लूका 5

यीशुआ के चेल्‍ले

(मत्‍ती 4:18–22; मरकुस 1:16–20)

1 # मत्‍ती 13:1,2; मर 3:9,10; 4:1 एक बारी जिद यीशु गन्‍नेसरता किया झील्‍ला धौरै उब्भा थिया, अर परमेश्वरा का वचन सुणणै वास्तै एक बड़ी भीड़ उसकै धौर भेळी होई, 2फेरी उनु झील्‍ला क किनारै दो बेड़ीयाँ लगियाँ देखियाँ, अर मछवारे उसकै माहले उतरी जाळ धोया करे। 3अर यीशु उनकै माहला एक्की बेड़ीया पर चढ़ी गया, जो शमोन्‍ना कि थी, अर उनु बेड़ीया कु किनारे थ दूर करनै कैहया। पिछैं वो बेड़ीया म बैस्सीक लोक्कैं कु उपदेश दैणैं लाग्गी गया।

4अर उपदेश खतम करे के बाद्दाम उनु शमोन्‍ना थ कैहया, “डुंघीया जाघ्घा चाल, अर मछीयाँ पाक्कड़ने वास्तै थारे जाळ राळो।”

5 # यूह 21:3 शमोन्‍नै यीशुआ थ कैहया, “हे मालक, हमु सारी रात महनत करी, अर काइं भी हमकु कोइन मिल्या, तोभी तौं कैहया करता हैं, तो हूँ जाळ राळता है।” 6#यूह 21:6अर जिद उनूर जाळ राळया तो घणियाँ सारीयाँ मछीयाँ पाकड़ी लियाँ, अर उनके जाळ पाटणै लाग्गी गये। 7अर उनूर दुसरीयैं किस्तियैं पर बैठ्ठे आपके साथियैं कु इशारा करीकना बुलाया, ताकी वो उनकी मदद करैं, अर उनूर आइकना दोन्‍नो बेड़ीयाँ इतनियां भरी लिया कि वो डूबणैं लाग्गी गइय्याँ। 8या देक्खी शमोन पतरस यीशुआ के पाँवैं म झुकि गया, अर उनु कैहया, “हे प्रभु, हूँ एक पाप्पी इन्सान हैं, मेरै धौरै थ चल्याज!”

9क्योंकि इतनियां मछीयाँ पाक्कड़ने क बाद, वो अर उसके सात्थी चौंहकी गये थिये। 10अर शमोन्‍ना के सात्थी याकूब अर यहून्‍ना भी चौंहकी गये थिये, जो जब्दिया के बेट्टे थिये, पिछैं यीशुऐं शमोन्‍ना थ कैहया, “ना डर, क्योंकि इबकै थ तौं जीवते इन्सान्‍नै कु परमेश्वरा धौरै ल्याणैं आळा बणंग।”

11पिछैं वो आपकियैं किस्तियैं कु किनारे पर लेई आये, अर सारा काइं छोड्डी उसकै गैल्‍लै होई गये।

कोहड़िया कु शुद्ध करना

(मत्‍ती 8:1–4; मरकुस 1:40–45)

12इसकै बाद, जिद यीशु एक्की शहरा म थिया, तो उसकै धौर एक कोहड़िया आया, अर वो यीशुआ कु देक्खी, उसकै साम्है झुकि गया, अर उसथै मीन्त करी कैहया कि, “हे प्रभु, अगर तौं चाँहवैं तो मिस्कु शुद्ध करी सक्‍ता हैं#5:12 मिस्कु शुद्ध करी सक्‍ता हैं यहूदी धार्मिक रीतियैं क मुताबित एक्की कोहड़िये कु अशुद्ध मान्या जात्‍ता थिया।।”

13अर यीशुऐं उसपर हाथ लगाइकना कैहया, “हूँ चाहता हैं, कि तौं शुद्ध होई जावैं।” अर जिधी उसका कोहोड़ दूर होई गया। 14अर यीशुऐं उसकु हुकम दिया कि, “या बात किसी कु भी ना बताइय्यैं, अर इबकै अपणे-आप्पा कु याजका कु जाई दिखा, अर शुद्ध होवोड़े इन्सान्‍ना वास्तै मूसा जो चढ़ावा कहोड़ा है, उसकु चढ़ा, ताकी लोक्कैं कु तेरे शुद्ध होणैं कि गवाही मिलै।”

15अर यीशुआ कि चर्चा होर भी फैलती गई, अर बड़ी भीड़ उसकु सुणणै, अर बिमारीयैं थ सूल होणैं वास्तै भेळी होया करी। 16पर यीशु प्रार्थना करनै वास्तै सूनियैं जाघ्घैं म जात्‍ता थिया।

लकवे के रोगीया कु सूल करना

(मत्‍ती 9:1–8; मरकुस 2:1–12)

17अर एक दिन यीशु उपदेश देया करया, अर फरीसी#5:17 फरीसी या एक यहूदी लोक्कैं का एक झुण्ड है, जो मूसा के नियमैं कु सिखावते थिये। अर यहूदी नियमैं कु सिखाणैं आळे भी बैठ्ठे थिये, जो गलील अर यहूदिया के हर एक्की शहरा थ, अर यरुशलेम शहरा थ आओड़े थिये, अर लोक्कैं कु बिमारीयैं थ सूल करनै वास्तै प्रभु परमेश्वरा कि शक्‍ती उसकै सात्थी थी। 18अर जिधी, कुछ लोक एक्की इन्सान्‍ना कु जो लकवे का रोग्गी थिया, एक्की खाट्टा पर उसकै धौरै लेई आये, अर यीशुआ धौर अन्दर लेई जाणैं, अर उसकै साम्है धरनै का कोइ ज़रीया लाभ्या करे। 19पर वो भीड़ होणैं किया वजाह थ उसकु अन्दर कोइ लेई जाई सके, अर उनूर छता पर जाई छता कियाँ खपरेल्‍लाँ हटाई उसकु खाट्टा समेत सारैं के बिच्‍चा म यीशुआ क साम्है थल्‍लै तारी दिया। 20अर उनका विश्वास देक्खी यीशुऐं उसथै कैहया, “हे भाई, तेरे पाप माफ होए।”

21पिछैं यहूदी नियमैं कु सिखाणैं आळे अर फरीसी आपसरीया म विचार करनै लाग्गी गये, “या कोण है, जो परमेश्वरा कि निन्दा करया करता है? परमेश्वरा क अलावा कोण है, जो किसी के पाप माफ करी सक्‍ता है!”

22यीशुआ कु उनकै मनैं के विचार पता थिये, अर यीशुऐं उनथै कैहया, “थम आपके मनैं म इदा कि सोच्या करो? 23असान क्या है, या कहणा कि ‘तेरे पाप माफ होए।’ या फेरी या कहणा, कि ‘ऊठ अर चाल फिर?’ 24पर या इस वास्तै है, कि थम जाणी सखों कि इन्सान्‍ना के बेट्टे कु धरतिया पर पाप माफ करनै का भी हक है।” यीशुऐं उस लकवे के रोगीया थ कैहया “हूँ चिकु कैहता हैं, कि ऊठ आपकी खाट चा अर आपकै घरै चल्याज!”

25अर वो जिधी उनकै साम्है उब्भा होई गया, अर आपका बिस्तरा चाई, परमेश्वरा कि बड़ाई करता-करता घरै चल्या गया। 26इसपर वो सारे चौंहकी गये, अर परमेश्वरा कि बड़ाई करनै लाग्गी गये, अर घणे डरा सात्थी या कैहया करे, “आज हमु अनोखियाँ बात्‍तां देखियाँ हैं!”

लेवीआ का बुलाया जाणां

(मत्‍ती 9:9–13; मरकुस 2:13–17)

27इसकै बाद वो बाहर गया, अर लेवी नावाँ के चूंगी लैणै आळे कु चूंगिया किया चौकिया पर बैठ्ठा देख्या, अर उसथै कैहया, “मेरै गैल्‍लै होइज।” 28अर वो सारा काइं छोड्डी उसकै गैल्‍लै होई गया।

29अर लेवीयैं उसकै वास्तै आपके घरा म बड़ा भोज धरवाया, अर ओठ्ठी चूंगी लैणै आळे अर दूसरे लोक्कैं कि भी बड़ी भीड़ भोज करनै बैठ्ठी थी। 30#लूका 15:1,2अर फरीसी अर उनके यहूदी शास्त्री यीशुआ के चेल्‍लैं थ या शकैत करया करे, “थम चूंगी लैणै आळैं अर पापियैं सात्थी कि खाओ-पियो?”

31यीशुऐं उनथै कैहया, “तन्दरूस्त लोक्कैं कु हकिम्मा कि जरुरत नाही होवै, बल्की बिमारैं कु उसकी जरुरत होवती है। 32अर हूँ धर्मियैं कु नाही, बल्की पाप्पी लोक्कैं कु बुलाणैं आओड़ा हैं, ताकी वो मन फिरावैं।”

उपवास्सा के बारे म सवाल

(मत्‍ती 9:14–17; मरकुस 2:18–22)

33अर उनूर उसथै कैहया, “यहून्‍ना के चेल्‍ले तो हमेशा उपवास अर प्रार्थना करते हैं, अर फरीसियैं के चेल्‍ले भी इदा ही करते हैं, पर तेरे चेल्‍ले तो खात्‍ते-पित्‍ते हैं।”

34यीशुऐं उनथै कैहया, “क्या थम बरातियैं कु उस वक्‍त उपवास करनै कही सक्‍ते हो जिद लाड़ा उनकै सात्थी होवै? 35पर वो दिन आँगड़े जिद लाड़ा उनथै दूर करी दिया जाग, अर वो सारे उपवास करंगड़े।”

36यीशुऐं उनथै एक उधाहरण भी कैहया, “कि कोइ भी नवाँ कापड़ा पाड़ी, उसकी कारी पुराणे कापड़े पर नाही लगावै, अर अगर कोइ इदा करता भी है, तो वो आपका नवाँ कापड़ा तो पाड़ी ही दैग अर साथ वो नवीं कारी भी पुराणे थ मेल कोइ खावै। 37अर कोइ भी नवाँ दाखरस पुराणे चमड़ैं किया मशका म नाही भरै, अर अगर वो इदा करता भी है, तो नवाँ दाखरस पुराणे मशका कु पाड़िकना खिण्डी जाग, अर मशका का भी नास होई जाग। 38पर नवाँ दाखरस नवीयाँ मशका म भरना चाहिये। 39अर कोइ भी इन्सान पुराणा दाखरस पीये के बाद्दाम नवाँ कोइन मांगैं, पर वो याही कैहैग पुराणा ही आच्छा थिया।”

Actualmente seleccionado:

लूका 5: Sansi

Destacar

Copiar