Эхин 2
2
1Иигэжэ оршолон юртэмсэ болон амитай, амигүй байгаали бүтээгдэһэн гээшэ. 2Долоодохи үдэр болоходо, Бурхан ажалаа дүүргэжэ, хэжэ байгаа бүхы ажалнуудһаа долоодохи үдэртөө Тэрэ амарба ха. 3Бурхан долоодохи үдэрые үреэжэ, тусхай нангин үдэр гээд тодорхойлбо, юундэб гэхэдэ, энэ үдэр хэжэ байһан ажалһаа Тэрэ амараа: бүтээлгэ байгуулгын хэрэг түгэсөө. 4Иимэл даа, оршолон юртэмсын байгуулагдаһан түүхэ.
Эдээмэй сэсэрлиг
Эзэн Бурханай газар дэлхэй болон огторгой бүтээхэдэнь, 5газар дээрэ нэгэшье һөөг бургааһан, нэгэшье ногоон үгы һэн. Эзэн Бурхан газарта бороо оруулаагүй мүн баһа таряа тариха хүн гэдэгые бии болгоодүй байгаа. 6Гансал гүн гүнзэгыһөө нэбтэрэн гаража байгаа уурал газарые шиигтүүлжэ байгаа.
7Тиигээд Эзэн Бурхан хүниие газарай шоройһоо бии болгожо, хамар руунь амидаралай амисхал үлеэжэ оруулба. Хүн амитан боложо амидырба. 8Эзэн Бурхан зүүн зүгтэхи Эдээм гэдэгтэ сэсэрлиг һуулган таряад, тэндээ Өөрынгөө бии болгоһон хүн гэдэгые байрлуулба. 9Энэ сэсэрлиг соогоо Эзэн Бурхан харахада аятай, эдихэдэ амтатай жэмэстэ мододые ургуулба. Сэсэрлигэй дунда ажамидарал үршөөдэг модон, тиихэдэ һайн, мууе ойлгохо болгодог эрдэмэй модон һуулгагдаба.
10Эдээмэй сэсэрлигээр гол урдажа, тэрэниие уһална, саашалхадаа, дүрбэн һалаа гол болон урдана. 11Тэдэ голойнь нэгэн Пишоон гэгдэдэг, алтатай Хавилаа гэжэ нютаг ороноор урдана. 12Тэрэ газар орондо сэбэр алтан, гүгэл болон мана шулуун байна. 13Хоёрдохи голынь Гихоон гэжэ нэрэтэй, Күүш гэжэ орон дайдые тойрон урдана. 14Гурбадахи голынь Тигр, Ассириһээ зүүн тээшэ урдана. Дүрбэдэхи голынь – Евфрат.
15Эдээмэй сэсэрлиг һэргээн харууһалжа байхыень Эзэн Бурхан хүниие тэндэ байрлуулаад, 16иимэ захяа хүндэ үгэбэ:
– Энэ сэсэрлигэй ямаршье алим жэмэс эдихэдэш болохо. 17Зүгөөр һайн муугай илгаае мэдэрүүлдэг модоной жэмэсэй ойронь хүрэжэ болохогүй. Тэрэниие оройдоо бү эди. Эдеэ һаа, тэрэл үдэртөө үхэхэш.
18Тиигээд Эзэн Бурхан:
– Хүнэй гансаараа байхань муу. Өөртэнь таараха хани бии болгохомни, – гэжэ айладхан шиидэбэ. 19Тиигээд Тэрэ газар шоройһоо элдэб түрэлэй хээрын ан гүрөөл, огторгойн янза бүриин шубуудые бии болгоод, тэдээндэ хүн ямар нэрэ үгэгшэ ааб гэжэ мэдэхэеэ ойронь асарба. Иигэжэ амиды голтой бүхэн нэрэтэй болобо. 20Хүн адуу мал, ангуудта болон жэгүүртэ шубуудта тус тустань нэрэ олгобо, зүгөөр тэдээн сооһоо өөртэнь таараха хани олдобогүй.
21Тиихэдэнь Эзэн Бурхан хүниие гүнзэгы нойроор унтуулаад, нэгэ хабһыень абажа, шархыень юушьегүй болоторынь эдэгээгээд, 22тэрэ хабһаараа эхэнэрые бүтээбэ. Тиигээд тэрэнээ хүндэ асарба. 23Хүн тэрэниие хараад:
– Зай, энэ минии яһанһаа таһарһан яһан,
мяханһаам таһарһан мяхан.
Эрэ намһаа абтаһан энэ хүн
эхэнэр гэжэ нэрэтэй болог, – гэбэ.
24Эгээл иимэһээ эрэ хүн эхэ эсэгэеэ орхёод, һамгантайгаа нэгэдэхэ, тиин хоёр хүн нэгэн бэе болон эблэрхэ ушартай.
25Хүн мүн тэрэнэй һамган хоюулаа шараа нюсэгэнүүд байгаа, зүгөөр эшэхэ гээшые мэдэдэггүйнүүд бэлэй.
Actualmente seleccionado:
Эхин 2: BurBBL2024
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
