destacar

Copiar