УблапӀэ 6
6
Яхэнэрэ шъхьэр
Иныжъхэр къыздикӀыгъэхэр
1ЦӀыфхэр чӀыгум нахьыбэ щыхъущтыгъэх, ахэмэ пшъашъэхэр къафэхъущтыгъэх. 2Тхьэм ыкъомэ#6:2 Тхьэм ыкъохэр – къикӀырэр: Тхьэм ыдэжь къикӀыгъэ псэхэр. цӀыфмэ япхъумэ ядэхагъэ алъэгъути, ахэр, шъхьадж ыгу рихьырэр, шъузкӀэ аштэщтыгъэх. 3Джащыгъум Зиусхьаным ыӀуагъ: «Сэ Спсэ цӀыфым егъашӀэми хэтыщтэп. ЦӀыфмэ хьадэгъур къапэщылъ, арышъ ахэмэ къагъэшӀэщтыр илъэсишъэрэ тӀокӀырэ орэхъу».
4А лъэхъаным, нэужырэми фэдэу, чӀыгум иныжъхэр тетыгъэх, сыда пӀомэ Тхьэм ыкъохэр цӀыфмэ апхъумэ адэжь къакӀохэти, ахэмэ сабыйхэр къафалъфыщтыгъэ. Ахэр блэкӀыгъэ зэманмэ ялӀыхъужъхэу щытхъу къызфахьыжьыгъ. 5ЧӀыгум тет цӀыфмэ ябзэджагъэ зэрэбэ дэдэр Зиусхьаным ылъэгъугъ: ахэмэ зэкӀэ ягупшысэхэр ренэу бзэджагъэ ашӀэным фэгъэзагъэх. 6КӀэгъожьыгъ Зиусхьаныр цӀыфыр чӀыгум къызэрэщигъэшӀыгъэмкӀэ, ыгукӀэ гукъэошхо щыхъугъ. 7Зиусхьаным къыӀуагъ: «ЧӀышъхьашъом тезгъэкӀодыкӀыщтых Сэ зэкӀэ къэзгъэшӀыгъэ цӀыфхэр, ахэмэ акӀыгъухэу хьэкӀэ къуакӀэхэри, былымхэри, цохъорэ пшырэ псэушъхьэхэри, ошъогу бзыухэри, сыда пӀомэ Сэ ахэр къызэрэзгъэшӀыгъэхэмкӀэ сыкӀэгъожьыгъ». 8Ау Нухьэ Зиусхьаныр нэшӀукӀэ еплъыгъ.
Псыкъиушхор
9Мары Нухьэ икъэбар: Нухьэ зафэу, мыхъун зи зыбгъодэмылъ цӀыфэу а лъэхъаным щыӀэгъэ цӀыфхэм ахэтыгъ; Нухьэ Тхьэм ыпашъхьэ итэу псэущтыгъэ. 10Нухьэ къуищ иӀагъ: Щэм, Хъам, Ефэт.
11Тхьэм ыпашъхьэкӀэ чӀыгум тетыр зэкӀэ емыкӀу хъугъэу щытыгъ; бзэджагъэр ащ тизыгъ. 12Джы мары Тхьэм ылъэгъугъ: зэкӀэ чӀыгум тет цӀыфхэр гъогу пхэнджым зэрэрыкӀохэрэм къыхэкӀэу чӀыгур емыкӀу хъугъэ. 13Арыти Тхьэм Нухьэ къыриӀуагъ: «ЧӀыгум щыпсэурэ пстэуми кӀэух афэсшӀынэу тесыубытагъ: ахэмэ ямыхъо мышӀагъэ чӀыгур зэлъиштагъэ. Сэ зэкӀэ ахэр згъэкӀодыщт, ахэмэ акӀыгъоу чӀыгури ары. 14Гофер чъыгым псыпхъонтэр зыфыхэшӀыкӀ; ащ ыкӀоцӀ унэ шъхьаф шъхьафэу зэтеути, ыкӀыӀукӀи ыкӀоцӀыкӀи мыстхъу щыф. 15Ар мырэущтэу шӀы: псыпхъонтэрым икӀыхьагъэ Ӏэнтэгъу#6:15 Псыпхъонтэрым икӀыхьагъэ метри 132 рэ, ишъомбгъуагъэ метрэ 22 рэ, илъэгагъэ метрэ 13 фэдиз мэхъу. шъищ, ишъомбгъуагъэ Ӏэнтэгъу шъэныкъу, илъэгагъэ Ӏэнтэгъу щэкӀ. 16Псыпхъонтэрым шъхьэ#6:16 Е шъхьангъупчъэ. фэшӀ, зы ӀэнтэгъукӀэ ышъхьагъыкӀэ ар дэхьый, ыбгъукӀэ пчъэ халъхь; ащ ыкӀоцӀ апэрэ, ятӀонэрэ, ящэнэрэ къатхэр ерэӀэх. 17Сэ, мары, псыкъиушхо чӀым къытесщэнышъ, щыӀэныгъэм ыпсэ зыхэлъэу ащ тет пстэури згъэкӀодыщт. ЗэкӀэ чӀым щыщыӀэр кӀодыщт. 18Ау Сэ Ӏуагъэ о къыбдэсшӀынышъ, о псыпхъонтэрым уихьащт, пкъохэри уишъузи, пкъомэ яшъузхэри уигъусэщтых. 19Джащ фэдэу зыкӀыгъэгъух псэ зыпыт пстэумэ ащыщэу тӀурытӀу, хъурэ бзырэ, ахэр псэоу о къыбдэнэнхэм пае. 20Быбырэ лъэпкъ пэпчъ, хьэкӀэ къокӀэ лъэпкъхэм, чӀыгум сыдрэ щыцохъорэ щыпшырэмэ ащыщэу тӀурытӀу, псэоу къэнэнхэм пае, уадэжь къерэхь. 21Сыд фэдэрэ шхыныгъуи зыдашт, ощ паий, ахэмэ апаий гъэтӀылъых».
22Тхьэм къызэрэриӀуагъэм фэдэу, Нухьэ зэкӀэ ышӀыгъ.
Actualmente seleccionado:
УблапӀэ 6: АдыТГ
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© Институт перевода Библии, 2002-2023
