Luk 8

Na daki nira tara sangaa ia Jisas ma na hana duli nira

1Bukena mai, ma ia Jisas e dia talihu laba tana vera leho ma na vera pepechi nira, me kori lengaa na saurongo talana tana nina baravata ia God. Mi ira tara bukea ia e sangavulu ruka hana duli loera, 2kolu kesana lakamu na daki te huru chonia ia na tarunga seko tatadira me vani maurisira tana nidira oche. Me chikai na daki, koi Meri na vangana ni Magdala te tu ia Jisas me huru chonia e vitu na tarunga seko tatana. 3Ma koi Joana na tauna ia Kusa, na tinoni te morosi taonia nina tatamani nira ia Herod, ma koi Susana ma na daki danga nira laka kesana. Ma na daki nira nia ara sangaa ia Jisas ma na hana duli nira tana nidira golo tovosi.

Na kori titihila na tinoni te rasa vahania na piu ni wit

(Matiu 13:1-23; Mak 4:1-20)

4Me danga tinoni ara maimai tatana ia Jisas, tara vota mai tana vera ma na vera, mara mai saikolu tatana ia Jisas. Ma ia Jisas e kori vanira na kori titihila de, 5“Totoha me chikai na tinoni te dia na rasa vahanira na piu ni wit tana lalona nina uta. Mi tahuna te rasa vahania ia, mi kesana ara ruchu sivo tana sala male, mi ira na tinoni ara dakehojaa ma na manu nira ara mai mara hani kodera. 6Mi kesana ara ruchu sivo tana pari marahova. Tahuna te tuturiha na pira, mara mate rongona te chele solehana. 7Mi kesana ara ruchu sivo tana levuhana na halo kakaruha, mara pira saisai me laba na halo kakaruha mara pokosia mara mate. 8Mi kesana ara ruchu sivo tana pari talana, mara dato mara vua mara vungu talana solehana, mara tamania chikai sangatu na piuna.”

Me kori vahai laka ia Jisas de, “Isei te tamani valingena me ke valinge talanaa.”

Ia Jisas e kori lengaa na rongona nina kori titihila nira

(Matiu 13:10-17; Mak 4:10-12)

9Mi ira hana duli nira ia Jisas ara gesuaa na hua te kalea ia na kori titihila nia. 10Ma ia Jisas e valagu vanira me kori vahai de, “God e vanihamu noha na manasa ni hae vagoa na omea tutuni te toha koku tana nina baravata ia God. Mi ira kesana na tinoni tovosi ngeni ba kara valingea na kori titihila vahai na koripoto bamu. Me seisuge kara hahae mara utu kara hae vagoa, me seisuge kara vavalinge mara utu kara valinge vagoa.”

Ia Jisas e kori lengaa na hua te kalea na kori titihila na tinoni te rasa vahania na piu ni wit

(Matiu 13:18-23; Mak 4:13-20)

11“Ma na manasa te kalea na kori titihila nia e vahai de. Na piu ni wit nia e vahai na valaguna ia God. 12Mi ira na piu tara ruchu sivo tana sala nia, e vahai ira na tinoni tara valingea na valaguna God, me mai na tarunga seko me taha chonia tana tobadira, me ke vahanira kara teha dodonu ma kara mate. 13Mi ira na piu tara sivo tana pari marahova e vahai ira tara valingea na valaguna God mara valinge mamahelaa, me teha lamuha boroha tana tobadira. Mara dodonu ira tana tahu kumukumu bamu, me tahuna te mai na tovotovo mara ruchu soha. 14Mi ira na piu tara sivo tana levuhana na halo kakaruha nia e vahai ira tara valingea na valaguna ia God me ngolira na papadana visa na omea tana pari de, mara ngavina golo danga ma na visa na mamahelana na pari de tana tobadira. Mara pokolia na valaguna ia God tana tobadira me teha dato odo. 15Mi ira na piu tara sivo tana pari talana nia, e vahai ira tara talana me hoto na tobadira. Mara valinge odoa na valaguna ia God mara livu sulihaa tana tobadira mara berengiti kolu diadia me chau tahuna tara tamani danga na vuadira.”

Nina valagu ia Jisas e vahai na ruu

(Mak 4:21-25)

16Me kori vahai laka ia Jisas de, “E teha chikai hanaa na rua na ruu me ke kopia tana vavana na diho, se ke livu sahea vavana na mihe. Ma ia ke livu kakae nomua tana belabela ke ni marara vanira visa kode na tinoni tara sahe mai tana vale nia.

17“Me vahai lakamu, visa na omea te toha koku ngeni ba kara laba lenga, ma na hua tara livu kokua, ke chikai na dani ngeni ba ke laba lenga. 18Tana matengana te vahai nia, ihamu kamu vavalinge odo rongona sei te hanaa nigu valagu nau mara kalamatavia, ia God ngeni ba ke pabo vani lakaa. Mi ira tara kovahai ara hanaa nigu valagu nau mara teha na kalamatavia, ia God ngeni ba ke taha choni kodea tatadira.”

Ara laba mai na tinana ma na tasina nira ia Jisas

(Matiu 12:46-50; Mak 3:31-35)

19Mara laba mai na tinana ma na tasina nira ia Jisas mara utu na mai varangisia ia, rongona te kapi na tinoni tara talihu labaa ia. 20Mi ira ara kori vahai vania ia Jisas de, “Na tinamu ma na tasimu nira hoe ara mai tuu i kuli, mara ngangavina na mai morosiho hoe.”

21Ma ia Jisas e kori vahai vani kodera ira de, “Na tinagu ma na tasigu nau ira tara valingea na valaguna ia God mara toha taonia.”

E valagu ia Jisas me beata na kolo

(Matiu 8:23-27; Mak 4:35-41)

22Me chikai na dani, ia Jisas kolu hana duli nira ara sahe tatana chikai na vaka pepechi, me kori vahai vanira hana duli nira, “Hida ma ka talihu tana tabana na kolo de.” 23Mi tahuna tara tatalihu tinoni loera, me jaro ia Jisas me biku rapo. Me laba taora chikai na hurihuri leho me hado tana kolo nia, ma na kolo e sahe tana vaka pepechi nia mara maravia ira kara luvu. 24Mi ira hana duli nira ara halisia ia Jisas mara kori vahai vania de, “!Taovia, Taovia, ngeni ba kalu mate lohita!” Ma ia Jisas e tuchau me kejalia na hurihuri ma na kolo, me luba sivo na hurihuri, me beata soha na kolo nia. 25Ma ia Jisas e gesuara hana duli nira, “?Ivei na lomiu dodonu lohamu?” Mi loera hana duli ia ara makai mara matahu mara vaivalaguhi mara kori vahai de, “?Isei numu tinoni de? !E valagu vania na hurihuri ma na kolo mara ko valinge mangana!”

Ia Jisas e vani mauria chikai na tinoni te sivolia danga na tarunga

(Matiu 8:28-34; Mak 5:1-20)

26Ma ia Jisas ma na hana duli nira ara tatalihu dia mara chau i Gerasa, na provins tana tabana tana tasi i Galili. 27Mi tahuna ia Jisas te chipu longa lilihi, me mai laba chikai na tinonina vera nia te hadovia na tarunga nira. Ma na tinoni nia e teha oka noha na tivi me teha na toha vale, me totoha ia tana baba ni tinoni mate. 28-29Me oka mai noha, na tarunga nira nia ara vahani bulesia tinoni nia, me seisuge kara soria na chen tana limana ma na tuana, ma kara toha pitua, me pichua na chen nia mara hurua na tinoni nia me dia tana talu mangu. Ma ia Jisas e tuu me kejalia na tarunga nira tatana tinoni nia kara chulu. Mi tahuna te morosia tinoni nia ia Jisas, me huu leho ia me ruchu sivo i pari me huu dato me kori vahai de, “!Ia Jisas sa, ihoe na Dalena ia God i heven vasau! Inau u nongi kikiho hoe ko mui na sekoliu nau.”

30Ma ia Jisas e gesuaa na tinoni nia, “?Isei na asamu hoe?”

Ma na tinoni nia e kori vahai vania de, “Nau asagu ‘ia Ala-ala.’ ” Ia e valagu vahai ia rongona e danga na tarunga te sahe tatana ia. 31Ma na tarunga nira ara nongia ia Jisas ke mui na kejalira na sivo tana mao ni rota te teha tamani vovotana.

32Me danga na bolo ara toha mara hahani lilihina chikai na vuvungana. Ma na tarunga nira ara nongia ia Jisas ke tala ma kara sahe tatadira na bolo nira nia. Ma ia Jisas e tala vanira. 33Mara chulu na tarunga nira tatana tinoni nia mara sahe lalodira na bolo nira. Ma na ala-ala ni bolo nira ara vinavinau mara sivo tana kabikabi nia, mara sivo lalona na tasi nia mara lulumi mara mate kode.

34Mi tahuna ira na tinoni tara morosi taoni bolo tara haea na omea te laba vahai nia, mara choho mara kori valegoa na hua te laba tana vera nia. 35Me danga na tinoni ara dia na morosia na omea vahai te laba nia. Mi tahuna tara laba ira tatana ia Jisas, mara morosi nohaa ira na tinoni nia te totoha noha tana lilihi ni tuana ia Jisas. Ma na tinoni nia e sahelia na kalekona me talana noha manasana. Mi ira kode ara morosi vahania ia mara matahu. 36Mi ira tara morosia ia Jisas te hurua na tarunga tatana tinoni nia ara kori vanira visa na tinoni e vahai vei e talana visu soha na tinoni nia. 37Tahuna vahai nia, ira tara toha talihu laba tana vera i Gerasa ara matahu solehana, mara nongia ia Jisas ke dia choni tana vera nia. Me sahe ia Jisas tana vaka pepechi me onioni na visu. 38Me laba na tinoni te hurura ia Jisas na tarunga nira tatana, me nongia ia Jisas me kori vahai vania de, “Ko tala hoe minau ku atu koluho hoe.”

Ma ia Jisas e raia tinoni nia ke visu, me kori vahai vania de, 39“Ko visu hoe veramu mo ko kori vanira ira na omea nira ia God te agosi vaniho hoe.” Me dia tinoni nia me kori lenga valegoa tana vera leho nia na omea nira te agosi ia Jisas vania ia.

Na garidaki te mate ma na daki ocheoche

(Matiu 9:18-26; Mak 5:21-43)

40Mi tahuna te visu laka ia Jisas tana tabana na tasi nia, e danga na tinoni ara mamahela vania ia, matengana ara toha pitua ia. 41Me chikai na tinoni asana ia Jaeras, na tinoni lehona tana vale lotu ira na Jiu tana vera nia, e mai me sivo tuturu vania ia Jisas me nongia ko dia koera tana valena ia, 42rongona ia e tamania chikai pelelee bamu dalena, na dalena daki te sangavulu ruka uvina te varangia ke mate.

Mi tahuna ia Jisas te diadia tana sala ke ni haea na garidaki nia, me danga na tinoni tara vungulia ia tabana mi tabana tana sala nia. 43Mi tana levuhadira na tinoni nira tana tahu nia, e toha chikai na daki te tavelia na habu lalona e sangavulu ruka na uvi. Na daki nia e kodesi voloa nina golo vanira ira na tinoni tataru kara taruhia ia#8:43 “Na daki nia e kodesi voloa nina golo vanira ira na tinoni tataru kara taruhia ia.” Kesana mamare tuali teha tamania na valagu de., mara teha ira na tangomana. 44Na daki nia e buke dia me chibelia na kokodena kalekona ia Jisas. Tana tahuna kalavata nia, me kode na habu mai tatana daki nia. 45Me gesu ia Jisas, “?Isei te chibeliu nau?”

Mara lianga kodea ira, me kori vahai ia Pita de, “!Taovia, mi loera ara sola tara matahuvia, na tinoni danga tara vunguliho hoe mara bingiho hoe de!”

46Ma ia Jisas e kori vahai de, “E chikai te chibeliu nau, rongona tu vajangia nau na susuliha tatagu nau e dia tatana me maurisia ia.” 47Ma na daki nia e kama tobana tara hae lelengaa na hua te agosia ia, me mai me sivo tuturu vania ia Jisas. Mi tana matadira kode visa na tinoni, na daki nia e koria na rongona e vu chibelia na kalekona ia Jisas. Me kori lenga lakamua ia e laka kalavata tahuna te chibelia na kalekona ia Jisas. 48Ma ia Jisas e kori vahai vania daki nia de, “Dalegu, nimu dodonu hoe tatagu nau te vahaniho mo laka nia. Ko dia tana rapo.”

49Mi tahuna ia Jisas te vavalagu vani vataa na daki nia, me laba mai chikai na tinoni te taha kori mai tana valena ia Jaeras me koria vahai de, “!Jaeras! E mate noha na dalemu hoe. Ko mui laka hoe bulesiana na Ticha.”

50Tahuna ia Jisas te valingea na saurongo nia, me kori vahai vania ia Jaeras de, “Ko mui hoe na toba sahata. Ko dodonu bamu hoe tatagu nau me ke mauri visu laka dalemu daki hoe.”

51Mi tahuna tara chau tana valena ia Jaeras, ma ia Jisas e lutia siki tinoni na sahe, iloera bamu ia Pita ma ia Jon ma ia Jemes ma na tinana ma na tohana garidaki nia. 52Na tinoni nira tana tahu nia ara vania na ora mara ngangai leho matena tara sahavia na garidaki nia, me laba ia Jisas me kori vahai vanira de, “Kamu mui hamu na ora leho vahai ia. Na garidaki de e teha na mate. Ia e biku bamu.”

53Mi ira ara changi kiana ia Jisas rongona tara hanaa ira na daki nia e mate piju noha. 54Ma ia Jisas e sahe me kapukua limana garidaki nia me soloa me kori vahai vania de, “!Dalegu, ko tuchau!” 55Mi tana tahuna nia, me visu mai na mamahona garidaki nia me tuchau kalavata. Ma ia Jisas e kejalira kara tuva hana na daki nia siki hahani ke hania. 56Ma na tinana ma na tohana garidaki nia ko sola to ko makai. Ma ia Jisas e tongo vanira ira na kori lenga valegoa na omea te laba nia.

Actualmente seleccionado:

Luk 8: mln

Destacar

Copiar